উত্তৰ জালুকবাৰীত মান্যবৰ মোহেৰ বিপনি মুকলি

নগাঁৱৰ বটদ্ৰৱাত সহোদৰৰ উদ্যোগত অনুষ্ঠিত ৰচনা প্ৰতিযোগিতাৰ বঁটা বিতৰণী অনুুষ্ঠান

শ্ৰীমন্ত শংকৰদেৱৰ জন্মোৎসৱৰ লগত সংগতি ৰাখি সামাজিক-সাংস্কৃতিক সংগঠন সহোদৰৰ উদ্যোগত অনুুষ্ঠিত ৰচনা প্ৰতিযোগিতাৰ বঁঁটা বিতৰণী অনুষ্ঠানটি শুক্ৰবাৰে অনুষ্ঠিত হয়। মহাপুৰুষ শ্ৰীমন্ত শংকৰদেৱৰ জন্মস্থান নগাঁৱৰ বটদ্ৰৱা থানৰ ঐতিহ্যমণ্ডিত আকাশী গংগাৰ তীৰৰ নৈসৰ্গিক পৰিবেশত অনুষ্ঠিত অনুষ্ঠানটিৰ সঞ্চালনা কৰে বটদ্ৰৱা থান পৰিচালনা সমিতিৰ সভাপতি তথা শ্ৰীশ্ৰী নৰোৱা সত্ৰৰ সত্ৰাধিকাৰ দেৱানন্দ দেৱগোস্বামীয়ে। “অসমীয়া নাট্য সাহিত্যৰ জনক শংকৰদেৱ” শীৰ্ষক বিষয়ৰ ৰাজ্যৰ বিভিন্ন প্ৰান্তৰ শতাধিক ছাত্ৰ ছাত্ৰীয়ে ডাক যোগে অংশ গ্ৰহণ কৰা এই ৰচনা প্ৰতিযোগিতাত প্ৰথম, দ্বিতীয় আৰু তৃতীয় স্থান লাভ কৰে ক্ৰমে বটদ্ৰৱা শংকৰদেৱ শিশু বিদ্যা নিকেতনৰ ছাত্ৰী কস্তুৰী শৰ্মা, ৰেনেচা কনিষ্ঠ মহাবিদ্যালয়ৰ ছাত্ৰী তুষ্টি বৰা আৰু ৰাইডঙীয়া শংকৰ মাধৱ বিদ্যাপীঠৰ ছাত্ৰী হিৰোস্মিতা শইকীয়াই। বটদ্ৰৱা থান পৰিচালনা সমিতিৰ সাধাৰণ সম্পাদক ইন্দ্ৰমোহন বৰুৱা, বিশিষ্ট সমাজকৰ্মী অৰূপ কুুমাৰ শইকীয়া, ডা০ মুকুট দেৱনাথ, অধ্যাপক প্ৰাঞ্জল হাজৰিকাকে প্ৰমুখ্য কৰি কেইবাগৰাকী ব্যক্তিৰ উপস্থিতিত অনুষ্ঠিত গাম্ভীৰ্যপূৰ্ণ অনুষ্ঠানটিত বিজয়ী প্ৰতিযোগী সকলক “স্বৰ্গীয়া কুসুম শইকীয়া” সোঁৱৰণত নগদ ধন, কিতাপৰ টোপোলা, কলম, ট্ৰফি, গছ পুলি আৰু মানপত্ৰ প্ৰদান কৰা হয়।

বাতৰি যুগুতালে নগাঁৱৰ পৰা ৰাহুল দেৱ বৰদলৈয়ে

ডেম’ক্ৰেচী লাইভ আৰু মৰমলেণ্ড ৱেলফেয়াৰ চ’ছাইটিৰ উদ্যোগত ‘ৰাষ্ট্ৰীয় শংকৰদেৱ চৰ্চা অনুষ্ঠান

সীমিত গণ্ডীৰ আৱেষ্টনীৰ পৰা উলিয়াই আনি শংকৰদেৱৰ বিশ্বজনীনতাক উপলব্ধি কৰাৰ ক্ষেত্ৰত এক খোজৰ অংশ হিচাপে ডেম’ক্ৰেচী লাইভ আৰু মৰমলেণ্ড ৱেলফেয়াৰ চ’ছাইটিৰ উদ্যোগত আয়োজন কৰা হৈছে ৰাষ্ট্ৰীয় শংকৰদেৱ চৰ্চা অনুষ্ঠান।সংগীত পৰিচালক ডা: হিতেশ বৰুৱাই উদ্বোধন কৰিবলগীয়া উক্ত শংকৰদেৱ চৰ্চা অনুষ্ঠানত মুখ্য বক্তা হিচাপে অংশগ্ৰহণ কৰিব সংগীত নাটক অকাডেমী বঁটা বিজয়ী সত্ৰীয়া নৃত্যগুৰু ৰামকৃষ্ণ তালুকদাৰে।

