গুৱাহাটী বিশ্ববিদ্যালয়ৰ উদ্যোগত মধুপুৰ সত্ৰত সাঁচিপতীয়া পুথি পঠন-সংৰক্ষণ শীর্ষক কর্মশালা সম্পন্ন

অসমীয়া জাতিৰ জনক মহাপুৰুষ শ্ৰীমন্ত শঙ্কৰদেৱৰ শেষ কৰ্মস্থলী তথা চুবুৰীয়া ৰাজ্য পশ্চিমবংগৰ কোচবিহাৰ জিলাৰ শ্ৰীশ্ৰী মধুপুৰ ধাম সত্ৰত গুৱাহাটী বিশ্ববিদ্যালয়ৰ কৃষ্ণকান্ত সন্দিকৈ গ্ৰন্থাগাৰৰ উদ্যোগত আৰু শ্ৰীশ্ৰী মধুপুৰ ধাম সত্ৰৰ সহযোগত ৩০ আগষ্টত দিনযোৰা কাৰ্যসূচীৰে ‘প্রাচীন সাঁচিপতীয়া পুথিৰ পঠন আৰু সংৰক্ষণ’ শীর্ষক এখন কর্মশালা অনুষ্ঠিত হয়। আৰম্ভণিতে এগছি বন্তি প্ৰজ্বলন কৰি কৰ্মশালাখন উদ্ধোধন কৰে শ্রীশ্রী মধুপুৰ ধাম সত্ৰৰ সত্ৰাধিকাৰ পীতাম্বৰ ৰায় ভকতে । গুৱাহাটী বিশ্ববিদ্যালয়ৰ কৃষ্ণকান্ত সন্দিকৈ গ্ৰন্থাগাৰৰ প্ৰাচীন পাণ্ডুলিপি বিশেষজ্ঞ ধনজিৎ তালুকদাৰে কৰ্মশালাত সমল ব্যক্তি হিচাপে অংশগ্রহণ কৰে। আনহাতে কর্মশালাত শ্ৰীশ্ৰী মধুপুৰ ধাম সত্ৰৰ সত্ৰাধিকাৰ আৰু ডেকা সত্ৰাধিকাৰ প্ৰমুখ্যে ভকত-বৈষ্ণৱৰ উপৰি সত্ৰৰ দাঁতি কাষৰীয়া অঞ্চলৰ ভালেসংখ্যক ছাত্র-ছাত্রী ,শ্ৰীশ্ৰী হৰিপুৰ মাধৱপুৰ সত্ৰৰ সত্ৰাধিকাৰ আৰু ভকত-বৈষ্ণৱ, শ্রীশ্রী ভানু কুমাৰী সত্ৰৰ ভকত-বৈষ্ণৱ, ওদালগুৰিৰ শ্ৰীমন্ত শংকৰদেৱ গেলাবিল সত্ৰৰো ভকত-বৈষ্ণৱ , ধুবুৰীৰ হাতীধুৰা মহাবিদ্যালয়ৰ শিক্ষার্থী আৰু কোচবিহাৰ বানেশ্বৰ সাৰথিবালা মহাবিদ্যালয়ৰ অধ্যাপক – অধ্যাপিকা , শিক্ষার্থীয়েও কর্মশালাত অংশগ্রহণ কৰে। শ্রীশ্রী মধুপুৰ ধাম সত্ৰৰ ডেকা সত্ৰাধিকাৰ মাধৱ দেৱ মহন্তই দুয়োখন মহাবিদ্যালয়লৈ এটিকৈ সাঁচিপুলি আগবঢ়ায় আৰু গুৱাহাটী বিশ্ববিদ্যালয় কর্তৃপক্ষক ধন্যবাদজ্ঞাপন কৰে। লগতে ধুবুৰী জিলা প্রশাসনে এইক্ষেত্ৰত আগভাগ লৈ যোগাযোগ ৰক্ষা কৰাৰ বাবে শলাগ লৈ কয় যে অসমৰ প্ৰাচীন পাণ্ডুলিপিসমূহৰ অধ্যয়ন আৰু সংৰক্ষণৰ ক্ষেত্ৰত গুৱাহাটী বিশ্ববিদ্যালয়ে গ্রহণ কৰা পদক্ষেপ সঁচাকৈ অতি প্রশংসনীয় কাৰ্য।