ক’ভিডৰ পৰিস্থিতিৰ বাবে মহাবিদ্যালয় বন্ধ হৈ থকা পৰিপ্ৰেক্ষিত ছাত্ৰ ছাত্ৰীৰ ঘৰে ঘৰে গৈ তেওঁলোকৰ অধ্যয়ন আৰু স্বাস্থ্যৰ বুজ ল`লে দক্ষিণ কামৰূপ মহাবিদ্যালয়ৰ চাৰিজন শিক্ষকে। মিৰ্জাস্থিত দক্ষিণ কামৰূপ মহাবিদ্যালয়ত দূৰণিবটীয়া অনাগ্ৰসৰ অঞ্চলৰ পৰা আহি অধ্যয়ন কৰা ছাত্ৰ ছাত্ৰী সকল ঘৰতে থাকিব লগা হৈছে। তেনে পৰিস্থিতিতে শিক্ষক হিচাপে নিজৰ ছাত্ৰ ছাত্ৰীৰ প্ৰতি থকা দায়বদ্ধতাক গুৰুত্ব দি নিজাববীয়া প্ৰচেষ্টাত শিক্ষকৰ দলটোৱে বকো সমষ্টিৰ অন্তৰ্গত পিছপৰা চৰ অঞ্চলৰ লগতে সোনতলি, কালাতলি, ছমৰীয়া আৰু ছয়গাও সমষ্টিৰ অন্তৰ্গত জোৰ শিমলু, গৰৈমাৰী, গুমি আদি অঞ্চললৈ গৈ ছাত্ৰ ছাত্ৰীৰ অধ্যয়নৰ বুজ লয়। মহাবিদ্যালয় খনৰ গণিত বিভাগৰ অধ্যাপক প্ৰশান্ত কলিতাৰ নেতৃত্বত যোৱা অধ্যাপকৰ দলটোত আছিল ৰাসায়ন বিজ্ঞান বিভাগৰ অধ্যাপক উৎপল দাস, জৈৱ প্ৰযুক্তি বিজ্ঞান বিভাগৰ অধ্যাপক মানবেন্দ্ৰ কলিতা, ইংৰাজী বিভাগৰ প্ৰাক্তন অধ্যাপক ড: শৈলেন্দ্ৰ কুমাৰ দাস। মহাবিদ্যালয় খনৰ বিজ্ঞান শাখাৰ কৰ্মচাৰী নয়ন কলিতাইও সহযোগ কৰে। ক’ভিড কালীন পৰিস্থিতিৰ মাজত থকা ছাত্ৰ- ছাত্ৰী সকল কেনেদৰে আছে বা পঢ়া শুনা কেনেকৈ কৰিছে বা অনলাইন ক্লাছৰ জৰিয়তে পাঠ্যক্ৰম বুজিছেনে নাই তাৰ খবৰ লয়। দীৰ্ঘদিন ধৰি মহাবিদ্যালয়ৰ শ্ৰেণী সমূহ বন্ধ হৈ থকাৰ ফলত শিক্ষাৰ্থীসকলৰ ব্যাঘাত হৈছে। বিশেষকৈ বিজ্ঞান শাখাত অধ্যয়নৰত শিক্ষাৰ্থী সকলে পাঠ্যক্ৰমৰ বিষয়বস্তু বুজি পোৱাত যথেষ্ট অসুবিধাৰ হৈছে । এই অসুবিধা দূৰ কৰাৰ ক্ষেত্ৰত শিক্ষক কেইজনে বিভিন্ন দিহা পৰামৰ্শ আগবঢ়ায় ।লগতে ছাত্ৰ-ছাত্ৰী মনোবল বৃদ্ধি কৰি অধ্যয়নৰ প্ৰতি আগ্ৰহী কৰাৰ ওপৰত গুৰুত্ব দিয়ে। ক`ভিড পৰিস্থিতিৰ মাজত মিৰ্জাৰ পৰা শিক্ষক কেইজনে ছাত্ৰ ছাত্ৰীৰ ঘৰ বিচাৰি তেওঁলোকৰ কাষলৈ অহাত উৎফুল্লিত হৈ পৰিছে শিক্ষাৰ্থী সকল। উল্লেখ্য যে, নেটৱৰ্ক ভালকৈ নথকাৰ বাবে অনাগ্ৰসৰ অঞ্চলৰ এই সমূহ ছাত্ৰ-ছাত্ৰীয়ে অনলাইন ক্লাছৰ সুবিধাৰ পৰাও বঞ্চিত হৈ আছে। এই চাৰি গৰাকী শিক্ষকে শৈক্ষিক দায়বদ্ধতাৰ নিদৰ্শন দাঙি ধৰি ছাত্ৰ ছাত্ৰীৰ ওচৰলেগৈ তেওঁলোকক নিজৰ ব্যক্তিগত ফোন নম্বৰত ফোন কৰি অধ্যয়নত অসুবিধা পালে যোগাযোগ কৰিবলৈ উপদেশ দিয়ে। শিক্ষক কেইজনে অভিভাৱক সকলৰ সৈতেও তেওঁলোকৰ সন্তানৰ অধ্যয়নত হোৱা সমস্যা আৰু উপায় সন্দৰ্ভত আলোচনা কৰে। শিক্ষাৰ্থীৰ প্ৰতি দায়বদ্ধ শিক্ষক কেইজনৰ এই পদক্ষেপক অভিভাৱক সকলে আদৰণি জনাইছে।
