কামৰূপ মহানগৰত ই ভি এম আৰু ভিভিপিএটিৰ ৰেণ্ডমাইজেশ্যন সম্পন্ন

কামৰূপ মহানগৰ নিৰ্বাচন জিলাৰ পাঁচটা সমষ্টিৰ ই.ভি.এম আৰু ভিভিপিএটি সমূহৰ আজি দ্বিতীয় পৰ্যায়ৰ ৰেণ্ডমাইজেশ্যন প্ৰক্ৰিয়া সম্পন্ন কৰা হয়। ভাৰতৰ নিৰ্বাচন আয়োগে কামৰূপ মহানগৰ জিলাত নিয়োগ কৰা সাধাৰণ পৰ্যবেক্ষকদ্বয় ভাৰতীয় প্ৰশাসনিক সেৱাৰ বিষয়া হিম শেখৰ গুপ্তা আৰু প্ৰদীপ কুমাৰ কৃষ্ণাৰাও ডাংগেৰ উপস্থিতিত জিলা আয়ুক্তৰ কাৰ্যালয় সভাকক্ষত সম্পন্ন কৰা হয় এই ৰেণ্ডমাইজেশ্যন প্ৰক্ৰিয়া। জিলা আয়ুক্ত তথা জিলা নিৰ্বাচন বিষয়া স্বপ্নিল পাল, ই.ভি.এম, ভি.ভি.পেট মেনেজমেন্ট কোষৰ ন’ডেল বিষয়া হেমাংগ নবীশ আৰু নিৰ্বাচন বিষয়া মানসজ্যোতি বৰাই অংশগ্ৰহণ কৰা উক্ত ৰেণ্ডমাইজেশ্যন প্ৰক্ৰিয়াৰ জৰিয়তে পাঁচোটা সমষ্টিৰ ই.ভি.এমসমূহ ভোটগ্ৰহণ কেন্দ্ৰ ভিত্তিক পৃথকীকৰণ কৰা হয়। ৰেণ্ডমাইজেশ্যন প্ৰক্ৰিয়াত ৰাজনৈতিক দলৰ প্ৰতিনিধিৰ লগতে নিৰ্বাচন অভিকৰ্তাসকল উপস্থিত থাকে। উল্লেখযোগ্য যে যোৱা ১৮ মাৰ্চত প্ৰথম পৰ্যায়ৰ ৰেণ্ডমাইজেশ্যন প্ৰক্ৰিয়া সম্পন্ন কৰা হৈছিল।