তালুকদাৰে ‘সাংস্কৃতিক দিশত শংকৰদেৱ’ শীৰ্ষক বক্তৃতা প্ৰদান কৰিব। বাকী বক্তাসকল আৰু তেওঁলোকৰ বক্তৃতাৰ বিষয় এনেধৰণৰ: ৰমেন দাস, শংকৰদেৱ গৱেষক-লেখক-শিল্পী (অসমীয়া জাতি গঠনত শংকৰদেৱ), ড° ডালিমী কোঁৱৰ, লোকসংগীতশিল্পী (শংকৰদেৱৰ অংকীয়া নাট ভাওনা), ডা: কনক চন্দ্ৰ তালুকদাৰ, বিশিষ্ট চৰ্মৰোগ বিশেষজ্ঞ তথা উপসভাপতি, অসম সত্ৰ মহাসভাৰ গুৱাহাটী জিলা সমিতি (শংকৰদেৱৰ ধৰ্মনিৰপেক্ষ দিশ), ডা: অম্লান দাস, সম্পাদক, শ্ৰীমন্ত শংকৰদেৱ যুৱ মঞ্চ (ৰাষ্ট্ৰীয় সংহতিত শংকৰদেৱ), ড° গীতা দত্ত চহৰীয়া (হিন্দী)

আনহাতে এক গুৰুত্বপূৰ্ণ বিষয়ত ড° গীতা দত্ত চহৰীয়াই হিন্দী ভাষাত বক্তৃতা প্ৰদান কৰিব। সাংবাদিক মৰম কুমাৰে আঁত ধৰিবলগীয়া অনুষ্ঠানত বক্তৃতাৰ মাজে মাজে থাকিব বৰগীত, ভোৰতাল নৃত্যৰ লগতে সত্ৰীয়া নৃত্যৰ উপাদান।ৰাজনৈতিক ক্ষেত্ৰৰ পৰা প্ৰদেশ কংগ্ৰেছৰ সভাপতি ভূপেন কুমাৰ বৰা অংশ ল’ব।

আনহাতে অনুষ্ঠানৰ বিশেষ আকৰ্ষণ হ’ব জনপ্ৰিয় কুইজ মাষ্টাৰ দীপাংকৰ কৌশিক-দিলীপ কুমাৰ শৰ্মা আৰু দীপাংকৰ ভট্টাচাৰ্যৰ পৰিচালনাৰে ‘বিশেষ শংকৰদেৱ কুইজ’।প্ৰতিটো প্ৰশ্নৰ উত্তৰৰ লগে লগে আগবঢ়োৱা হ’ব শংকৰদেৱ বিষয়ক কিতাপৰ উপহাৰ। শংকৰদেৱ চৰ্চা অনুষ্ঠানৰ প্ৰতি সমৰ্থন প্ৰকাশ কৰি পাণবজাৰৰ R G Publication ৰ প্ৰকাশক ৰাকেশ গোস্বামী আৰু চন্দ্ৰ প্ৰকাশৰ প্ৰকাশক ডা: ৰবীন্দ্ৰ মোহন শৰ্মাই শংকৰদেৱ কুইজ অনুষ্ঠানলৈ সহযোগ আগবঢ়াইছে।

কুইজ অনুষ্ঠানত প্ৰজেক্টৰৰ জৰিয়তে শংকৰদেৱৰ ভিন্ন দিশ তুলি ধৰি প্ৰশ্নবোৰ আকৰ্ষণীয় ৰূপত উপস্থাপন কৰা হ’ব বুলি পৰিচালকদ্বয়ে জানিবলৈ দিছে।

