শিৱসাগৰত জিলা উন্নয়ন সমন্বয়ৰক্ষী আৰু পৰ্য্যালোচনা সমিতিৰ বৈঠক

যোৰহাটৰ লোকসভা সমষ্টিৰ সাংসদ তপন কুমাৰ গগৈৰ অধ্যক্ষতাত আজি শিৱসাগৰ জিলাৰ উপায়ুক্ত কাৰ্য্যালয়ৰ চুকাফা সভাকক্ষত জিলা উন্নয়ন সমন্বয়ৰক্ষী আৰু পৰ্য্যালোচনা সমিতি (দিশা)ৰ এক বৈঠক অনুষ্ঠিত হয়।বৈঠকত সাংসদ গৰাকীয়ে জিলাখনত ৰূপায়ন হৈ থকা বিভিন্ন জন হিতকৰ আৰু উন্নয়নমুখী আঁচনিৰ অগ্ৰগতিৰ বিস্তৃত ভাৱে বুজ লয়। আলোচনা কালত সাংসদ গৰাকীয়ে আঁচনি সমূহৰ ক্ষিপ্ৰ ৰূপায়নৰ ওপৰত গুৰুত্ব আৰোপ কৰে।

 

 

 

জিলা উপায়ুক্ত লক্ষীনন্দন গগৈৰ উপস্থিতিত অনুষ্ঠিত এই বৈঠকত পৰ্য্যালোচনা কালৰ আৰম্ভণিতে সাংসদ তপন কুমাৰ গগৈয়ে পঞ্চায়ত আৰু গ্ৰামোন্নয়ন বিভাগৰ অধীনত ৰূপায়ন হৈ থকা কাম কাজৰ অগ্ৰগতিৰ বুজ লয়। তেওঁ পৰ্য্যালোচনা কালত যিসমূহ আঁচনিৰ কাম কাজ অসম্পূৰ্ণ হৈ আছে, সেই সমূহৰ কাৰক সমূহৰ বিষয়ে বিতং প্ৰতিবেদন দাখিল কৰিবলৈ খণ্ড উন্নয়ন বিষয়া সকলক নিৰ্দেশ দিয়ে।

 

 

তেওঁ পঞ্চায়ত পৰ্য্যায়ত ৰূপায়িত হৈ থকা কাম কাজৰ অগ্ৰগতিৰ ক্ষেত্ৰত গাঁও পঞ্চায়ত আৰু আঞ্চলিক পঞ্চায়তৰ সভাপতি সকল সক্ৰিয়ভাৱে অংশগ্ৰহণ কৰাৰ পোষকতা কৰে। তেওঁ লগতে সংশ্লিষ্ট বিভাগসমূহৰ লগত সু-সমন্বয় ৰক্ষা কৰি কাম কৰি যাবলৈ আহ্বান জনায়। তেওঁ প্ৰতিটো পঞ্চায়তত একোখনকৈ গ্ৰন্থাগাৰ, জিম তথা সংগীত বিদ্যালয় নিৰ্মাণৰ দৰে কাম হাতত ল’বলৈও আহ্বান জনায় যাতে ইয়াৰ দ্বাৰা ভৱিষ্যত প্ৰজন্মৰ শাৰিৰীক আৰু মানসিক উৎকৰ্ষ সাধনত অৰিহণা যোগাব পাৰে।

 

 

 

বৈঠকত জিলা উন্নয়ন সমন্বয়ৰক্ষী আৰু পৰ্য্যালোচনা সমিতি (দিশা) ৰ সহ-সভাপতি তথা ৰাজ্যসভাৰ সাংসদ কামাখ্যা প্ৰসাদ তাছাই আঁচনি সমূহ হাতত লোৱাৰ ক্ষেত্ৰত এই সমূহৰ ব্যৱহাৰিক আৰু বিজ্ঞান ভিত্তিক দিশৰ ওপৰতো গুৰুত্ব প্ৰদান কৰিবলৈ কয়।বৈঠকত প্ৰধান মন্ত্ৰী আৱাস যোজনাৰ নিৰ্মানৰত অসম্পূৰ্ণ ঘৰ সমূহ পৰৱৰ্তী দিশাৰ বৈঠকৰ পূৰ্বে সম্পূৰ্ণ কৰিবলৈ নিৰ্দেশ দিয়া হয়।

 

 

 

