ছাত্ৰ ছাত্ৰীৰ শৈক্ষিক ভৱিষ্যত সুৰক্ষিত কৰিবলৈ আহ্বান চৰাইদেউ জিলাৰ চাৰিখন মহাবিদ্যালয় ছাত্ৰ একতা সভাৰ

সমগ্ৰ বিশ্বতে আতংকৰ সৃষ্টি কৰা মহামাৰী ক’ৰণা ভাইৰাছৰ ভয়াবহতাৰ প্ৰতি লক্ষ্য ৰাখি সম্প্ৰতি দেশত অব্যাহত থকা লক ডাউনৰ পৰিপ্ৰেক্ষিতত শিক্ষানুষ্ঠান সমূহ বন্ধ ৰখা হৈছে। তাৰ বিপৰীতে চৰকাৰে শিক্ষানুষ্ঠান সমূহ বিশেষকৈ মহাবিদ্যালয় সমূহৰ শিক্ষকসকলে অনলাইন ব্যৱস্থাৰ জৰিয়তে এতিয়া পাঠদান কৰি ছাত্ৰ-ছাত্ৰীৰ শৈক্ষিক ভৱিষ্যত সুৰক্ষিত কৰিবলৈ চেষ্টা অব্যাহত ৰাখিছে।

 

কিন্তু অতি তাৎপৰ্যপূৰ্ণ কথা এয়ে যে ৰাজ্যৰ এনে কিছু অঞ্চল আছে য’ত ম’বাইল নেটৱৰ্কৰ সমস্যাৰ লগতে বিদ্যুতৰ কোনো ধৰণৰ ব্যৱস্থাই নাই। তেনে পৰিপ্ৰেক্ষিতত বহু সংখ্যক ছাত্ৰ-ছাত্ৰীয়ে অনলাইন পাঠ গ্ৰহণৰ পৰা বঞ্চিত হ’ব লগীয়া হৈছে।

 

আনহাতে অতি কম সময়ৰ ভিতৰতে মহাবিদ্যালয় সমূহৰ ষান্মাসিক পৰ্যায়ৰ চূড়ান্ত পৰীক্ষা সমূহো অনুষ্ঠিত কৰিবলৈ দিহা কৰাত এতিয়া বিপাঙত পৰিছে ছাত্ৰ-ছাত্ৰীসকল। শ্ৰেণীকোঠাত পাঠ গ্ৰহণ নকৰাকৈ এতিয়া বহু ছাত্ৰ ছাত্ৰী মানসিকভাৱে সাজু নহয় পৰীক্ষাত অৱতীৰ্ণ হ’বলৈ। যাৰ ফলত চৰাইদেউ জিলাৰ চাৰিখনকৈ উচ্চ শিক্ষানুষ্ঠানৰ ছাত্ৰ ছাত্ৰীসকলে এতিয়া সমগ্ৰ বিষয়টো হৃদয়ংগম কৰি সঠিক সিদ্ধান্ত গ্ৰহণ কৰিবলৈ ৰাজ্যৰ শিক্ষামন্ত্ৰীক আহ্বান জনাইছে।

 

আজি চৰাইদেউ জিলাৰ সোণাৰি মহাবিদ্যালয়, সোণাৰি বাণিজ্য মহাবিদ্যালয়, সাপেখাতি মহাবিদ্যালয় আৰু বৰহাট মহাবিদ্যালয় ছাত্ৰ একতা সভাই যৌথভাৱে এখন স্মাৰক পত্ৰ ৰাজ্যৰ শিক্ষামন্ত্ৰীলৈ প্ৰেৰণ কৰি ছাত্ৰ-ছাত্ৰীৰ শৈক্ষিক ভৱিষ্যত সুৰক্ষিত কৰাৰ স্বাৰ্থত কেইটামান দাবী উত্থাপন কৰে।

 

