ক’ভিড-১৯ ব্যৱস্থাপনা সন্দৰ্ভত শিৱসাগৰত সাংসদ কামাখ্যা প্ৰসাদ তাছাৰ পৰ্যালোচনা বৈঠক

ৰাজ্য সভাৰ সাংসদ কামাখ্যা প্ৰসাদ তাছাই অলপতে শিৱসাগৰ জিলাত উপস্থিত হৈ জিলাখনৰ ক’ভিড-১৯ ব্যৱস্থাপনাৰ বুজ লবলৈ এখন পৰ্যালোচনা বৈঠকত অংশগ্ৰহণ কৰে।

উপায়ুক্ত কাৰ্য্যালয়ৰ চুকাফা সভাকক্ষত অনুষ্ঠিত এই বৈঠকত সাংসদ তাছাই ক’ভিড-১৯ ৰোগৰ ভয়াবহতা তথা ব্যাপক গনসংক্ৰমণৰ প্ৰতি লক্ষ্য ৰাখি জিলাখনত ক’ভিড-১৯ ৰোগৰ পৰীক্ষণ বৃদ্ধি কৰাৰ পোষকতা কৰে। তেওঁ ৰাইজৰ মাজত ক’ভিডৰ বিৰূদ্ধে ব্যাপক হাৰত সচেতনতা আৰু সজাগতা বৃদ্ধিৰ আহ্বান জনোৱাৰ লগতে অনুভাষ যন্ত্ৰৰ দ্বাৰা বহুল ভাৱে ভ্ৰাম্যমাণ প্ৰচাৰ চলাই যাবলৈ পৰামৰ্শ দিয়ে।

নিজ বক্তব্যত তেওঁ চাহ-বাগিচা সমূহত অতিমাৰী ক’ভিড-১৯ -ৰ সংক্ৰমণ ৰোধৰ বাবে কাৰ্যকৰী পদক্ষেপ গ্ৰহণ কৰিবলৈ প্ৰশাসন তথা চাহ-বাগিচা কৰ্তৃপক্ষক নিৰ্দেশ দিয়ে। চাহ-বাগিচা এলেকাত ক’ভিড ব্যৱস্থাপনা তদাৰক কৰাৰ বাবে তেওঁ সমূহ বাগিচা কৰ্তৃপক্ষক ন’ডেল বিষয়া সহ তদাৰকী গোট বা টাস্ক ফৰ্চ গঠন কৰি সেই তালিকা ২৬ মে’ তাৰিখৰ ভিতৰত উপায়ুক্ত কাৰ্য্যালয়ত দাখিল কৰিবলৈ নিৰ্দেশ দিয়ে। চাহ-বাগিচা এলেকাত থকা ক’ভিড কেয়াৰ চেণ্টাৰ সমূহৰ আন্তঃগাঁথনি শক্তিশালী কৰাৰ লগতে প্ৰয়োজনীয় সা-সুবিধা মজুত থকাটো সুনিশ্চিত কৰিবলৈও সাংসদ গৰাকীয়ে বাগিচা কৰ্তৃপক্ষক নির্দেশ দিয়ে। এই ক্ষেত্ৰত কোনো গাফিলতি সহ্য কৰা নহ’ব বুলিও তেওঁ সকীয়াই দিয়ে। তেওঁ লগতে চাহ বাগিচা সমূহৰ প্ৰৱেশ দ্বাৰত থাৰ্মেল স্কেনাৰৰ দ্বাৰা দেহৰ তাপমান পৰীক্ষণ তথা চেনিটাইজাৰৰ ব্যৱস্থা মজুত ৰাখিবলৈ নির্দেশ দিয়ে। তেওঁ চাহ বাগিচা সমূহৰ শ্ৰমিক সকলৰ সুবিধাৰ্থে বাগিচা এলেকাৰ দোকান সমূহ পুৱা সোনকালে খোলাৰ ব্যৱস্থা কৰিবলৈও আহ্বান জনায়। তেওঁ চাহ বাগিচা এলেকাত অনুভাষ যন্ত্ৰৰ দ্বাৰা ব্যাপক হাৰত ভ্ৰাম্যমাণ প্ৰচাৰৰ উদ্যোগ গ্ৰহণ কৰিবলৈ নিৰ্দেশ দিয়ে।