সাংসদ গগৈয়ে বৈঠকত জিলাখনৰ অসম ৰাজ্যিক জীৱিকা অভিযানৰ অধীনত থকা আত্মসহায়ক গোট সমূহৰ কাম-কাজৰ বিষয়ে আলোচনা কৰা হয়। ইয়াৰ লগতে বিদ্যালয় সমূহৰ আন্তঃগাঁথনি, শিক্ষকৰ সংখ্যা, বিদ্যায়তনিক স্থিতি, পাঠ্যপুথি আৰু মধ্যাহ্ন ভোজনৰ যোগান আজি বিভিন্ন বিষয়ৰ ওপৰত আলোচনা কৰা হয়। শিক্ষক সকলে সপ্তাহত অন্ততঃ দুদিনকৈ হ’লেও নিজ নিজ বিদ্যালয়লৈ গৈ বিদ্যালয়সমূহ চাফ চিকুণ কৰি ৰখাৰ ব্যৱস্থা কৰিবলৈ আহ্বান জনায়।

 

 

বৈঠকত ৰূপহীমুখ আৰু অফলা অঞ্চলত চলি থকা গৰাখহনীয়া সমস্যাৰ ক্ষেত্ৰত তাৎক্ষণিক ব্যৱস্থা গ্ৰহণ কৰাৰ বাবে উৰ্ধতন কৰ্তৃপক্ষৰ সৈতে যোগাযোগ কৰিবলৈ জিলা জলসম্পদ বিভাগক বৈঠকত নিৰ্দেশ দিয়া হয়।বৈঠকত জিলাখনৰ পুৰণি কীৰ্তিচিহ্ন সমূহ বেদখলমুক্ত কৰাৰ বাবে মুখ্যমন্ত্ৰীকে প্ৰমুখ্য কৰি সংশ্লিষ্ট চৰকাৰী বিভাগ সমূহৰ লগত যোগাযোগ কৰাৰ বাবে সিদ্ধান্ত গ্ৰহণ কৰা হয়। ইয়াৰ লগতে সংশ্লিষ্ট ৰাজহ চক্ৰ বিষয়া সকলক জিলাখনৰ পুৰণি কীৰ্তিচিহ্ন সমূহ বেদখলৰ স্থিতি সন্দৰ্ভত বিতং প্ৰতিবেদন দাখিল কৰিবলৈ নিৰ্দেশ দিয়া হয়।

 

 

 

আজি দিশাৰ বৈঠকত অন্যান্য বিভাগৰ লগতে জনস্বাস্থ্য কাৰিকৰী, ৰাজহ আৰু দুৰ্যোগ ব্যৱস্থাপনা, গড়কাপ্তানী, এন এইচ আই ডি চি এল, সমাজ কল্যাণ, খাদ্য, অসামৰিক যোগান আৰু গ্ৰাহক পৰিক্ৰমা, স্বাস্থ্য আৰু পৰিয়াল কল্যাণ, অসম শক্তি বিতৰণ নিগম লিমিটেড, অসম ৰাজ্যিক পৰিবহন বিভাগ, ভাৰত সঞ্চাৰ নিগম লিমিটেড, বন (টেৰীটৰিয়েল আৰু সামাজিক বনানিকৰণ), জলসিঞ্চন, পশুপালন আৰু পশুচিকিৎসা, কৃষি, ৰেচম, পৰ্যটন, সাংস্কৃতিক পৰিক্ৰমা, ভূমি সংৰক্ষণ আদি বিভাগৰ আঁচনি আৰু কাম কাজৰ অগ্ৰগতিৰ পৰ্য্যালোচনা কৰা হয়।

 

 

বৈঠকত নাজিৰা সমষ্টিৰ বিধায়ক দেৱব্ৰত শইকীয়া, আমগুৰি সমষ্টিৰ বিধায়ক প্ৰদীপ হাজৰিকা, জিলা উপায়ুক্ত লক্ষীনন্দন গগৈ, জিলা পৰিষদৰ মুখ্য কাৰ্যবাহী বিষয়া বিপুল শইকীয়া, জিলা উন্নয়ন আয়ুক্ত নৱাব আল আজহাৰ আলী, অতিৰিক্ত উপায়ুক্ত মুন গগৈ, নাজিৰাৰ মহকুমাধিপতি সম্প্ৰীতি গোস্বামী, জিলা পৰিষদৰ সভাপতি ধ্ৰুৱজ্যোতি মাউতৰ লগতে খণ্ড উন্নয়ন বিষয়া সকল, আঞ্চলিক পঞ্চায়তৰ সভাপতি সকল আৰু সংশ্লিষ্ট বিভিন্ন বিভিন্ন বিভাগৰ মুৰব্বী বিষয়া সকল উপস্থিত থাকে।

খবৰ যুগুতালে শিৱসাগৰৰ দিলিস্তান খানে..

