ৰাষ্ট্ৰীয় একতা দিৱস উপলক্ষে শিৱসাগৰত আয়োজিত একতা পেৰেডৰ কুচকাৱাজৰ অভিবাদন গ্ৰহণ কৰিলে মুখ্যমন্ত্ৰীয়ে

মুখ্যমন্ত্ৰী সৰ্বানন্দ সোনোৱালে আজি শিৱসাগৰৰ ব’ৰ্ডিং খেলপথাৰত ৰাষ্ট্ৰীয় একতা দিৱস উপলক্ষে আয়োজিত একতা পেৰেড পৰিদৰ্শন কৰি কুচকাৱাজৰ অভিবাদন গ্ৰহণ কৰে।শিৱসাগৰ জিলা আৰক্ষীৰ উদ্যোগত আয়োজিত এই পেৰেডত মুঠ আঠটাকৈ দলে অংশগ্ৰহণ কৰে।তেওঁলোক হৈছে চি আৰ পি এফৰ ১৫৯নং বেটেলিয়ন,অ’এন জি চি,নাজিৰাস্থিত কেন্দ্ৰীয় ঔদ্যোগিক সুৰক্ষা বাহিনী,অসম আৰক্ষী প্ৰথম,তৃতীয় আৰু ২৫নং বেটেলিয়ন, শিৱসাগৰ আৰু যোৰহাট ডিষ্টিক্ত এগজিকিউটিভ ফ’ৰ্চ আৰু লিগিৰিপুখুৰী নাজিৰাস্থিত প্ৰথম অসম আৰক্ষী বেটেলিয়ন ব্ৰেণ্ড প্লাৰ্টুন দল।এই পেটেডৰ নেতৃত্ব বহন কৰে পেৰেড কমাণ্ডাৰ অনুপজ্যোতি বৰাই।

 

 

 

একতা পেৰেড উপলক্ষে আয়োজিত অনুষ্ঠানত ভাষণ প্ৰদান কৰি মুখ্যমন্ত্ৰীয়ে কয় যে স্বাধীন ভাৰতৰ প্ৰথম গৰাকী উপপ্ৰধানমন্ত্ৰী তথা গৃহমন্ত্ৰী লৌহমানৱ,ভাৰতৰত্ন চৰ্দাৰ বল্লভ ভাই পেটেলৰ এক ভাৰত শ্ৰেষ্ঠ ভাৰতৰ আদৰ্শৰে অনুপ্ৰাণিত হৈ প্ৰতিগৰাকী ভাৰতীয়ই দেশৰ একতা,অখণ্ডতা আৰু সৰ্বভৌমত্ব ৰক্ষাৰ বাবে প্ৰতিজ্ঞাবদ্ধ হ’ব লাগিব।

 

লৌহমানৱ গৰাকীয়ে স্বাধীনতা সময়ত দেশৰ সৰু সৰু ৰাজ্যবোৰ একত্ৰিত কৰি এক শক্তিশালী গণতন্ত্ৰৰ ভেটি গঢ়ি তুলিছিল।তেওঁ দেখুৱাই যোৱা পথ অনুসৰণ কৰি প্ৰধানমন্ত্ৰী নৰেন্দ্ৰ মোদীয়ে ৬ হাজাৰ বছৰীয়া ভাৰতীয় সভ্যতা,মূল্যবোধ আৰু পৰম্পৰা ভেটিৰ ওপৰত প্ৰতিষ্ঠিত এখন শক্তিশালী ভাৰতীয় সমাজ গঢ়াৰ বাবে নিৰন্তৰ কাম কৰি আহিছে। আমিও অসমৰ বুকুত শিক্ষা,সাংস্কৃতিক, ক্ৰীড়া আদি সকলো দিশতে নিপুণ তথা ৰাষ্ট্ৰভক্তি আৰু ৰাষ্ট্ৰ সেৱাত সমৰ্পিত এক প্ৰজন্ম গঢ়ি তোলাৰ লক্ষ্যৰে নিষ্ঠাৰে কাম কৰিছো। ইচ্ছা শক্তি থাকিলে সকলো সম্ভৱ বুলি মন্তব্য কৰি একতা,দৃঢ়তা,কঠোৰ পৰিশ্ৰম আদি মানৱীয় অস্ত্ৰৰে এখন আত্মনির্ভৰ অসম তথা শক্তিশালী ভাৰত নিৰ্মাণৰ বাবে আত্মনিয়োগ কৰিবলৈ সকলোকে আহ্বান জনায়।

আজি এই একতা পেৰেডৰ অনুষ্ঠানত সাংসদ তপন গগৈ,বিধায়ক কুশল দুৱৰী,আৰক্ষী উপ মহাপৰিদৰ্শক শিৱ প্ৰসাদ গাঞ্জালা ,শিৱসাগৰ জিলাৰ উপায়ুক্ত লক্ষীনন্দন গগৈ আৰু আৰক্ষী অধীক্ষক অমিতাভ সিনহাকে ধৰি জিলা প্ৰশাসন আৰু আৰক্ষীৰ শীৰ্ষ বিষয়াসকল তথা স্থানীয় ৰাইজ উপস্থিত থাকে।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