বৈঠকত সাংসদ তাছাই ৰাজহ চক্ৰ বিষয়া সকলৰ তত্বাৱধানত তৃণমূল পৰ্য্যায়ত ক’ভিড-১৯ ব্যৱস্থাপনাৰ তদাৰক কৰাৰ উদ্দেশ্যে জিলাখনৰ প্ৰতিখন গাঁৱত গাওঁবুঢ়া, গাঁওৰক্ষী বাহিনী তথা পঞ্চায়তৰ সভাপতি- সম্পাদক সহ অনতিপলমে একোখনকৈ মাইক্ৰ টাস্ক ফৰ্চ গঠন কৰি সক্ৰিয় কৰাৰ পোষকতা কৰে। তদ্রুপ ভাৱে তেওঁ চহৰ অঞ্চলৰ প্ৰতিখন ৱাৰ্ডত একোটাকৈ মাইক্ৰ টাস্ক ফৰ্চ গঠন কৰিবলৈ আহ্বান জনায়।

সাংসদ গৰাকীয়ে ক’ভিড-১৯ ৰোগৰ সংক্ৰমণ ৰোধৰ ক্ষেত্ৰত মাল পৰিবাহী ট্ৰাক সমূহৰ সামগ্ৰী বোজাই কৰা আৰু নমোৱা আস্থানৰ ক্ষেত্ৰত বিশেষ সাৱধানতা অৱলম্বন কৰাৰ প্ৰয়োজনীয়তা আছে বুলিও উল্লেখ কৰে।

বৈঠকত শিৱসাগৰ জিলাৰ উপায়ুক্ত বিষ্ণু কমল বৰাই জিলাখনৰ ক’ভিড-১৯ ব্যৱস্থাপনা সম্পৰ্কে বিস্তৃত প্ৰতিবেদন আগবঢ়ায়। তেওঁ উল্লেখ কৰে যে, ১ মাৰ্চ, ২০২১ তাৰিখৰ পৰা ২৪ মে’, ২০২১ তাৰিখলৈ জিলাখনত ৭৬,৭৮৪ গৰাকী লোকৰ ক’ভিড পৰীক্ষা কৰা হৈছে; ইয়াৰে ৫,৪০০ গৰাকীৰ আৰ. টি. পি. চি. আৰ. আৰু ৭১,৩৮৪ গৰাকীৰ ৰেপিড এন্টিজেন টেষ্ট কৰোৱা হৈছে। বৰ্তমানলৈ ক’ভিড পজিটিভ ৰোগীৰ সংখ্যা ৩,২৭৩ গৰাকী আৰু বৰ্তমানে সক্ৰিয় পজিটিভ ৰোগীৰ সংখ্যা ১,২০৮ গৰাকী। তেওঁ উল্লেখ কৰে যে, বৰ্তমানে ৩৮৯ গৰাকী ক’ভিড ৰোগী চিকিৎসালয়ত চিকিৎসাধীন হৈ আছে আৰু ইয়াৰ বিপৰীতে ৮১৯ গৰাকী গৃহ আছুতীয়াকৰণত আছে। অতিমাৰী ক’ভিড-১৯ -ৰ বাবে জিলাখনৰ ৩৮ গৰাকী ৰোগীৰ  মৃত্যু হৈছে বুলিও তেওঁ সদৰি কৰে। জিলাখনত ক’ভিড ৰোগী সুস্থ হোৱাৰ হাৰ ৯৮ শতাংশ বুলিও তেওঁ উল্লেখ কৰে। উপায়ুক্ত গৰাকীয়ে লগতে কয় যে, ক’ভিড ৰোগীৰ চিকিৎসাৰ বাবে বিভিন্ন চিকিৎসালয় তথা ক’ভিড কেয়াৰ চেণ্টাৰত ৪৮৭ খন বিচনা মজুত ৰখা হৈছে আৰু ইয়াৰে ২৭৫ খনত লক্ষণযুক্ত ক’ভিড ৰোগীৰ চিকিৎসা চলি আছে। জিলাখনত মুঠ ১২৮৪ টা কন্টেইনমেণ্ট জ’ন নিৰ্দিষ্ট কৰা হৈছিল, যাৰ ৫৬১ খন উঠাই লোৱা হৈছে আৰু ৭২৩ খন বৰ্তমানে সক্ৰিয় হৈ আছে। ইতিমধ্যে ৮৬২ গৰাকী কন্টেইনমেণ্ট জ’নৰ বাসিন্দাক সাহায্য সামগ্ৰী প্ৰদান কৰা হৈছে। জিলা উপায়ুক্ত গৰাকীয়ে নিজ বক্তব্যত উল্লেখ কৰে যে, বৰ্তমানলৈ ৯৭,৭০৫ গৰাকী লোকক ক’ভিড-১৯ -ৰ প্ৰতিষেধক প্ৰদান কৰা হৈছে। অক্সিজেনৰ মজুতকৰণৰ সন্দৰ্ভত তেওঁ কয় যে, বৰ্তমানে জিলাখনত ১৮০ টা B-type অক্সিজেন চিলিণ্ডাৰ, ৪০ টা  D-type অক্সিজেন চিলিণ্ডাৰ, আৰু ৬৩ খন Pipeleine support বিচনা মজুত আছে। তেওঁ লগতে উল্লেখ কৰে যে, জিলাখনৰ ১৪ খন ১০৮- এম্বুলেঞ্চৰ ৯ খন ক’ভিড-১৯ আক্রান্ত ৰোগীৰ যাতায়তৰ ক্ষেত্ৰত ব্যৱহাৰ কৰা হৈ আছে।

