খানামুখত পৰীক্ষিত হালৈৰ প্ৰবন্ধ সংকলন ভিন্নসুৰী উন্মোচন

বিশিষ্ট লেখক,সাহিত্যিক, উত্তৰ পূব সীমান্ত ৰেলৱেৰ অৱসৰপ্ৰাপ্ত কৰ্মচাৰী পৰীক্ষিত হালৈৰ প্ৰবন্ধ সংকলন ভিন্নসুৰী আজি তেওঁৰ গুৱাহাটীৰ পশ্চিম প্ৰান্তৰ খানামুখস্থিত বাসগৃহত উন্মোচন কৰা হয়। এই উপলক্ষে অনুষ্ঠিত অনুষ্ঠানটোত গ্ৰন্থখন উন্মোচন কৰে গুৱাহাটী বিশ্ববিদ্যালয়ৰ ভূগোল বিজ্ঞান বিভাগৰ অৱসৰপ্ৰাপ্ত মূৰব্বী অধ্যাপক ডঃ অৱনী কুমাৰ ভাগৱতীয়ে । আনহাতে সাহিত্যিক চন্দন কলিতাই আঁত ধৰা অনুষ্ঠানটোত চমু ভাষণত ডঃ অৱনী কুমাৰ ভাগৱতীয়ে পৰীক্ষিত হালৈৰ সাহিত্য প্ৰতিভাৰ উচ্চ প্ৰশংসা কৰি অৱসৰৰ পাছতো তেঁও সময়ৰ সদ্বব্যৱহাৰ কৰি সাহিত্য চৰ্চাত ব্ৰতী হৈ থকা বিষয়টোৰ শলাগ লয়।অনুষ্ঠানত ডঃ দিলীপ কুমাৰ কলিতা ,ডঃ প্ৰদীপ কলিতা ,প্ৰশান্ত গোশ্বামী , মহেশ্বৰ লহকৰকে ধৰি কেবাজনেও চমু ভাষণত গ্ৰন্থখনে পাঠক ৰাইজৰ সমাদৰ লাভ কৰিব বুলি আশা ব্যক্ত কৰে। অনুষ্ঠানত লেখক পৰীক্ষিত হালৈয়ে চমু ভাষণত ভিন্নসুৰী প্ৰবন্ধ গ্ৰন্থখনৰ বিষয়বস্তুৰ ওপৰত আলোকপাত কৰে পূৰ্বতে তেওঁৰ প্ৰকাশ পোৱা অন্য তিনিখন গ্ৰন্থৰ বিষয়েও উল্লেখ কৰে। অনুষ্ঠানত সাহিত্য ক্ষেত্ৰৰ লগত জড়িত কেবাজনো বিশিষ্ট ব্যক্তি আৰু পৰীক্ষিত হালৈৰ পৰিয়ালৰ সদস্য সকল উপস্থিত থাকে।