সফলতাৰে সামৰণি পৰিল দ্বিতীয় গুৱাহাটী আন্তঃৰাষ্ট্ৰীয় চলচিত্ৰ মহোৎসৱ। সপ্তাহ যোৰা কাৰ্য্যসূচীৰে অনুষ্ঠিত হোৱা মহোৎসৱটোত ৫০ খন দেশৰ ১০৮ খন চিনেমা প্ৰদৰ্শিত হয়। আজি সামৰণি অনুষ্ঠানত জ্যোতি চিত্ৰবনৰ অধ্যক্ষ পবিত্ৰ মাৰ্ঘেৰিটাই কয় এই চলচিত্ৰ মহোৎসৱটো বিভিন্ন ঠাইত অনুষ্ঠিত কৰা মহোৎসৱৰ ধৰণে অনুষ্ঠিত কৰিছো। দৰ্শকৰ সহাঁৰিৰ প্ৰতি লক্ষ্য ৰাখি বিশেষকৈ শিশুসকলৰ বাবে অহা তিনিমাহৰ ভিতৰত শিশু চলচিত্ৰ মহোৎসৱ অনুষ্ঠিত হ’ব। অনুষ্ঠানত ছিংগাপুৰৰ এন জি বোন য়ানে কয় যে চলচিত্ৰ মহোৎসৱত অংশ লৈ আপ্লুত হ’লো।ছিংগাপুৰৰ চিনেমাবোৰত যদিও নিজা ষ্টোৰি নাথাকে এই মহোৎসৱৰ দ্বাৰা বিভিন্ন চিনেমা পৰম্পৰা, সংস্কৃতিৰ বিশেষ আভাস পাবলৈ সক্ষম হ’লো। উল্লেখযোগ্য যে এই মহোৎসৱৰ লগত সংগতি ৰাখি উত্তৰ পূৱৰ ৬ খন চিনেমা প্ৰতিযোগিতাৰ বাবে নিৰ্বাচন কৰা হয়। ইয়াৰ ভিতৰত জুৰীৰ বিশেষ বঁটা লাভ কৰে অৰুণ নাথে, গল্ডেন কেমেৰা বঁটা লাভ কৰে দ্যা কুইষ্টে আৰু চিলভাৰ কেমেৰা বঁটা লাভ কৰে মঞ্জিল বৰুৱাৰ প্ৰযোজিত এ চিক্টেট চাৰ্চে।অনুষ্ঠানত সাংস্কৃতিক পৰিক্ৰমা বিভাগৰ মন্ত্ৰী নৱ কুমাৰ দলে, বিভিন্ন দেশৰ চলচিত্ৰপ্ৰেমী, প্ৰতিনিধিয়ে অংশগ্ৰহণ কৰে।