Share on whatsapp
WhatsApp
Share on facebook
Facebook
Share on twitter
Twitter
Share on email
Email

সোণাৰিৰ ঔগুৰি শ্যাম গাঁৱৰ বৌদ্ধ ধৰ্মাৱলম্বী অঞ্চলত বৰ্ষাবাস প্ৰবাৰণা তিথি পালন

বৌদ্ধ ধৰ্মাৱলম্বী লোকসকলৰ অন্যতম প্ৰধান উৎসৱটো হ’ল বৰ্ষাবাস প্ৰবাৰণা তিথি। তিনিমাহ জুৰি বিভিন্ন ৰীতি নীতিৰে শাওণ মাহৰ পুৰ্ণিমাৰ তিথিৰপৰা লক্ষ্মী পুৰ্ণিমালৈকে জীৱন যাপন কৰাৰ অন্তত লক্ষ্মী পূৰ্ণিমাত সামৰণি পৰে।

 

 

উল্লেখযোগ্য যে এই তিনি মাহ বৌদ্ধ ধৰ্মাৱলম্বী লোকসকলৰ বাবে পবিত্ৰ মাহ।এই সময়ছোৱাত তেওঁ লোকে নিজৰ মিতিৰ কুটুম্বৰ ঘৰলৈ অহা যোৱা নকৰে, বিয়া-সকাম আদি নাপাতে।পৰাপক্ষত বৌদ্ধ ধৰ্মৰ মূল নীতিৰ অষ্টশীল ধাৰণ কৰি সকলোৱে উপবাসে থাকিবলৈ চেষ্টা কৰে। এই বৰ্ষাবাস প্ৰবাৰণা তিথিৰ সামৰণিত সোণাৰিৰ অসম নাগালেণ্ড,অৰুণাচল প্ৰদেশ সীমান্তৰ ঔগুৰি শ্যাম গাঁৱৰ বৌদ্ধ বিহাৰত ভিক্ষুৰপৰা আশীষ লৈ বৌদ্ধ ধৰ্মাৱলম্বী লোকসকলে আকাশ বন্তি বৌদ্ধ সকলৰ ভাষাত ফুং-ফাই উৰোৱাই অপায় অমংগল দূৰ কৰিবলৈ ভগৱানৰ ওচৰত প্ৰাৰ্থনা জনায়।

 

 

অসমৰ বিভিন্ন প্ৰান্তত থকা বৌদ্ধ ধৰ্মাৱলম্বী লোকসকলৰ লগতে চৰাইদেউ জিলাৰ ঔগুৰি শ্যাম গাওঁ, ৰহন শ্যাম গাওঁ, দিচাংপানী শ্যাম গাওঁ, চলাপথাৰ আদি বৌদ্ধ ধৰ্মাৱলম্বী বসতিপ্ৰধান অঞ্চলসমুহতো বৰ্ষাবাস প্ৰবাৰণা তিথিৰ সামৰণি পৰে। গাঁওবাসীৰ এটাই আশা যাতে এই তিথিয়ে জনসাধাৰণৰ অপায় অমংগল দূৰ কৰি এক শান্তিৰ বাতাবৰণ সমাজত প্ৰতিষ্ঠা কৰে।

খবৰ যুগুতালে সোণাৰিৰপৰা অভিজিৎ ভূঞাই

অহা ২ নৱেম্বৰৰ পৰা খুলিব বিদ্যালয় মহাবিদ্যালয় সমূহ-ৰাজ্য চৰকাৰৰ নিৰ্দেশনাত আৰু কি আছে

অহা ২ নৱেম্বৰৰ পৰা ৰাজ্যৰ বিদ্যালয়,মহাবিদ্যালয় সমূহ আৰম্ভ হ’ব। ৰাজ্য চৰকাৰে এই সম্পৰ্কে কেইটামান গুৰুত্বপূৰ্ণ নিৰ্দেশনা জাৰি কৰিছে।

 

 

ষষ্ঠ শ্ৰেণীৰ পৰা দ্বাদশ শ্ৰেণীলৈ পাঠদান আৰম্ভ হ’ব। ষষ্ঠ,অষ্টম,দশম,দ্বাদশ শ্ৰেণীৰ পাঠদান প্ৰতি সোমবাৰ,বুধবাৰ আৰু শুকুবাৰে হ’ব।এই ক্ষেত্ৰত বিদ্যালয় মুৰব্বীয়ে শ্ৰেণীৰ বেটছ নিৰ্ধাৰণ কৰিব।