যোদ্ধা দ্যা আন টল্ড ষ্টৰী উন্মোচন

ম্যানমাৰত সতীৰ্থৰ হাততে প্ৰাণ দিছিল ৰশ্মিতা অসম ওৰফে জাহ্নৱী মহন্ত ৰাজকোঁৱৰে । ম্যানমাৰৰ হেনচাং নামৰ এক দুর্গম এলেকাত শিৰচ্ছেদ কৰাৰ পাছত ৰশ্মিতা অসমৰ মৃতদেহটো কৈলং নামৰ খৰশ্ৰোতা নদীখনত উটি গৈছিল।যি দুজন আলফা সদস্যই এই দুষ্কাৰ্য সংঘটিত কৰিছিল তেওঁলোকৰ বিৰুদ্ধে পৰৱৰ্তী সময়ত আলফাই মৃত্যুদণ্ডও ঘোষণা কৰিছিল।কিন্ত ইয়াৰ পূৰ্বেই ম্যানমাৰ ত্যাগ কৰি অসমলৈ পলাই আহিছিল শিৱসাগৰ আৰু তিনিচুকীয়া জিলাৰ এই দুই আলফা সদস্যই।

এখন ভৰা ঘৰ-সংসাৰ চৰকাৰী চাকৰি এৰি অৰণ্যলৈ যোৱা ৰশ্মিতা অসমৰ কি পৰিস্থিতিত কি দৰে মৃত্যু হৈছিল সেই কথা অসমৰ ৰাইজে আজিও নাজানে।অসমৰ ৰাইজে নজনা অথচ সত্যক পোহৰলৈ অনাৰ স্বাৰ্থতেই সাংবাদিক ধীৰু মনি গগৈয়ে তেওঁ শেহতীয়া গ্ৰন্থ নিষিদ্ধ যোদ্ধা দ্যা আনটল্ড ষ্টৰীজত লিপিবদ্ধ কৰিছে।আজি গুৱাহাটীৰ প্ৰেছ ক্লাৱত এই গ্ৰন্থখন উন্মোচন কৰে বিশিষ্ট সাহিত্যিক ড° ৰীতা চৌধুৰীয়ে।

গ্ৰন্থখন উন্মোচন কৰি চৌধুৰীয়ে কয় যে কিতাপখনৰ ভিতৰত প্ৰৱেশ কৰাৰ লগে লগেই মই যেন প্ৰৱেশ কৰিছোঁ এখন আমি কাহানিও নেদেখা আৰু দেখাৰ সম্ভাৱনা নথকা পৃথিৱীত।সেইখন এখন অচিনাকি পৃথিৱী।যুদ্ধ,মৃত্যু, বিশ্বঘাতকতা,দুৰ্গম যাত্ৰা,অকল্পনীয় সমাজ,ৰাষ্ট্ৰীয় পৰা মুক্ত অঞ্চলত স্বাধীনতাকামী বিদ্ৰোহী জীৱন আৰু অনেক কথাই বাৰে বাৰে মোক বিস্মিত কৰিছে।মোক নতুন নতুন কথাৰ লগত পৰিচিত কৰিছে।চকুৰ আগত যেন ভাঁহি উঠিছে বেলেগ বেলেগ অভাৱনী দৃশ্যপট।

আনহাতে আলফাৰ ২৮ বেটেলিয়নৰ কথা আমি কাকতত পঢ়িছোঁ বুলি উল্লেখ কৰি তেওঁ কয় যে আলফাৰ মতাদর্শ,তেওঁলোকে গ্ৰহণ কৰা পথ তাৰ কাৰণ আৰু ফলাফল এইবোৰ গভীৰ বিচাৰ বিশ্লেষণ বিষয়।এই পথ গ্ৰহণযোগ্য হওক বা নহওক যিহেতু এটা পথৰ সৃষ্টি হৈছে।অসমৰ ইতিহাস নিৰ্মাণত যি পথৰ এটা বিশেষ ভূমিকা আছে।এই পথৰ অনাবৃষ্টি আৰু অলিখিত কথা সমূহ বিচাৰি উলিয়াই লিপিবদ্ধ কৰাৰ প্ৰয়োজন আছে।

সম্প্ৰতি দৈনিক জনমভূমি কাকতৰ জ্যেষ্ঠ সাংবাদিক হিচাপে কৰ্মৰত ধীৰু মনি গগৈৰ কিতাপখন সন্নিবিষ্ট হোৱা তথ্য সমূহ অসমৰ সমাজ আৰু ৰাজনৈতিক গৱেষণাৰ বাবে অতি গুৰুত্বপূৰ্ণ বুলি চিহ্নিত হোৱা থল আছে বুলিও কয় বিশিষ্ট সাহিত্যিক গৰাকীয়ে।

