মহানগৰীৰ আজাৰাস্থিত ঐতিহ্যমণ্ডিত শিক্ষানুষ্ঠান ৰাজধৰ বড়া উচ্চতৰ মাধ্যমিক বিদ্যালয়ৰ হীৰক জয়ন্তী বৰ্ষ উপলক্ষে হীৰক জয়ন্তী উদযাপন সমিতিৰ উদ্যোগত গুৱাহাটীস্থিত মাৰোৱাৰী মেটাৰনিটী হাস্পতাল আৰু লায়ন্স ক্লাব গুৱাহাটীৰ সহযোগত আজি মহানগৰীৰ সমীপৱৰ্তী চকৰ্দো দেশভক্ত তৰুণ ৰাম ফুকন মধ্য ইংৰাজী বিদ্যালয়ত এটি বিনামূলীয়া স্বাস্থ্য শিৱিৰ অনুষ্ঠিত হৈ যায়। উক্ত শিৱিৰ মুকলি কৰে আজাৰা গাঁও পঞ্চায়তৰ সভানেত্ৰী কবিতা বড়ো ৰংপীয়ে। এই অনুষ্ঠানত উদযাপন সমিতিৰ কাৰ্যকৰী সভাপতি ভৱেন চন্দ্ৰ মেধী, উপ সভাপতিদ্বয় চন্দ্ৰ কুমাৰ দাস, মহেশ্বৰ ৰংপী আৰু কোষাধ্যক্ষ জয়ন্ত কুমাৰ পাটগিৰি উপস্থিত থকা এই শিৱিৰ পৰিচালনা কৰে সম্পাদক তপন জখৰীয়াই। স্বাস্থ্য পৰীক্ষা শিৱিৰৰ জৰিয়তে হিতাধিকাৰী সকলৰ চকু, ডায়েবেটিচ, ফিজিওথেৰাপি, প্ৰসুতি আৰু শিশু ৰোগৰ বিনামূলীয়া চিকিৎসা প্ৰদান কৰাৰ লগতে ঔষধ বিতৰণ কৰা হয়। প্ৰায় দুই শতাধিক ৰোগী এই শিবিৰৰ দ্বাৰা উপকৃত হয়। শিবিৰ আৰম্ভ হোৱাৰ পূৰ্বে চকৰ্দো অঞ্চলৰ সমাজকৰ্মী বাহাদুৰ ইংতি, সুগ্ৰীব বে, লক্ষীন্দ্ৰ টেৰণ আৰু তৰুণ ৰাম ফুকন মধ্য ইংৰাজী বিদ্যালয়ৰ প্ৰধান শিক্ষক বিমল মেধিক সম্বৰ্ধনা জনোৱা হয়।
জ্যেষ্ঠ সাংবাদিক নৱ ঠাকুৰীয়ালৈ বিশেষ সন্মান
জ্যেষ্ঠ সাংবাদিক নৱ ঠাকুৰীয়াক প্ৰেছ এমব্লেম কেম্পেইন নামৰ আন্তৰ্জাতিক সংস্থাৰ ভাৰতৰ প্ৰতিনিধি হিচাপে বাছনি কৰা হৈছে। উল্লেখযোগ্য যে চুইজাৰলেণ্ডৰ জেনেভাস্থিত সংস্থাটোৱে সমগ্ৰ পৃথিৱীতে ঘটি থকা সাংবাদিক হত্যা, সংবাদকৰ্মীৰ ওপৰত হোৱা নিগ্ৰহ আৰু শেহতীয়াকৈ ক’ভিডত মৃত্যু হোৱা সাংবাদিকৰ তালিকা প্ৰস্তুত কৰি আহিছে।
কেইবাখনো দেশৰ জ্যেষ্ঠ সাংবাদিকৰ উদ্যোগত ২০০৪ চনত জন্ম লাভ কৰা সংস্থাটোৰ সম্পাদক-প্ৰধান ব্লেইজ লেম্পেনে ঠাকুৰীয়াক এই দায়িত্ব অৰ্পনৰ বিষয়ে অৱগত কৰায়।লগতে সংস্থাটোৱে জাৰ্নেলিষ্ট ফ’ৰাম অসম সভাপতি ৰূপম বৰুৱাক ইয়াৰ সহযোগী সংগঠন হিচাপে মান্যতা প্ৰদান কৰিছে।
২০১০ চনৰ পৰা ৰাষ্ট্ৰসংঘত নিজৰ বক্তব্য উপস্থাপন কৰি অহা সংস্থাটোৱে ভাৰতবৰ্ষৰ বিভিন্ন প্ৰান্তৰ কৰ্মৰত সাংবাদিক আৰ্থিক অৱস্থা সম্পৰ্কটো অধ্যয়ন কৰিব।আজিৰ পৰা তিনিদশক পূৰ্বে অসম অভিযান্ত্ৰিক মহাবিদ্যালয়ৰ পৰা স্নাতক ডিগ্ৰী লাভ কৰা ঠাকুৰীয়াই অসমীয়া কাকতৰ জৰিয়তে সাংবাদিকতা জীৱন আৰম্ভ কৰে।
সম্প্ৰতি তেওঁ বহুকেইখন ৰাষ্ট্ৰীয় আৰু আন্ত:ৰাষ্ট্ৰীয় পৰ্যায়ৰ কাকতত সাংবাদিকতা আৰু সাংবাদিকৰ বিভিন্ন সমস্যা ওপৰত প্ৰবন্ধ লিখি আহিছে।
ভিউৱাছৰ মতামত