পৰিবহন মন্ত্ৰীৰ নিৰ্দেশত বৰঝাৰ বিমান বন্দৰ আৰু ৰেলৱে ষ্টেচনত যাত্ৰীৰ পৰিবহন ব্যৱস্থাৰ বুজ ললে অসম ৰাজ্যিক পৰিবহনৰ অধ্যক্ষই

ক’ভিড-১৯’ ৰ সংক্ৰমণ ৰোধৰ বাবে যোৱা ২৪ মাৰ্চত দেশজুৰি লকডাউন আৰম্ভ হোৱাৰ সময়ৰে পৰা গুৱাহাটীকে ধৰি ৰাজ্যৰ ৰেল ষ্টেচন সমূহত ৰাজহুৱা পৰিবহন সেৱাৰ একমাত্ৰ প্ৰতিষ্ঠান অসম ৰাজ্যিক পৰিবহন নিগমৰ ফালৰ পৰা যাত্ৰীক গন্তব্য স্থানলৈ বা কোৱাৰেণ্টাইন শিবিৰলৈ নিয়াৰ বাবে যাত্ৰীসকলক সেৱা আগবঢ়ায় আহিছে।

 

 

তেনেদৰে যোৱা ২৫ মে’ৰ পৰা দেশত ঘৰুৱা যাত্ৰীবাহী বিমান সেৱা আৰম্ভ হোৱাৰে পৰা গুৱাহাটীৰ বৰঝাৰস্থিত লোকপ্ৰিয় গোপীনাথ বৰদলৈ আন্ত:জাৰ্তিক বিমান বন্দৰকে ধৰি ৰাজ্যৰ বিমান বন্দৰত বহি: ৰাজ্যৰ পৰা অহা যাত্ৰীসকলক গন্তব্য স্থান বা কোৱাৰেণ্টাইন শিবিৰলৈ লৈ যোৱাৰ বাবেও এ.এছ.টি.চি.য়ে দিনে-নিশাই অহৰহ সেৱা আগবঢ়ায় আহিছে।

 

 

আনহাতে দেওঁবাৰে মাজনিশা গুৱাহাটী মহানগৰীত দুসপ্তাহৰ বাবে আৰম্ভ হোৱা লকডাউনৰ সময়ছোৱাত যাত্ৰীৰ পৰিবহন সেৱাত কোনো ধৰণৰ ব্যাঘাত নজন্মে তাৰ বাবে পৰিবহন মন্ত্ৰী চন্দ্ৰ মোহন পাটোৱাৰীয়ে নিৰ্দেশ দিছিল। সেইবাবে আজি অসম ৰাজ্যিক পৰিবহন নিগমৰ অধ্যক্ষ অশোক কুমাৰ ভট্টৰায়ে গুৱাহাটী ৰেলৱে ষ্টেচন আৰু বৰঝাৰ বিমান পৰিদৰ্শন কৰি যাত্ৰীৰ পৰিবহন ব্যৱস্থাৰ বুজ লয়।

 

 

বৰঝাৰ বিমান বন্দৰত অধ্যক্ষ ভট্টৰায়ে জিলা পৰিবহন বিষয়া গৌতম দাস, প্ৰৱৰ্তক পৰিদৰ্শকদ্বয় লক্ষীকান্ত বুঢ়াগোঁসাই আৰু বিক্ৰমাদিত্য গগৈ, অসম ৰাজ্যিক পৰিবহন নিগম আস্থানৰ অধ্যক্ষদ্বয় বিকাশ পাচোৱান আৰু পংকজ দাসসহ কৰ্তব্যৰত বিষয়া কৰ্মচাৰীসকলক নিয়ন্ত্ৰণ কক্ষত সাক্ষাৎ কৰি যাত্ৰীক আগবঢ়ায় অহা পৰিবহন সেৱাৰ বুজ লয়। অধ্যক্ষগৰাকীক সংগ দিয়ে অসম ৰাজ্যিক পৰিবহন নিগমৰ মুখ্য বাণিজ্যিক প্ৰৱন্ধক মুৰুলী বৰাই। আনহাতে উপস্থিত সাংবাদিকৰে সৈতে হোৱা চমু বাৰ্তালাপত অধ্যক্ষ অশোক কুমাৰ ভট্টৰায়ে লকডাউন আৰম্ভ হোৱাৰে পৰা বিগত দিনকেইটাত অসম ৰাজ্যিক পৰিবহন নগমে এক লাখৰো অধিক লোকক বিনামূলীয়াকৈ গন্তব্য স্থানলৈ প্ৰেৰণ কৰিছে বুলি মন্তব্য কৰে।