প্ৰণিধানযোগ্য যে আলফাৰ ২৮ বেটেলিয়নৰ অলিখিত বহুতো জীয়া কাহিনীৰে সমৃদ্ধ নিষিদ্ধ যোদ্ধা।গ্ৰন্থখন প্ৰতিটো পৃষ্ঠাতে আছে আলফাৰ উত্থান পতন তথা শ্বহীদ হোৱা বীৰ সকলৰ জীৱন গাথা।২৮ বেটেলিয়নৰ এৰিয়া কমাণ্ডাৰ মাধুৰ্য্য গোহাঁই,চৰণ মাঝি,ভাস্কৰ হাজৰিকা,প্ৰদীপ গগৈৰ মৃত্যু লগতে চাখান টানিবলৈ গৈ ম্যানমাৰত কিদৰে কৰুণ ভাৱে কুণ্ডিল্য বৰুৱাৰ মৃত্যু হৈছিল এই কথাও প্ৰকাশ কৰিছে গগৈয়ে।বৰুৱাৰ মৃত্যু পিছত ম্যানমাৰত নগা গাঁৱৰ ৰাইজে তেওঁৰ মৃতদেহ সৎকাৰ কৰা লগতে শ্ৰাদ্ধও পাতিছিল।

এই শ্ৰাদ্ধৰ বাবে তেওঁলোকে আলফাৰ পৰা কেৱল এটা কুকুৰৰ মূল্য হে লৈছিল।বাকী সকলো তেওঁলোকে নিজেই গোটাই পাতিছিল।স্বাধীনতা বিচাৰি গৈ কৰুণ মৃত্যুক আঁকোৱালি লোৱা বৰুৱাৰ দৰে কিদৰে মিন্টু সোণোৱাল নামৰ আলফা সদস্য জনে ৩৭ টা দিন ডিব্ৰু ছৈখোৱা অভয়াৰণ্যত সেনাৰ বেহুৰ মাজত কেঁচা চাউল খাই প্ৰাণ বছাইছিল,কিদৰে বিতোপন বৰুৱাই যুদ্ধ ক্ষেত্ৰতো কবিতা গীত লিখি প্ৰাণ দিছিল ইত্যাদি বহুতো কথাই আছে গ্ৰন্থখনত।

লেখক গগৈ মতে ২৮ বেটেলিয়ন আছিল এটা সময়ত আলফা মেৰুদণ্ড।উজনি অসমত সেনা আৰক্ষী বাবে মূৰৰ কামোৰণি হৈ পৰা ২৮ বেটেলিয়ন গঠনৰ আঁৰৰ কাহিনী বেটেলিয়ন ভংগ লৈকে প্ৰায় সকলো কথাই সামৰি প্ৰস্তুত কৰা হৈছে।

প্ৰকৃততে সংগঠনৰ ধন সংগ্ৰহৰ অভিযানৰ পৰা সামৰিক অভিযানলৈ সকলো দিশ আৰম্ভণিতে এই বেটেলিয়নটোৱে চোৱা চিতা কৰিছিল।সেনা অভিযানত এই বেটেলিয়নটোৰ শ শ নেতা,সদস্য নিহত হৈছিল।উক্ত আলফা নেতা সদস্য সকলৰ মৃত্যুৰ জীয়া কাহিনী সমূহ আজিও বহুতে নাজানে।বহু কথা মই নিজেও নাজানো।কিন্ত এটা অনুসন্ধিৎসু মনৰ গৰাকী হিচাপে ইতিহাস খুচৰি আৰু এজন সাংবাদিক হিচাপে বিভিন্ন তথ্য তথা উৎসৰ সহায় লৈ ৰাইজে নজনা কথাবোৰ লিপিবদ্ধ কৰাৰ চেষ্টা চলাইছোঁ।

আলফাৰ সদস্যসকলক কি পৰিস্থিতিত কেনেকৈ কিদৰে মৃত্যু হৈছিল।কোনজন সতীৰ্থ বিশ্বাস ঘাটকতাৰ বলি হৈছিল আদি বহুতো অজান কথাৰ লগতে ২৮ বেটেলিয়ন কেতিয়া শিখৰত উপনীত হৈছিল,কেতিয়া পৰা অৱনমন আৰম্ভ হৈছিল,কাৰ কি ভূমিকাৰ বাবে বেটেলিয়নটোৰ ক্ষতি হৈছিল সকলো কথাই লিপিবদ্ধ কৰা হৈছে।