গুৱাহাটী বিশ্ববিদ্যালয় এন এছ এছ কোষৰ ৰাষ্ট্ৰীয় কন্যা শিশু দিবস উদযাপন
আজাদী কা অমৃত মহোৎসবৰ অংশ হিচাপে গুৱাহাটী বিশ্ববিদ্যালয়ৰ ৰাষ্ট্ৰীয় সেৱা আঁচনি কোষে ২৪ জানুৱাৰীত এক বেবিনাৰৰ মাধ্যমত ৰাষ্ট্ৰীয় কন্যা শিশু দিবস উদযাপন কৰে। মুখ্য অতিথি হিচাপে উপস্থিত থাকি বিশ্ববিদ্যালয়খনৰ উপাচাৰ্য প্ৰফেছৰ প্রতাপ জ্যোতি সন্দিকৈয়ে ৰাষ্ট্ৰীয় কন্যা শিশু দিবস উদযাপনৰ গুৰুত্ব সম্পৰ্কে বিস্তৃত আলোচনা কৰি কয় যে কন্যা শিশুৰ প্রতি শ্রদ্ধা প্রথমে ঘৰৰ পৰাই আৰম্ভ কৰা উচিত আৰু এনএছ এছ স্বেচ্ছাসেবকে মানুহৰ মাজলৈ এই বাৰ্তা প্ৰেৰণ কৰিবলৈ আহ্বান জনায় । উত্তৰ পূব এন এছ এছৰ আঞ্চলিক সঞ্চালক দীপক কুমাৰে কাৰ্য্যসূচী বিষয়া আৰু স্বেচ্ছাসেবক সকলক কন্যা শিশুৰ উন্নতি আৰু নিৰাপত্তাৰ বাবে উদ্যোগ লবলৈ আহ্বান জনায় । তেওঁ চৰকাৰী বিভিন্ন আঁচনি , গার্ল চাইল্ড আঁচনিসমূহ এন এছ এছ কাৰ্য্যসূচী বিষয়া আৰু স্বেচ্ছাসেবকসকলে আগুৱাই নিয়াত অৰিহণা যোগাব লাগিব বুলি উল্লেখ কৰে। অতিথি অৰু অংশগ্রহণকাৰীক আদৰণি জনায় বিশ্ববিদ্যালয়ৰ ছাত্ৰকল্যাণ সঞ্চালক তথা এন এছ এছৰ কাৰ্য্যসূচী সমন্বয়ক ডঃ ৰঞ্জন কুমাৰ কাকতিয়ে । তেওঁ কয় যে : কন্যা শিশুৰ অধিকাৰ ,শিক্ষাৰ গুৰুত্ব, স্বাস্থ্য আৰু লিংগ বৈষম্য আৰু শাৰীৰিক নিৰ্যাতনৰ দৰে সমস্যা সম্পৰ্কে সচেতনতাৰ বাবে ৰাষ্ট্ৰীয় কন্যা শিশু দিবস পালন কৰা হয় । স্বাধীনতাৰ ৭৫ বছৰ উদযাপনৰ বাবে ২০ বছৰৰ কম বয়সী ৭৫ জনী কন্যা শিশুক গুৱাহাটী বিশ্ববিদ্যালয় এন এছ এছ কোষৰ অধীনৰ বিভিন্ন কলেজ এন এছ এছ গোটৰ দ্বাৰা সমাজত অসামান্য অৱদানৰ বাবে স্মাৰক,গামোচা আৰু মানপত্ৰৰে সম্বৰ্ধনা জনায় । কলেজৰ অধ্যক্ষ, এনএছএছ প্রোগ্রাম অফিছাৰ আৰুস্বেচ্ছাসেবক সমন্বিতে প্রায় ৩০০ জন অংশগ্রহণকাৰী এই বেবিনাৰত অংশগ্ৰহণ কৰে।
ভিউৱাছৰ মতামত