ডিমাহাচাও পাহাৰীয়া জিলাখনৰ উমৰাংচুস্থিত নেপকুৰ বিবেকানন্দ কেন্দ্ৰ বিদ্যালয়ৰ সহযোগত অসম সত্ৰ মহাসভাই সত্ৰীয়া সংগীত(গীত-বাদ্য-নৃত্য)ৰ সাতদিনীয়া কৰ্মশালা শুভাৰম্ভ কৰে মৰিগাঁও জিলাৰ শ্ৰীশ্ৰী কালশিলা সত্ৰৰ সত্ৰাধিকাৰ তথা অসম সত্ৰ মহাসভাৰ সম্পাদক প্ৰধান কুসুম কুমাৰ মহন্তই। আৰম্ভণি অনুষ্ঠানত মুখ্য অতিথি হিচাপে উপস্থিত থাকে নেপকুৰ উপ-মহাপ্ৰবন্ধক অভিজিত কলিতা আৰু বিবেকানন্দ কেন্দ্ৰ বিদ্যালয়ৰ অধ্যক্ষ প্ৰমূখ্যে শিক্ষক শিক্ষয়িত্ৰীৰ লগতে বহতকেইজন স্থানীয় বিশিষ্ট ব্যক্তি। কৰ্মশালাৰ সমল ব্যক্তি হিচাপে আছে অসম সত্ৰ মহাসভাৰ সাংস্কৃতিক সম্পাদক কৃষ্ণ গোস্বামীৰ লগতে গায়ন(বৰগীত)ত কুন্দন বৰা , নৃত্যত অধ্যাপক গোবিন্দ শইকীয়া আৰু বাদন (খোল)ত অম্লানজ্যোতি দেৱ গোস্বামী। বিবেকানন্দ কেন্দ্ৰ বিদ্যালয়ৰ শিক্ষয়িত্ৰী মৃনালিনী বৰঠাকুৰে আতধৰা সভাখনত আদৰনি ভাষণ প্ৰদান কৰে বিদ্যালয়খনৰ বিষয়ৰ শিক্ষক তাৰিনী কান্ত শৰ্মাই।শতাধিক ছাত্ৰ-ছাত্ৰীৰ লগতে বয়সস্থ মহিলাই এই কৰ্মশালাত অতি আগ্ৰহেৰে যোগান কৰিছে।অসম সত্ৰ মহাসভাৰ বাবে ই এক গৌৰৱৰ বিষয়।
বিবেকানন্দ কেন্দ্ৰ বিদ্যালয় তথা নেপকু কৰ্তৃপক্ষৰ লগতে উমৰাংচু বিভিন্ন জাতি জনজাতিৰ লোকৰ কৰ্মশালাৰ প্ৰতি আগ্ৰহ দেখি অসম সত্ৰ মহাসভা উৎসাহিত।এনেকুৱা কৰ্মশালা অসমৰ বৰাক উপত্যকাৰ উপৰিও পশ্চিম বঙ্গ,দিল্লী,হাৰিয়ানা আদি ভাৰতৰ বিভিন্ন ক্ষেত্ৰত অনুষ্ঠিত কৰাৰ পৰিকল্পনা হাতত লৈছে বুলি সম্পাদক প্ৰধান কুসুম কুমাৰ মহন্তই জনাই।