আনহাতে সেনা আৰক্ষী আক্ৰমণত এটা সময়ত এই বেটেলিয়নটো এমাহত ৪৭ জনলৈকে সদস্য অতি কৰুণ পৰিস্থিতিত মৃত্যু বৰণ কৰিবলগীয়া হৈছিল বুলি জনাই গগৈয়ে কয় যে আলফাৰ সংগ্ৰাম কিদৰে চলিছিল কিদৰে ডেকা অসমীয়া প্ৰাণ দিছিল এই কথাবোৰ যাতে নতুন প্ৰজন্মই জানে বা ইতিহাসৰ পাতত লিপিবদ্ধ লৈ থাকে তাৰ বাবেই এই গ্ৰন্থখন প্ৰস্তুত হৈছে।

বিশ্বৰ বৰ্ধিত জনসংখ্যাৰ হাৰৰ বিপৰীতে ভয়াবহ ভাৱে হ্ৰাস পাইছে ভূমি উৰ্বৰতা- ডঃ নিৰঞ্জন ডেকা।

অসম কৃষি বিশ্ববিদ্যালয়ৰ অধীনস্থ কৃষি বিজ্ঞান কেন্দ্ৰ নগাঁৱৰ উদ্যোগত শনিবাৰে “বিশ্ব ভূমি দিৱস” উদযাপন কৰা হয়। নগাঁৱৰ শিমলুগুৰিত থকা কৃষি বিজ্ঞান কেন্দ্ৰৰ সভাগৃহত “বিশ্ব ভূমি দিৱস” উপলক্ষে অনুষ্ঠিত সভাত অংশ গ্ৰহণ কৰি কৃষি বিজ্ঞান কেন্দ্ৰ নগাঁৱৰ মুৰব্বী ডঃ নিৰঞ্জন ডেকাই- বিশ্বৰ বৰ্ধিত জনসংখ্যাৰ হাৰৰ বিপৰীতে ভয়াবহ ভাবে ভূমি উৰ্বৰতা হ্ৰাস পোৱাৰ বিষয়ে আলোচনা কৰাৰ লগতে কৃষকক সাৰৰ সামঞ্জস্য ৰক্ষা কৰি বিশেষকৈ জৈবিক সাৰ প্ৰয়োগৰ কৰি ভূমি ৰক্ষাৰ বাবে আহ্বান জনায়। ভূমি বিজ্ঞানী দিপেন চন্দ্ৰ নাথে আঁত ধৰা সভাখনিত নগাঁও জিলা কৃষি বিষয়া অশোক বৰঠাকুৰ, কৃষি গৱেষণা কেন্দ্ৰ চিলঙনীৰ প্ৰধান বিজ্ঞানী ড০ প্ৰবিত্ৰ চন্দ্ৰ বৰদলৈ আৰু খাগৰিজান উন্নয়ন খণ্ডৰ খণ্ড প্ৰকল্প বিষয়া মিন্টু ডেকাই ভূমিৰ সংৰক্ষণ, ভূমি ৰক্ষা, কৃষিত সাৰ আদি বিষয়ৰ ওপৰত আলোকপাত কৰে। অনুষ্ঠানটিত নগাঁও জিলাৰ জামুগুৰি, শেনচোৱা, আইভেটি, গেডাবড়ি, কহুৱাতলি, শিমলুগুৰি, ভোগবাৰী, নসত্ৰ, বটদ্ৰৱা আদি গাঁৱৰ ৭০ গৰাকী প্ৰগতিশীল কৃষকক আগন্তুক তিনি বছৰৰ বাবে মাটিৰ পৰীক্ষা প্ৰমানপত্ৰ প্ৰদান আৰু শাক পাচলিৰ পুলি বিতৰণ কৰা হয়। উদ্যান শস্য বিশেষজ্ঞা জুলি শৰ্মা, পথাৰ শষ্য বিজ্ঞানী ডঃ বন্তি গগৈ, কৃষি অৰ্থনীতি বিভাগৰ বিষয় বস্তু বিশেষজ্ঞা ড০ চিংকি বৰ্মন, ড০ অনিমেশ ডেকা, বিষ্ণু নাৰায়ণ ফুকনকে প্ৰমুখে কৃষি বিজ্ঞান কেন্দ্ৰৰ সমূহ বিজ্ঞানী, কৰ্মচাৰী আৰু কৃষকসকলৰ উপস্থিতিত অনুষ্ঠিত অনুষ্ঠানটিৰ শেষত কৃষি বিজ্ঞান কেন্দ্ৰটিৰ চৌহদত ঔষধি গছ পুলি ৰোপণ কৰা হয়।
খবৰ যুগুতালে নগাঁৱৰ পৰা ৰাহুল দে‍ৱ বৰদলৈয়ে ।

দৃষ্টিকোণে জিনিছে ৰাষ্ট্ৰীয় আন্ত:ৰাষ্ট্ৰীয় সন্মান

এখন চুটি ছবি। ছবিখনৰ নানা দৃষ্টিকোণ -দা পাৰ্চপেক্টিভ’। ছবিখনে লাভ কৰিছে বহুকেইটা ৰাষ্ট্ৰীয় আৰু আন্ত:ৰাষ্ট্ৰীয় বঁটা ।

