নগঞা ঢুলীয়া, চিত্ৰশিল্পী, খনিকৰ মহেন্দ্ৰ বৰালৈ “বৰ্হমথুৰি শিল্পী বঁটা সাংস্কৃতিক মঞ্চ অসমৰ

ৰাজ্যখনৰ এগৰাকী বিশিষ্ট শিল্পী নগাঁও জিলাৰ পুৰণিগুডাম কাষৰি গাৱৰ মহেন্দ্ৰ বৰালৈ সাংস্কৃতিক মঞ্চ, অসমএ চলিত বৰ্ষৰ “বৰ্হমথুৰি শিল্পী বঁটা ২০২৬” আগবঢ়াইছে ৷ ষাঠিৰ দশকৰ মাজভাগৰ পৰা ঢোল, খোল, ভাওনাকে ধৰি চিত্ৰশিল্পৰ সাধনাত নিবিড়ভাৱে ব্ৰতি হৈ অহা বিশিষ্ট শিল্পীগৰাকীক “সাংস্কৃতিক মঞ্চ অসম”ৰ উদ্যোগত অনুষ্ঠিত সপ্তদশ লোকনৃত্য কৰ্মশালাৰ সামৰণিত দেওবাৰে মহানগৰীৰ শ্ৰীমন্ত শংকৰদেৱ কলাক্ষেত্ৰৰ ৰংঘৰ বাকৰিত অনুষ্ঠিত এক গাম্ভীৰ্যপূৰ্ণ অনুষ্ঠানত এই সন্মান আগবঢ়োৱা হয় ৷ এই উপলক্ষে অনুষ্ঠিত গাম্ভীৰ্যপূৰ্ণ সভাখনত “পদ্মশ্ৰী” সন্মান প্ৰাপক কলা নিৰ্দেশক নুৰুদ্দিন আহমেদ, ডাঃ হীতেশ বৰুৱা, সাংস্কৃতিক সংগঠক গোপাল জালান, শ্ৰীমন্ত শংকৰদেৱ কলাক্ষেত্ৰ সমাজৰ সচিব সুদৰ্শন ঠাকুৰ,সেৱা ভাৰতী পূৰ্বাঞ্চল পালক সুৰেন্দ্ৰ তালখেড়কৰ জী, সেৱা ভাৰতী পূৰ্বাঞ্চল ক্ষেত্ৰৰ সম্পাদক বিজু দত্তকে ধৰি বিভিন্নক্ষেত্ৰৰ কেইবাগৰাকীও ব্যক্তি বিশিষ্ট অতিথি হিচাপে উপস্থিত থাকি অনুষ্ঠানটোৰ সৌষ্ঠৱ বৃদ্ধি কৰে ৷ বঁটা গ্ৰহণ কৰি দিয়া ভাষণ প্ৰসঙ্গত শিল্পীগৰাকীয়ে বিভিন্ন সমস্যাৰ মাজত ওৰেটো জীৱন শিল্প সাধনা অব্যাহত ৰখাৰ কথা উল্লেখ কৰি “বৰ্হমথুৰি বঁটা” প্ৰাপ্তিয়ে অনাগত দিনত তেওঁক নিজস্ব শিল্পসাধনা আগবঢ়াই নিয়াৰ ক্ষেত্ৰত অনুপ্ৰাণিত কৰিব বুলি উল্লেখ কৰে। উল্লেখ্য যে, সাংস্কৃতিক মঞ্চ অসমৰ উদ্যোগত অনুষ্ঠিত লোকনৃত্য কৰ্মশালাত এইবাৰ ৰাজ্যখনৰ বিভিন্ন ঠাইৰ চাৰি শতাধিক প্ৰশিক্ষাৰ্থীয়ে অংশগ্ৰহণ কৰে। আনহাতে সামৰণি অনুষ্ঠানত মুখ্য অতিথিৰূপে অংশগ্ৰহণ কৰে বিশিষ্ট সত্ৰীয়া গুৰু, নৃত্যাচাৰ্য, পদ্মভূষণ যতীন গোস্বামীয়ে ৷