আন্তৰ্জাতিক দিব্যাঙ্গ দিৱসৰ অনুষ্ঠানত অংশগ্ৰহণ মুখ্যমন্ত্ৰী

দিব্যাঙ্গসকলৰ অধিকাৰ তথা কল্যাণৰ অৰ্থে জনসাধাৰণৰক সজাগ আৰু সচেতন কৰা উদ্দেশ্যে সমগ্ৰ বিশ্বজুৰি পালন কৰি অহা আন্তৰ্জাতিক দিব্যাঙ্গ দিৱস আজি অসমতো পালন কৰা হয়।এই উপলক্ষে ৰাজ্য চৰকাৰৰ সমাজ কল্যাণ বিভাগে এলিমকো আৰু কামৰূপ জিলা প্ৰশাসনৰ সহযোগত আমিনগাঁৱস্থিত কুমাৰ ভাস্কৰ বৰ্মন ক্ষেত্ৰত আয়োজন কৰা অনুষ্ঠানত মুখ্যমন্ত্ৰী ড° হিমন্ত বিশ্ব শৰ্মাই মুখ্য অতিথি হিচাপে অংশগ্ৰহণ কৰে।দিব্যাঙ্গসকলৰ সৰ্বোতোপ্ৰকাৰৰ কল্যাণৰ বাবে ৰাজ্য চৰকাৰে বদ্ধপৰিকৰ বুলি উল্লেখ কৰি মুখ্যমন্ত্ৰীয়ে কয় যে আন্তৰ্জাতিক দিব্যাঙ্গ দিৱস উদযাপনে আমাৰ আন্তৰিকতা আৰু কৃতজ্ঞতা জ্ঞাপনৰ এক সুযোগ প্ৰধান কৰে।এই দিৱস উদযাপনে বিশেষ ভাৱে সক্ষম লোক সকলৰ প্ৰয়োজনীয়তা প্ৰতি জনসাধাৰণৰ মাজত সজাগতা সৃষ্টিৰ ক্ষেত্ৰত প্ৰভূত সহায় কৰে বুলি মন্তব্য কৰি মুখ্যমন্ত্ৰীয়ে ঘোষণা কৰে যে গুৱাহাটীৰ কাহিলীপাৰাস্থিত ভাউৰী দেৱী চেৰাওগী বাধিৰ বিদ্যালয় আৰু দৃষ্টিহীন সকলৰ বাবে বশিষ্ঠস্থিত বিদ্যালয় খন উচ্চতৰ মাধ্যমিক পৰ্যায়লৈ উন্নীত কৰাৰ বাবে ৰাজ্য চৰকাৰে সিদ্ধান্ত গ্ৰহণ কৰিছে।তদুপৰি বিশেষ ভাৱে সক্ষম লোকসকলৰ সুবিধা বাবে ভাৰতীয় সাংকেতিক ভাষা(ছাইন লেংগুবেজ)ৰ আৰ্হিত অসমীয়া সাংকেতিক ভাষাও প্ৰস্তুত কৰা হ’ব বুলিও তেওঁ কয়।

অনুষ্ঠানত মুখ্যমন্ত্ৰীয়ে কয় যে বিশেষ ভাৱে সক্ষম লোকসকলৰ সুবিধাৰ প্ৰতি লক্ষ্য ৰাখি ৰাজ্য চৰকাৰে চাকৰি আৰু অন্যান্য শিক্ষানুষ্ঠান সমূহত এনে লোকৰ সংৰক্ষিত আসনৰ সংখ্যা ৪ শতাংশলৈ বৃদ্ধি কৰিছে।তেওঁ লগতে উল্লেখ কৰে যে বিশেষ ভাৱে সক্ষম লোকসকলৰ আৰ্থ সামাজিক তথা শৈক্ষিক সৱলীকৰণ দ্ৰুততাৰে যাতে সম্ভৱ হৈ উঠে সেই উদ্দেশ্যে সামাজিক ন্যায় আৰু সৱলীকৰণ সঞ্চালকালয় নামেৰে এক সুকীয়া সঞ্চালকালয় গঠন কৰা হৈছে।সমাজৰ বিশেষভাৱে সক্ষম লোকসকলৰ বাবে দিব্যাঙ্গ শব্দটো প্ৰচলন কৰা বাবে প্ৰধানমন্ত্ৰী নৰেন্দ্ৰ মোদীলৈ কৃতজ্ঞতা জ্ঞাপন কৰি কয় যে ইয়ে বিশেষভাৱে সক্ষম লোকসকলৰ প্ৰতি সমাজৰ সকলো শ্ৰেণীৰ জনসাধাৰণৰ মাজত এক ইতিবাচক প্ৰভাৱ পেলাবলৈ সক্ষম হৈছে।

