সময়ৰ দ্ৰুত পৰিবৰ্তনৰ লগে লগে মানুহৰ চিন্তা ধাৰাৰ পৰিবৰ্তন হয়। ইয়াৰ লগে লগে পৰিবৰ্তন হয় জীৱিকা নিৰ্বাহৰ ক্ষেত্ৰ সমূহ। সময়ৰ লগত খোজ মিলাই অসম দক্ষতা বিকাশ অভিযানে বিভিন্ন কাৰ্য্যসূচী হাতত লৈছে। তাৰেই অংশ স্বৰূপে অহা ১৫ জুলাইত ৱৰ্ল্ড য়ুথ ডে’ লগত সংগতি ৰাখি লতাশিল খেল পথাৰৰ পৰা ৱাকাথান হ’ব। এই ৱাকাথান প্ৰায় ৪.৬ কি: মি: হ’ব। এই মন্তব্য অসম দক্ষতা বিকাশ অভিযানৰ সঞ্চালক আনন্দ প্ৰকাশ তিৱাৰীৰ। ইয়াৰ অংশস্বৰূপে অসমৰ সাতখন জিলা সামৰি লোৱা হৈছে। সেই জিলা কেইখন ধুবুৰী, গোৱালপাৰা, বৰপেটা, বাক্সা, ওদালগুৰি, হাইলাকান্দি আৰু মঙ্গলদৈ অন্যতম। এই জিলা কেইখনত দক্ষতা বিকাশৰ অভিযানৰ অধীনত নিবনুৱা সকলৰ মাজত বিভিন্ন কৰ্মশালা অনুষ্ঠিত হ’ব। তেখেতে লগতে জনায় যে বিভিন্ন অভিযানৰ অন্তৰ্গত পাঠ্যক্ৰম গ্ৰহণ কৰা সকলৰ মাজত অহা ২৩ জুলাইত নিয়োগ মেলা আয়োজন কৰা হ’ব। মণিৰাম দেৱান ট্ৰেড চেণ্টাৰত হ’ব লগা এই নিয়োগ মেলাত বেচৰকাৰী, অৰ্ধ চৰকাৰী খণ্ডৰ প্ৰতিষ্ঠানে অংশ ল’ব।শিক্ষা তথা প্ৰশিক্ষণৰ ক্ষেত্ৰত বিশেষ ভাৱে পাৰদৰ্শিতা দেখুওৱা অনুষ্ঠানক “দক্ষতা “নামেৰে এক বিশেষ বঁটা প্ৰদান কৰা হ’ব। বিশেষকৈ মিচনৰ এটা কল চেণ্টাৰ মুকলি কৰা হ’ব। ইয়াৰ উপৰিও গুৱাহাটীত নৱেম্বৰত নৰ্থ-ইষ্ট স্কিল চেণ্টাৰ মুকলি কৰা হ’ব বুলি আজি এক সংবাদ মেল যোগে জানিবলৈ দিয়ে।
