তামুলপুৰত অসম প্ৰত্যক্ষ নিযুক্তি পৰীক্ষা সম্পৰ্কীয় প্ৰশিক্ষণ

অহা ১৫, ২৯ ছেপ্টেম্বৰ আৰু ২৭ অক্তোবৰত অনুষ্ঠিত হ’বলগীয়া “অসম প্ৰত্যক্ষ নিযুক্তি পৰীক্ষা ২০২৪ (ADRE, 2024) সম্পৰ্কীয় এক প্ৰশিক্ষণ কাৰ্যসূচী আজি তামুলপুৰ জিলা আয়ুক্ত কাৰ্যালয়ৰ সভাকক্ষত অনুষ্ঠিত হয়।জিলা আয়ুক্ত বিদ্যুৎ বিকাশ ভাগৱতীৰ অধ্যক্ষতাত অনুষ্ঠিত সভাখনত চেণ্টাৰ ইনচাৰ্জ আৰু ছুপাৰভাইজিং অফিচাৰসকলক প্ৰশিক্ষণ প্ৰদান কৰা হয়। তামুলপুৰ জিলাৰ বিভিন্ন চৰকাৰী অনুষ্ঠান-প্ৰতিষ্ঠানৰ বিষয়া তথা শিক্ষকসকলে কাৰ্যসূচীত অংশগ্ৰহণ কৰে। জিলা আয়ুক্তগৰাকীয়ে বিষয়াসকলৰ কাম কেনে হ’ব,সেই সম্পৰ্কে সকলোকে সুন্দৰকৈ বুজাই দিয়াৰ লগতে বিষয়াসকলৰ পৰা বিভিন্ন সুবিধা-অসুবিধা সম্পৰ্কেও জানিব বিচাৰে। তেওঁ পৰীক্ষা যাতে সুকলমে অনুষ্ঠিত হয়, তাৰ প্ৰতি লক্ষ্য ৰাখিবলৈ সকলোকে আহ্বান জনায়। পৰীক্ষাসমূহ ২৯টা কেন্দ্ৰত অনুষ্ঠিত হ’ব। উল্লেখযোগ্য যে এইবাৰৰ পৰীক্ষাত ১৬,৩৩১গৰাকী পৰীক্ষাৰ্থী অৱতীৰ্ণ হ’ব‌। তামুলপুৰ জিলাৰ উপৰি আন জিলাৰ পৰীক্ষাৰ্থীয়েও পৰীক্ষাত অৱতীৰ্ণ হ’ব।আজিৰ কাৰ্যসূচীত অতিৰিক্ত আয়ুক্তদ্বয় লখিমী দত্ত আৰু হেমাশ্ৰী খনিকৰ তথা সহকাৰী আয়ুক্ত অৰুণিমা কাকতি আদি উপস্থিত থাকে বুলি তথ্য আৰু জনসংযোগ বিষয়া বিজয় বেজবৰুৱাই এক প্ৰেছ বিজ্ঞপ্তিযোগে জনাইছে।