চতিয়া সমষ্টিৰ অন্তৰ্গত দহখনকৈ গাঁও পঞ্চায়তত আজি বিহু উপলক্ষে বৰ্ষিয়ান নাগৰিকক সম্বৰ্দ্ধনা জনোৱাৰ কাৰ্য্যসূচী পঞ্চায়ত কৰ্মকৰ্তা সকলে ৰূপায়ন কৰে ৷ উত্তৰ মূঢ়াদল গাঁওপঞ্চায়তৰ এলেকাৰ বৰ্ষিয়ান নাগৰিক সকলৰ ঘৰে ঘৰে গৈ আজি ৰঙালী বিহু উপলক্ষে গাঁও পঞ্চায়তটোৰ সভাপতি দিপক নেৱাৰৰ নেতৃত্বত কৰ্মকৰ্তা সকলে ফুলাম গামোচাৰে সম্বৰ্দ্ধনা জ্ঞাপন কৰাৰ লগতে চৰণ চুই সেৱা জনোৱাৰ উপৰিও বিহুৰ উপহাৰ আৰু সম্বৰ্দ্ধনা পত্ৰ প্ৰদান কৰে । চতিয়া সমষ্টিৰ বিধায়ক পদ্ম হাজৰিকাৰ পৰামৰ্শ অনুযায়ী প্ৰতিটো গাঁওপঞ্চায়তত আজিৰ দিনটোত এনে কৰ্মসুচী গ্ৰহন কৰা হৈছে বুলি পঞ্চায়ত সভাপতি গৰাকীয়ে জানিবলৈ দিয়ে ৷ আজিৰ কাৰ্য্যসুচীত জ্যেষ্ঠ বিজেপি নেতা প্ৰবিন দাসকে ধৰি অন্যান্য কৰ্মী সকলেও অংশগ্ৰহণ কৰে । ইয়াৰ উপৰিও পহিলা বহাগৰ দিনা অসম সাহিত্য সভাৰ ৰঙাচকুৱা শাখা সাহিত্য সভাই পাঁছজন বিশিষ্ট লোকক প্ৰশংসা পত্ৰ প্ৰদান কৰে । লোক কেইজন ক্ৰমে- ৰঙাচকুৱাৰ মোহন হাজৰিকা, কুল প্ৰসাদ নেৱাৰ , খৃষ্টানবস্তিৰ চালিয়ান তিৰু , বাটমাৰীৰ বিনোদ কলিতা আৰু হাটিঙা বড়িৰ মহেন্দ্ৰ হাজৰিকা ।
বাতৰি যুগুতালে জামুগুৰিহাটৰ পৰা ৰাতুল হাজৰিকাই ।