স্মাৰকপত্ৰত উল্লেখিত দাবী অনুসৰি আগন্তুক পৰীক্ষাৰ প্ৰস্তুতিৰ বাবে শিক্ষকসকলৰ তত্বাৱধানত ন্যুনতম ৪০-৬০ দিন শিক্ষা আহৰণৰ সুবিধা প্ৰদান কৰা, সাম্প্ৰতিক পৰিস্থিতিত বিপৰ্যয় হোৱা অৰ্থনৈতিক অৱস্থাৰ প্ৰতি লক্ষ্য ৰাখি ছাত্ৰ-ছাত্ৰীৰ সুবিধা হোৱাকৈ পৰীক্ষাৰ মাছুল নিৰ্ধাৰণ কৰা, পূৰ্বৰ প্ৰশ্ন কাকতসমূহৰ গঠন প্ৰণালীৰ বিপৰীতে সাম্প্ৰতিক সময়ৰ প্ৰতি লক্ষ্য ৰাখি প্ৰশ্নকাকতসমূহ প্ৰস্তুত কৰাত কিছু শিথিলতা অৱলম্বন কৰা, যিহেতু এই শিক্ষাবৰ্ষত পাঠ্যসূচী অতি ন্যুনতম পৰ্যায়লৈ আগবঢ়োৱা হ’ল গতিকে এই ক্ষেত্ৰত মহাবিদ্যালয় সমূহৰ বিষয়ভিত্তিক অধ্যাপক সকলক পাঠ্যসূচী অনুসৰি প্ৰশ্নকাকত প্ৰস্তুত কৰিবলৈ স্বতন্ত্ৰতা প্ৰদান কৰা, আনহাতে বিশ্ববিদ্যালয়সমূহত নতুন শিক্ষানীতি প্ৰৱৰ্তন কৰা হৈছে যদিও শিক্ষানীতিৰ পাঠ্যসূচী অনুসৰি একোখন পূৰ্ণাংগ পাঠ্যপুথিৰ অভাৱ হোৱাৰ পৰিপ্ৰেক্ষিতত এই অভাৱ দূৰীকৰণৰ ব্যৱস্থা গ্ৰহণ কৰা, চৰকাৰে তাৎক্ষণিকভাৱে ঘোষণা কৰা লক ডাউনৰ পৰিপ্ৰেক্ষিতত বহু ছাত্ৰ-ছাত্ৰীৰ প্ৰয়োজনীয় কিতাপ পত্ৰসমূহ হোষ্টেলসমূহতে থাকি গ’ল যাৰ ফলত এতিয়া পৰীক্ষাত অৱতীৰ্ণ হ’বলৈ এইসকল ছাত্ৰ-ছাত্ৰী অসমৰ্থ। গতিকে ইয়াৰ সমাধান কৰিবলৈ শিক্ষা মন্ত্ৰীক স্মাৰক পত্ৰৰ জৰিয়তে আহ্বান জনায়। মন কৰিবলগীয়া যে এই সমস্যা সমূহ সমাধান নকৰাকৈ যদি অতি কম সময়ৰ ভিতৰতে পৰীক্ষা অনুষ্ঠিত কৰা হয় তেতিয়া হলে বহু ছাত্ৰ-ছাত্ৰীৰ শৈক্ষিক ভৱিষ্যত এতিয়া অন্ধকাৰ হৈ পৰিব।

খবৰ যুগুতালে সোণাৰিৰ পৰা অভিজিত ভূঞাই..

 

Share on whatsapp
WhatsApp
Share on facebook
Facebook
Share on twitter
Twitter
Share on email
Email

কাইলৈ হ’ব বিশাল গণসমাবেশ -জেৰেঙা পথাৰত চলিছে প্ৰস্তুতি

ঐতিহাসিক জেৰেঙা পথাৰত কালিলৈ অনুষ্ঠিত হ’ব এক বিশাল গণসমাবেশ।এই সভাত উপস্থিত থাকিব দেশৰ প্ৰধানমন্ত্ৰী । ইতিমধ্যে এসপ্তাহ ধৰি সভাৰ যাবতীয় প্ৰস্তুতি অব্যাহত আছে। শিৱসাগৰ জিলা প্ৰশাসনে নিৰাপত্তা ক্ষেত্ৰত পহৰাৰ ব্যৱস্থা কৰিছে। উল্লেখযোগ্য যে এই বিশাল গণ সমাবেশত ৩ লাখ লোকক ভূমি পট্ৰা প্ৰদান কৰিব।দেশৰ প্ৰধানমন্ত্ৰী গৰাকীৰ আগমনকলৈ ৪ খনকৈ হেলিপেড সাজু কৰি তুলিছে। জানিব পৰা মতে প্ৰতিখন জিলাৰ পৰা বিভিন্ন প্ৰতিনিধি এই সমাবেশলৈ আহিব। এই সমাবেশত অংশগ্ৰহণকাৰী সকলে ক’ভিড প্ৰট’কল মনাৰ লগতে কিছু নীতি নিৰ্দেশনা মানি চলিব লাগিব বুলি শিৱসাগৰ জিলা প্ৰশাসনে জানিবলৈ দিছে।