আজিৰ বৈঠকত আৰক্ষী অধীক্ষক ৰাকেশ ৰৌশন, জিলা উন্নয়ন আয়ুক্ত প্ৰণৱজিত কাকতি, জিলা স্বাস্থ্য সেৱাৰ যুটীয়া সঞ্চালক ডাঃ স্যমন্ত মাধৱ শৰ্মা, নাজিৰাৰ মহকুমাধিপতি লখিমী দত্ত, ৰাজহ চক্ৰ বিষয়াসকল তথা অন্যান্য প্ৰশাসনিক বিষয়াসকল, স্বাস্থ্য বিভাগৰ বিষয়াসকল, চাহ খেতিয়ক (tea planters), কিছু সংখ্যক চাহ-বাগিচাৰ পৰিচালক আৰু বাগিচাত কৰ্তব্যৰত চিকিৎসকৰ লগতে আছু, টাই আহোম আৰু চাহ জনজাতি সংগঠনৰ কিছুসংখ্যক প্ৰতিনিধি উপস্থিত থাকে।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

প্ৰস্তুতি দেৱীৰ বাঁও চকু মোৰ লৰে দৃশ্য শ্ৰব্য মুকলি

সংগীত জগতত ভুমুকি মৰা নবাগতা কণ্ঠশিল্পী প্ৰস্তুতি দেৱীৰ কণ্ঠ আৰু কেশৱ নয়নৰ কথা-সুৰেৰে এটি সুমুধুৰ গীত ‘বাঁও চকু মোৰ লৰে’ আজি শুভমুক্তি হয়। ভোগালী বিহুৰ মাজতে অসমবাসীৰ মাজলৈ এই সুৰীয়া গীতটি কণ্ঠশিল্পীগৰাকীয়ে উপহাৰ দিয়ে। গীতটি আনুষ্ঠানিকভাৱে শুভমুক্তি দিয়ে বিশিষ্ট কণ্ঠশিল্পী, সংগীত পৰিচালক জে পি দাস আৰু মনীষা হাজৰিকাই। লগতে উপস্থিত থাকে চাজু আহমেদ, মানস হাজৰিকা আৰু সুনয়না। গীতটি মুকলি অনুষ্ঠানত বহুকেইগৰাকী বিশিষ্ট ব্যক্তি উপস্থিত থাকে।বেলতলাস্থিত হোটেল ৰয়েল দি কাছাত আয়োজিত এক গাম্ভীৰ্যপূৰ্ণ অনুষ্ঠানত আনুষ্ঠানিকভাৱে মুকলি কৰি কণ্ঠশিল্পী জে পি দাসে কয় যে, গীতটি অতিকে মনোমোহা হৈছে। গীতটিৰ কণ্ঠ হৃদয়স্পৰ্শী।অনাগত দিনটো প্ৰস্তুতি দেৱীয়ে এনে ধৰণৰ গীত অসমবাসী ৰাইজলৈ আগবঢ়াই যাব বুলি আশা কৰিছোঁ। তেওঁলৈ অশেষ শুভ কামনা থাকিল। অসমবাসীয়ে গীতটি আঁকোৱালি ল’ব বুলি আশা প্ৰকাশ কৰিলো।একেদৰে মনীষা হাজৰিকাই কয়, গীতটি সুৱলা হৈছে। গীতটিৰ কথা-সুৰ সুন্দৰ। গীতটি অসমবাসীয়ে আদৰি ল’ব। গীতটি সম্পৰ্কে কিছু বক্তব্য ৰাখে কণ্ঠশিল্পী প্ৰস্তুতি দেৱীয়ে।

