ছাটাৰগাঁওৰ ৬২ টা পৰিয়ালক শ্ৰী সত্য সাই সেৱা সংগঠনৰ খাদ্য সামগ্ৰী বিতৰণ

পশ্চিম গুৱাহাটীৰ পৰিবেশ অনুকূল গাঁও হিচাপে পৰিচিত আজাৰা থানাৰ অন্তৰ্গত ছাটাৰগাঁওত সামাজিক সংস্থা শ্ৰী সত্য সাই সেৱা সংগঠনে আজি খাদ্য সামগ্ৰী বিতৰণ কৰে। সংগঠনটোৰ কৰ্মকর্তা সত্যেন শৰ্মাৰ নেতৃত্বত যোৱা দলটোৱে অঞ্চলটোৰ ৬২ টা ৰাভা জনগোষ্ঠীৰ পৰিয়ালক চাউল, দালি, আলু, পিয়াজ , নিমখ , মিঠাতেল , চিৰা , বিস্কুট , দিয়াচলাইৰ উপৰি মুখত পৰিধান কৰাৰ বাবে চাৰিখনকৈ মাস্ক বিতৰণ কৰে । বিতৰণ কাৰ্যসূচীত স্থানীয় নৱজ্যোতি ক্লাবৰ সভাপতি দ্বীপেন ৰাভা , সম্পাদক মনোজ ৰাভাকে ধৰি কেবাজনো কৰ্মকর্তা , পৰ্যটনৰ উন্নয়নৰ হকে কাম কৰি অহা সংগঠন ” ৰংমন ট্যুৰিজিম চছাইটিৰ প্ৰমোদ কলিতা , কন্দৰ্প বড়ো , অসম পৰ্বতাৰোহী সংস্থাৰ মানস বৰুৱাকে ধৰি কেবাজনেও সহযোগিতা আগবঢ়ায় । উল্লেখযোগ্য যে ক’ভিডৰ প্ৰথম ঢৌৰ দৰে দ্বিতীয় ঢৌতো অতি সাৱধানতা অৱলম্বন কৰা বাবে এই পৰ্যন্ত অঞ্চলটোৰ কোনো লোক ক’ভিডত আক্ৰান্ত হোৱা নাই । আনহাতে বিগত ২০২০ বৰ্ষতো শ্ৰী সত্য সাই সেৱা সংগঠনে অঞ্চলটোৰ বাসিন্দা সকলৰ মাজত খাদ্য সামগ্ৰীৰ উপৰিও মাস্ক , চেনিটাইজাৰ , ছাতি , আদিও বিতৰণ কৰিছিল ।