ইউৰোপৰ সুউচ্চ শৃংগ মাউন্ট এলব্ৰুছ আৰোহণ নৱ কুমাৰ ফুকনৰ

অসম কন্যা লাভলীনা বৰগোহাঁইয়ে টকিঅ’ অলিম্পিকত বক্সিঙৰ ব্ৰঞ্জ পদক লাভ কৰি গৌৰৱ কঢ়িওৱাৰ দিনাই আন এজন অসমীয়া নৱ কুমাৰ ফুকনে ইউৰোপৰ সুউচ্চ শৃংগ মাউন্ট এলব্ৰুছ আৰোহণ কৰি অসমলৈ গৌৰৱ কঢ়িয়াই আনে।পৰ্বতাৰোহী নৱ কুমাৰ ফুকনে আজি দুপৰীয়া ইউৰোপ মহাদেশৰ ৰাচিয়াৰ ৫৬৪২ মিটাৰ উচ্চতাৰ মাউন্ট এলব্ৰুছ জয় কৰে।তেওঁ মাউন্ট এলব্ৰুছৰ শীৰ্ষত ভৰি থৈ অসম গৌৰৱ এশিঙীয়া গঁড়ৰ সংৰক্ষণৰ কৰাৰ লগতে প্ৰকৃতি সংৰক্ষণৰ চিত্ৰ সম্বলিত অসমীয়া গামোচা প্ৰদৰ্শন কৰাৰ লগতে ভাৰত মাতা কি জয় ধ্বনি দিয়ে। তেওঁ ভাৰতৰ প্ৰধানমন্ত্ৰী নৰেন্দ্ৰ মোদী, অসমৰ মুখ্যমন্ত্ৰী ড হিমন্ত বিশ্ব শৰ্মা, ভাৰতৰ ক্ৰীড়া মন্ত্ৰী অনুৰাগ ঠাকুৰ, অসমৰ ক্ৰীড়া মন্ত্ৰী বিমল বৰা আৰু ৰাজহ মন্ত্ৰী যোগেন মহনৰ ফটো সম্বলিত পোষ্টাৰ প্ৰদৰ্শন কৰে।উল্লেখ্য যে ইয়াৰ পূৰ্বে নৱ কুমাৰ ফুকনে ২০১৬ চনত পৃথিৱীৰ সবোচ্চ শৃংগ মাউন্ট এভাৰেষ্ট আৰু ২০১৫ চনত দক্ষিণ আফ্ৰিকাৰ সুউচ্চ শৃংগ মাউন্ট কিলিমাঞ্জাৰো আৰোহণ কৰি অসমলৈ গৌৰৱ কঢ়িয়াই আনিছিল। চৰাইদেউ জিলাৰ চেপন শান্তি বনৰ নিৱাসী তথা চেপন উচ্চ মাধ্যমিক বিদ্যালয়ৰ শাৰীৰিক নিৰ্দেশক নৱ কুমাৰ ফুকনৰ সাফল্যত চেপন, ডিমৌ অঞ্চলত আনন্দৰ বন্যা হৈছে।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

