অসম মহিলা অভিযন্তা সংস্থাৰ উদ্যোগত পশ্চিম ৰামচাৰাণি উচ্চ মাধ্যমিক বিদ্যালয়ত সজাগতা সভা সম্পন্ন

ৰাজ্যৰ মহিলা অভিযন্তা সকলৰ একমাত্ৰ আৰু উমৈহতিয়া সংগঠন অসম মহিলা অভিযন্তা সংস্থাৰ উদ্যোগত গুৱাহাটীৰ পশ্চিম প্ৰান্তৰ আজাৰা ৰাজহ চক্ৰ এলেকাৰ পশ্চিম ৰামচাৰাণি উচ্চ মাধ্যমিক বিদ্যালয়ত আজি শিশু কিশোৰৰ মানসিক বিকাশৰ বাবে লবলগীয়া যতন বিষয়ক এখন সজাগতা সভা অনুষ্ঠিত হৈ যায় । দিলীপ বৰুৱা স্মৃতি ন্যাস সমিতিৰ সৌজন্যত দিনৰ ১১ বজাৰ পৰা অনুষ্ঠিত হোৱা সভাখনত বিদ্যালয়ৰ ছাত্ৰ – ছাত্ৰী আৰু শিক্ষক- শিক্ষয়ত্ৰী উপস্থিত থাকে । আনহাতে অসম মহিলা অভিযন্তা সংস্থাৰ সভানেত্ৰী মৃদুলা দাসৰ আদৰণি ভাষণৰে শুভাৰম্ভ হোৱা সভাখনৰ আঁত ধৰে সম্পাদিকা অন্তৰা বৰুৱাই। সভাত বিশিষ্ট বক্তা হিচাপে ভাগ লৈ জ্যেষ্ঠ মনস্তত্ত্ববিদ তথা মনোবিজ্ঞানী লয়া আগৰৱালাই ভাষণ প্ৰসংগত উপস্থিত ছাত্ৰ – ছাত্ৰীসকলক মানসিক শক্তি অক্ষুণ্ণ ৰাখি পৰীক্ষাৰ বাবে প্ৰস্তুতি চলোৱাকে ধৰি জীৱনৰ ঘাট – প্রতিঘাট সমুহ কিদৰে অতিক্ৰম কৰিব পাৰি তাৰ কৌশল সমুহ সুন্দৰকৈ দাঙি ধৰে। সভাত সংস্থাৰ কোষাধক্ষ্য কৃষ্ণা শৰ্মা , সদস্যা মঞ্জুলা শইকীয়া ভূঞা , নাফিজা হাজৰিকা বৰবৰা আৰু নমিতা শৰ্মা, বিদ্যালয়ৰ প্ৰধান শিক্ষক অশোক কলিতাই চমু ভাষণ প্ৰদান কৰে। সভাৰ লগত সংগতি ৰাখি বিশিষ্ট বক্তা আৰু ছাত্ৰ – ছাত্ৰীসকলৰ মাজত এক অন্তৰংগ আলাপৰ আয়োজন কৰা হয়।