অনুষ্ঠানক আন এক বিশেষ মাত্ৰা প্ৰদান কৰাৰ আগ্ৰহেৰে শংকৰদেৱ বিষয়ক পদক্ষেপৰ প্ৰতি বিশেষ সমৰ্থন প্ৰকাশ কৰি নিজৰ দুখন গ্ৰন্থ উন্মোচনৰ বাবে আগবাঢ়ি আহিছে লেখিকা মঞ্জু দেৱী (মালিগাঁও)। ইতিমধ্যে ‘দ্ৰৌপদীৰ কান্দোন’ নামৰ কাব্যসংকলেনেৰে পৰিচিতি লাভ কৰা মঞ্জু দেৱীৰ ‘আত্মজ’ আৰু ‘সূৰ্যস্নান’ নামৰ দুখনকৈ গ্ৰন্থ উন্মোচন কৰা হ’ব। এই অনুষ্ঠানতে শংকৰদেৱৰ সংস্কৃতি-সাহিত্যৰ চৰ্চা কৰি বিশেষ অৱদান যোগাই অহা কিছু ব্যক্তিত্বক শংকৰদেৱ সম্বৰ্ধনা প্ৰদান কৰা হ’ব। লগতে অনুষ্ঠান পৰিৱেশন কৰা প্ৰতিগৰাকী শিল্পীক প্ৰদান কৰা হ’ব অংশগ্ৰহণৰ প্ৰমাণপত্ৰ। মঞ্চত প্ৰমাণপত্ৰ প্ৰদান কৰিব আমাৰ অসমৰ সহকাৰী সম্পাদক মণ্টু শইকীয়া, ড° বুলজিৎ বুঢ়াগোহাঁই, বি এন বৰুৱা, হীৰেন চহৰীয়াকে ধৰি বিশিষ্ট ব্যক্তিসকলে।

অনুষ্ঠানত কবি-সাংবাদিক ৰঞ্জিত পাটগিৰীয়ে পাঠ কৰিব শংকৰদেৱক লৈ ৰচনা কৰা এটি কবিতা।অনুষ্ঠানত লেখক তথা অসম আন্দোলনৰ নিৰ্যাতিত বিশিষ্ট সমাজকৰ্মী হীৰেন চহৰীয়া, ৰ’টাৰী ক্লাব অৱ গুৱাহাটীৰ সভাপতি তথা বিশিষ্ট মানৱদৰদী সমাজকৰ্মী বি এন বৰুৱা, লেখক-নাট্যকাৰ ৰঞ্জিত দাসকে ধৰি ভালেসংখ্যক গণ্য মান্য ব্যক্তিয়ে অংশ ল’ব।

সেইদৰে ডেম’ক্ৰেচী লাইভৰ শংকৰদেৱ বিষয়ক অনুষ্ঠানটিৰ প্ৰতি সমৰ্থন প্ৰকাশ কৰি উপস্থিত থাকিব নাৰীশক্তিৰে গঠিত মানৱদৰদী স্বেচ্ছাসেৱী সংগঠন ‘সদিচ্ছা’ৰ প্ৰায় দহগৰাকী বিষয়ববীয়া আৰু সদস্য।অনুষ্ঠানৰ জৰিয়তে উদীয়মান কণ্ঠশিল্পী সুকন্যা শৰ্মাক মৰমলেণ্ডৰ মঞ্চত প্ৰথমবাৰলৈ শুভেচ্ছামূলকভাৱে আগুৱাই দিয়া হ’ব।লগতে আন কেইবাগৰাকীও শিল্পীয়ে অংশ ল’ব অনুষ্ঠানত।

ইতিমধ্যে ডেম’ক্ৰেচী লাইভ আৰু মৰমলেণ্ড ৱেলফেয়াৰ চ’ছাইটিৰ অহা ১৭ অক্টোবৰৰ ‘ৰাষ্ট্ৰীয় শংকৰদেৱ চৰ্চা’ আয়োজনৰ পদক্ষেপক সকলোৱে একেমুখে অতি সময়োচিত আৰু প্ৰয়োজনীয় পদক্ষেপ বুলি প্ৰশংসাৰে ওপোচাই দিছে।
বিশিষ্ট গান্ধীবাদী তথা শংকৰদেৱৰ অন্যতম উপাসক হেম ভাইয়ে এয়া অতি গুৰুত্বপূৰ্ণ পদক্ষেপ বুলি মন্তব্য কৰে।মই আশ্চৰ্য প্ৰকাশ কৰিছো, মৰম কুমাৰে তেওঁৰ সাৰুৱা মস্তিষ্কৰে নিতৌ ন ন চিন্তাৰ অনুষ্ঠান উপহাৰ দি আহিছে। ইয়াৰ ভিতৰত আটাইতকৈ এক মহৎ কাম হ’ল শংকৰদেৱক বিজ্ঞানসন্মতভাৱে বিশ্বৰ দৰবাৰলৈ লৈ যোৱাৰ পদক্ষেপ গ্ৰহণ কৰাটো। এই কথাই মোক অতিশয় আনন্দিত কৰিছে,’ হেম ভাইৰ মন্তব্য।