আজি এই অনুষ্ঠানৰ সৈতে সংগতি ৰাখি মুখ্যমন্ত্ৰীয়ে বিশেষভাৱে সক্ষম লোকসকলৰ বাবে হুইল চেয়াৰ আগবঢ়াই।তেওঁ কয় যে ২০২২ চনৰ ডিচেম্বৰ মাহৰ ভিতৰত ৰাজ্য চৰকাৰে চলাচল বাবে অসমৰ্থ ৰাজ্য খনৰ সকলো লোকলৈ হুইল চেয়াৰ আৰু তিনিচকীয়া ৰিক্সা প্ৰদান কৰিব।দিব্যাঙ্গসকলৰ বাবে বিশেষ নিয়োগ অভিযান আৰম্ভ কৰা বাবে ৰাজ্য চৰকাৰে বিচাৰ বিবেচনা কৰি আছে বুলিও কয়।অনুষ্ঠানত ভাষণ প্ৰদান কৰি অজন্তা নেওগে কয় যে বিশেষভাৱে সক্ষম লোকসকলে যাতে মৰ্য্যদা সহকাৰে জীৱন নিৰ্বাহ কৰিব পাৰে সেই উদ্দেশ্যে ৰাজ্য চৰকাৰে কেইবালানিও পদক্ষেপ গ্ৰহণ কৰিছে।মন্ত্ৰী গৰাকীয়ে অনুষ্ঠানত সমাজ কল্যাণ বিভাগে এই দিশত লোৱা বিভিন্ন আঁচনি সমূহৰ চমু বিৱৰণ দাঙি ধৰি আঁচনি সমূহ সফল ৰূপায়ণৰ ক্ষেত্ৰত ৰাজ্য খনৰ সকলো শ্ৰেণীৰ জনসাধাৰণৰ সহায় সহযোগিতা কামনা কৰে।

অনুষ্ঠানত কমলপূৰ সমষ্টিৰ বিধায়ক দিগন্ত কলিতা,বকো সমষ্টিৰ বিধায়িকা নন্দিতা দাস,সুমন হৰিপ্ৰিয়া,হেমাংগ ঠাকুৰীয়া,প্ৰদীপ ঠাকুৰীয়া,বিভিন্ন সংগঠনৰ প্ৰতিনিধি সকল,সমাজ কল্যান সঞ্চালকালয় সঞ্চালক বিভাষ মোদী প্ৰমুখ্যে গণ্য মান্য ব্যক্তিসকল উপস্থিত থাকে।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

আৰ্যভট্ট বিজ্ঞান কেন্দ্ৰ ৰাণী ব্লকৰ উদ্যোগত ধাৰাপুৰ উচ্চ মাধ্যমিক বিদ্যালয়ত বিজ্ঞান ভিত্তিক প্ৰতিযোগীতা