গণৰাজ্য দিৱসত কোন মন্ত্ৰীয়ে ক`ত পতাকা উত্তোলন কৰিব

ক’ভিড প্রট’কলৰ মাজেৰে দেশৰ ৭৩ সংখ্যক গণৰাজ্য দিৱস উদযাপনৰ প্রস্তুতি চলিছে৷ মহামাৰীৰ বর্ধিত সংক্রমণৰ প্রতি লক্ষ্য ৰাখি এইবাৰৰ গণৰাজ্য দিৱস উদ্যাপনৰ পৰিসৰ কেতবোৰ ক্ষেত্রত সীমাবদ্ধ থাকিব৷ বিশেষকৈ কোনো ধৰণৰ সাংস্কৃতিক কার্যসূচী নাথাকে বুলি ইতিমধ্যে সদৰী কৰিছে স্বাস্থ্যমন্ত্রী কেশৱ মহন্তই৷ ইয়াৰ মাজতে কোন মন্ত্রী, স্বায়ত্তশাসিত পৰিষদৰ মুখ্য কার্যবাহী সদস্য, উপ–মুখ্য কার্যবাহী সদস্যই কোন জিলাত গণৰাজ্য দিৱসত ৰাষ্ট্রীয় পতাকা উত্তোলন কৰিব, সেই সন্দর্ভত মুখ্যমন্ত্রী কার্যালয়ৰ তৰফৰ পৰা এক নির্দেশনা জাৰি কৰা হৈছে৷ নির্দেশনাটোত উল্লেখ কৰা মতে মন্ত্রী ৰঞ্জিত কুমাৰ দাসে নলবাৰীত, অতুল বৰাই যোৰহাটত, উর্খাও গৌৰা ব্রহ্মই তামুলপুৰত, চন্দ্রমোহন পাটোৱাৰীয়ে গোৱালপাৰাত, পৰিমল শুক্লবৈদ্যই বঙাইগাঁৱত, কেশৱ মহন্তই ডিব্রুগড়ত, ডাঃ ৰণোজ পেগুৱে শোণিতপুৰত, অশোক সিংহলে কাছাৰত, যোগেন মহনে লখিমপুৰত, সঞ্জয় কিষাণে গোলাঘাটত, অজন্তা নেওগে নগাঁৱত, পীয়ূষ হাজৰিকাই তিনিচুকীয়াত আৰু বিমল বৰাই ধুবুৰী জিলাত ৰাষ্ট্রীয় পতাকা উত্তোলন কৰিব৷ সেইদৰে বিটিচিৰ মুখ্য কার্যবাহী সদস্য প্রমোদ বড়োৱে কোকৰাঝাৰত, উপ–মুখ্য কার্যবাহী সদস্য গোবিন্দ চন্দ্র বসুমতাৰীয়ে ওদালগুৰিত, কার্বি আংলং স্বায়ত্তশাসিত পৰিষদৰ মুখ্য কার্যবাহী সদস্য তুলিৰাম ৰংহাঙে কার্বি আংলঙত আৰু উত্তৰ কাছাৰ পার্বত্য স্বায়ত্তশাসিত পৰিষদৰ মুখ্য কার্যবাহী সদস্য দেৱলাল গার্লোছাই ডিমা হাছাও জিলাত উত্তোলন কৰিব গণৰাজ্য দিৱসৰ ৰাষ্ট্রীয় পতাকা৷