সেইদৰে সংগীত নাটক অকাডেমী বঁটা বিজয়ী সত্ৰীয়া নৃত্যগুৰু ৰামকৃষ্ণ তালুকদাৰে ডেম’ক্ৰেচী লাইভ-মৰমলেণ্ড ৱেলফেয়াৰ চ’ছাইটিয়ে অতি গুৰুত্বপূৰ্ণ পদক্ষেপ লোৱা বুলি মন্তব্য কৰি শুভেচ্ছা জ্ঞাপন কৰিছে।

ডেম’ক্ৰেচী লাইভ-মৰমলেণ্ডে সময়ে সময়ে কিছু সমাজৰ বাবে উপকাৰী কিছু গভীৰ দিশত কাম কৰি আহিছে। গুৰুজনাৰ বাবে লোৱা এই পদক্ষেপত মই সুখী অনুভৱ কৰিছো,’ ৰামকৃষ্ণ তালুকদাৰৰ মন্তব্য।আনহাতে শংকৰদেৱৰ নাটসমূহ ইংৰাজীলৈ অনুবাদ কৰি বিশেষ পদক্ষেপ গ্ৰহণ কৰা অৱসৰপ্ৰাপ্ত অধ্যাপক, প্ৰাগজ্যোতিষ মহাবিদ্যালয়ৰ অৱসৰপ্ৰাপ্ত অধ্যক্ষ, সুবক্তা বিশিষ্ট লেখক ড° দয়ানন্দ পাঠকে শংকৰদেৱক লৈ এই পদক্ষেপ এক ভাল পদক্ষেপ বুলি মন্তব্য কৰিছে।প্ৰদেশ কংগ্ৰেছৰ সভাপতি ভূপেন কুমাৰ বৰাই ডেম’ক্ৰেচী লাইভ আৰু মৰমলেণ্ড ৱেলফেয়াৰ চ’ছাইটিৰ পদক্ষেপৰ শলাগ লৈ কয়,’অন্তৰৰ পৰা মই এই পদক্ষেপৰ শলাগ লৈছো।

সেইদৰে নিউজ লাইভৰ মুৰব্বী ভিডিঅ’ জাৰ্ণেলিষ্ট মানস প্ৰতিম নাথে এই পদক্ষেপক উচ্চ প্ৰশংসা কৰিছে।অনুষ্ঠানৰ প্ৰতি সহযোগিতা আগবঢ়াই সাফল্যমণ্ডিত কৰিবলৈ ৰাইজৰ প্ৰতি ডেম’ক্ৰেচী লাইভৰ মুখ্য সম্পাদক তথা মৰমলেণ্ড ৱেলফেয়াৰ চ’ছাইটিৰ সভাপতি মৰম কুমাৰ আৰু সম্পাদক অনুপ কুমাৰ চৌধুৰীয়ে অনুৰোধ জনাইছে।