মাংগালোৰত চৰকাৰী জিলা ৱেনলক আয়ুষ চিকিৎসালয় ভৱন শুভ উদ্বোধন

কেন্দ্ৰীয় আয়ুষ মন্ত্ৰী আৰু কেন্দ্ৰীয় বন্দৰ,জাহাজ পৰিবহন আৰু জলপথ মন্ত্ৰী সৰ্বানন্দ সোণোৱালে মাংগালোৰত আয়ুষ চিকিৎসাক অধিক গতিশীলতা প্ৰদানৰ লক্ষ্যৰে মাংগালোৰত চৰকাৰী জিলা ৱেনলক আয়ুষ চিকিৎসালয় ভৱনৰ শুভ উদ্বোধন কৰে।এই ব্যৱস্থাই জনসাধাৰণক সুলভ আৰু গুণগত স্বাস্থ্যসেৱা লাভ কৰাত সহায় কৰিব বুলি উল্লেখ কৰে।ইয়াত আয়ুষ অ’পিডি (আয়ুৰ্বেদ,যোগ আৰু প্ৰাকৃতিক ৰোগথেৰাপী,য়ুনানী,সিদ্ধ,হোমিঅ’পেথি)আৰু এলোপেথিৰ সফল কাৰ্যকলাপৰ বাবে উন্নত আৰু বিশেষ চিকিৎসা সুবিধা থাকিব।আয়ুষ দক্ষিণ কানাড়া বিভাগৰ অধীনত ৭ খন আয়ুষ ডিচপেনচাৰী আৰু ১০ খন বিচনাযুক্ত আৰু ২৫ খন বিচনাযুক্ত চিকিৎসাৰ ২ খন আয়ুষ চিকিৎসালয় আছে।সকলো চিকিৎসা সুবিধা যুক্ত এই প্ৰতিষ্ঠান সমূহত প্ৰতিদিনে প্ৰায় ১০০০ ৰোগীক বিভিন্ন আয়ুষ চিকিৎসা সেৱা আগবঢ়োৱা হয়।ক’ভিড-১৯ ৰ সময়ত তেওলোকে আগবঢ়োৱা সেৱাৰ সোণোৱালে ভূয়সী প্ৰশংসা কৰে আৰু মানৱ কল্যাণৰ দিশত কাম কৰি যাবলৈ আহ্বান জনায়।দেশৰ পৰম্পৰাগত চিকিৎসা পদ্ধতি যেনে আয়ুৰ্বেদিক,যোগ,আৰু নিচাৰ’পেথী, য়ুনানী,হোমিঅ’পেথী,ইত্যাদিৰ প্ৰসাৰৰ ক্ষেত্ৰত আধুনিক আৰু বিজ্ঞানসন্মত দৃষ্টিভংগীৰে কাম কৰি যোৱা বাবে সংশ্লিষ্ট কৰ্তৃপক্ষক সোণোৱালে আহ্বান জনায় আৰু কয় যে প্ৰধান মন্ত্ৰী নৰেন্দ্ৰ মোদী সপোনক সৰোগত কৰি আয়ুষক মানৱ জীৱনৰ এক অবিচ্ছেদ্য অংগ হিচাপে গঢ়ি তোলাৰ বাবে আয়ুষ মন্ত্ৰালয়ে ক্ষীপ্ৰতাৰে কাম কৰি আছে।

মনালিছা বৰুৱা ভাৰতীয় টেবুল টেনিছ দলৰ প্রশিক্ষক নিযুক্ত

অসমৰ একালৰ প্রখ্যাত টেবুল টেনিছ খেলুৱৈ মনালিছা বৰুৱা মেহতা ভাৰতীয় টেবুল টেনিছ দলৰ প্রশিক্ষক নিযুক্ত হৈছে৷ অহা ২৮ ছেপ্টেম্বৰৰ পৰা ৫ ছেপ্ঢেম্বৰলৈ কাটাৰত অনুষ্ঠিত হ’বলগীয়া ২৫সংখ্যক আই টি টি এফ এছিয়ান টেবুল টেনিছ চেম্পিয়নশ্বিপৰ বাবে ঘোষিত ভাৰতীয় দলটোত অসমৰ অৰ্জুন বঁটা বিজয়ী প্রাক্তন খেলুৱৈগৰাকীয়ে প্রশিক্ষকৰ গুৰুদায়িত্ব লাভ কৰিছে৷ দলটোৰ আনগৰাকী প্রশিক্ষক হ’ল অৰূপ বাছাক৷ইফালে, প্রতিযোগিতাখনত জি সাথিয়ান, শৰথ কমল আদিৰ দৰে দেশৰ আগশাৰীৰ টেবুল টেনিছ খেলুৱৈয়ে অংশ ল’ব৷ মন কৰিবলগীয়া যে ভাৰতীয় ছিনিয়ৰ টেবুল টেনিছ দলটোৰ প্রশিক্ষকৰ দায়িত্ব লাভ কৰা মনালিছা বৰুৱা হ’ল কেইবাবাৰৰ প্রাক্তন ৰাষ্ট্রীয় চেম্পিয়ন৷ তেওঁ ১৯৮৭ত সন্মানীয় অর্জুন বঁটা লাভ কৰিছিল৷

