সন্মিলিত গণশক্তি অসম, কেন্দ্ৰীয় সমিতিৰ উদ্যোগত দিনজোৰা কাৰ্যসূচীৰে দেওবাৰে নামনি চেৰপাই ৰাজহুৱা প্ৰেক্ষাগৃহত সম অধিকাৰ, সম মৰ্যাদা আৰু সম উন্নয়নৰ উদ্দেশ্যে দলীয় প্ৰশিক্ষণ কৰ্মশালাৰ এখনি সভা অনুষ্ঠিত কৰা হয়৷সন্মিলিত গণশক্তি, অসম মাজুলী জিলা সমিতিৰ সভাপতি ৰঞ্জিত দলেয়ে সঞ্চালনা কৰা সভাৰ প্ৰথম কাৰ্যসূচী অনুসৰি পুৱা প্ৰশিক্ষণ কৰ্মশালা উদ্বোধন কৰে সন্মিলিত নাৰীশক্তি, অসমৰ সভানেত্ৰী ভৱানী দুৱৰাই৷ দ্বিতীয় কাৰ্যসূচীমতে পুৱা ৯ বজাত নীতিনিষ্ঠ নেতৃত্বত সমল ব্যক্তি হিচাপে উপস্থিত থাকে সন্মিলিত গণশক্তি, অসমৰ সভাপতি পৰমানন্দ চায়েঙীয়াই৷ পুৱা দহ বজাত জীৱন জীৱিকাৰ অভিযানত সমল ব্যক্তি হিচাপে উপস্থিত থাকি জীৱিকাৰ সন্দৰ্ভত গুৰুত্বপূৰ্ণ ভাষণ প্ৰদান কৰে অ,এছ ডি, মিচিং স্বায়ত্ত্বশাসিত,গোগামুখৰ ডা° অনিল কুমাৰ পেগুৱে৷ চতুৰ্থ কাৰ্যসূচীমতে দিনৰ ১১ বজাত সন্মিলিত গণশক্তি, অসমৰ সভাপতি সুনীল কুমাৰ পেগুৱে সমল ব্যক্তি হিচাপে উপস্থিত থাকি গণশক্তি কৰ্মসূচীৰ সম্পৰ্কে আলোকপাত কৰে৷ বাৰ বাজি বিশ মিনিটত কৃষি খণ্ডত চৰকাৰী আঁচনিৰ আৰ্থিক ৰেহাই ব্যৱস্থা সন্দৰ্ভত আলোচনা কৰে, মাজুলী জিলা কৃষি বিষয়া ইৰছাদ আলীয়ে৷ দিনৰ ১:৩০ বজাত পশুধন আঁচনিৰ চৰকাৰী সুবিধা আৰু আৰ্থিক ৰেহাইৰ সম্পৰ্কে উপস্থিত ৰাইজক অৱগত কৰে ৰতনপুৰ গায়ন ৰাজ্যিক পশুচিকিৎসালয়ৰ ভাৰপ্ৰাপ্ত পশু চিকিৎসক ডা° প্ৰণৱ কোঁচ ডাঙৰীয়াই৷ দিনৰ ২:৩০ বজাত শ্ৰমিক অধিকাৰ আৰু আইনী সুৰক্ষা সম্পৰ্কে গুৰুত্বপূৰ্ণ ভাষণ প্ৰদান কৰে লখিমপুৰ জিলাৰ শ্ৰম পৰিদৰ্শক প্ৰণৱ টায়ুঙে৷ উল্লেখ্য যে উক্ত দলীয় প্ৰশিক্ষণ কৰ্মশালাত শতাধিক ৰাইজৰ উপস্থিতিৰ লগতে মিচিং স্বায়ত্ত্বশাসিত পৰিষদৰ নীলকান্ত দলে, সাংবাদিক প্ৰাঞ্জল গাৰে আদি উপস্থিত থাকে৷
বাতৰি যুগুতালে মাজুলীৰ পৰা প্ৰাঞ্জল প্ৰণয় গাৰে।