ঢকুৱাখনা মৰনৈ আঞ্চলিক কোচ ৰাজবংশী ছাত্ৰ সন্থা গঠন

ৰাজ্যখনৰ  অন্যতম ভূমিপুত্ৰ কোচ ৰাজবংশীয় জনগোষ্ঠীৰ সংগ্ৰামী সত্তা স্বৰূপ  সদৌ কোচ ৰাজবংশী ছাত্ৰ সন্থাৰ ঢকুৱাখনা জিলা সমিতিৰ অন্তৰ্গত বাসুদেৱ থান মৰনৈ আঞ্চলিক সমিতিখন শুক্ৰবাৰে পুনৰ গঠন কৰা হয়।   ঢকুৱাখনা জিলা সমিতি , মহকুমা সমিতি আৰু ঢকুৱাখনা কোচ ৰাজবংশী  সন্মিলনী বিষয়ববীয়া সকলৰ উপস্থিতিত মৰনৈ ভঁৰাল ভেঁটি হৰিমন্দিৰ প্ৰাংগনত এই সন্দৰ্ভত এখন সংগঠনিক সভা অনুষ্ঠিত হয়। ঢকুৱাখনাৰ জিলা কোচ ৰাজবংশী  সন্মিলনী সভাপতি  দিনেশ কোচ , সম্পাদক নৰোত্তম কোচ, ঢকুৱাখনা জিলা কোচ ৰাজবংশী ছাত্র সন্থাৰ সভাপতি দেৱকৃষ্ণ কোচ আৰু ঢকুৱাখনা জিলা কোচ ৰাজবংশী ছাত্ৰ সন্থাৰ সম্পাদক  মানস প্ৰতিম কোচ আৰু জিলা সমিতিৰ  বিষয়ববীয়া প্ৰণৱ কোচ, ৰূপম কোচ, নাৰায়ন ৰয় আদি  উপস্থিত থকা সংগঠনিক সভাত সৰ্ব দিশত উপেক্ষিত কোচ ৰাজবংশী সকলৰ সাংবিধানিক অধিকাৰ  প্ৰাপ্তিৰ ক্ষেত্ৰত ঐক্যবদ্ধ উমৈহতীয়া গণতান্ত্ৰিক সংগ্ৰামৰ বিকল্প নাই বুলি  ঐক্যমত পোষণ কৰি স্বাধীকাৰ আজুৰি অনাৰ বাবে নৃগোষ্ঠীয় সংগ্ৰামী সত্তা স্বৰূপ “আক্ৰাছো”ৰ সাংগঠনিক পৰিসৰ বৃদ্ধিত অধিক গুৰুত্ব প্ৰদানৰ আবশ্যকতা বহু কেইগৰাকী বক্তাই দোহাৰে। সভাত ঢকুৱাখনা জিলা সমিতিৰ পৰ্যবেশকৰ উপস্থিতিত প্ৰদীপ ডেকাক উপসভাপতি , টুলেশ্বৰ ডেকাক সভাপতি, টংকেশ্বৰ ডেকাক সাধাৰণ সম্পাদক ,  জানমণি ডেকাক সহকাৰী সম্পাদিকা হিচাপে  ৩১ জনীয়া বাসুদেৱ থান মৰনৈ আঞ্চলিক কোচ ৰাজবংশী ছাত্ৰ সন্থাৰ নতুন  আঞ্চলিক সমিতিখন গঠন কৰা হয়। নবগঠিত বাসুদেৱ থান মৰনৈ  আঞ্চলিক কোচ ৰাজবংশী ছাত্ৰ সন্থাই  স্বজাতিৰ প্ৰাপ্য অধিকাৰ সাব্যস্তৰ লগতে ঢকুৱাখনা জিলা কোচ ৰাজবংশী সকলৰ সৰ্বাংগীন উন্নয়ন বিকাশৰ ক্ষেত্ৰতো বিশেষ  সক্ৰিয় ভূমিকা গ্ৰহণ কৰি যাব বুলি  ৰাজহুৱা ভাবে সংকল্প গ্ৰহণ কৰে। 
বাতৰি যুগুতালে অমৃত পৱন বৰাই।

বালিপৰাৰ এৰাগাঁৱত শংকৰ জন্ম জয়ন্তী পালন – ভাগৱত ভ্ৰমণ

সমগ্ৰ ৰাজ্যৰ সমান্তৰালভাৱে শোণিতপুৰৰ বালিপৰাতো বৰ্ণাঢ্য কাৰ্যসূচীৰে মহাপুৰুষ শ্ৰীমন্ত শংকৰদেৱৰ ৫৭৩ জন্ম জয়ন্তী পালন কৰা হয় । বালিপৰাৰ এৰাগাঁওস্থিত শ্ৰী শ্ৰী কমলাবাৰী শাখা সত্ৰৰ উদ্যোগত আৰু এৰাগাঁওবাসী ৰাইজৰ সহযোগত আজি জন্ম জয়ন্তী উপলক্ষ্যে এক ভাগৱত ভ্ৰমণ কাৰ্যসূচী অনুষ্ঠিত কৰে । গাঁওখনৰ সমূহ ভক্তপ্ৰাণ ৰাইজ সমবেত হৈ ভাগৱত লৈ গাঁওখন প্ৰদক্ষিণ কৰে । গাঁওখনৰ প্ৰতিগৰাকী গৃহস্থই নিজ নিজ পদূলিত শৰাই, ধূপ-ধূনা ,চাকি আগবঢ়াই পৰিয়ালৰ সকলোৰে মংগল কামনাৰ্থে ভগৱন্তৰ চৰণত আঁঠু লৈ সেৱা কৰে । ভাগৱত ভ্ৰমণৰ সময়ছোৱাত গায়ন-বায়নৰ হৰিনাম, খোল-বাদ্যৰ শব্দত এক আধ্যাত্মিক পৰিৱেশৰ সূচনা হয় ।