জামুগুৰিহাটত কহুৱাৰ নান্দনিক সৌন্দৰ্য্যই হাতবাউলি মাতিছে

শৰৎৰ আগমনৰ লগে লগে জামুগুৰিহাটতো জীয়া ভৰলী নদীৰ দুয়োপাৰ উপচি ফুলিছে শুভ্ৰ কহুৱা।দুয়োপাৰে চকুৰে মনিব নোৱৰা পয্যন্ত ফুলি থকা শুভ্ৰ কহুৱাই স্বাভাৱিকভাবে সকলোকে দৃষ্টি আকৰ্ষণ কৰিছে। ভৰলীৰ পাৰত বতাহত হালিজালি নাচি থকা কহুৱা বনে সকলোকে মন্ত্ৰমুগ্ধ কৰিছে। জামুগুৰিহাটৰ ১৫নং ৰাষ্ট্ৰীয় ঘাইপথৰ জীয়া ভৰলীৰ দলংৰ ওপৰৰে পাৰ হৈ যোৱা প্ৰতি গৰাকী ব্যক্তিয়েই উপভোগ কৰিছে নদীৰ দুয়োপাৰে ফুলি থকা কহুৱাৰ নয়নাভিৰাম দৃশ্য। ।ইয়াৰোপৰি জীয়া ভৰলীৰ পাৰত অৱস্থি বিশাল কৃষি পাম কন্যকাৰ বক্ষতো শৰতৰ বতৰত ফুলা কহুৱাৰ দৃশ্যই সকলোৰে মনপ্ৰাণ হৰি নিছে।
বাতৰি যুগুতালে ৰাতুল হাজৰিকাই..

অসম কেবিনেট বৈঠকত কি কি সিদ্ধান্ত গ্ৰহণ কৰিলে

অসমৰ বিদ্যুৎ যোগানৰ সমগ্ৰ ব্যৱস্থাটোক শক্তিশালীকৰণৰ বাবে আজিৰ কেবিনেটে ৩২৮৪ কোটি টকা ব্যয়সাপেক্ষে বহুকেইটা গুৰুত্বপূৰ্ণ পদক্ষেপ লোৱাৰ সিদ্ধান্ত গ্ৰহণ কৰে৷ সেই অনুসৰি
১. বিদ্যুৎ সংবহনৰ বাবে ১৯৬ টা নতুন বিদ্যুৎ উপকেন্দ্ৰ নিৰ্মাণ৷
২. ২৬০৫ কিঃমিঃ দৈৰ্ঘ্যৰ নতুন ৩৩ কে ভি লাইন স্থাপন৷
৩. ৩০১৮ কিঃমিঃ দৈৰ্ঘ্যৰ নতুন ১১ কে ভি লাইন স্থাপন৷
৪. ২৬৭৪ টা নতুন হাই ভল্টেজ ট্ৰেন্সফৰ্মাৰ স্থাপন৷
৫. ১৮৬২৫৫ টা নতুন গ্ৰাহক প্ৰিপেইড স্মাৰ্ট মিটাৰ স্থাপন৷
৬. ৪০ হাজাৰ নতুন ট্ৰেন্সফৰ্মাৰ মিটাৰ স্থাপন আদি৷

●আবকাৰী বিভাগত ৰাজহ ক্ষতি হ্ৰাস কৰাৰ লক্ষ্যৰে অন্যান্য ব্যৱস্থাৰ লগতে চুবুৰীয়া ৰাজ্য বিশেষকৈ অৰুণাচল প্ৰদেশৰ পৰা সুৰাৰ সৰবৰাহৰ ক্ষেত্ৰত ট্ৰেনজিত পাছ ব্যৱস্থা প্ৰৱৰ্তন কৰাৰ সিদ্ধান্ত গ্ৰহণ কৰা হয়৷ সেইদৰে চুলাই মদৰ সেৱনক নিৰুৎসাহিত কৰাৰ উদ্দেশ্যে চৰকাৰী অনুমোদিত দেশীয় সুৰাৰ অনুজ্ঞাপত্ৰৰ মাচুল, আবেদন মাচুল, আমানত ধন জমা, আবকাৰী শুল্ক আদি হ্ৰাসৰ সিদ্ধান্ত গ্ৰহণ কৰা হয়৷