নামৰূপৰ সাৰ কাৰখানালৈ আহিছে ভাল খবৰ

নামৰূপ কাৰখানাৰ বাবে আছে ভাল খবৰ। নামৰূপ সাৰ কাৰখানাৰ চতুর্থ গোটৰ স্থাপন হোৱাৰ সপোন এতিয়া সাৰ্থক হোৱাৰ দিশে আগবাঢ়িছে।আজি কেন্দ্ৰীয় সাৰ আৰু ৰসায়ন বিভাগৰ মন্ত্ৰী সদানন্দ গৌড়াৰে হোৱা এক আলোচনাত উপস্থিত থকাৰ পিছতে কাৰখানাটোৰ চতুৰ্থটো গোট স্থাপনৰ ক্ষেত্ৰত সম্ভাৱনা ব্যক্ত কৰিছে বিত্তমন্ত্ৰী ড০ হিমন্ত বিশ্ব শৰ্মাই। মন্ত্ৰী ড০ শৰ্মাই জনাই যে চতুৰ্থটো গোটক লৈ থকা জটিলতা আঁতৰাবলৈ অসম চৰকাৰে বিনিয়োগৰ পৰিমাণ পূৰ্বৰ ১১ শতাংশৰ পৰিৱৰ্তে ২৬ শতাংশলৈ বৃদ্ধি কৰাৰ প্ৰস্তাৱ দিছে।

লগতে বিত্তমন্ত্ৰী গৰাকীয়ে কয় যে কেন্দ্ৰীয় চৰকাৰে এই সম্পৰ্কত সেউজ সংকেত দিব।উল্লেখযোগ্য যে ১৯৬৯ চনৰ পৰা আৰম্ভ হোৱা কাৰখানাটোৰ ২য় আৰু ৩য় গোটৰ কাম অতি দুৰ্বলভাৱে চলি থকাৰ পিছত ৪ৰ্থটো গোট মুকলি কৰাৰ বাবে চেষ্টা চলাই থকা হৈছিল যদিও ই কাৰ্যতঃ হৈ উঠা নাছিল। কিন্তু আজি বৈঠকত বিত্তমন্ত্ৰী গৰাকীয়ে চতুৰ্থটো গোট স্থাপনৰ স্থাপনৰ সম্ভাৱনাৰ থকা কথা সদৰি কৰে।

গাহৰি পালকৰ সমস্যাক গুৰুত্ব দিয়ক

অসমৰ গাহৰি পালক সকলে দীৰ্ঘদিন ধৰি সন্মুখীন হৈ থকা সমস্যাৰ সমাধানৰ বাবে চৰকাৰ তথা বিভাগীয় কৰ্তৃপক্ষক দৃষ্টিগোচৰ কৰাৰ অৰ্থে কালি এখনি সংবাদমেল অনুষ্ঠিত কৰে।গুৱাহাটী প্ৰেছ ক্লাৱত অনুষ্ঠিত হোৱা সংবাদ মেলখনত উত্তৰ পূব প্ৰগতিশীল গাহৰি পালক সন্থাৰ সম্পাদকে কয় যে লকডাউনৰ বাবে গাহৰি পালক সকলে লকডাউনৰ পিছত গাহৰিৰ বাবে পয্যাপ্ত সামগ্ৰী যোগানৰ ক্ষেত্ৰত বিভিন্ন সমস্যাৰ সন্মুখীন হোৱাৰ লগতে উপাৰ্জনহীনতাত ভূগিছে।ইয়াৰ উপৰিও আফ্ৰিকান ছোৱাইন ফ্লুৱে যথেষ্ট প্ৰভাৱ পেলাইছে।সেয়েহে বিভাগীয় কৰ্তৃপক্ষক গাহৰি পালনৰ ক্ষেত্ৰত সুস্থ পৰিৱেশ গঢ়ি দিবলৈ সংবাদমেলৰ যোগে আহ্বান জনাইছে।