 

 

সপ্তম, নৱম,আৰু একাদশ শ্ৰেণীৰ পাঠদান প্ৰতি মঙলবাৰ,বৃহস্পতিবাৰ আৰু শনিবাৰে  হ’ব। প্ৰতিটো শ্ৰেণীৰ দুটাকৈ বেটছ থাকিব লাগিব। অৱশ্যে শিক্ষাৰ্থীৰ সংখ্যা ২০ জনতকৈ কম হ’লে এটা বেটছই হ’ব।

 

 

আনহাতে পলিটেকনিক আৰু অভিযান্ত্ৰিক শিক্ষানুষ্ঠানসমূহো অহা ২ নৱেম্বৰৰ পৰা খোলা হ’ব যদিও হোষ্টেলসমূহ প্ৰথম এমাহ বন্ধ থাকিব।ইফালে এক তৃতীয়াংশ শিক্ষাৰ্থী কঢ়িয়াই বাছ চলা-চল কৰিব পাৰিব। সকলোৱে মাস্ক আৰু ছেনিটাইজ পৰিধান কৰাটো বাধ্যতামূলক।

আমেৰিকাৰ পাঠ্যক্ৰমত সন্নিবিষ্ট হ’ল অৰণ্য মানৱৰ বিষয়ে

অসমবাসীৰ বাবে সুখবৰ।অসম গৌৰৱ অৰণ্য মানৱ যাদৱ পায়েঙৰ কৰ্মৰাজি সন্নিবিষ্ট হ’ল আমেৰিকা বিদ্যালয়ৰ পাঠ্যক্ৰমত।উল্লেখযোগ্য যে আমেৰিকা বিদ্যালয়ৰ ষষ্ঠ শ্ৰেণীৰ পাঠ্যক্ৰমত অন্তৰ্ভুক্ত কৰা হৈছে।

 

 

 

অৰণ্য মানৱ গৰাকী এই স্বীকৃতিকলৈ মুখ্যমন্ত্ৰী গৰাকীয়ে এনেদৰে কয়- অৰণ্য মানৱ যাদৱ পায়েঙদেৱৰ পৰিৱেশ সচেতনতা আৰু প্ৰকৃতিৰ সৈতে থকা আত্মীয়তাই কেৱল আমাৰ দেশৰে নহয়, বিশ্বৰ বিভিন্ন প্ৰান্তৰ জনগণক উদ্বুদ্ধ কৰিছে। সুদূৰ আমেৰিকাৰ শিক্ষানুষ্ঠানৰ পাঠ্যক্ৰমত তেখেতৰ বিষয়ে অন্তৰ্ভুক্ত হোৱাটোৱে প্ৰতিফলিত কৰিছে- বিশ্বজুৰি থকা তেখেতৰ সুনামৰ কথা।

 

পায়েঙৰ এই স্বীকৃতিত অসমবাসী গৌৰৱান্বিত। তেখেতৰ কৰ্মচেতনাৰে অনুপ্ৰাণিত হৈ আমি সকলোৱে পৰিৱেশ তথা জৈৱ বৈচিত্ৰতাৰ সুৰক্ষা আৰু সংৰক্ষণৰ বাবে একেলগে কাম কৰি যাব লাগিব।

পশ্চিম গুৱাহাটীত ৰাইজৰ মাজত ক’ভিড সজাগতা সৃষ্টিৰ বাবে ১৭৫ চি আৰ পি এফৰ ১০০ দিনীয়া কাৰ্যসূচী আৰম্ভ

পশ্চিম গুৱাহাটীৰ ৰাণীস্থিত ১৭৫ চি আৰ পি এফ বেটেলিয়ানৰ উদ্যোগত ৰাইজৰ মাজত ক’ভিডৰ সজাগতা সৃষ্টিৰ বাবে ১২ অক্টোবৰৰ পৰা ১০০ দিনীয়া কাৰ্যসূচী আৰম্ভ কৰা হৈছে।১৭৫ চি আৰ পি এফৰ কমাণ্ডেণ্ট সুভাষ চন্দ্ৰ শৰ্মাৰ নেতৃত্বত আৰম্ভ হোৱা সজাগতা কাৰ্যসূচীৰ অহা বর্ষৰ ১৯ জানুৱাৰীত সামৰণি পৰিব।

 

 

