মৰমলেণ্ড চ’ছাইটিৰ পদক্ষেপ

মৰমলেণ্ড ৱেলফেয়াৰ চ’ছাইটিৰ তৰফৰ পৰা ক’ভিড সজাগতা-সাহাৰ্য্য-সহবাস অভিযানৰ অংশ হিচাপে মহানগৰীৰ ভিন্ন প্ৰান্তত অসহায় লোকৰ কাষত থিয় হোৱাৰ প্ৰয়াস কৰিছে। ক’ৰণাৰ দ্বিতীয় লহৰত ৰাজ্যখনৰ বহু মানুহৰ মৃত্যুৰ সংবাদে ভয় পূৰ্বতকৈ অধিক কৰি তুলিছে আৰু সকলো ঘৰতে আৱদ্ধ হৈ থাকিব লগা হৈছে। তেনে সময়তে ডেম’ক্ৰেচী লাইভ আৰু মৰমলেণ্ডৰ তৰফৰ পৰা অসহায় লোকক কিছু খাদ্য তুলি দি মানৱতাৰ এক নিদৰ্শন দাঙি ধৰিছে। লগতে যিসকল আৰক্ষী-চি আৰপিএফৰ জোৱানে নিজৰ জীৱনকো তুচ্ছ কৰি দিন ৰাতি ক’ভিডকালীন কৰ্তব্যত নিয়োজিত হৈ আছে, তেওঁলোকক কিছু মানসিক সাহস দিয়াৰ উদ্দেশ্যে মহানগৰীৰ হাতীগাঁও, নুনমাটি, নাৰেংগী, চান্দমাৰি, গুৱাহাটী ক্লাবকে ধৰি ভিন্ন প্ৰান্তত আৰক্ষী-চিআৰপিএফৰ জোৱানক চাহ-মিঠাইৰে আপ্যায়ন কৰাই মানসিক সমৰ্থন দিয়াৰ প্ৰয়াস কৰিছে ৱেলফেয়াৰটোৱে। ডেম’ক্ৰেচী লাইভৰ মুখ্য সম্পাদক তথা মৰমলেণ্ড ৱেলফেয়াৰ চ’ছাইটিৰ সঞ্চালক মৰম কুমাৰৰ নেতৃত্বৰ এই কাৰ্যসূচী সম্পাদন হৈছে।