জন্মদিনত অনুৰাগীয়ে লিখিলে সুশান্ত তুমি য’তেই আছা, শান্তিত থাকা

আজি জনপ্ৰিয় অভিনেতা সুশান্ত সিং ৰাজপুতৰ ৩৫ সংখ্যক জন্ম বাৰ্ষিকী।অভিনেতা গৰাকী জন্ম দিনৰ লগত সংগতি ৰাখি ছ’চিয়েল মেডিয়াত হাজাৰ হাজাৰ অনুৰাগীয়ে শুভেচ্ছা জ্ঞাপন কৰি পোষ্ট শ্বেয়াৰ কৰিছে।কোনোৱে ৰাজপুতৰ দৰ্শন, আৰ্দশক সুঁৱৰি অভিনেতা গৰাকী শুভেচ্ছা যাঁচিছে।কোনোৱে অভিনেতা গৰাকীৰ ন্যায়ৰ বাবে এই বিশেষ দিনটোত ঈশ্বৰক প্ৰাৰ্থনা জনাইছে।

ইতিমধ্যে ছ’চিয়েল মেডিয়া ফেচবুকত এটা টেণ্ড আৰম্ভ হৈছে। উল্লেখযোগ্য যে বিগত বৰ্ষৰ ১৪ জুনত অভিনেতা গৰাকীক মুম্বাইত নিজা ফ্লেটত মৃত অৱস্থাত পোৱা গৈছিল ।পৰৱৰ্তী সময়ত অভিনেতা গৰাকীৰ মৃত্যু তদন্ত কৰিবলৈ চি বি আই, এ চি বি আৰু ইউ ডি সক্ৰিয় হৈ পৰিছিল।জনপ্ৰিয় অভিনেতা গৰাকীৰ আজি এই বিশেষ দিনটোত এন ই ফ’কাচ ডট কমৰ পৰিয়ালে শ্ৰদ্ধাৰে স্মৰণ কৰিছোঁ।

ৰবীন্দ্ৰ ভৱনত পৰিবেশিত হ’ল মোক্ষ

ৰবীন্দ্ৰভৱনত আজি সন্ধিয়া ৬ বজাত অসম চৰকাৰৰ সাংস্কৃতিক সঞ্চালকালয়ৰ উদ্যোগত তথা বৰ্তমানৰ সঞ্চালক যাদৱ শইকীয়াৰ নেতৃত্বত,গুৱাহাটীৰ “দৰ্পণ ডান্স অকাডেমী” আৰু সংগীত সত্ৰৰ সহযোগত যোৱা বৰ্ষত মহাপ্ৰয়াণ ঘটা পদ্মশ্ৰী ,সংগীত নাটক অকাডেমী বঁটা প্ৰাপক ভাৰতৰ এগৰাকী যশস্বী নৃত্যবিশাৰদ, সমালোচক কোঠাৰীৰ স্মৃতিত “মোক্ষ” শীৰ্ষক ভাৰতীয় ধ্ৰুপদী নৃত্যৰ এক অনুষ্ঠান পৰিৱেশিত হয়৷এই অনুষ্ঠানটিত নৃত্যাচাৰ্য পদ্মশ্ৰী যতীন গোস্বামী,অসম চৰকাৰৰ সাংস্কৃতিক বিভাগৰ অৱসৰপ্ৰাপ্ত উচ্চপদস্থ বিষয়া স্বপ্ননীল বৰুৱা,আই এ এছ বিষয়া তথা সাংস্কৃতিক ব্যক্তিত্ব মাধুৰীমা বৰুৱা,প্ৰখ্যাত মূকাভিনয় শিল্পী মইনুল হক,গুৱাহাটী বিশ্ববিদ্যালয়ৰ ছাত্ৰ কল্যাণৰ সঞ্চালক ড° ৰঞ্জন কাকতি,গুৱাহাটী বিশ্ববিদ্যালয়ৰ ভাইচ চেঞ্চেলৰ মৃণালজ্যোতি ডেকা বিশিষ্ট অতিথি হিচাপে উপস্থিত থাকে৷এইসকল বিশিষ্ট ব্যক্তিক অনুষ্ঠানটিত সম্বৰ্ধনা জনোৱাৰ লগতে প্ৰয়াত সুনীল কোঠাৰীৰ বিষয়ে কিছু কথাও শ্ৰদ্ধাৰে স্মৰণ কৰা হয়৷বন্তি প্ৰজ্বলনৰে আৰম্ভ হোৱা ‘মোক্ষ’ শীৰ্ষক নৃত্য সন্ধিয়াটিত অৰুণাভজ্যোতি মালাকাৰৰ “খোল বাদন”,স্বনামধন্য নৃত্যশিল্পী অনিতা শৰ্মাৰ “গুৰু বন্দনাৰে সৈতে সত্ৰীয়া নৃত্য”,যশস্বী নৃত্যগুৰু বিপুল দাসৰ “কথক নৃত্য”,খ্যাতনমা নৃত্যশিল্পী তথা প্ৰৱক্তা ড° অঞ্জনাময়ী শইকীয়াৰ “ওডিচি নৃত্য” পৰিবেশনৰ লগতে গুৱাহাটীৰ সংগীত সত্ৰৰ শিল্পীসকলে ‘একলব্য’ আৰু আন এক সত্ৰীয়া নৃত্য প্ৰদৰ্শন কৰে৷