 

 

 

তেনেদৰে জিলা পৰিবহন বিষয়া গৌতম দাসেও পৰিবহন মন্ত্ৰীৰ নিৰ্দেশত গুৱাহাটীত পুনৰ আৰম্ভ হোৱা লকডাউনৰ সময়ছোৱাত বৰঝাৰ বিমান বন্দৰ আৰু গুৱাহাটী ৰেলৱে ষ্টেচনত যাত্ৰীৰ পৰিবহন সেৱাত কোনো ধৰণৰ ব্যাঘাত নহয় সেই দিশত চকু ৰখা হৈছে বুলি সদৰি কৰে। ইফালে অসম ৰাজ্যিক পৰিবহন নিগমৰ অধ্যক্ষ গৰাকীয়ে বৰঝাৰ বিমান বন্দৰ কৰ্তৃপক্ষৰ কেইবাগৰাকী বিষয়াৰ সৈতেও যাত্ৰীৰ পৰিবহন ব্যৱস্থা সন্দৰ্ভত পৰ্যালোচনা কৰাৰ লগতে সহযোগিতা কামনা কৰে।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

কাইলৈ হ’ব বিশাল গণসমাবেশ -জেৰেঙা পথাৰত চলিছে প্ৰস্তুতি

ঐতিহাসিক জেৰেঙা পথাৰত কালিলৈ অনুষ্ঠিত হ’ব এক বিশাল গণসমাবেশ।এই সভাত উপস্থিত থাকিব দেশৰ প্ৰধানমন্ত্ৰী । ইতিমধ্যে এসপ্তাহ ধৰি সভাৰ যাবতীয় প্ৰস্তুতি অব্যাহত আছে। শিৱসাগৰ জিলা প্ৰশাসনে নিৰাপত্তা ক্ষেত্ৰত পহৰাৰ ব্যৱস্থা কৰিছে। উল্লেখযোগ্য যে এই বিশাল গণ সমাবেশত ৩ লাখ লোকক ভূমি পট্ৰা প্ৰদান কৰিব।দেশৰ প্ৰধানমন্ত্ৰী গৰাকীৰ আগমনকলৈ ৪ খনকৈ হেলিপেড সাজু কৰি তুলিছে। জানিব পৰা মতে প্ৰতিখন জিলাৰ পৰা বিভিন্ন প্ৰতিনিধি এই সমাবেশলৈ আহিব। এই সমাবেশত অংশগ্ৰহণকাৰী সকলে ক’ভিড প্ৰট’কল মনাৰ লগতে কিছু নীতি নিৰ্দেশনা মানি চলিব লাগিব বুলি শিৱসাগৰ জিলা প্ৰশাসনে জানিবলৈ দিছে।