আৰ্যভট্ট বিজ্ঞান কেন্দ্ৰ ৰাণী ব্লকৰ উদ্যোগত ধাৰাপুৰ উচ্চ মাধ্যমিক বিদ্যালয়ত বিজ্ঞান ভিত্তিক প্ৰতিযোগীতা

ধাৰাপুৰ উচ্চ মাধ্যমিক বিদ্যালয়ত আজি বিজ্ঞান ভিত্তিক এখনি প্ৰতিযোগিতা অনুষ্ঠিত হয় । ধাৰাপুৰ উচ্চতৰ মাধ্যমিক আৰু পলাশবাৰী আঞ্চলিক হাইস্কুলৰ ছাত্ৰ- ছাত্ৰী সকলে বিজ্ঞানৰ আৰ্হি, আকস্মিক বক্তৃতা আৰু পষ্টাৰ লিখাৰ প্ৰতিযোগিতাত অংশ গ্ৰহন কৰে । প্ৰতিযোগিতাৰ অন্তত ধাৰাপুৰ উচ্চ মাধ্যমিক বিদ্যালয়ৰ পৰিচালনা সমিতিৰ সভাপতি তৰুন চন্দ্ৰ দাসৰ সভাপতিত্বত বটাঁ বিতৰণি সভা অনুষ্ঠিত হয় । ধাৰাপুৰ উচ্চতৰ মাধ্যমিক বিদ্যালয়ৰ অধ্যক্ষ উৎপল শৰ্মা, পশ্চিম গুৱাহাটী মহাবিদ্যালয়ৰ প্ৰৱক্তা ড°হেমন্ত কলিতা, পলাশবাৰী আঞ্চলিক হাইস্কুলৰ শিক্ষক দীনেশ শৰ্মা, খগেন মেধি, মৰমী শৰ্মা আদিয়ে প্ৰতিযোগীতা সন্দৰ্ভত বক্তব্য আগবঢ়ায় । বিজয়ী প্ৰতিযোগী সকলোৰ মাজত বঁটা আৰু মানপত্ৰ বিতৰন কৰে ।

জোনবিল মেলাত মন্ত্ৰী পীযুষ হাজৰীকা: ১৮ গৰাকী তিৱা ৰজাক ৰাজভাট্টা প্ৰদান

অসম চৰকাৰৰ তথ্য, জনসংযোগ, জলসম্পদ আৰু সংসদীয় পৰিক্ৰমা বিভাগৰ মন্ত্ৰী পীযুষ হাজৰীকাই আজি মৰিগাঁও জিলাৰ ঐতিহাসিক জোনবিল মেলাত উপস্থিত থাকি গোভা ৰজা দীপচিং দেওৰজা সহিতে ১৮ গৰাকী সন্মানীয় তিৱা ৰজাক সম্বৰ্ধনা জনোৱাৰ লগতে মুখ্যমন্ত্ৰীৰ হৈ এক লাখ টকাকৈ ৰাজভাটাৰ চেক বিতৰণ কৰে । লগতে মন্ত্ৰীগৰাকীয়ে ৫০ লাখ টকা ব্যয় সাপেক্ষে নিৰ্মাণ কৰা অতিথি আৰু সংগ্ৰহালয় গৃহৰ উন্মোচন কৰে ।