এই ছবিখন পৰিচালনা কৰিছে অসমৰ আগশাৰীৰ মহিলা ফটোগ্ৰাফাৰ লিপি দাসে।এই সন্দৰ্ভত লিপি দাসে এনেদৰে মন্তব্য কৰে। ছবিখনত অভিনয় কৰিছে অমৃতা গগৈ,ৰুমী ভূঞা,নিত্যঙগনাৰ লগতে বহু কেইগৰাকী শিল্পীয়ে ।

উল্লেখযোগ্য যে দৃষ্টিকোণে ১৬ বাৰ নমিনেচন লাভ কৰা লগতে ৭ টা বঁটা লাভ কৰিবলৈ সক্ষম হৈছে।শেহতীয়াকৈ ঢাকাত অনুষ্ঠিত হোৱা চিনেমেকিং ইণ্টাৰনেচনেল ফ্লিম ফেষ্টিভেলটো বঁটা লাভ কৰিবলৈ সক্ষম হৈছে।

জাৰ্নেলিষ্ট ইউনিয়ন অৱ আসামৰ আলোচনা চক্ৰ অনুষ্ঠিত

কৰ্মক্ষেত্ৰত মহিলাৰ সমতা আৰু মহিলা সাংবাদিকে সন্মুখীন হোৱা বিভিন্ন সমস্যাৰ বিষয়ে আলোকপাত কৰি আজি জাৰ্নেলিষ্ট ইউনিয়ন অৱ আসামৰ উদ্যোগত মহিলা সাংবাদিকৰ এক আলোচনাচক্ৰ অনুষ্ঠিত হয়।
এই আলোচনাচক্ৰত গুৱাহাটীৰ বহু কেইগৰাকী মহিলা সাংবাদিকৰ লগতে ইউনিয়নৰ সদস্য সকল উপস্থিত থাকে।বিশেষকৈ ক’ভিড-১৯ পৰিস্থিতিত মহিলা সাংবাদিক সকলে সন্মুখীন হোৱা বিভিন্ন পৰিৱেশ পৰিস্থিতিৰ বিষয়ে এক মত বিনিময় অনুষ্ঠান অনুষ্ঠিত হয়।

ইন্টাৰনেশ্যনেল ফেডাৰেশ্যন অৱ জাৰ্নেলিষ্টজিমৰ উপসভাপতি ছবিনা ইন্দ্ৰেজিতে ভাৰ্চুৱেলী অনুষ্ঠানটোত অংশগ্ৰহণ কৰে।তেখেতে কৰ্মক্ষেত্ৰত মহিলা সকলৰ নিজৰ সহকৰ্মীৰ পৰা যি অসুবিধা পায় সেই সম্পৰ্কেও বক্তব্য ৰাখে।এই সম্পৰ্কে আই জে ইউ এৰ প্ৰেচিডেন্ট গীতাৰ্থ পাঠকেও নিজৰ মন্তব্য কৰে।

আলোচনাচক্ৰত উপস্থিত থাকি চেমিম চুলতানাই নিজৰ মত ব্যক্ত কৰি কয় যে কৰ্মক্ষেত্ৰত মহিলা সকল কোনো ক্ষেত্ৰতে পিছপৰি থাকিব নালাগে।পুৰুষৰ সমানেই মৰ্য্যদা সহকাৰে সকলোৱে জীয়াই থকাৰ অধিকাৰ আছে।ঠিক সেইদৰে সবিতা লহকৰেও নিজৰ মত ব্যক্ত কৰে।
আজি আলোচনাচক্ৰত সম্পাদক সুস্মিতা গোস্বামী, জেণ্ডাৰ কাউন্সিৰ জে ইউ এৰ ৰতন লুৱাং উপস্থিত থাকে।

দুৰ্নীতিমুক্ত বি টি আৰ,উন্নয়নৰ বিটিআৰ আৰু ৰূপান্তৰ বিটিআৰ গঠনৰ বাবে বিজেপি প্ৰাৰ্থীসকলক বিপুল ভোটত জয়যুক্ত কৰিবলৈ মুখ্যমন্ত্ৰী আহ্বান

মুখ্যমন্ত্ৰী সৰ্বানন্দ সোনোৱালে আজি বাক্সাৰ নিমুৱাত অনুষ্ঠিত বিশাল নিৰ্বাচনী সভাত অংশগ্ৰহণ কৰি বিটিচি নিৰ্বাচনত ভাৰতীয় জনতা পাৰ্টীৰ প্ৰাৰ্থীসকলক বিটিচিৰ সৰ্বাংগীন উন্নয়ন তথা পৰিবৰ্তনৰ স্বাৰ্থত বিপুল ভোটদানেৰে জয়যুক্ত কৰাৰ আহ্বান জনায়।