● বৰ্তমান অনিয়মীয়া হৈ থকা লোকপ্ৰিয় গোপীনাথ বৰদলৈ বঁটা ২০২১ বৰ্ষৰ পৰা প্ৰতি দুবছৰৰ অন্তত নিয়মীয়াকৈ প্ৰদানৰ সিদ্ধান্ত গ্ৰহণ কৰা হয়৷ৰাষ্ট্ৰীয় সংহতিত অৰিহণা যোগোৱা অথবা ৰাষ্ট্ৰলৈ বৰঙনি আগবঢ়োৱা ৰাজ্য অথবা ৰাজ্যৰ বাহিৰৰ ব্যক্তি বা সংস্থালৈ এই বঁটা আগবঢ়োৱা হ’ব৷সেইদৰে এই বঁটাৰ নগদ ধনৰ পৰিমাণ পূৰ্বৰ ২ লাখ টকাৰ পৰা ৫ লাখ টকালৈ বৃদ্ধিৰ বাবেও সিদ্ধান্ত গ্ৰহণ কৰা হয়৷
ৰাজ্যখনত থকা চৰকাৰী আদৰ্শ বিদ্যালয়সমূহৰ পৰিচালনাৰ বাবে আজিৰ কেবিনেটে এক আদৰ্শ বিদ্যালয় সংগঠন গঠনৰ সিদ্ধান্ত গ্ৰহণ কৰে৷ সেইদৰে ৰাজ্যৰ প্ৰতিটো বিধানসভা সমষ্টিতে অতি কমেও এখনকৈ আদৰ্শ বিদ্যালয় স্থাপনৰো সিদ্ধান্ত গ্ৰহণ কৰা হয়৷