নামৰূপৰ সাৰ কাৰখানালৈ আহিছে ভাল খবৰ

নামৰূপ কাৰখানাৰ বাবে আছে ভাল খবৰ। নামৰূপ সাৰ কাৰখানাৰ চতুর্থ গোটৰ স্থাপন হোৱাৰ সপোন এতিয়া সাৰ্থক হোৱাৰ দিশে আগবাঢ়িছে।আজি কেন্দ্ৰীয় সাৰ আৰু ৰসায়ন বিভাগৰ মন্ত্ৰী সদানন্দ গৌড়াৰে হোৱা এক আলোচনাত উপস্থিত থকাৰ পিছতে কাৰখানাটোৰ চতুৰ্থটো গোট স্থাপনৰ ক্ষেত্ৰত সম্ভাৱনা ব্যক্ত কৰিছে বিত্তমন্ত্ৰী ড০ হিমন্ত বিশ্ব শৰ্মাই। মন্ত্ৰী ড০ শৰ্মাই জনাই যে চতুৰ্থটো গোটক লৈ থকা জটিলতা আঁতৰাবলৈ অসম চৰকাৰে বিনিয়োগৰ পৰিমাণ পূৰ্বৰ ১১ শতাংশৰ পৰিৱৰ্তে ২৬ শতাংশলৈ বৃদ্ধি কৰাৰ প্ৰস্তাৱ দিছে।

লগতে বিত্তমন্ত্ৰী গৰাকীয়ে কয় যে কেন্দ্ৰীয় চৰকাৰে এই সম্পৰ্কত সেউজ সংকেত দিব।উল্লেখযোগ্য যে ১৯৬৯ চনৰ পৰা আৰম্ভ হোৱা কাৰখানাটোৰ ২য় আৰু ৩য় গোটৰ কাম অতি দুৰ্বলভাৱে চলি থকাৰ পিছত ৪ৰ্থটো গোট মুকলি কৰাৰ বাবে চেষ্টা চলাই থকা হৈছিল যদিও ই কাৰ্যতঃ হৈ উঠা নাছিল। কিন্তু আজি বৈঠকত বিত্তমন্ত্ৰী গৰাকীয়ে চতুৰ্থটো গোট স্থাপনৰ স্থাপনৰ সম্ভাৱনাৰ থকা কথা সদৰি কৰে।

গাহৰি পালকৰ সমস্যাক গুৰুত্ব দিয়ক

অসমৰ গাহৰি পালক সকলে দীৰ্ঘদিন ধৰি সন্মুখীন হৈ থকা সমস্যাৰ সমাধানৰ বাবে চৰকাৰ তথা বিভাগীয় কৰ্তৃপক্ষক দৃষ্টিগোচৰ কৰাৰ অৰ্থে কালি এখনি সংবাদমেল অনুষ্ঠিত কৰে।গুৱাহাটী প্ৰেছ ক্লাৱত অনুষ্ঠিত হোৱা সংবাদ মেলখনত উত্তৰ পূব প্ৰগতিশীল গাহৰি পালক সন্থাৰ সম্পাদকে কয় যে লকডাউনৰ বাবে গাহৰি পালক সকলে লকডাউনৰ পিছত গাহৰিৰ বাবে পয্যাপ্ত সামগ্ৰী যোগানৰ ক্ষেত্ৰত বিভিন্ন সমস্যাৰ সন্মুখীন হোৱাৰ লগতে উপাৰ্জনহীনতাত ভূগিছে।ইয়াৰ উপৰিও আফ্ৰিকান ছোৱাইন ফ্লুৱে যথেষ্ট প্ৰভাৱ পেলাইছে।সেয়েহে বিভাগীয় কৰ্তৃপক্ষক গাহৰি পালনৰ ক্ষেত্ৰত সুস্থ পৰিৱেশ গঢ়ি দিবলৈ সংবাদমেলৰ যোগে আহ্বান জনাইছে।

জন্মদিনত অনুৰাগীয়ে লিখিলে সুশান্ত তুমি য’তেই আছা, শান্তিত থাকা

আজি জনপ্ৰিয় অভিনেতা সুশান্ত সিং ৰাজপুতৰ ৩৫ সংখ্যক জন্ম বাৰ্ষিকী।অভিনেতা গৰাকী জন্ম দিনৰ লগত সংগতি ৰাখি ছ’চিয়েল মেডিয়াত হাজাৰ হাজাৰ অনুৰাগীয়ে শুভেচ্ছা জ্ঞাপন কৰি পোষ্ট শ্বেয়াৰ কৰিছে।কোনোৱে ৰাজপুতৰ দৰ্শন, আৰ্দশক সুঁৱৰি অভিনেতা গৰাকী শুভেচ্ছা যাঁচিছে।কোনোৱে অভিনেতা গৰাকীৰ ন্যায়ৰ বাবে এই বিশেষ দিনটোত ঈশ্বৰক প্ৰাৰ্থনা জনাইছে।