ধাৰাপুৰ উচ্চ মাধ্যমিক বিদ্যালয়ত আজি বিজ্ঞান ভিত্তিক এখনি প্ৰতিযোগিতা অনুষ্ঠিত হয় । ধাৰাপুৰ উচ্চতৰ মাধ্যমিক আৰু পলাশবাৰী আঞ্চলিক হাইস্কুলৰ ছাত্ৰ- ছাত্ৰী সকলে বিজ্ঞানৰ আৰ্হি, আকস্মিক বক্তৃতা আৰু পষ্টাৰ লিখাৰ প্ৰতিযোগিতাত অংশ গ্ৰহন কৰে । প্ৰতিযোগিতাৰ অন্তত ধাৰাপুৰ উচ্চ মাধ্যমিক বিদ্যালয়ৰ পৰিচালনা সমিতিৰ সভাপতি তৰুন চন্দ্ৰ দাসৰ সভাপতিত্বত বটাঁ বিতৰণি সভা অনুষ্ঠিত হয় । ধাৰাপুৰ উচ্চতৰ মাধ্যমিক বিদ্যালয়ৰ অধ্যক্ষ উৎপল শৰ্মা, পশ্চিম গুৱাহাটী মহাবিদ্যালয়ৰ প্ৰৱক্তা ড°হেমন্ত কলিতা, পলাশবাৰী আঞ্চলিক হাইস্কুলৰ শিক্ষক দীনেশ শৰ্মা, খগেন মেধি, মৰমী শৰ্মা আদিয়ে প্ৰতিযোগীতা সন্দৰ্ভত বক্তব্য আগবঢ়ায় । বিজয়ী প্ৰতিযোগী সকলোৰ মাজত বঁটা আৰু মানপত্ৰ বিতৰন কৰে ।

জোনবিল মেলাত মন্ত্ৰী পীযুষ হাজৰীকা: ১৮ গৰাকী তিৱা ৰজাক ৰাজভাট্টা প্ৰদান

অসম চৰকাৰৰ তথ্য, জনসংযোগ, জলসম্পদ আৰু সংসদীয় পৰিক্ৰমা বিভাগৰ মন্ত্ৰী পীযুষ হাজৰীকাই আজি মৰিগাঁও জিলাৰ ঐতিহাসিক জোনবিল মেলাত উপস্থিত থাকি গোভা ৰজা দীপচিং দেওৰজা সহিতে ১৮ গৰাকী সন্মানীয় তিৱা ৰজাক সম্বৰ্ধনা জনোৱাৰ লগতে মুখ্যমন্ত্ৰীৰ হৈ এক লাখ টকাকৈ ৰাজভাটাৰ চেক বিতৰণ কৰে । লগতে মন্ত্ৰীগৰাকীয়ে ৫০ লাখ টকা ব্যয় সাপেক্ষে নিৰ্মাণ কৰা অতিথি আৰু সংগ্ৰহালয় গৃহৰ উন্মোচন কৰে ।

ৰাজ্য চৰকাৰৰ ক’ভিদ বিধি মানি অনুষ্টুপীয়াকৈ আয়োজিত জোনবিল মেলাত অংশ লৈ মন্ত্ৰী পীযুষ হাজৰীকাই কয় যে জোনবিল মেলা হৈছে আমাৰ তিৱা সম্প্ৰদায়ৰ গৌৰৱ আৰু আমাৰ সংস্কৃতিৰ এক অন্যতম অনুস্থান । জোনবিল মেলাৰ বিনিময় প্ৰথাৰ ঐতিহাসিক গুৰুত্বৰ কথা উল্লেখ কৰি মন্ত্ৰীগৰাকীয়ে কয় যে অসমৰ ঐতিহ্য আৰু সংস্কৃতিক কেতিয়াও উপেক্ষা কৰিব নোৱাৰো ।ৰজা জোঙাল বলহুৰ শৌৰ্য-বীৰ্যৰ কথা সোৱঁৰি মন্ত্ৰীগৰাকীয়ে কয় যে এই শৌৰ্য বীৰ্যৰ ধাৰাবাহিকতা আজিও তিৱাসকলে ৰক্ষা কৰি আহিবলৈ সক্ষম হৈছে । 