বৰহেৰামদো সত্ৰত মহাপুৰুষ শ্ৰীমন্ত শঙ্কৰদেৱৰ জন্মোৎসৱ পালন

দক্ষিণ কামৰূপৰ পলাশবাৰী ৰাজহ চক্ৰৰ অন্তৰ্গত মহাপুৰুষ শ্ৰী শ্ৰী মাধৱদেৱ স্থাপিত বৰহেৰামদো সত্ৰত যোৱা ১৪ অক্টোবৰৰ পৰা দুদিনীয়া কাৰ্যসূচীৰে মহাপুৰুষ শ্ৰীশ্ৰী শঙ্কৰদেৱ গুৰুজনাৰ জন্মোৎসৱ পালন কৰা হয়। এই উপলক্ষে জন্মোৎসৱৰ আগদিনা অৰ্থাৎ গন্ধৰ দিনা খঞ্জুৰি নাম পৰিৱেশন কৰা হয়। জন্মোৎসৱৰ দিনা পুৱা উষা কীৰ্তনৰ পিছত বুঢ়ী আইসকলে নাম কীৰ্তন কৰে। ধৰ্মধ্বজা উত্তোলন কৰে বৰহেৰামদো সত্ৰৰ বুঢ়া সত্ৰাধিকাৰ উমেশ মহন্তই। ইয়াৰ পিছতে ৰাইজে সমূহীয়া নাম প্ৰসঙ্গ কৰে। আবেলি আইসকলে দিহানাম পৰিবেশন কৰাৰ পিছত ৰাইজে গাঁৱত নাম কীৰ্তন কৰে।শেষত চৌতালী নাম পৰিৱেশন কৰি জন্মোৎসৱৰ কাৰ্যসূচী সমাপ্ত কৰে। সেইদৰে ১৫ অক্টোবৰৰ কাৰ্যসূচী অনুসৰি বৰহেৰামদো সত্ৰৰ ডেকা সত্ৰাধিকাৰ ধীৰেন মহন্ত,সভাপতি চন্দ্ৰ বৰুৱা,সম্পাদক মুকুল মহন্ত আদিকে ধৰি পৰিচালনা সমিতিৰ বিষয়ববীয়াৰ লগতে বাপ বান্ধৱ,আই মাতৃ আদি উপস্থিত থাকে।উল্লেখযোগ্য যে ১৫৬৩ চনত মহাপুৰুষ শ্ৰী শ্ৰী মাধৱদেৱ গুৰুজনাই দক্ষিণ কামৰূপত এই ঐতিহাসিক সত্ৰখন স্থাপন কৰিছিল।

ঢকুৱাখনাত উচ্চতৰ মাধ্যমিক অধ্যক্ষ মঞ্চ-অসমৰ চতুৰ্থ প্ৰতিষ্ঠা দিৱস পালন

পুৰাতন ভাৰতীয়ৰ প্ৰজ্ঞা,পুৰাতন ভাৰতীয় শিক্ষা ব্যৱস্থা, একবিংশ শতিকাৰ প্ৰয়োজনীয়তা এই সকলোৰে মাজত সংগতি ৰাখি কিদৰে সাম্প্ৰতিক  শিক্ষা ব্যৱস্থাটো বৈল্পৱিক ধাৰণাৰ মাজেদি আগুৱাই নি একবিংশ শতিকাৰ বাবে উপযুক্ত কৰি তুলিব তাৰ চিন্তা কৰ্ষণ কৰি নতুন  শিক্ষা নীতি ২০২০ প্ৰৱৰ্তন কৰা হৈছে। 

