অসমৰ নৱ নিযুক্ত ৰাজ্যপাল গোলাব চন্দ্ৰ কটাৰীয়া মঙ্গলবাৰে গুৱাহাটীত উপস্থিত হয়। গুৱাহাটীৰ বৰঝাৰ স্থিত লোকপ্ৰিয় গোপীনাথ আন্তঃৰাষ্ট্ৰীয় বিমানবন্দৰত অসম চৰকাৰৰ মন্ত্ৰী চন্দ্ৰ মোহন পাটোৱাৰী, অতুল বৰা, ৰঞ্জিত দাস, ইউ জি ব্ৰহ্ম, বিমল বৰাই তেখেতক উষ্ম আদৰণি জনায়। সেই সময়তে বিজেপিৰ অধ্যক্ষ ভৱেশ কলিতা, মুখ্য সচিব পবন কুমাৰ বৰঠাকুৰ, গুৱাহাটীৰ মুখ্য আয়ুক্ত দিগন্ত বৰা, কামৰূপ মেট্ৰ’ জিলাৰ উপায়ুক্ত পল্লব গোপাল ঝা আৰু অন্য গণ্য মান্য ব্যক্তি উপস্থিত থাকে। জানিব পৰা মতে নৱ নিযুক্ত ৰাজ্যপাল গোলাব চন্দ্ৰ কটাৰীয়াই বুধবাৰে গুৱাহাটী পাঞ্জাবাৰীস্থিত শ্ৰীমন্ত শংকৰদেৱ কলাক্ষেত্ৰত আয়োজিত এক সমাৰোহত শপত গ্ৰহণ কৰিব।