আজি আনুষ্ঠানিক ভাৱে মুকলি হ’ল উদ্যান শস্য মেলা

বৃহস্পতিবাৰৰ পৰা বোকাখাতত তিনিদিনীয়াকৈ অনুষ্ঠিত হ’ল আন্তঃৰাষ্ট্ৰীয় ভাৰ্চুৱেল পদ্ধতিৰে ৰাষ্ট্ৰীয় কৃষি আৰু উদ্যান শস্য মেলা ৷ মুখ্যমন্ত্ৰী সৰ্বানন্দ সোণোৱালে মেলাখন আনুষ্ঠানিকভাৱে মুকলি কৰাৰ কথা আছিল যদিও প্ৰতিকুল বতৰৰ বাবে উপস্থিত থাকিব নোৱাৰি ভাৰ্চুৱেল পদ্ধতিৰে অংশ গ্ৰহণ কৰে ৷ তাৰোপৰি মেলাখনত কেন্দ্ৰীয় কৃষিমন্ত্ৰী নৰেন্দ্ৰ সিং টোমাৰেও ভৰ্চুৱেল পদ্ধতিৰে অংশ গ্ৰহণ কৰে ৷ প্ৰায় দুঘন্টা পলমকৈ আৰম্ভ হোৱা উদ্বোধনী অনুষ্ঠানৰ কৃষিমন্ত্ৰী অতুল বৰাই আদৰণি ভাষণ প্ৰদান কৰাৰ সময়তে ভৰ্তি হৈ থকা মণ্ডপ খালী হৈ পৰা দেখা গ’ল ৷ অনুষ্ঠানত ১২ দেশৰ ৰাষ্টদূত আৰু উচ্চায়ুক্তই অংশ গ্ৰহণ কৰে ৷ এই বৃহৎ মেলাত ৰাজ্যখনৰ ৩৩ খন জিলাৰ ১৮৩ খন বিপনীয়ে অংশ গ্ৰহণ কৰিছে ৷ অৱশ্যে চিপচিপিয়া বৰষুণৰ বাবে উৎসাহ সীমিত হোৱা পৰিলক্ষিত হয় ৷ ৰাজ্যৰ ৫ শ কৃষকে প্ৰতিদিনে প্ৰশিক্ষণ লোৱাৰ লগতে গোলাঘাট জিলাৰ ৬ শ কৃষকে প্ৰতিদিনে প্ৰশিক্ষণ ল’ব ৷ প্ৰতি সন্ধ্যা ৰাজ্যৰ প্ৰতিস্থিত শিল্পীয়ে সাংস্কৃতিক কাৰ্যসূচী পৰিৱেশন কৰিব ৷ আজি প্ৰথম নিশা বিপিন চাওদাং, কল্পনা পাটোৱাৰী, সোমনাথ বৰা আৰু বিমান বৰুৱাৰ লগতে স্থানীয় শিল্পীৰ সাংস্কৃতিক অনুষ্ঠান অনুষ্ঠিত হ’ব ৷

খবৰ যুগুতালে বোকাখাতৰ পৰা দিব্যজ্যোতি হাজৰিকাই..