কামৰূপৰ শিক্ষা বিভাগৰ বিশেষ পদক্ষেপৰ ফলত স্বাধীনতাৰ ৭৫ বছৰ পিছত গুৱাহাটীৰ সমীপৰ তথা কামৰূপ জিলাৰ গড়ভাঙ্গাত কালি দুখন মধ্য ইংৰাজী বিদ্যালয়ৰ শুভ আৰম্ভ হয়। গড়ভাঙ্গা প্ৰাথমিক বিদ্যালয় আৰু ৰংমালী প্ৰাথমিক বিদ্যালয়ক উন্নীত কৰি এই দুখন মধ্য ইংৰাজী বিদ্যালয় স্থাপন কৰা হয়।গড়ভাঙ্গা প্ৰাথমিক বিদ্যালয়ত আয়োজন কৰা এক গাম্ভীৰ্য পূৰ্ণ অনুষ্ঠানত অসমৰ শিক্ষামন্ত্ৰী ডা. ৰণোজ পেগুৱে এই বিদ্যালয় দুখন উদ্বোধন কৰে। উল্লেখযোগ্য যে ১৬ খন ৰাজহ গাওঁ থকা এই গড়ভাঙ্গা অঞ্চলত ইয়াৰ পূৰ্বে এখনো উচ্চ প্ৰাথমিক বিদ্যালয় নাছিল। আজি এই বিদ্যালয় দুখন উদ্বোধন কৰি শিক্ষামন্ত্ৰী গৰাকীয়ে কয় যে আজিৰ দিনটো গড়ভাঙ্গা বাসীৰ বাবে সচাকৈয়ে আনন্দৰ দিন। কামৰূপৰ শিক্ষা বিভাগে লোৱা বিশেষ পদক্ষেপৰ বাবে আজি গড়ভাঙ্গা বাসীয়ে এই সুবিধা লাভ কৰিবলৈ সক্ষম হ’ল। তেওঁ এই বিদ্যালয় দুখনত ছাত্ৰ ছাত্ৰী থাকিলে এই বছৰেই অষ্টম শ্ৰেণীলৈকে নামভৰ্তি কৰাবলৈ সংশ্লিষ্ট বিদ্যালয় দুখনৰ প্ৰধান শিক্ষকক পৰামৰ্শ দিয়ে। তেওঁ কয় যে চৰকাৰে গড়ভাঙ্গা অঞ্চলত অচিৰেই হাইস্কুল স্থাপনৰ ব্যৱস্থা কৰি আছে। উল্লেখযোগ্য যে বৰ্তমানৰ কামৰূপৰ জিলা প্ৰাথমিক শিক্ষা বিষয়া তথা কামৰূপৰ বিদ্যালয় সমূহৰ পৰিদৰ্শক অপূৰ্ব ঠাকুৰীয়াই ২০১৯ চনত এক শিক্ষা সংযোগ কাৰ্যসূচী লৈ গড়ভাঙ্গা অঞ্চলৰ শৈক্ষিক জৰীপ কৰি ২০২০ চনৰ জানুৱাৰী মাহত চৰকাৰক এক প্ৰতিবেদন দাখিল কৰি গড়ভাঙ্গা অঞ্চলত কমেও দুখন উচ্চ প্ৰাথমিক স্কুল স্থাপনৰ প্ৰস্তাৱ দিছিল। ইয়াৰ পিছত শিক্ষা বিষয়া গৰাকীয়ে সমগ্ৰ শিক্ষা,অসমৰ মিছন সঞ্চালক আৰু কামৰূপৰ উপায়ুক্তক গড়ভাঙ্গা অঞ্চললৈ নি অঞ্চলটোৰ শৈক্ষিক পৰিৱেশৰ বিষয়ে অৱগত কৰে। বিষয়াগৰাকীৰ এনে নিৰলস প্ৰয়াসৰ ফলত গড়ভাঙ্গাই দুখনকৈ উচ্চ প্ৰাথমিক বিদ্যালয় পাবলৈ সক্ষম হয়। ইতিমধ্যে বিদ্যালয় দুখনৰ অতিৰিক্ত তিনিটাকৈ শ্ৰেণীকোঠা নিৰ্মাণৰ বাবে প্ৰতি খন বিদ্যালয়ক সমগ্ৰ শিক্ষা ,অসমৰ পৰা ১৯ লাখ ৮৫ হাজাৰকৈ টকাৰ অনুমোদন দিয়া হৈছে। আজি শিক্ষা মন্ত্ৰী গৰাকীয়ে নতুনকৈ নিৰ্মাণ কৰিবলৈ লোৱা শ্ৰেণীকোঠাৰো