ৰাষ্ট্রীয় জ্ঞানৰ তৃষ্ণা দূৰ কৰাৰ এক ৰাষ্ট্ৰ ব্যাপ্ত প্ৰয়াস এই ৰাষ্ট্ৰীয়  নতুন শিক্ষা নীতি ।একবিংশ শতিকাত ভাৰতক বিশ্বৰ ভিতৰতে জ্ঞানৰ “চুপাৰ পাৱাৰ” হিচাবে গঢ় দিবলৈ প্ৰৱৰ্তন কৰা এই নতুন শিক্ষা নীতিয়ে আধুনিক শিক্ষা ব্যৱস্থাত বৈপ্লৱিক পৰিৱৰ্তন আনিবলৈ সক্ষম হ`ব আৰু এই প্ৰক্ৰিয়াত প্ৰতিগৰাকী শিক্ষক  অভিভাৱক ,শিক্ষাৰ্থীয়ে সহযোগিতা আগবঢ়োৱাটো সাম্প্ৰতিক সময়ৰ তাগিদা।এই ক্ষেত্ৰত অধ্যক্ষ মঞ্চৰ কৰণীয় অধিক।
ৰাজ্যখনৰ  ছয় শতাধিক উচ্চতৰ মাধ্যমিক বিদ্যালয়ৰ অধ্যক্ষ সকলৰ প্ৰতিনিধিত্বকাৰী একমাত্ৰ উমৈহতীয়া সংগঠন উচ্চতৰ মাধ্যমিক অধ্যক্ষ মঞ্চ-অসমৰ চতুৰ্থ সংখ্যক  প্ৰতিষ্ঠা দিৱসত নিৰ্দিষ্ট বক্তা হিচাবে উপস্থিত থাকি বৃহস্পতি বাৰে এই মন্তব্য কৰে শিক্ষাবিদ সেৱক চন্দ্ৰ চুতীয়াই। ৰাজ্যখনৰ বিভিন্ন স্থানত সিঁচৰতি হৈ থকা  উচ্চতৰ মাধ্যমিক বিদ্যালয় সমূহৰ অধ্যক্ষ সকলৰ মাজত সু সমন্বয় গঢ়ি চৰকাৰী নীতি নিৰ্দেশনাৰ মাজেৰে  শিক্ষাৰ্থী সকলৰ শৈক্ষিক ,মানসিক, শাৰীৰিক আৰু আধ্যাত্মিক উৎকৰ্ষ সাধনৰ  লক্ষ্যৰে ২০১৮ চনৰ ১৪ অক্টোবৰত  আত্মপ্ৰকাশ কৰা এই মঞ্চৰ চতুৰ্থ সংখ্যক প্ৰতিষ্ঠা দিৱসটো  বৃহস্পতি বাৰে লখিমপুৰ জিলা মঞ্চৰ আমন্ত্ৰণ ক্ৰমে  ঢকুৱাখনা উচ্চতৰ মাধ্যমিক বিদ্যালয়ৰ আতিথ্যত দিনজোৰা কার্যক্রমণিকাৰে অনুষ্ঠিত কৰা সভাত  ঢকুৱাখনা মহাবিদ্যালয়ৰ সহযোগী অধ্যাপক সেৱক চন্দ্ৰ চুতীয়াই নতুন শিক্ষা নীতিৰ প্ৰাসংগিকতা আৰু নব্য প্ৰবৰ্তীত এই শিক্ষা  নীতিৰ  মহৎ লক্ষ্য উদ্দেশ্যৰ সন্দৰ্ভত  বিশ্লেষণাত্মক বক্তব্য আগবঢ়ায়। 
পুৱা সামূহিক চাফাই , গছপুলি ৰোপণ শ্বহীদ তৰ্পণ আদি কাৰ্যসূচীৰ পাছতে মঞ্চৰ পতাকা উত্তোলন কৰে অধ্যক্ষ মঞ্চ-অসমৰ সভাপতি কল্পনা গগৈ আৰু অধ্যক্ষ মঞ্চ অসমৰ লখিমপুৰ জিলা সমিতিৰ সভাপতি মনোজ বৰাই। দুপৰীয়া  এটি সমবেত সংগীতেৰে মঞ্চ মুকলি কৰাৰ পাছতে ৰাজ্যিক সমিতিৰ সভাপতি কল্পনা গগৈৰ সভাপতিত্বত  বিদ্যালয় প্ৰেক্ষাগৃহত মুকলি সভা অনুষ্ঠিত