আনহাতে বিগত সময়ত তিৱা ৰজাসকলক বছৰি ৬০ হাজাৰ টকাৰ ভাট্টা দি অহাৰ বিপৰীতে এই বৰ্ষৰপৰা তেঁওলোকক বছৰি ১ লাখকৈ ৰাজভাট্টা দিয়া হৈছে বুলিও মন্ত্ৰীগৰাকীয়ে উল্লেখ কৰে।পাছবেলালৈ মন্ত্ৰীগৰাকীয়ে জাগীৰোড সমষ্টিৰ কেইবাটাও স্থানত অংগনবাদী কেন্দ্ৰৰ আধাৰশিলা স্থাপন কৰে ।

জামুগুৰিহাটত শোণিতকোঁৱৰ গজেন বৰুৱা দিৱস উদযাপন

অসমৰ সাংস্কৃতিক ক্ষেত্ৰৰ এগৰাকী নক্ষত্র স্বৰূপ,ঐতিহ্য মণ্ডিত বাৰেচহৰীয়া ভাওনা, বৰপুখুৰীপাৰৰ মুকলি বিহুক জগত সভাত পৰিচয় কৰি স্বৰ্ণ শিখৰত উপনীত কৰোতা, শোণিতকোঁৱৰ গজেন বৰুৱাৰ স্মৃতি দিৱস আজি বাৰেচহৰীয়া ভাওনা প্ৰকল্প স্থলীত চৰকাৰী নীতি-নিৰ্দেশনা অনুসৰি অনুষ্ঠুপীয়াকৈ পালন কৰা হয় । চতিয়া বিধানসভা সমষ্টিৰ বিধায়ক তথা গৰুখুঁটি প্ৰকল্পৰ অধ্যক্ষ পদ্ম হাজৰিকাক মুখ্য উপদেষ্টা আৰু বাৰেচহৰীয়া ভাওনা কমিটিৰ সভাপতি ভৱ গোস্বামীক উপদেষ্টা হিচাপে লৈ গঠন কৰা উদ্ যাপন সমিতিখনে উক্ত দিৱসটি বৰ্ণাঢ্য কাৰ্যসূচীৰে পালনৰ আয়োজন কৰিছিল যদিও ক’ভিদ পৰিস্থিতিৰ বাবে অধিকাংশ কাৰ্যসূচী বাতিল কৰি অনুষ্ঠুপীয়াকৈ পালন কৰা হয়। আজি পুৱা ৯ বজাত বাৰেচহৰীয়া ভাওনা প্ৰকল্প স্থলীৰ শ্বহীদ বেদী প্ৰসংগত থকা শোণিতকোঁৱৰ গজেন বৰুৱাৰ প্ৰতিমূৰ্তিত অঞ্চলটোৰ অনুষ্ঠানসমূহৰ বিষয়ববীয়া আৰু সীমিত সংখ্যক ৰাইজৰ উপস্থিতিত শ্ৰদ্ধাঞ্জলি অনুষ্ঠান অনুষ্ঠিত হয় আৰু সন্ধিয়া বন্তি প্ৰজ্বলনেৰে বৰ্ষটোত কাৰ্যসূচীৰ সামৰণি পৰিব। অনুষ্ঠানটোত উপস্থিত থকা সকলোৰে মাস্ক পৰিধান বাধ্যতামূলক কৰাৰ লগতে সমিতিৰ তৰফৰ পৰা চেনিটাইজাৰৰ ব্যৱস্থা কৰা হৈছে বুলিও সম্পাদকদ্বয়ে জানিয়ে দিয়ে। উল্লখযোগ্য যে ২০১৭ চনৰ পৰা অসম চৰকাৰে প্ৰতি দুবছৰৰ অন্তৰে অন্তৰে শিল্পী গৰাকীৰ নামত বঁটা প্ৰদান কৰি আহিছে ।
বাতৰি যুগুতালে জামুগুৰিহাটৰ পৰা ৰাতুল হাজৰিকাই

