মধ্য গুৱাহাটী বিধানসভা সমষ্টি পৰ্যায়ৰ খেল মহাৰণ ২.০ ৰ সফল সামৰণি

কামৰূপ জিলা প্ৰশাসন আৰু জিলা ক্ৰী়ড়া বিভাগৰ উদ্যোগত যোৱা ৭ ডিচেম্বৰৰ পৰা অনুষ্ঠিত বিধানসভা সমষ্টি পৰ্যায়ৰ খেল মহাৰণৰ আজি সফল সামৰণি পৰে । সামৰণি অনুষ্ঠানত অংশগ্ৰহণ কৰি পশ্চিম বিধানসভা সমষ্টিৰ ৰমেন্দ্ৰ নাৰায়ণ কলিতাই নৱপ্ৰজন্মক উদ্দেশ্যি কয় যে গাঁৱে-ভূঞে,চহৰে-নগৰে বিভিন্ন প্ৰতিভা লুকাই আছে । কিন্তু উপযুক্ত মঞ্চৰ অভাৱত সুপ্ত হৈ থকা প্ৰতিভাসমূহ খেল মহাৰণৰ জৰিয়তে প্ৰদৰ্শন কৰিবলৈ সক্ষম হৈছে । অসমৰ বহুতো খেলুৱৈয়ে নিজৰ শ্ৰম আৰু প্ৰচেষ্টাৰে ৰাষ্ট্ৰীয় আৰু আন্ত:ৰাষ্ট্ৰীয় পৰ্যায়ত সুনাম অৰ্জন কৰি ৰাজ্যখনলৈ গৌৰৱ কঢ়িয়াই আনিবলৈ সক্ষম হৈছে । উল্লেখযোগ্য যে মধ্য গুৱাহাটীত ১৮০০ গৰাকী প্ৰতিযোগীয়ে ৱাৰ্ডৰ পৰা নিৰ্বাচিত হৈ সমষ্টি পৰ্যায়ৰ খেল প্ৰতিযোগিতাত অংশগ্ৰহণ কৰে । সমষ্টি ভিত্তিত বিজয়ী এই প্ৰতিযোগীসকলে জিলা পৰ্যায়ত খেলাৰ সুবিধা পাব । অনুষ্ঠানৰ শেষত বিজয়ী প্ৰতিযোগীসকলক বঁটা প্ৰদান কৰা হয়। আজিৰ এই সামৰণি অনুষ্ঠানত অতিৰিক্ত জিলা আয়ুক্ত কেচিঅ’ কৰণ পেগু,বিশিষ্ট খেলুৱৈদ্বয় অম্বা শইকীয়া পাটগিৰি , প্ৰদীপ শৰ্মা ,১২ আৰু ১৩ নং ৱাৰ্ডৰ পাৰিষদদ্বয় পূৰবী তালুকদাৰ আৰু দীপাংকৰ বৈশ্য,শাৰিৰীক প্ৰশিক্ষক ,বিজয়ী প্ৰতিযোগীসকলৰ লগতে অভিভাৱক তথা স্থানীয় নাগৰিকসকল উপস্হিত থাকে।