বুধবাৰে গুৱাহাটীৰ এক সভাগৃহত অসমৰ এগৰাকী বিশিষ্ট সাংবাদিক,সাহিত্যিক,ঔপন্যাসিক তথা ‘সাতসৰী ’ আলোচনী আৰু ‘সাদিন’ৰ সম্পাদক অনুৰাধা শৰ্মা পূজাৰীয়ে লেখিকা বিনীশা দেৱীৰ নৱতম উপন্যাস গোসাঁনীৰ শুভ উন্মোচন কৰে৷ এগৰাকী নাৰীৰ কাহিনীৰে লেখিকা বিনীশা দেৱীয়ে অতীজৰ অসমীয়া সমাজখনৰ বহু কথা “গোসানী “শীৰ্ষক গ্ৰন্থখনত প্ৰতিফলিত কৰিছে ।
গল্প আৰু কবিতা ৰচনাৰেও সাহিত্য চৰ্চা কৰি অহা বিনীশা দেৱীৰ তৃতীয়খন উপন্যাস গোসাঁনী অনলাইন যোগেও উপলব্ধ হ’ব বুলি জানিব পৰা গৈছে৷আজিৰ গ্ৰন্থ উন্মোচনী অনুষ্ঠানটিত অতিথি হিচাপে সাংবাদিক জগদীশ পাটগিৰি,গীতিকাৰ তথা সাংবাদিক মানসী বায়ন,ৰূপাঞ্জলী নাথ, গায়ক তথা গ্ৰন্থ প্ৰকাশক ৰাকেশ গোস্বামীৰ লগতে কেইবাগৰাকীও গ্ৰন্থ অনুৰাগী উপস্থিত থাকে ৷ বিনীশা দেৱীৰ ২০৭ পৃষ্ঠাৰ এই গ্ৰন্থখন প্ৰকাশ কৰিছে গুৱাহাটীৰ পানবজাৰৰ এম আৰ পাব্লিকেশ্যনৰ হৈ অপূৰ্ব কলিতাই৷ সাংবাদিক দৰ্শনা বৰুৱাই আঁত ধৰা তথা ক’ভিড প্ৰ’টকল মানি অনুষ্টুপীয়াকৈ আয়োজন কৰা এই গ্ৰন্থ উন্মোচনী সভাত উপস্থিত থকা বিশিষ্ট ব্যক্তি কেইগৰাকীয়ে সদ্য উন্মোচিত গ্ৰন্থখনৰ ভিন্ন দিশৰ এক আলোচনা কৰে।