নিৰ্বাচনী সভাত ভাষণ প্ৰদান কৰি মুখ্যমন্ত্ৰীয়ে বিটিআৰবাসী জনসাধাৰণ ৰাজনৈতিক ভাৱে যথেষ্ট সজাগ আৰু সচেতন বুলি কয়।বিটিআৰবাসী জনসাধাৰণৰ মাজত ভাল আৰু বেয়াৰ বিচাৰ কৰাৰ ক্ষমতা আছে বুলি উল্লেখ কৰি মুখ্যমন্ত্ৰীয়ে বিটিআৰৰ সৰ্বাংগীন পৰিবৰ্তনৰ বাবে জাতি-বৰ্ণ ভাষা নিৰ্বিশেষে সকলো শ্ৰেণীৰ জনসাধাৰণে শক্তিশালী সিদ্ধান্ত গ্ৰহণ কৰিব লাগিব বুলি কয়।

ভাৰতীয় জনতা পাৰ্টীয়ে বিটিআৰ অধীনত চাৰিখন জিলাৰ বৈপ্লৱিক পৰিবৰ্তন অনাৰ প্ৰতিশ্ৰুতিৰে এইবাৰৰ নিৰ্বাচনত পোন প্ৰথমবাৰৰ বাবে অৱতীৰ্ণ হৈছে বুলি মুখ্যমন্ত্ৰীয়ে কয়।বিজেপি মানে উন্নয়ন, বিজেপি মানে মৰ্য্যদা, বিজেপি মানে পৰিবৰ্তন,বিজেপি মানে হৈছে নিৰাপত্তা বুলি উল্লেখ কৰি মুখ্যমন্ত্ৰীয়ে আগন্তুক দিনৰ বিটিআৰৰ অধীনৰ চাৰিখন জিলাৰ সৰ্বাংগীন উন্নয়ন বাবে বিটিআৰত বিজেপি চৰকাৰ গঠন হোৱাটো নিশ্চিত বুলি দোহাৰে।

তেওঁ কয় যে যোৱা ১৭ বছৰ যি অপশাসন আৰু দুৰ্নীতি হ’ল তাৰ পৰা পৰিত্ৰাণ বিচাৰি বিটিআৰৰ জনসাধাৰনে বিজেপি চৰকাৰে মনে প্ৰাণে বিচাৰিছে। বিজেপি চৰকাৰ হ’লেহে এই অঞ্চলৰ ৰাইজৰ উন্নয়ন হ’ব।বিজেপি চৰকাৰ হলেহে কেন্দ্ৰ আৰু ৰাজ্য চৰকাৰৰ প্ৰতিখন আঁচনিৰ পুঁজি শতকৰা ১০০ শতাংশ ভালদৰে ব্যৱহাৰ হ’ব বুলি মুখ্যমন্ত্ৰীয়ে কয়।যোৱা দিনবোৰত বিটিআৰৰ জনসাধাৰনে যথেষ্ট ভয় আৰু শংকাৰত জীৱন কটাব লগীয়া হৈছে।এই অশান্তি দিন নাইকিয়া কৰিব বাবে বিজেপি চৰকাৰৰ নিতান্তই প্ৰয়োজন বুলিও তেওঁ কয়।মুখ্যমন্ত্ৰীয়ে বিজেপি নেতৃত্বাধীন চৰকাৰ গঠনৰ বাবে সকলো ভোটদাতা ৰাইজক সংকল্প ল’বলৈ আহ্বান জনায়।

বিজেপি চৰকাৰ গঠন হ’লে বিটিআৰৰ চাৰিখন জিলাক নতুন ৰূপত সজাই জনসাধাৰণৰ আশা আকাংক্ষা পূৰণ পূৰণ কৰিব বুলিও মুখ্যমন্ত্ৰীয়ে কয়।বিজেপি চৰকাৰ হ’লে বিটিআৰৰ চাৰিখন জিলাকে ভাৰতবৰ্ষৰ অন্যতম উন্নত জিলা হিচাপে গঢ়ি তোলাৰ পদক্ষেপ লোৱা হ’ব বুলিও কয়।বিটিআৰ অধীনত চাৰিখন জিলাৰ প্ৰতিটো পৰিয়ালৰ জীৱন আৰু সম্পত্তি সুৰক্ষা প্ৰদানৰ দিশত বিজেপি চৰকাৰে দায়বদ্ধতাৰে পদক্ষেপ ল’ব তেওঁ কয়।নিবনুৱা যুৱক যুৱতী সকলক যাতে কৰ্ম সংস্থাপনৰ পথ প্ৰশস্ত হয় তাৰ বাবে চাৰিওখন জিলা প্ৰতিটো প্ৰান্তত দক্ষতা বিকাশ কেন্দ্ৰ গঢ়ি তোলা হ’ব।বিজেপি চৰকাৰ গঠন হলে সমন্বয়ৰ মাজেৰে স্থায়ী শান্তি প্ৰতিষ্ঠা দিশত নিষ্ঠাসহকাৰে পদক্ষেপ ল’ব।