আনহাতে কাৰ্যসূচীৰ লগত সংগতি ৰাখি ৰাণীকে ধৰি কাষৰীয়া অঞ্চলত বাস কৰা ৰাইজৰ মাজত ক’ভিড সজাগতা সৃষ্টিৰ বাবে মাস্ক, চেনিটাইজাৰ, চাবোন, আদি বিতৰণ কৰা হয়। তেনেদৰে চাবোনৰে হাত ধোঁৱা পদ্ধতি আৰু সামাজিক দূৰত্ব বজাই ৰখা আদিৰ বিষয়ে বুজাই দিয়া হয়। কার্যসূচীত কমাণ্ডেণ্ট সুভাষ চন্দ্ৰ শৰ্মা, চেকেণ্ড-ইন-কামাণ্ড কে.এল.ধীমান, পৰিদৰ্শক দেশবীৰ সিং, উপ-পৰিদৰ্শক দিলীপ কুমাৰ তিৱাৰী, সহ: উপ-পৰিদৰ্শক বি.কে.স্বামীকে ধৰি বাহিনীটোৰ আন বিষয়া জোৱান সকলে ভাগ লয়।

অভিশপ্ত ৩০অক্টোবৰৰ নিহত সকলক সুঁৱৰি অনুষ্ঠিত হ’ল শ্ৰদ্ধাঞ্জলি অনুষ্ঠান

আজি ৩০ অক্টোবৰ। আজি দিনটোতে ধাৰাবাহিক বোমা বিস্ফোৰণত কপি উঠিছিল অসমৰ বিভিন্ন প্ৰান্ত। বহু নিৰিহ লোকে এই ধাৰাবাহিক বোমা বিস্ফোৰণত প্ৰান হেৰুৱালে। চিৰদিনৰ বাবে ঘুনীয়া হ’ল বহু জন।

 

 

এই অভিশপ্ত ৩০ অক্টোবৰ নিহত সকলক সুঁৱৰি আজি গণেশগুৰিত অনুষ্ঠিত হয় শ্ৰদ্ধাঞ্জলি অনুষ্ঠান। উল্লেখযোগ্য যে প্ৰতিবছৰে নিহত সকলক সুঁৱৰি শ্ৰদ্ধাঞ্জলিৰ অনুষ্ঠান অনুষ্ঠিত হৈ আহিছে ।এইবাৰ অনুষ্ঠানত নিহত সকলৰ আত্মীয় উপস্থিত থাকে।

 

এই অনুষ্ঠানত উপস্থিত থাকি মন্ত্ৰী সিদ্ধাৰ্থ ভট্টাচাৰ্যই এনেদৰে কয় । আজি শ্ৰদ্ধাঞ্জলি অনুষ্ঠানত সৰ্বধর্মীয় প্ৰাৰ্থনা সভাৰ লগতে বিভিন্নজনে বক্তব্য ৰাখে। আজি অনুষ্ঠানত উপস্থিত থাকে বিধায়ক অতুল বৰা, মন্ত্ৰী সিদ্ধাৰ্থ ভট্টাচাৰ্য, কামৰূপ জিলা উপায়ুক্ত বিশ্বজিৎ পেগু, মেডিয়া উপদেষ্টা হৃষীকেশ গোস্বামীকে আদি কৰি বহু কেইজন বিশিষ্ট ব্যক্তি।

আজি ৰাজ্যজুৰি উদযাপিত হ’ব লক্ষ্মী পূজা

আজি লক্ষ্মী পূজা।ধন সম্পত্তিৰ অধিষ্ঠাত্ৰী দেৱীক আজি দিনটোত আৰাধানা কৰা হয়।

 

 

এই লক্ষ্মী পূজা অসমীয়া সমাজ জীৱনৰ লগত বিশেষ ভাৱে সম্পৰ্কিত ।কৃষক ৰাইজে ধানে দোনে নদন বদন হ’বলৈ লক্ষ্মী দেৱীক আৰাধানা কৰে।ভঁৰাল ,খেতি পথাৰ,গোঁসাই ঘৰত বন্তি জ্বলাই লক্ষ্মী দেৱীক আহ্বান জনায়।লক্ষ্মী পূজাৰ উপলক্ষ্যে বজাৰত পূজা নানা বিধ সামগ্ৰীয়ে ভৰি পৰা পৰিলক্ষিত হৈছে।পঞ্জিকা অনুসৰি আজি ৫.৩০ৰ পৰা লক্ষ্মী পূৰ্ণিমাৰ তিথি আৰম্ভ হ’ব।