কামৰূপ জিলাত গণৰাজ্য দিৱস উদ্‌যাপনৰ প্ৰস্তুতি সম্পৰ্কীয় পৰ্যালোচনা সভা অনুষ্ঠিত

কোভিডৰ বৰ্দ্ধিত সংক্ৰমণৰ প্ৰতি লক্ষ্য ৰাখি সমাগত ৭৩ সংখ্যক গণৰাজ্য দিৱসটি এইবাৰ কামৰূপ জিলাত অনুষ্টুপীয়াকৈ উদ্‌যাপনৰ সিদ্ধান্ত গ্ৰহণ কৰা হৈছে৷ এই দিৱস উদ্‌যাপনৰ প্ৰস্তুতি সম্পৰ্কত পুনৰালোচনা কৰাৰ অৰ্থে আজি জিলা উন্নয়ন আয়ুক্ত নৰসিং বে’ৰ সভাপতিত্বত উপায়ুক্তৰ কাৰ্যালয় সভাকক্ষত জিলাখনৰ বিভিন্ন বিভাগৰ বিষয়াসকলৰ উপৰি আৰক্ষী প্ৰশাসন, সামৰিক আৰু অৰ্দ্ধসামৰিক বাহিনীৰ প্ৰতিনিধিসকলৰ উপস্থিতিত অনুষ্ঠিত সভাত এই সিদ্ধান্ত গ্ৰহণ কৰা হয়৷ এই অনুসৰি পূৰ্বৰ সিদ্ধান্তমতে প্ৰস্তুতি আৰম্ভ কৰা সকলো সাংস্কৃতিক আৰু অন্যান্য কাৰ্যসূচী বাতিল কৰা হয়৷

চৰকাৰী নিৰ্দেশনা অনুসৰি কোভিডৰ নীতি-নিৰ্দেশনা সম্পূৰ্ণৰূপে মানি ৰাষ্ট্ৰীয় পতাকা উত্তোলন, আৰক্ষী, সামৰিক আৰু অৰ্দ্ধসামৰিক বাহিনীৰ দ্বাৰা প্ৰদৰ্শিত কুচ-কাৱাজ আৰু মুখ্য অতিথিৰ ভাষণেৰে আগন্তুক গণৰাজ্য দিৱসটি উদ্‌যাপন কৰা হ’ব৷ উল্লেখযোগ্য যে প্ৰতিকূল পৰিস্থিতিৰ প্ৰতি লক্ষ্য ৰাখি এইবাৰৰ গণৰাজ্য দিৱস উদ্‌যাপনৰ কাৰ্যসূচীত ৬০ বছৰৰ ঊদ্ধৰ্ৰ লোকসকলৰ লগতে ১৫ বছৰৰ তলৰ শিশুসকলক উপস্থিত থাকিবলৈ উৎসাহিত কৰা হোৱা নাই৷

আজিৰ সভাত বিভিন্ন বিভাগ, সামৰিক তথা অদ্ধৰ্সামৰিক বাহিনীৰ প্ৰতিনিধিসকলৰ উপৰি কামৰূপ জিলা পৰিষদৰ মুখ্য কাৰ্যবাহী বিষয়া পৰাগ কুমাৰ কাকতি, জিলাখনৰ অতিৰিক্ত উপায়ুক্তসকল ক্ৰমে ধ্ৰুৱজ্যোতি দাস, সিদ্ধাৰ্থ গোস্বামী, প্ৰণৱ দত্ত গোস্বামী আৰু কমল বৰুৱাকে ধৰি জিলা প্ৰশাসনৰ অন্যান্য বিষয়াসকল উপস্থিত থাকে৷

২৫ জানুৱাৰীৰ পৰা শ্বুটিং আৰম্ভ হ`ব গেংছ অফ এ ফেমিলি

জ্যোতি চিত্ৰবনত অলপতে গেংছ অফ এ ফেমিলি শীৰ্ষক এখন চিনেমাৰ মুহুৰত অনুষ্ঠিত হয়।জাভেদ কাইছাৰৰ পৰিচালিত এই চিনেমাখন আগৰকাঠ ৰপ্তানিকৰ্তাৰ জীৱনৰ আধাৰত নিৰ্মিত হৈছে।চিনেমাখনৰ শ্বুটিং ২৫ জানুৱাৰীৰ পৰা আৰম্ভ হ`ব।