বিটিআৰত বিজেপি চৰকাৰ গঠন হ’লে বিটিআৰ চুক্তি প্ৰতিটো দফা ৰূপায়ণৰে বিকাশৰ নতুন যুগৰ সূচনা কৰিব বুলিও কয়।দুৰ্নীতিমুক্ত অসম গঢ়াৰ বাবে বিগত চাৰে চাৰি বছৰ বিজেপি চৰকাৰখনে যেনেধৰণৰ মানসিকতাৰে কাম কৰি আহিছে ঠিক তেনে ধৰণে বিটিআৰটো দুৰ্নীতি মুক্ত বিটিআৰ গঠনৰ দিশত চৰকাৰে দৃঢ়তাৰে পদক্ষেপ ল’ব বুলি মুখ্যমন্ত্ৰীয়ে কয়।দুৰ্নীতিমুক্ত বিটিআৰ,উন্নয়নৰ বিটিআৰ,আৰু ৰূপান্ত গঠনৰ বিটিআৰ গঠনৰ বাবে বিজেপি প্ৰাৰ্থী সকলক বিপুল ভোটত জয়যুক্ত কৰাৰ বাবে সংকল্পবদ্ধ হ’বলৈও সকলো শ্ৰেণী জনসাধাৰণৰক আহ্বান জনায়।

আজিৰ এই সভাত ভাৰতীয় জনতা পাৰ্টীৰ ৰাজ্যিক সভাপতি ৰঞ্জিত দাস,ৰাজ্যিক সমিতিৰ কাৰ্যনিৰ্বাহকৰ সদস্য মনদ্বীপ ডেকা,বৰপেটা জিলাৰ বিজেপি সভাপতি শংকৰ দাস,বৰপেটা বিধান সভাৰ সমষ্টিৰ বিধায়ক গুনীদ্ৰ নাথ দাস,বজালীৰ জিলা সমিতিৰ সভাপতি নগেন চৌধুৰীকে ধৰি দলৰ বিষয়ববীয়া সকল উপস্থিত থাকে।ইয়াৰ পিছতে মুখ্যমন্ত্ৰীয়ে ওদালগুৰি জিলাৰ গোলমা গাঁও হাইস্কুল খেলপথাৰটো অনুষ্ঠিত হোৱা নিৰ্বাচনী সভাত অংশগ্ৰহণ কৰি বিজেপি প্ৰাৰ্থীসকলৰ হৈ নিৰ্বাচনী প্ৰচাৰ চলায়।

মিৰ্জাত ধপাঁত সেৱনৰ ভয়াবহতা আৰু কেঞ্চাৰ সন্দৰ্ভত কৰ্মশালা

ধপাঁত আৰু ধপাঁত দ্বাৰা প্ৰস্তুত কৰা বিভিন্ন দ্ৰৱ্য সেৱনৰ ফলত মানৱ দেহত বিভিন্ন ৰোগৰ সৃষ্টি হৈ ক্ষতি কৰে । ভাৰত বৰ্ষত হোৱা কৰ্কট ৰোগৰ ৪০শতাংশই ধপাঁত ব্যৱহাৰৰ ফলত হয় ।আমাৰ দেশত প্ৰতি বছৰে ১৩ লাখ লোক ধপাঁত সেৱনৰ ফলত মৃত্যু মুখত পৰে।আনহাতে অসমত ধপাঁত সেৱনৰ ফলত প্ৰতি বছৰে অকাল মৃত্যুক সাৱটি লোৱা লোকৰ সংখ্যা হল ৩৪ হাজাৰ।