ইতিমধ্যে ছ’চিয়েল মেডিয়া ফেচবুকত এটা টেণ্ড আৰম্ভ হৈছে। উল্লেখযোগ্য যে বিগত বৰ্ষৰ ১৪ জুনত অভিনেতা গৰাকীক মুম্বাইত নিজা ফ্লেটত মৃত অৱস্থাত পোৱা গৈছিল ।পৰৱৰ্তী সময়ত অভিনেতা গৰাকীৰ মৃত্যু তদন্ত কৰিবলৈ চি বি আই, এ চি বি আৰু ইউ ডি সক্ৰিয় হৈ পৰিছিল।জনপ্ৰিয় অভিনেতা গৰাকীৰ আজি এই বিশেষ দিনটোত এন ই ফ’কাচ ডট কমৰ পৰিয়ালে শ্ৰদ্ধাৰে স্মৰণ কৰিছোঁ।

ৰবীন্দ্ৰ ভৱনত পৰিবেশিত হ’ল মোক্ষ

ৰবীন্দ্ৰভৱনত আজি সন্ধিয়া ৬ বজাত অসম চৰকাৰৰ সাংস্কৃতিক সঞ্চালকালয়ৰ উদ্যোগত তথা বৰ্তমানৰ সঞ্চালক যাদৱ শইকীয়াৰ নেতৃত্বত,গুৱাহাটীৰ “দৰ্পণ ডান্স অকাডেমী” আৰু সংগীত সত্ৰৰ সহযোগত যোৱা বৰ্ষত মহাপ্ৰয়াণ ঘটা পদ্মশ্ৰী ,সংগীত নাটক অকাডেমী বঁটা প্ৰাপক ভাৰতৰ এগৰাকী যশস্বী নৃত্যবিশাৰদ, সমালোচক কোঠাৰীৰ স্মৃতিত “মোক্ষ” শীৰ্ষক ভাৰতীয় ধ্ৰুপদী নৃত্যৰ এক অনুষ্ঠান পৰিৱেশিত হয়৷এই অনুষ্ঠানটিত নৃত্যাচাৰ্য পদ্মশ্ৰী যতীন গোস্বামী,অসম চৰকাৰৰ সাংস্কৃতিক বিভাগৰ অৱসৰপ্ৰাপ্ত উচ্চপদস্থ বিষয়া স্বপ্ননীল বৰুৱা,আই এ এছ বিষয়া তথা সাংস্কৃতিক ব্যক্তিত্ব মাধুৰীমা বৰুৱা,প্ৰখ্যাত মূকাভিনয় শিল্পী মইনুল হক,গুৱাহাটী বিশ্ববিদ্যালয়ৰ ছাত্ৰ কল্যাণৰ সঞ্চালক ড° ৰঞ্জন কাকতি,গুৱাহাটী বিশ্ববিদ্যালয়ৰ ভাইচ চেঞ্চেলৰ মৃণালজ্যোতি ডেকা বিশিষ্ট অতিথি হিচাপে উপস্থিত থাকে৷এইসকল বিশিষ্ট ব্যক্তিক অনুষ্ঠানটিত সম্বৰ্ধনা জনোৱাৰ লগতে প্ৰয়াত সুনীল কোঠাৰীৰ বিষয়ে কিছু কথাও শ্ৰদ্ধাৰে স্মৰণ কৰা হয়৷বন্তি প্ৰজ্বলনৰে আৰম্ভ হোৱা ‘মোক্ষ’ শীৰ্ষক নৃত্য সন্ধিয়াটিত অৰুণাভজ্যোতি মালাকাৰৰ “খোল বাদন”,স্বনামধন্য নৃত্যশিল্পী অনিতা শৰ্মাৰ “গুৰু বন্দনাৰে সৈতে সত্ৰীয়া নৃত্য”,যশস্বী নৃত্যগুৰু বিপুল দাসৰ “কথক নৃত্য”,খ্যাতনমা নৃত্যশিল্পী তথা প্ৰৱক্তা ড° অঞ্জনাময়ী শইকীয়াৰ “ওডিচি নৃত্য” পৰিবেশনৰ লগতে গুৱাহাটীৰ সংগীত সত্ৰৰ শিল্পীসকলে ‘একলব্য’ আৰু আন এক সত্ৰীয়া নৃত্য প্ৰদৰ্শন কৰে৷

