আজিৰ পৰা আৰম্ভ বিধানসভাৰ বাজেট অধিৱেশন

0 45

আজিৰ পৰা আৰম্ভ হৈছে পঞ্চদশ অসম বিধানসভাৰ প্ৰথমখন পূৰ্ণাংগ বাজেট অধিৱেশন। সম্পূৰ্ণ এমাহজুৰি চলিবলগীয়া এই অধিৱেশনতে মুখ্যমন্ত্ৰী ড° হিমন্ত বিশ্ব শৰ্মাৰ চৰকাৰে দাখিল কৰিব প্ৰথমখন পূৰ্ণাংগ বাজেট ।১৬জুলাইত বিত্তমন্ত্ৰী অজন্তা নেওগয়ে ২০২১-২০২২ বৰ্ষৰ পূৰ্ণাংগ বাজেট দাখিল কৰিব বিধানসভাত । মন কৰিবলগীয়া যে, অজন্তা নেওগেই হ’ব বাজেট দাখিল কৰা অসমৰ প্ৰথমগৰাকী মহিলা বিত্তমন্ত্ৰী ।আনহাতে, এমাহজোৰা বাজেট অধিৱেশনত দাখিল হ’ব বহুকেইখন গুৰুত্বপূৰ্ণ বিধেয়ক । ইয়াৰে দুখন বিধেয়কক লৈ ইতিমধ্যে আৰম্ভ হৈছে ৰাজনৈতিক মহলত তীব্ৰ বাদানুবাদ আৰু মতানৈক্য । এই বিধেয়ক দুখন হৈছে- জনসংখ্যা নিয়ন্ত্ৰণ বিধেয়ক আৰু গো সুৰক্ষা বিধেয়ক । ইফালে বিধানসভাৰ নৱ নিৰ্বাচিত অধ্যক্ষ বিশ্বজিৎ দৈমাৰীয়ে এইবাৰৰ অধিৱেশনত কেতবোৰ কঠোৰ নিয়ম মানি চলা হ’ব বুলি ইতিমধ্যে ঘোষণা কৰিছে ।এইবেলি বিধানসভাত বন্ধ কৰা হৈছে সংবাদ মাধ্যমৰ প্ৰৱেশ । তদুপৰি নিৰাপত্তাজনিত কাৰণত এইবাৰ অধিৱেশনৰ সময়চোৱাত বিধানসভাত জামাৰৰ জৰিয়তে ম’বাইল নেটৱৰ্ক ডাউন কৰি ৰখাৰ ব্যৱস্থা কৰা হৈছে । এইবাৰৰ অধিৱেশনত ৰাজ্যৰ ১২৬ গৰাকী বিধায়কলৈ বিধানসভা সচিবালয়ে লেপটপ যোগান ধৰিছে ।এই লেপটপতে সকলো বিধায়কে অনলাইনযোগে লাভ কৰিব অধিৱেশনৰ প্ৰতিদিনৰ কাৰ্যক্ৰমণিকাৰ সকলো নথি-পত্ৰ । প্ৰথমবাৰৰ বাবে এইবাৰৰ বাজেট অধিৱেশনত প্ৰচলন কৰা হৈছে বড়ো ভাষাৰ। বিধায়কসকলে অসমীয়া, ইংৰাজী, হিন্দী আৰু বঙালী ভাষাৰ লগতে বড়ো ভাষাতো প্ৰশ্ন উত্থাপন কৰিব পাৰিব বিধানসভাত ।

Leave A Reply

Your email address will not be published.