তামুলপুৰত স্বাধীনতা দিৱসৰ প্ৰস্তুতি সম্পৰ্কীয় সভা

তামুলপুৰ জিলা প্ৰশাসনে সমাগত ৭৮সংখ্যক স্বাধীনতা দিৱস উদযাপন কৰিবলৈ ইতিমধ্যে তৎপৰতা আৰম্ভ কৰিছে। তদুপলক্ষে আজি তামুলপুৰ জিলা আয়ুক্ত কাৰ্যালয়ৰ সভাকক্ষত এখন সভা অনুষ্ঠিত হয়। জিলা আয়ুক্ত বিদ্যুৎ বিকাশ ভাগৱতীৰ অধ্যক্ষতাত অনুষ্ঠিত সভাখনত তামুলপুৰ জিলাৰ বিভিন্ন বিভাগৰ বিষয়াসকল উপস্থিত থাকে। জিলা আয়ুক্তগৰাকীয়ে প্ৰতিটো বিভাগৰ বিষয়াসকলক নিজৰ নিজৰ দায়িত্বসমূহৰ কথা সোঁৱৰাই দিয়ে। আয়ুক্তগৰাকীয়ে স্বাস্থ্য, পশুপালন, হস্ততাঁত, সমাজকল্যাণ আদি বিভাগক স্বাধীনতা দিৱসৰ দিনা প্ৰদৰ্শনীও অনুষ্ঠিত কৰিবলৈও আহ্বান জনাইছে। বিভিন্ন কাৰ্যসূচীসমূহ যাতে সুচাৰুভাৱে অনুষ্ঠিত হয়, তাৰ প্ৰতি লক্ষ্য ৰাখিবলৈ জিলা আয়ুক্তগৰাকীয়ে সকলোকে আহ্বান জনায়‌। আজিৰ সভাখনত অতিৰিক্ত আয়ুক্তদ্বয় ডঃ দীপাংকৰ নাথ আৰু লখিমী দত্ত, সহকাৰী আয়ুক্তত্ৰয় হিতেশ বড়ো, অৰুণিমা কাকতি, কবিতা ফাংচ’ আৰু বিভিন্ন বিভাগৰ বিষয়াসকল উপস্থিত থাকে।