●কৃষি বিভাগৰ সৱলীকৰণ তথা বিভাগটোৰ কৰ্মশক্তি বৃদ্ধিৰ বাবে আজিৰ কেবিনেটে ৰাজ্যৰ প্ৰতিখন জিলাতে একোজনকৈ প্ৰগ্ৰেম অফিচাৰ, একাউণ্ট অফিচাৰ আৰু মিডিয়া এক্সপাৰ্ট নিযুক্তি দিয়াৰ সিদ্ধান্ত গ্ৰহণ কৰে৷
●কৰ্তব্যৰ সময়ত মৃত্যুমুখত পৰা সামৰিক অথবা অদ্ধৰ্সামৰিক বাহিনীত কৰ্মৰত অসমৰ জোৱানসকলৰ নিকটাত্মীয়লৈ আগবঢ়োৱা এককালীন আৰ্থিক সাহায্যৰ পৰিমাণ বৰ্তমানৰ ২০ লাখ টকাৰ পৰা ৫০ লাখ টকালৈ বৃদ্ধিৰ বাবে আজিৰ কেবিনেটে সিদ্ধান্ত গ্ৰহণ কৰে৷ সেইদৰে কৰ্তব্যৰ সময়ত প্ৰাণ হেৰুওৱা ৰাজ্যৰ আৰক্ষী বিষয়া-কৰ্মী, গৃহৰক্ষী আৰু গাঁওৰক্ষী বাহিনীৰ স্বেচ্ছাসেৱকসকলৰ নিকটাত্মীয়লৈও ৫০ লাখ টকাকৈ এককালীন আৰ্থিক সাহায্য প্ৰদানৰ সিদ্ধান্ত গ্ৰহণ কৰা হয়৷
●অসম চাহ নিগমৰ অধীনৰ বাগিচাসমূহৰ শ্ৰমিকসকললৈ অহা শাৰদীয় উৎসৱৰ সময়ত ২০ শতাংশ বানচ প্ৰদানৰ বাবে আজিৰ কেবিনেটে সিদ্ধান্ত গ্ৰহণ কৰে৷ ইয়াৰ বাবে চৰকাৰৰ ব্যয় হ’ব ২৪ কোটি টকা৷
●৬৬.৩৪ কোটি টকা ব্যয়ৰে ৰাজ্যৰ পঞ্চায়ত প্ৰতিনিধিসকলৰ বকেয়া পাৰিতোষিক বিত্ত বিভাগে মুকলি কৰাৰ বাবেও আজিৰ কেবিনেটত সিদ্ধান্ত লোৱা হয়৷
●ৰাজ্য চৰকাৰে প্ৰৱৰ্তন কৰা প্ৰধান ৰাজ্যিক অসামৰিক বঁটাসমূহৰ নাম সাল-সলনিৰ সিদ্ধান্ত গ্ৰহণ কৰা হয়৷সেই অনুসৰি ‘অসমৰত্ন’ বঁটাৰ নাম ‘অসম বৈভৱ’, ‘অসম বিভূষণ’ বঁটাৰ নাম ‘অসম সৌৰভ’ আৰু ‘অসম ভূষণ’ তথা ‘অসমশ্ৰী’ বঁটাৰ নাম ‘অসম গৌৰৱ’লৈ সলনিৰ সিদ্ধান্ত লোৱা হয়৷
●ৰাজ্যৰ নাগৰিকসকলক মাটি-বাৰীৰ দীৰ্ঘদিনীয়া সমস্যাৰ পৰা মুক্তি দিয়াৰ লগতে ৰাজহ প্ৰশাসনৰ আমূল সংস্কাৰৰ বাবে ২০৯.৮৪ কোটি টকা ব্যয়ৰে ‘মিছন বসুন্ধৰা’ নামৰ এক অভিলাষী পদক্ষেপ গ্ৰহণ কৰাৰ সিদ্ধান্ত লোৱা হয়৷ অহা ২ অক্টোবৰ তাৰিখে মুখ্যমন্ত্ৰীয়ে এই বিষয়ে সবিশেষ অৱগত কৰিব৷
●ৰাজ্য চৰকাৰৰ সিদ্ধান্ত অনুসৰি প্ৰতিমাহে ৰাজধানীৰ বাহিৰত অনুষ্ঠিত হ’বলগা কেবিনেট বৈঠকত অংশগ্ৰহণৰ বাবে অহা-যোৱাৰ বাটত প্ৰতিগৰাকী মন্ত্ৰীয়ে একোখনকৈ জিলা ভ্ৰমণ কৰি বিভিন্ন কাম-কাজ পৰ্যালোচনা কৰিব৷ সেই অনুসৰি অহা ৩০ ছেপ্টেম্বৰ তাৰিখে ধেমাজিত অনুষ্ঠিত হ’ব লগা কেবিনেট বৈঠকত অংশ ল’বলৈ যোৱা মন্ত্ৰীসকলে ভ্ৰমণ কৰিবলগীয়া জিলাসমূহ আৰু পৰ্যালোচনা কৰিবলগীয়া কাম-কাজসমূহ আজিৰ কেবিনেটত স্থিৰ কৰা হয়৷ সেইমতে মন্ত্ৰী ৰঞ্জিত কুমাৰ দাসে অহা-যোৱাৰ বাটত ক্ৰমে কামৰূপ আৰু ডিব্ৰুগড় জিলা, অতুল বৰাই দৰং আৰু শিৱসাগৰ জিলা, চন্দ্ৰমোহন পাটোৱাৰীয়ে ওদালগুৰি আৰু যোৰহাট জিলা, উৰ্খাও গৌৰা ব্ৰহ্মই শোণিতপুৰ আৰু মৰিগাঁও জিলা, পৰিমল শুক্লবৈদ্যই বিশ্বনাথ আৰু গোলাঘাট জিলা, কেশৱ মহন্তই লখিমপুৰ আৰু চলাইদেউ জিলা, ৰণোজ পেগুৱে কামৰূপ জিলা, অশোক সিংহলে নগাঁও আৰু লখিমপুৰ জিলা, যোগেন মহনে গোলাঘাট আৰু ওদালগুৰি জিলা, সঞ্জয় কিষাণে যোৰহাট আৰু শোণিতপুৰ জিলা, অজন্তা নেওগে শিৱসাগৰ আৰু বিশ্বনাথ জিলা, পীযুষ হাজৰিকাই ডিব্ৰুগড় আৰু দৰং জিলা আৰু বিমল বৰাই চৰাইদেউ আৰু নগাঁও জিলা ভ্ৰমণ কৰি বিভিন্ন কাম-কাজৰ বুজ ল’ব৷

