ইতিমধ্যে কলকাতা আন্তৰ্জাতিক চলচ্চিত্ৰ মহোৎসৱত ৰয়েল বেংগল টাইগাৰ শীৰ্ষক বঁটাৰে শ্ৰেষ্ঠ পৰিচালকৰ সন্মান কঢ়িয়াই আনিবলৈ সক্ষম হোৱা অসমীয়া ছবি গড অন দ্যা বেলকনি, অৰ্থাৎ বেলকনিত ভগৱান ছবিখনৰ অফিচিয়েল টেইলাৰ মুকলি হ’ল।বুধবাৰে যোৰহাট প্ৰেছ ক্লাৱত অনুষ্ঠিত হোৱা এক গাম্ভীৰ্যপূৰ্ণ অনুষ্ঠানত যোৰহাটৰ বহু সাংস্কৃতিক কৰ্মীৰ উপস্থিতিত ছবিখনৰ টেইলাৰ মুকলি কৰা হয়।
দেৰগাঁৱৰ মাইনা প্ৰডাকশ্যনৰ বেনাৰত প্ৰযোজক নুৰুল চুলতানৰ প্ৰযোজনাত বিশিষ্ট পৰিচালক বিশ্বজিৎ বৰাৰ বলিষ্ঠ পৰিচালনাৰে গড অন দ্যা বেলকনি-এ ইতিমধ্যে সমালোচকৰ প্ৰশংসা বুটলিবলৈ সক্ষম হোৱাৰ লগতে কেৰেলাত অনুষ্ঠিত হোৱা কেৰেলা আন্তৰ্জাতিক চলচ্চিত্ৰ মহোৎসৱলৈ ইণ্ডিয়ান চিনেমা নাও প্ৰতিযোগিতা শাখাৰ বাবে আমন্ত্ৰিত হৈছে।
এই মহোৎসৱখন ১০ ফেব্ৰুৱাৰীৰ পৰা ৫ মাৰ্চলৈকে অনুষ্ঠিত হ’ব। ইয়াৰোপৰি ১৯ সংখ্যক ঢাকা আন্তৰ্জাতিক চলচ্চিত্ৰ মহোৎসৱ ২০২১ আৰু কানাডাৰ টৰন্ট’ত অনুষ্ঠিত হ’বলগীয়া অল্টানেটিভ চলচ্চিত্ৰ মহোৎসৱত ২০২০ৰ শ্ৰেষ্ঠ অভিনেতা, শ্ৰেষ্ঠ ড্ৰামা ছবি, শ্ৰেষ্ঠ কাহিনী আৰু শ্ৰেষ্ঠ চিত্ৰনাট্যৰ বাবে বিশ্বজিৎ বৰাই মনোনয়ন লাভ কৰিছে।
একেলগে স্পেইনৰ মাদ্ৰিদত অনুষ্ঠিত হ’বলগীয়া ইমাজিন ইণ্ডিয়া আন্তৰ্জাতিক মহোৎসৱৰ মূল প্ৰতিযোগিতাত বিভাগতো অংশ ল’ব গড অন দ্যা বেলকনি-এ।ই নিশ্চয়কৈ অসমৰ বাবে অতি গৌৰৱৰ কথা। মুম্বাই ছবিজগতত পৰা অসমীয়া ছবি বহ্নিমান, ৰক্তবীজ তথা ফেহুজালি আদি বহু অভিজ্ঞতাৰে এক সুকীয়া কলাসুলভ প্ৰতিচ্ছবি দাঙি ধৰিবলৈ সক্ষম হোৱা বিশ্বজিৎ বৰা আশাবাদী যে গড অন দ্যা বেলকনি-এ এক অনন্য যাত্ৰাৰে অসমক বিশ্ব দৰবাৰত বিশেষ মাত্ৰা প্ৰদান কৰিব।