হয়। মঞ্চৰ উপদেষ্টা  নাচিৰ চুলতানে শুভ উদ্ধোধন কৰা মুকলি সভাত অগ্ৰজ সকলৰ সামাজিক অৱদানৰ ওপৰতে  উঠি অহা নৱ প্ৰজন্মৰ ভৱিষ্যত নিৰ্ভৰশীল বুলি কৈ এখন সৰ্বাংগ সুন্দৰ  সমাজ গঠনৰ অবিহনে ভৱিষ্যত প্ৰজন্মৰ ভৱিষ্যত কেতিয়াও  সুন্দৰ আৰু সুৰক্ষিত নহয় বুলি ব্যক্ত কৰি দেশৰ মেৰুদণ্ড  আৰু  ভবিষ্যত স্ৰষ্টা  স্বৰূপ শিক্ষক সকলেই এই ক্ষেত্ৰত অগ্ৰণী ভূমিকা লোৱাটো প্ৰয়োজন বুলি কয়। ৰাজ্যিক একাডেমীক কাউন্সিলৰ প্রাক্তন সম্পাদক চুলতানে প্রাক্তন ৰাষ্ট্ৰপতি আব্দুল কালাম ,বিশিষ্ট কথা সাহিত্যিক  ডঃ নগেন শইকীয়াৰ , আব্দুল মালিক , হোমেন বৰগোহাঞিৰ  সান্নিধ্যপূৰ্ণ অভিজ্ঞতাৰ মননশীল ব্যাখ্যা দাঙি ধৰে। লখিমপুৰ জিলা মঞ্চৰ  উপদেষ্টা, মাধৱদেৱ কলেজিয়েট উচ্চতৰ মাধ্যমিক বিদ্যালয়ৰ অধ্যক্ষ প্ৰফুল্ল বৰুৱাই আদৰণি ভাষণত ৰাজ্যিক আৰু জিলা নেতৃবৰ্গ আৰু প্ৰতিনিধি সকলৰ আদৰণি জনায়।
মঞ্চৰ সাধাৰণ সম্পাদক আবুল হাছেন আল আমানে উদ্দেশ্য বাখ্যাত মঞ্চৰ জন্ম যন্ত্ৰণা , পৰৱৰ্তী কাৰ্যকালত আহি পৰা প্ৰবল  প্ৰত্যাহ্বান আৰু এনে প্ৰবল প্ৰতিবন্ধকতাকো নেওচি  সাম্প্ৰতিক সময়ত ৰাজ্যিক সংগঠনিক ভেঁটিৰে এক গুৰুত্বপূৰ্ণ অনুষ্ঠানলৈ ধাবিত হোৱা মঞ্চৰ প্ৰাসংগিকতা সন্দৰ্ভত বিশদ বাখ্যা আগবঢ়ায়।লখিমপুৰ জিলা  অধ্যক্ষ মঞ্চৰ সভাপতি মনোজ বৰা ,সম্পাদক সত্য ৰঞ্জন বৰা,বিদ্যালয় পৰিচালনা আৰু উন্নয়ন সমিতিৰ সভাপতি  ডিম্বেশ্বৰ গগৈ ,
শিক্ষাবিদ দেৱেন দাস ,বিভিন্ন উচ্চতৰ মাধ্যমিক বিদ্যালয় অধ্যক্ষ, শিক্ষাৰ্থী ,মঞ্চৰ শতাধিক বিষয়ববীয়া আৰু  সদস্য উপস্থিত থকা   ঢকুৱাখনা উচ্চতৰ মাধ্যমিক বিদ্যালয়ৰ দশম শ্ৰেণীৰ ছাত্ৰী মাজুন বৰুৱাৰ শ্ৰুতি মধুৰ গীতেৰে জীপাল  মুকলি সভাত উচ্চতৰ মাধ্যমিক শিক্ষা সংসদৰ উপ নিয়ন্ত্ৰক ডঃ লব ঠাকুৰীয়া, খগেন পেগু , ডিম্বেশ্বৰ গগৈ  আদিয়েও বক্তব্য আগবঢ়ায়। কেন্দ্ৰীয় ভাবে উদযাপিত প্ৰতিষ্ঠা দিৱসতে শিৱসাগৰ আৰু চৰাইদেও জিলাৰ আমন্ত্ৰণ ক্ৰমে  অহা  ডিচেম্বৰ মাহত  শিৱসাগৰ জিলাত মঞ্চৰ ৰাজ্যিক দ্বিবাৰ্ষিক অধিবেশন অনুষ্ঠিত কৰা হ°ব বুলি ঘোষণা কৰি মঞ্চৰ সমূহ জিলা সমিতিৰ আন্তৰিক সহযোগিতা কামনা কৰে ৰাজ্যিক সমিতিৰ সভাপতি কল্পনা গগৈয়ে। 
বাতৰি যুগুতালে অমৃত পৱন বৰাই।