শিৱসাগৰত আয়োজিত গাঁওৰক্ষী সংগঠনৰ ৭২ তম প্ৰতিষ্ঠা দিৱসত মুখ্যমন্ত্ৰীৰ অংশ গ্ৰহণ

মুখ্যমন্ত্ৰী সৰ্বানন্দ সোণোৱালে কালি শিৱসাগৰৰ ঐতিহাসিক তলাতল ঘৰৰ বাকৰিত আয়োজিত সদৌ অসম গাঁও ৰক্ষী সংগঠনৰ ৭২ তম্‌ প্ৰতিষ্ঠা দিৱসত মুখ্য অতিথি হিচাপে অংশ গ্ৰহণ কৰে৷ অনুষ্ঠানৰ আৰম্ভণিতে মুখ্যমন্ত্ৰীয়ে গাঁওৰক্ষী বাহিনীৰ প্ৰতিষ্ঠাপক হৰিনাৰায়ণ বৰুৱাৰ প্ৰতিচ্ছৱিত মাল্যাৰ্পণ কৰি গভীৰ শ্ৰদ্ধা নিবেদন কৰে৷
এই উপলক্ষে আয়োজিত সভাত ভাষণ প্ৰদান কৰি মুখ্যমন্ত্ৰীয়ে কয় যে মহামানৱ মহাত্মা গান্ধীয়ে কৈছিল যে ভাৰতবৰ্ষৰ আত্মা গাঁৱতহে বাস কৰে৷ ভাৰতবৰ্ষৰ প্ৰায় ৮৪ শতাংশ লোক গাঁৱত বাস কৰে৷ ভাৰতবৰ্ষক শক্তিশালী কৰিব লাগিলে ৮৪ শতাংশ লোকে বসবাস কৰা গ্ৰামাঞ্চলক শক্তিশালী কৰিব লাগিব৷ ভাৰতবৰ্ষৰ প্ৰতিখন গাঁৱৰ গঞাই আজি একবিংশ শতিকাত শক্তিশালীভাৱে অৱতীৰ্ণ হোৱাৰ বাবে নিষ্ঠাসহকাৰে অৱতীৰ্ণ হৈছে৷ অসমৰ ২৬ হাজাৰ খন গাঁৱৰ সৰ্বাংগীন উন্নয়নৰ বাবে আমি সকলোৱে সন্মিলিত প্ৰচেষ্টা চলাব লাগিব৷ গ্ৰামাঞ্চলৰ সাৰুৱা মাটিত উৎপাদন বৃদ্ধিৰ বাবে আমি প্ৰচেষ্টা চলাব লাগিব৷ উঠি অহা প্ৰজন্মক আমাৰ পাঁচ হাজাৰ বছৰীয়া সভ্যতা সংস্কৃতিৰ উমান দিব লাগিব৷ মানৱীয় অনুভূতিৰে উঠি অহা প্ৰজন্মৰ মাজত মানৱতাবোধৰ সৃষ্টি কৰিব লাগিব৷ জাতিৰ পিতা মহাত্মা গান্ধীয়ে ভাৰতবৰ্ষক ৰাম ৰাজ্য হিচাপে প্ৰতিষ্ঠা কৰাৰ সপোন দেখিছিল৷ গাঁও ৰক্ষী বাহিনীৰ সদস্য সকলে নিজৰ নিজৰ গাঁৱক সুৰক্ষিত কৰি ৰাখিব লাগিব বুলি উল্লেখ কৰি মুখ্যমন্ত্ৰীয়ে কয় যে গাঁৱসমূহত যাতে কোনো অপৰাধমূলক ঘটনা সংঘটিত নহয় তাৰ বাবে গাঁওৰক্ষী বাহিনীৰ জোৱান সকলক নিষ্ঠাৰে কাম কৰিব লাগিব৷
মুখ্যমন্ত্ৰীয়ে কয় যে ২০১৬ চনত দুৰ্নীতিমুক্ত, বিদেশীমুক্ত, সন্ত্ৰাসবাদমুক্ত আৰু প্ৰদূষণমুক্ত অসম গঢ়াৰ বাবে বৰ্তমানৰ চৰকাৰখনে সংকল্প লৈছিল৷ এই লক্ষ্য পূৰণৰ দিশত ৰাইজৰ সহযোগত চৰকাৰখনে বহুখিনি সফল হৈছে৷ এতিয়া অসমৰ সকলো শ্ৰেণীৰ জনসাধাৰণে সুৰিক্ষতভাৱে এক শান্তিপূৰ্ণ বাতাৱৰণত জীৱন যাপন কৰাৰ বাবে