সংবাদ মেল অনুষ্ঠিত

0 146

মুখ্যমন্ত্ৰী ড° হিমন্ত বিশ্ব শৰ্মা নেতৃত্বাধীন অসম চৰকাৰ সম্ভৱত স্বাধীন ভাৰতৰ প্ৰথমখন চৰকাৰ যিয়েই ১০০ খন কেবিনেট বৈঠক সফলভাৱে অনুষ্ঠিত কৰি প্রায় ৯৮ শতাংশ সিদ্ধান্তই কাৰ্যকৰী কৰিবলৈ সক্ষম হৈছে” -এই মন্তব্য ৰাজ্যিক বিজেপিৰ মুখপাত্ৰ লক্ষ্য কোঁৱৰৰ। আজি দলৰ বশিষ্টস্থিত মুখ্য কাৰ্যালয়ত এক সংবাদ মেল সম্বোধন কৰি মুখপাত্ৰ গৰাকীয়ে কয়,ৰাজ্য চৰকাৰৰ ১০০ খন কেবিনেটত সৰ্বমুঠ ১,২৩৮ টা সিদ্ধান্ত গ্ৰহণ কৰি ইয়াৰে ১,২১৭ টা সিদ্ধান্তই কাৰ্যকৰী কৰিছে। এই সিদ্ধান্ত সমূহৰ জৰিয়তে অসমৰ আৰ্থ-‌ সামাজিক, শৈক্ষিক, আন্তঃগাঁথনি আদি সকলোবোৰ ক্ষেত্ৰতে বহু কল্যাণকামী পদক্ষেপ গ্রহণ কৰিছে। তেওঁ লগতে কয়, কেবিনেট সমূহ কেৱল দিছপুৰকেন্দ্ৰিক নকৰি ৰাজ্যৰ ভিন ভিন প্রান্তত অনুষ্ঠিত কৰিছিল। ইয়াৰ জৰিয়তে চৰকাৰখনৰ প্রতিজন মন্ত্ৰী তথা বিষয়াই অধিক জনমুখী হোৱাৰ সুবিধা লাভ কৰিছিল। মুখপাত্ৰ গৰাকীয়ে লগতে কয় যে ৰাজ্য চৰকাৰৰ শততম কেবিনেটত গ্রহণ কৰা সিদ্ধান্তৰাজিয়ে অনাগত দিনত অসমৰ জনসাধাৰণক আৰু অধিক উপকৃত কৰি তুলিব। বিশেষকৈ মাহিলী বিধৱা পেঞ্চন ৩০০ ৰ পৰা ১২৫০ লৈ বৃদ্ধিয়ে বহু বিধৱা মহিলাক সকাহ প্রদান কৰিব। আনহাতে উপ জিলা গঠনে প্ৰশাসনীয় ব্যৱস্থাটো সঠিকভাৱে পৰিচালনা কৰিবলৈ অধিক সহজ কৰি তুলিছে। লক্ষ্য কৌৱৰে ৰাজ্য চৰকাৰৰ ১০০ খন কেবিনেটৰ সিদ্ধান্তক ভাৰতীয় জনতা পাৰ্টি নেতৃত্বাধীন দ্বিতীয়খন চৰকাৰৰ সফলতাৰ এক দলিল বুলি অভিহিত কৰিছে।

সংবাদমেলত মুখপাত্ৰ গৰাকীয়ে লগতে কয়, ২০০৪ চনত ধেমাজিত হোৱা বোমা বিস্ফোৰণৰ সঠিক তদন্ত কংগ্ৰেছে ভালদৰে কৰা নাছিল। কেছ ডায়েৰীত উল্লেখিত অনুসৰি মূল অভিযুক্ত ৰছীদ ভৰালী আৰু কংগ্ৰেছৰ ভৰত নৰহৰ মাজত বিশেষ যোগসূত্ৰ আছে। তদানীন্তন কংগ্ৰেছ চৰকাৰৰ গৃহ বিভাগৰ গাফিলতিৰ বাবেই উপযুক্ত প্ৰমানৰ অভাৱত গুৱাহাটী উচ্চ ন্যায়লয়ে অভিযুক্ত সকলক দোষমুক্ত বুলি ঘোষণা কৰিছে। ইতিমধ্যে মুখ্যমন্ত্ৰী ড° হিমন্ত বিশ্ব এই সন্দৰ্ভত সকলোবোৰ দিশ চালিজাৰি চাই উচ্চতম ন্যায়লয়ৰ দ্বাৰস্থ হ’বলৈ বিশেষ তৎপৰ গ্রহণ কৰিছে বুলি মুখপাত্ৰ গৰাকীয়ে মন্তব্য কৰে। তেওঁ লগতে কয়, জনতাই জনাৰ্ডন,জনতাৰ পক্ষত থাকি ৰাজ্য চৰকাৰে গ্ৰহণ কৰা এই সিদ্ধান্তক ৰাজ্যিক বিজেপিয়ে আদৰণি জনাইছে।

Leave A Reply

Your email address will not be published.