ছয়গাঁৱৰ পশ্চিমধূলিত বিজেপিৰ সভাত বৃক্ষৰোপণ আৰু কৃষকক সম্বৰ্ধনা

কামৰূপ জিলাৰ ছয়গাঁও সমষ্টিৰ পশ্চিমধূলী গোসাঁই ঘৰ প্ৰাঙ্গণত আজি ছয়গাঁও মণ্ডল কিষাণ মৰ্চাৰ উদ্যোগত দেশৰ প্ৰধানমন্ত্ৰী নৰেন্দ্ৰ মোদীৰ জন্মদিনৰ লগত সংগতি ৰাখি বৃক্ষ ৰোপণ কাৰ্যসূচীৰ লগতে কৃষকক সম্বৰ্ধনা জনোৱা হয় । দক্ষিণ কামৰূপ জিলা বিজেপিৰ সভাপতি ধনেশ্বৰ তালুকদাৰৰ সভাপতিত্বত অনুষ্ঠিত হোৱা এই সভাখনত ভাষণ প্ৰদান কৰে ৰাজ্যিক কাৰ্য্যনিৰ্বাহক সদস্য হিৰণ্য দাস, প্ৰভাত চন্দ্ৰ দাস, জিলা সাধাৰণ সম্পাদক লঙ্কেশ্বৰ কলিতা, প্ৰহ্লাদ বিশ্বাস, সম্পাদক কৈল্যাশ কলিতা, ভাৰপ্ৰাপ্ত মণ্ডল সভাপতি মিহিৰ ৰঞ্জন দাস, বনগাঁও মণ্ডলৰ সভানেত্ৰী লাৱণ্য বড়ো, কৃষাণ মৰ্চাৰ সভাপতি ধীৰাজ ঠাকুৰীয়া, কিষাণ মৰ্চাৰ সভাপতি পবিত্ৰ নাথ, জিলা সম্পাদীকা অপৰূপা কলিতা, অবিচি মৰ্চাৰ সভাপতি ৰাজেন নাথ, যুৱ মৰ্চাৰ সভাপতি মন্টু কলিতা প্ৰমুখ্যে ভালেমান বিশিষ্ট ব্যক্তি উপস্থিত থাকে । আজিৰ সভাতে অঞ্চলটোৰ কেবাগৰাকীও কৃষকক সম্বৰ্ধনা জনোৱাৰ লগতে অৱসৰপ্ৰাপ্ত শিক্ষক পৰশুৰাম দাস আৰু সঞ্জীৱ দাসক ফুলাম গামোচা জাপিৰে সম্বৰ্ধনা জনোৱা হয় । ইয়াৰ পিছতে বিদ্যালয় চৌহদত জিলা সভাপতি ধনেশ্বৰ তালুকদাৰ আৰু ৰাজ্যিক কাৰ্যনিৰ্বাহক সদস্য হিৰণ্য দাসে গছপুলি ৰোপণ কৰে ।

গুৱাহাটীৰ এন চি চিৰ বায়ু শাখাৰ কেডেট নেপো মৈৰাংথেম বায়ু সেনাৰ ফ্লায়িং অফিচাৰ পদলৈ নিৰ্বাচিত