কামৰূপ জিলা ধঁপাত নিয়ন্ত্ৰণ কোষৰ নডেল বিষয়া ডাঃ অমিয়া কুমাৰ দাসে আজি কামৰূপ জিলাৰ মিৰ্জাৰ দক্ষিণ কামৰূপ মহাবিদ্যালয় প্ৰেক্ষাগৃহত সাংবাদিকৰ বাবে আয়োজিত ধপাঁতৰ ভয়াবহতা আৰু কৰ্কট ৰোগ শীৰ্ষক কামৰূপ জিলাৰ সাংবাদিকসকলৰ বাবে আয়োজিত এক কৰ্মশালাত ধপাঁত সেৱনৰ ভয়াবহতা সম্পৰ্কত বাখ্যা কৰি এই তথ্য সদৰি কৰে। কামৰূপ জিলা ধপাঁত নিয়ন্ত্ৰণ কোষ,কেঞ্চাৰ কেয়াৰ ফাউণ্ডেছন আৰু সাংবাদিক পৰিষদ অসমৰ কামৰূপ জিলা সমিতিৰ যুটীয়া উদ্যোগত আৰু কামৰূপ জিলা তথ্য আৰু জনসংযোগ বিভাগৰ সহযোগত আয়োজিত আজিৰ এই অনুষ্ঠানত সাংবাদিকসকলৰ মাজত পাৱাৰ পইন্টৰ সহায়ত ধঁপাত জাতীয় দ্ৰব্য সেৱনৰ ফলত হব পৰা বিভিন্ন ৰোগ যেনে – হৃদপেশী সম্পৰ্কীয় ৰোগ, কৰ্কট ৰোগ, শ্বাস প্ৰশ্বাস জনীত ৰোগ আৰু মধুমেহৰ দৰে হ’ব পৰা ভয়াবহ ৰোগৰ বিষয়ে বিশদ ভাবে বাখ্যা কৰি নডেল বিষয়া ডাঃ অমিয় কুমাৰ দাসে সম্প্ৰতি ধোঁৱা বিহীন ধঁপাত জাতীয় দ্ৰব্য সেৱনৰ প্ৰতি যুৱ সমাজ ভয়াবহ ভাবে আকৃষ্ট হোৱা বুলি উল্লেখ কৰি গভীৰ উদ্বেগ প্ৰকাশ কৰাৰ লগতে ইয়াৰ প্ৰতিৰোধত সমাজৰ সকলো শ্ৰেণীৰ লোকৰ দ্বায়িত্ব আছে বুলি মত প্ৰকাশ কৰে।

তেওঁ কয় যে যোৱা সমাজৰ মাজত বৃদ্ধি পোৱা ধপাঁত যেনে চাদা, গুটখা , ধপাঁত যুক্ত পান মচলা , খৈনী জৰদা আদি ধোৱা বিহীন ধপাঁত মুখ গহ্বৰত সৃষ্টি হোৱা কৰ্কট ৰোগৰ মূল কাৰক । ধঁপাতত চাৰি হাজাৰৰো অধিক ৰাসায়নিক পদাৰ্থ থাকে বুলি উল্লেখ কৰি ধপাঁত ব্যৱহাৰৰ ফলত কৰ্কট ৰোগৰ উপৰিও হাওঁফাওঁৰ কাৰ্য ক্ষমতা হ্ৰাস , হাপানী ৰোগ , যক্ষ্মা , উচ্চ ৰক্ত চাপ , ষ্ট্ৰোক আদি অনেক ৰোগৰ সৃষ্টি হয় বুলি প্ৰকাশ কৰে । কৰ্মশালাত উপস্থিত থাকি অসম কেঞ্চাৰ কেয়াৰ ফাউণ্ডেছনৰ কাৰ্য্যবাহী বিষয়াৰমেন বৰ্মনে ধঁপাত জাতীয় দ্ৰব্য সেৱনৰ অপকাৰিতা বিৰুদ্ধে ফাউণ্ডেছনে চৰকাৰৰ বিভিন্ন সংস্থাৰ সহযোগত অসমৰ বিভিন্ন অঞ্চলত সজাগতা সভা অনুষ্ঠিত কৰি অহাৰ কথা অৱগত কৰে।

আজিৰ এই কাৰ্য্যসূচীত মুখ্য অতিথি ৰূপে উপস্থিত থাকে কামৰূপ জিলাৰ উপযুক্ত কৈলাশ কাৰ্তিক এনে জিলা খনত কামৰূপ জিলা ধপাঁত নিয়ন্ত্ৰণ সমিতি আৰু অসম কেঞ্চাৰ কেয়ার ফাউণ্ডেছনে ধপাঁত নিয়ন্ত্ৰণ আৰু ইয়াৰ ভায়াবহতা সম্পৰ্কে জনসজগত মূলক কাৰ্য্যসূচী হাতত লৈ অহাত সন্তোষ প্ৰকাশ কৰাৰ লগতে আজিৰ কাৰ্য্যসূচীত কামৰূপ জিলা সাংবাদিক পৰিষদে কৰা পূৰ্ণ সহযোগিতাৰ শলাগ লয় ।কাৰ্যসূচীৰ আৰম্ভনিতে কামৰূপ জিলাৰ তথ্য আৰু জনসংযোগ বিষয়া প্ৰণৱ কুমাৰ দাসে কৰ্মশালাখনৰ উদ্দেশ্য বাখ্যা কৰে।

কামৰূপ জিলা সাংবাদিক পৰিষদৰ সম্পাদক পৱিত্ৰ কুমাৰ দাসে আঁত ধৰা কৰ্মশালা খনত আজিৰ অনুষ্ঠানত উপস্থিত থকা কামৰূপ জিলাৰ উপযুক্ত কৈলাশ কাৰ্তিক এন , কামৰূপ জিলা ধপাঁত নিয়ন্ত্ৰণ কোষৰ নডেল বিষয়া ডা : আমিয়’ কুমাৰ দাস , কামৰূপৰ তথ্য আৰু জনসংযোগ বিষয়াণব কুমাৰ দাসক সম্বৰ্ধনা জনায়।