বি জে পিত যোগদান কৰিল বি পি এফৰ দুই নেতাই

বিপিএফ দলৰ দুই নেতা ক্ৰমে ৰাজ্য সভাৰ সাংসদ বিশ্বজিত দৈমাৰী আৰু তামোলপুৰ সমষ্টিৰ বিধায়ক ইমানুৱেল মুছাহাৰীয়ে আজি আনুষ্ঠানিকভাৱে ভাৰতীয় জনতা পাৰ্টিত যোগদান কৰে। এই উপলক্ষে আজি পুৱা চাৰে ন বজাত মুখ্যমন্ত্ৰী সৰ্বানন্দ সোণোৱালৰ খাৰঘুলিস্থিত বাসভৱনৰ ব্ৰহ্মপুত্ৰ গেষ্ট হাউচত অনুষ্ঠিত এক যোগদান সভাত দুয়োজন নেতাই আনুষ্ঠানিকভাৱে যোগদান কৰি গেৰুৱা বস্ত্ৰ পৰিধান কৰে।অনুষ্ঠানটোত বিজেপিৰ ৰাজ্যিক সভাপতি ৰঞ্জিত কুমাৰ দাস, মুখপাত্ৰ ৰূপম গোস্বামী, বিজেপি নেতা মমিনুল আৱালকে ধৰি বহু কেইজনো নেতা উপস্থিত থাকে। অনুষ্ঠানটোৰ আত ধৰে সাংসদ তথা বিজেপিৰ ৰাষ্ট্ৰীয় সাধাৰণ সম্পাদক দিলীপ শইকীয়াই।মুখ্যমন্ত্ৰীয়ে দুয়োজনকে বিজেপি দললৈ আদৰণি জনাই কয় যে এইবাৰ বিটিচি নিৰ্বাচনত বিজেপি দলে বিটিচি গঠন কৰাটো নিশ্চিত হৈছে।দৈমাৰী আৰু মুছাহাৰীৰ যোগদানে বিজেপি দলক আৰু অধিক শক্তিশালী কৰি তুলিব বুলি তেওঁ আশা প্ৰকাশ কৰে।