বি এছ এফৰ গুৱাহাটী ফ্ৰন্টিয়াৰত আন্তঃকমাণ্ড মহিলা ক্ৰীড়া সমাৰোহ আৰম্ভ

সীমান্ত নিৰাপত্তা বাহিনী ( বি এছ এফ ) ৰ গুৱাহাটীৰ পশ্চিম প্ৰান্তৰ আজাৰা পাটগাওঁস্থিত গুৱাহাটী ফ্ৰন্টিয়াৰ মুখ্য কাৰ্যালয় চৌহদত আজিৰে পৰা ২৭ তিনিদিনীয়াকৈ আৰম্ভ হৈছে বি এছ এফৰ আন্তঃকমাণ্ড মহিলা ক্ৰীড়া সমাৰোহ। বি এছ এফৰ গুৱাহাটী ফ্ৰন্টিয়াৰ মুখ্য কাৰ্যালয়ৰ সূত্ৰই সদৰি কৰা অনুসৰি সমাৰোহত জুদো, ৱেটলিফটিং, আৰ্মৰেষ্টলিং আৰু বক্সিং আদি প্ৰতিযোগিতা অনুষ্ঠিত হৈছে আৰু বি এছ এফৰ কলকাতাস্থিত পূব মণ্ডল আৰু চণ্ডীগড়স্থিত পশ্চিম মণ্ডলৰ মুঠ ১৩৬ গৰাকী মহিলা খেলুৱৈয়ে ভাগ লৈছে । য’ত কেবাগৰাকী ৰাষ্ট্ৰীয় পৰ্যায়ৰ প্ৰতিযোগিতাত ভাগ লোৱা খেলুৱৈ আছে। আনহাতে বি এছ এফৰ গুৱাহাটী ফ্ৰন্টিয়াৰৰ মহা পৰিদৰ্শক সুখদেৱ ৰাজৰ তত্বাবধানত অনুষ্ঠিত ক্ৰীড়া সমাৰোহখন আজি পুৱা শুভাৰম্ভ কৰে বি এছ এফৰ গুৱাহাটী ফ্ৰন্টিয়াৰৰ উপ মহা পৰিদৰ্শক তথা প্ৰিঞ্চিপাল ষ্টাফ অফিচাৰ ৰাজেশ কুমাৰে । এই উপলক্ষে অনুষ্ঠিত চমু উদ্ধোধনী অনুষ্ঠানত ৰাজেশ কুমাৰে প্ৰতিযোগিতাত অংশগ্ৰহণ কৰিবলৈ অহা মহিলা খেলুৱৈ সকলক অভিনন্দন জ্ঞাপন কৰি কয় যে ইয়াৰ দ্বাৰা খেলুৱৈ সকলৰ মাজত পাৰস্পৰিক সম্পৰ্কৰ এনাজৰীডাল সুদুঢ় হোৱাৰ লগতে নিজৰ প্ৰতিভা প্ৰদৰ্শন কৰিবলৈ সুযোগ লাভ কৰিব। উদ্ধোধনী অনুষ্ঠানৰ পূৰ্বে খেলুৱৈ সকলে মাৰ্চপাৰ্ট প্ৰদৰ্শন কৰে। উল্লেখ্য যে অহা ২৭ আগষ্টত সমাৰোহৰ সামৰণি পৰিব।