ৰাজ্য চৰকাৰৰ ক’ভিদ বিধি মানি অনুষ্টুপীয়াকৈ আয়োজিত জোনবিল মেলাত অংশ লৈ মন্ত্ৰী পীযুষ হাজৰীকাই কয় যে জোনবিল মেলা হৈছে আমাৰ তিৱা সম্প্ৰদায়ৰ গৌৰৱ আৰু আমাৰ সংস্কৃতিৰ এক অন্যতম অনুস্থান । জোনবিল মেলাৰ বিনিময় প্ৰথাৰ ঐতিহাসিক গুৰুত্বৰ কথা উল্লেখ কৰি মন্ত্ৰীগৰাকীয়ে কয় যে অসমৰ ঐতিহ্য আৰু সংস্কৃতিক কেতিয়াও উপেক্ষা কৰিব নোৱাৰো ।ৰজা জোঙাল বলহুৰ শৌৰ্য-বীৰ্যৰ কথা সোৱঁৰি মন্ত্ৰীগৰাকীয়ে কয় যে এই শৌৰ্য বীৰ্যৰ ধাৰাবাহিকতা আজিও তিৱাসকলে ৰক্ষা কৰি আহিবলৈ সক্ষম হৈছে । 

আনহাতে বিগত সময়ত তিৱা ৰজাসকলক বছৰি ৬০ হাজাৰ টকাৰ ভাট্টা দি অহাৰ বিপৰীতে এই বৰ্ষৰপৰা তেঁওলোকক বছৰি ১ লাখকৈ ৰাজভাট্টা দিয়া হৈছে বুলিও মন্ত্ৰীগৰাকীয়ে উল্লেখ কৰে।পাছবেলালৈ মন্ত্ৰীগৰাকীয়ে জাগীৰোড সমষ্টিৰ কেইবাটাও স্থানত অংগনবাদী কেন্দ্ৰৰ আধাৰশিলা স্থাপন কৰে ।

জামুগুৰিহাটত শোণিতকোঁৱৰ গজেন বৰুৱা দিৱস উদযাপন

অসমৰ সাংস্কৃতিক ক্ষেত্ৰৰ এগৰাকী নক্ষত্র স্বৰূপ,ঐতিহ্য মণ্ডিত বাৰেচহৰীয়া ভাওনা, বৰপুখুৰীপাৰৰ মুকলি বিহুক জগত সভাত পৰিচয় কৰি স্বৰ্ণ শিখৰত উপনীত কৰোতা, শোণিতকোঁৱৰ গজেন বৰুৱাৰ স্মৃতি দিৱস আজি বাৰেচহৰীয়া ভাওনা প্ৰকল্প স্থলীত চৰকাৰী নীতি-নিৰ্দেশনা অনুসৰি অনুষ্ঠুপীয়াকৈ পালন কৰা হয় । চতিয়া বিধানসভা সমষ্টিৰ বিধায়ক তথা গৰুখুঁটি প্ৰকল্পৰ অধ্যক্ষ পদ্ম হাজৰিকাক মুখ্য উপদেষ্টা আৰু বাৰেচহৰীয়া ভাওনা কমিটিৰ সভাপতি ভৱ গোস্বামীক উপদেষ্টা হিচাপে লৈ গঠন কৰা উদ্ যাপন সমিতিখনে উক্ত দিৱসটি বৰ্ণাঢ্য কাৰ্যসূচীৰে পালনৰ আয়োজন কৰিছিল যদিও ক’ভিদ পৰিস্থিতিৰ বাবে অধিকাংশ কাৰ্যসূচী বাতিল কৰি অনুষ্ঠুপীয়াকৈ পালন কৰা হয়। আজি পুৱা ৯ বজাত বাৰেচহৰীয়া ভাওনা প্ৰকল্প স্থলীৰ শ্বহীদ বেদী প্ৰসংগত থকা শোণিতকোঁৱৰ গজেন বৰুৱাৰ প্ৰতিমূৰ্তিত অঞ্চলটোৰ অনুষ্ঠানসমূহৰ বিষয়ববীয়া আৰু সীমিত সংখ্যক ৰাইজৰ উপস্থিতিত শ্ৰদ্ধাঞ্জলি অনুষ্ঠান অনুষ্ঠিত হয় আৰু সন্ধিয়া বন্তি প্ৰজ্বলনেৰে বৰ্ষটোত কাৰ্যসূচীৰ সামৰণি পৰিব। অনুষ্ঠানটোত উপস্থিত থকা সকলোৰে মাস্ক পৰিধান বাধ্যতামূলক কৰাৰ লগতে সমিতিৰ তৰফৰ পৰা চেনিটাইজাৰৰ ব্যৱস্থা কৰা হৈছে বুলিও সম্পাদকদ্বয়ে জানিয়ে দিয়ে। উল্লখযোগ্য যে ২০১৭ চনৰ পৰা অসম চৰকাৰে প্ৰতি দুবছৰৰ অন্তৰে অন্তৰে শিল্পী গৰাকীৰ নামত বঁটা প্ৰদান কৰি আহিছে ।
বাতৰি যুগুতালে জামুগুৰিহাটৰ পৰা ৰাতুল হাজৰিকাই