ৰাষ্ট্রীয় শিক্ষাৰ্থী বাহিনীৰ বায়ু শাখাৰ গুৱাহাটী বিশ্ববিদ্যালয়স্থিত ৫০ আসাম এয়াৰ স্কোৱাদ্ৰোণ এন চি চি ইউনিটৰ কেডেট আৰু কটন বিশ্ববিদ্যালয়ৰ পৰা এইবেলি ভূগোল বিজ্ঞান বিষয়ত মেজৰসহ সুখ্যাতিৰে স্নাতক ডিগ্ৰী উত্তীৰ্ণ হোৱা ছাত্ৰ নেপো মৈৰাংথেম ছাৰ্ভিছ ছিলেকচন বৰ্ডৰ দ্বাৰা আয়োজিত পৰীক্ষাত উত্তীৰ্ণ হৈ ভাৰতীয় বায়ু সেনাৰ সন্মানীয় ফ্লায়িং অফিচাৰ পদৰ বাবে নিৰ্বাচিত হৈছে । তেওঁ এই পদৰ বাবে নিৰ্বাচিত হোৱা বাবে এন চি চি ইউনিটৰ সকলোৱে তেওঁক শুভেচ্ছা জ্ঞাপন কৰিছে । আনকি ২২ ছেপ্টেম্বৰত ইউনিটৰ কমাণ্ডিং অফিচাৰ গ্রুপ কেপ্তেইন ৰবীন বিষ্ণৱে নেপোক ইউনিটলৈ বিৰল গৌৰৱ কঢ়িয়াই অনা বাবে সম্বৰ্ধনা জনায় । উল্লেখযোগ্য যে বৰ্তমান গুৱাহাটীৰ উজানবজাৰ নিবাসী নেপোৰ প্ৰকৃত ঘৰ হল মণিপুৰৰ পূব ইম্ফল জিলাৰ এখন ভিতৰুৱা অঞ্চলত । মণিপুৰ সৈনিক স্কুলৰ পৰা দ্বাদশ শ্ৰেণী উত্তীৰ্ণ হোৱাৰ পাছত তেওঁ ২০১৮ চনত কটন বিশ্ববিদ্যালয়ত স্নাতক পাঠ্যক্ৰমত নাম ভৰ্ত্তি কৰাৰ সমান্তৰালভাৱে ৫০ আসাম এয়াৰ স্কোৱাদ্ৰোণ এন চি চি ইউনিটত কেডেট হিচাপে নাম ভৰ্ত্তি কৰে । ইয়াৰ মাজতে তেওঁ সৰ্বভাৰতীয় বায়ু সৈনিক শিবিৰত উত্তৰ পূব মণ্ডলক প্ৰতিনিধিত্ব কৰি শ্ৰেষ্ঠ এৰোমডেলাৰৰ সন্মান আৰু বায়ু সেনাৰ শ্বিলংস্থিত ইষ্টাৰ্ণ কমাণ্ডৰ উদ্যোগত এ এল জিত আয়োজিত এয়াৰ ফেষ্টিফেলত এৰো মডেলিঙত ভাগ লৈ ইউনিটলৈ গৌৰৱ কঢ়িয়াই আনিছিল । মণিপুৰৰ এখন চৰকাৰী চিকিৎসালয়ৰ চতুৰ্থ শ্ৰেণীৰ কৰ্মচাৰী এম নৰিন্দৰ সিং আৰু এম ইন্দুবালা সিঙৰ পুত্ৰ নেপোৱে অহা বছৰৰ আৰম্ভণিতে তেলেংগানাৰ দণ্ডিয়ালত থকা ভাৰতীয় বায়ু সেনাৰ একাডেমীত ফ্লায়িং অফিচাৰ হিচাপে উৰণ প্ৰশিক্ষণ পাঠ্যক্ৰমত ভাগ লব । আনহাতে এন চি চিৰ কেডেট হিচাপে তেওঁ সন্মানীয় ফ্লায়িং অফিচাৰ পদৰ বাবে নিৰ্বাচিত হৈ বাহিনীটোলৈ গৌৰৱ কঢ়িয়াই অনা বাবে এন চি চিৰ উত্তৰ পূব মণ্ডলৰ অতিৰিক্ত সঞ্চালক প্ৰধান মেজৰ জেনেৰেল ভাস্কৰ কলিতা আৰু গুৱাহাটী গ্রুপৰ গ্রুপ কমাণ্ডাৰ ব্ৰিগেদিয়াৰ যোগেশ চন্দ্ৰ তালুকদাৰে নেপোক শুভেচ্ছা জ্ঞাপন কৰি তেওঁৰ উজ্জ্বল ভৱিষ্যত কামনা কৰিছে ।