আজি আনুষ্ঠানিক ভাৱে মুকলি হ’ল উদ্যান শস্য মেলা

বৃহস্পতিবাৰৰ পৰা বোকাখাতত তিনিদিনীয়াকৈ অনুষ্ঠিত হ’ল আন্তঃৰাষ্ট্ৰীয় ভাৰ্চুৱেল পদ্ধতিৰে ৰাষ্ট্ৰীয় কৃষি আৰু উদ্যান শস্য মেলা ৷ মুখ্যমন্ত্ৰী সৰ্বানন্দ সোণোৱালে মেলাখন আনুষ্ঠানিকভাৱে মুকলি কৰাৰ কথা আছিল যদিও প্ৰতিকুল বতৰৰ বাবে উপস্থিত থাকিব নোৱাৰি ভাৰ্চুৱেল পদ্ধতিৰে অংশ গ্ৰহণ কৰে ৷ তাৰোপৰি মেলাখনত কেন্দ্ৰীয় কৃষিমন্ত্ৰী নৰেন্দ্ৰ সিং টোমাৰেও ভৰ্চুৱেল পদ্ধতিৰে অংশ গ্ৰহণ কৰে ৷ প্ৰায় দুঘন্টা পলমকৈ আৰম্ভ হোৱা উদ্বোধনী অনুষ্ঠানৰ কৃষিমন্ত্ৰী অতুল বৰাই আদৰণি ভাষণ প্ৰদান কৰাৰ সময়তে ভৰ্তি হৈ থকা মণ্ডপ খালী হৈ পৰা দেখা গ’ল ৷ অনুষ্ঠানত ১২ দেশৰ ৰাষ্টদূত আৰু উচ্চায়ুক্তই অংশ গ্ৰহণ কৰে ৷ এই বৃহৎ মেলাত ৰাজ্যখনৰ ৩৩ খন জিলাৰ ১৮৩ খন বিপনীয়ে অংশ গ্ৰহণ কৰিছে ৷ অৱশ্যে চিপচিপিয়া বৰষুণৰ বাবে উৎসাহ সীমিত হোৱা পৰিলক্ষিত হয় ৷ ৰাজ্যৰ ৫ শ কৃষকে প্ৰতিদিনে প্ৰশিক্ষণ লোৱাৰ লগতে গোলাঘাট জিলাৰ ৬ শ কৃষকে প্ৰতিদিনে প্ৰশিক্ষণ ল’ব ৷ প্ৰতি সন্ধ্যা ৰাজ্যৰ প্ৰতিস্থিত শিল্পীয়ে সাংস্কৃতিক কাৰ্যসূচী পৰিৱেশন কৰিব ৷ আজি প্ৰথম নিশা বিপিন চাওদাং, কল্পনা পাটোৱাৰী, সোমনাথ বৰা আৰু বিমান বৰুৱাৰ লগতে স্থানীয় শিল্পীৰ সাংস্কৃতিক অনুষ্ঠান অনুষ্ঠিত হ’ব ৷

খবৰ যুগুতালে বোকাখাতৰ পৰা দিব্যজ্যোতি হাজৰিকাই..