কামৰূপ জিলাত গণৰাজ্য দিৱস উদ্‌যাপনৰ প্ৰস্তুতি সম্পৰ্কীয় পৰ্যালোচনা সভা অনুষ্ঠিত

কোভিডৰ বৰ্দ্ধিত সংক্ৰমণৰ প্ৰতি লক্ষ্য ৰাখি সমাগত ৭৩ সংখ্যক গণৰাজ্য দিৱসটি এইবাৰ কামৰূপ জিলাত অনুষ্টুপীয়াকৈ উদ্‌যাপনৰ সিদ্ধান্ত গ্ৰহণ কৰা হৈছে৷ এই দিৱস উদ্‌যাপনৰ প্ৰস্তুতি সম্পৰ্কত পুনৰালোচনা কৰাৰ অৰ্থে আজি জিলা উন্নয়ন আয়ুক্ত নৰসিং বে’ৰ সভাপতিত্বত উপায়ুক্তৰ কাৰ্যালয় সভাকক্ষত জিলাখনৰ বিভিন্ন বিভাগৰ বিষয়াসকলৰ উপৰি আৰক্ষী প্ৰশাসন, সামৰিক আৰু অৰ্দ্ধসামৰিক বাহিনীৰ প্ৰতিনিধিসকলৰ উপস্থিতিত অনুষ্ঠিত সভাত এই সিদ্ধান্ত গ্ৰহণ কৰা হয়৷ এই অনুসৰি পূৰ্বৰ সিদ্ধান্তমতে প্ৰস্তুতি আৰম্ভ কৰা সকলো সাংস্কৃতিক আৰু অন্যান্য কাৰ্যসূচী বাতিল কৰা হয়৷

চৰকাৰী নিৰ্দেশনা অনুসৰি কোভিডৰ নীতি-নিৰ্দেশনা সম্পূৰ্ণৰূপে মানি ৰাষ্ট্ৰীয় পতাকা উত্তোলন, আৰক্ষী, সামৰিক আৰু অৰ্দ্ধসামৰিক বাহিনীৰ দ্বাৰা প্ৰদৰ্শিত কুচ-কাৱাজ আৰু মুখ্য অতিথিৰ ভাষণেৰে আগন্তুক গণৰাজ্য দিৱসটি উদ্‌যাপন কৰা হ’ব৷ উল্লেখযোগ্য যে প্ৰতিকূল পৰিস্থিতিৰ প্ৰতি লক্ষ্য ৰাখি এইবাৰৰ গণৰাজ্য দিৱস উদ্‌যাপনৰ কাৰ্যসূচীত ৬০ বছৰৰ ঊদ্ধৰ্ৰ লোকসকলৰ লগতে ১৫ বছৰৰ তলৰ শিশুসকলক উপস্থিত থাকিবলৈ উৎসাহিত কৰা হোৱা নাই৷

আজিৰ সভাত বিভিন্ন বিভাগ, সামৰিক তথা অদ্ধৰ্সামৰিক বাহিনীৰ প্ৰতিনিধিসকলৰ উপৰি কামৰূপ জিলা পৰিষদৰ মুখ্য কাৰ্যবাহী বিষয়া পৰাগ কুমাৰ কাকতি, জিলাখনৰ অতিৰিক্ত উপায়ুক্তসকল ক্ৰমে ধ্ৰুৱজ্যোতি দাস, সিদ্ধাৰ্থ গোস্বামী, প্ৰণৱ দত্ত গোস্বামী আৰু কমল বৰুৱাকে ধৰি জিলা প্ৰশাসনৰ অন্যান্য বিষয়াসকল উপস্থিত থাকে৷