লাইখুটা স্থাপন কৰে। সভাত পশ্চিম গুৱাহাটী সমষ্টিৰ বিধায়ক ৰমেন্দ্ৰ নাৰায়ন কলিতাই বিশিষ্ট অতিথি হিচাপে ভাষণ দি গড়ভাঙ্গা অঞ্চলৰ উন্নয়নৰ বাবে তেওঁ লোৱা বিভিন্ন পদক্ষেপৰ কথা উল্লেখ কৰে। সভাত অসম চৰকাৰৰ প্ৰাথমিক শিক্ষাৰ অতিৰিক্ত সঞ্চালক নৃপেন দাস, কামৰূপৰ উপায়ুক্ত কৈলাস কাৰ্তিক এন, কামৰূপৰ অতিৰিক্ত উপায়ুক্ত কমল বৰুৱা, ৰাণীৰ খণ্ড প্ৰাথমিক শিক্ষা বিষয়া লাচিত বসুমতাৰী, বিশিষ্ট শিক্ষাবিদ পৰেশ বৈশ্য উপস্থিত থাকে। সভাত ভাষণ দি কামৰূপৰ উপায়ুক্ত কৈলাস কাৰ্তিক এনে কয় যে গড়ভাঙ্গা অঞ্চলত পৰ্যটনৰ বাবে ভাল আঁচনি লব পাৰি। যাতায়ত ব্যৱস্থাৰ উন্নয়নৰ লগে লগে গড়ভাঙ্গাৰ উন্নয়নৰ পথ অধিক প্ৰশস্ত হ’ব বুলি তেওঁ আশা প্ৰকাশ কৰে। সভাত সমগ্ৰ শিক্ষা কামৰূপৰ জিলা আচনি বিষয়া ক্ৰমে ফুলপাহি নাথ, চুইটী বেজবৰুৱা উপস্থিত থাকে।সভাৰ আঁত ধৰে জলী ভট্টাচাৰ্য ই। অনুষ্ঠানত গড়ভাঙ্গা প্ৰাথমিক বিদ্যালয়ৰ ছাত্ৰ ছাত্ৰীসকলে বিভিন্ন সাংস্কৃতিক অনুষ্ঠান পৰিবেশন কৰে। অনুষ্ঠানত ৰাণী শিক্ষাখণ্ডৰ তৰফৰ পৰাও সাংস্কৃতিক অনুষ্ঠান পৰিবেশন কৰে। সামৰণি শলাগৰ শৰাই আগবঢ়াই সমগ্ৰ শিক্ষা কামৰূপৰ জিলা আচনি বিষয়া চুইটী বেজবৰুৱাই।
Trending
- এয়াৰটেলে তীব্ৰতৰ বাউজিং গ্ৰাহকক প্ৰদান কৰিছে
- গুৱাহাটী কবি কিশোৰ কুমাৰ জৈনৰ দুখনকৈ কাব্যগ্ৰন্থ উন্মোচন
- তামুলপুৰত অসম প্ৰত্যক্ষ নিযুক্তি পৰীক্ষা সম্পৰ্কীয় প্ৰশিক্ষণ
- এণ্ড্ৰিউ ইউল এণ্ড কোম্পানীৰ অধীনস্থ চাহ বাগিচাৰ অচল অৱস্থা দূৰীকৰণৰ বাবে ৰাজ্য চৰকাৰৰ প্ৰচেষ্টা
- Teachers’ Day Celebration in Chirang District Highlights Educational Advancements and Achievements
- ই পি মিডিয়া ফ’ৰাম চাউথ কামৰূপৰ প্ৰতষ্ঠা দিৱস উদযাপন
- এইচডিএফচি বেংকে গ্ৰাহক অভিজ্ঞতা উন্নত কৰিবলৈ নতুন বৈশিষ্ট্যৰে ইউপি আই আৰু চি বি ডি চি উন্মোচন কৰে
- 31st Annual General Meeting of Numaligarh Refinery Limited held
- পবাক বন্যপ্ৰাণী অভয়াৰণ্যৰূপে গঢ়ি তোলা হ’ব – বিধানসভাত মন্ত্ৰী চন্দ্ৰমোহন পাটোৱাৰী
- ৰাষ্ট্ৰীয় পেলু নিৰ্মূলকৰণ দিৱসৰ শুভাৰম্ভ