ঢকুৱাখনাত স্বামী বিবেকানন্দৰ জীৱনচৰ্যা সন্দৰ্ভত ৰচনা প্ৰতিযোগিতা

আধুনিক ভাৰতৰ স্ৰষ্টা স্বৰূপ মহান দাৰ্শনিক ,স্বামী বিবেকানন্দৰ জন্ম জয়ন্তী উপলক্ষত ঢকুৱাখনাত বৃহস্পতি বাৰে অনুষ্ঠিত কৰা হয় যুৱ দিৱস। ভাৰতীয় জনতা পাৰ্টিৰ ঢকুৱাখনা জিলা সমিতিৰ ভাতৃ সংগঠন ঢকুৱাখনা জিলা যুৱ মৰ্চাৰ  উদ্যোগত ,ঢকুৱাখনা মণ্ডল যুৱ মৰ্চাৰ সহযোগত বৃহস্পতি বাৰে এই যুৱ দিৱস দিনজোৰা কাৰ্যসূচীৰে পালন কৰা হয়।  ঢকুৱাখনা নৰ্মাল স্কুল প্ৰাংগনত কোভিড বিধি মানি অনুষ্ঠিত এই দিৱসৰ সতে সংগতি ৰাখি শিক্ষাৰ্থী সকলৰ মাজত ৰচনা প্ৰতিযোগিতা অনুষ্ঠিত কৰা হয়।

ঢকুৱাখনা সংগঠনিক জিলা ভিত্তিত অনুষ্ঠিত এই প্ৰতিযোগিতাত বিভিন্ন শিক্ষানুষ্ঠানৰ গৰিষ্ঠ সংখ্যক শিক্ষাৰ্থীয়ে অংশ গ্ৰহণ কৰে।স্বামী বিৱেকানন্দৰ জীৱন দৰ্শন শীৰ্ষক এই ৰচনা প্ৰতিযোগিতাত শ্ৰেষ্ঠ বিবেচিত প্ৰতিযোগী সকলক গ্ৰন্থ সম্ভাৰ , মানপত্ৰ আদিৰে আৰু প্ৰতিযোগিতাত অংশ গ্ৰহণ কৰা সকলো প্ৰতিযোগীক মানপত্ৰ আৰু কলমেৰে মান্যতা প্ৰদান কৰা হয়।  যুৱ মৰ্চাৰ ঢকুৱাখনা মণ্ডল সমিতিৰ সাধাৰণ সম্পাদক পলাশ কোঁৱৰে আঁত ধৰা যুৱ দিৱসৰ অনুষ্ঠানত ঢকুৱাখনা জিলা যুৱ মৰ্চাৰ সভাপতি বৃকোদৰ দাস, সাধাৰণ সম্পাদক মিগম পেগু ,নৰ্মাল স্কুলৰ অধ্যক্ষ লক্ষী কোঁৱৰ, শিক্ষয়িত্ৰী অপৰাজিতা বুঢ়াগোহাঁই,শংকৰদেৱ শিশু নিকেতনৰ আচাৰ্য ৰাজীৱ তামুলী ,শিক্ষক সুভাষ বৰপাত্ৰ গোহাঁই, বিদ্যুৎ চমুৱাৰ লগতে যুৱ মৰ্চাৰ গৰিষ্ঠ সংখ্যক কাৰ্যকৰ্তা উপস্থিত থাকি প্ৰতিযোগী সকলক পুৰস্কৃত কৰে  আৰু মহান দাৰ্শনিক গৰাকীৰ ভাবাদৰ্শ আৰু মাৰ্গ দৰ্শনেৰে নৱ প্ৰজন্মক আগুৱাই গৈ এখন স্বনির্ভৰশীল আৰু প্ৰগতিশীল দেশ গঢ়াত অৱদান যোগাই ,দেশ মাতৃৰ বাবে উৎকৃষ্ট সেৱা আগবঢ়োৱাৰ পৰম অংশীদাৰ হোৱাৰ পৰামৰ্শ আগবঢ়ায়।
বাতৰি যুগুতালে অমৃত পৱন বৰাই ।