এক পৰিৱেশ নিৰ্মাণ হৈছে৷ এসময়ত অসমৰ সমাজ জীৱনত দুৰ্নীতি আৰু ভ্ৰষ্টাচাৰ দলৈকে শিপাই গৈছিল৷ শাসন ব্যৱস্থা দুৰ্বল হৈ পৰিছিল৷ দুৰ্নীতিপৰায়ণ ব্যক্তি, প্ৰভাৱশালী ব্যক্তিসকলে ন্যস্তস্বাৰ্থ পূৰণ কৰাৰ বাবে বিভিন্ন অপকৰ্মত লিপ্ত হৈছিল৷ অসমৰ ৰাইজৰ সহযোগত বৰ্তমানৰ ৰাজ্য চৰকাৰখনে দুৰ্নীতিৰ বিৰুদ্ধে যি শক্তিশালী পদক্ষেপ গ্ৰহণ কৰিলে ইয়াৰ ফলশ্ৰুতিত আজি সমগ্ৰ ৰাজ্যখনতে এক সুন্দৰ আৰু শক্তিশালী ব্যৱস্থা প্ৰদান কৰাৰ দিশত চৰকাৰখন সফল হৈছে বুলিও তেওঁ কয়৷
অসমৰ জনসাধাৰণে শান্তি বিচাৰে বুলি উল্লেখ কৰি মুখ্যমন্ত্ৰীয়ে কয় যে পূৰ্বৰ চৰকাৰে যথোচিত পদক্ষেপ গ্ৰহণ নকৰা বাবে জনসাধাৰণে শান্তিৰ সন্ধান কৰিব লগা হৈছিল৷ সমগ্ৰ অসমৰ গণতান্ত্ৰিক বাতাবৰণ সেই সময়ত প্ৰদূষিত হৈ পৰিছিল৷ সেয়েহে সন্ত্ৰসবাদ মুক্ত অসম গঢ়াৰ লক্ষ্যৰে ২০১৬ চনত বৰ্তমানৰ ৰাজ্য চৰকাৰখনে যি যাত্ৰা আৰম্ভ কৰিলে ইয়াৰ ফলশ্ৰুতিত বহু কেইটা উগ্ৰপন্থী সংগঠনৰ বহু সদস্যই উগ্ৰপন্থা পৰিত্যাগ কৰি মূলসুঁতিলৈ উভতি আহিছে৷ ফলত ৰাজ্যখনত শান্তিৰ পৰিৱেশ বিৰাজ কৰাৰ বাবে জনসাধাৰণে যথেষ্ট সকাহ পাইছে৷ ইয়াৰ ফলতে অসমে সকলো দিশতে উন্নতিৰ জখলাত বগাবলৈ সক্ষম হৈছে৷ ইয়াৰ মূল কাৰণ শান্তি বুলিও মুখ্যমন্ত্ৰীয়ে কয়৷ সন্ত্ৰাসবাদমুক্ত অসম গঢ় দিয়াৰ বাবে ভাৰতবৰ্ষৰ অন্যান্য প্ৰান্তত অসমে এতিয়া সুকীয়া দৃষ্টি লাভ কৰিবলৈ সক্ষম হৈছে বুলিও তেওঁ কয়৷
মুখ্যমন্ত্ৰীয়ে কয় যে গাঁওৰক্ষী বাহিনীৰ জোৱান সকলে গাঁও সমূহ সুৰক্ষিত কৰি ৰাখিব লাগিব৷ গ্ৰাম্য সমাজত যাতে মিলাপ্ৰীতি আৰু সমন্বয় অটুত থাকে সেই দিশত গাঁওৰক্ষী বাহিনীয়ে প্ৰধান ভূমিকা ল’ব লাগিব৷ গাঁও সমূহত যদি কোনো অপশক্তিয়ে শান্তি-সম্প্ৰীতি বিনষ্ট কৰিবলৈ প্ৰচেষ্টা চলায় সেই প্ৰচেষ্টা গাঁওৰক্ষী বাহিনীয়ে মষিমূৰ কৰিব লাগিব৷ গাঁও সমূহক পৰিষ্কাৰ-পৰিচ্ছন্ন কৰি ৰাখিবলৈ সক্ষম হ’লে জাতিৰ পিতা মহাত্মা গান্ধীৰ ৰাম ৰাজ্যৰ সপোন বাস্তাৱায়িত হ’ব বুলিও মুখ্যমন্ত্ৰীয়ে কয়৷ গাঁওৰক্ষী বাহিনীৰ প্ৰতিগৰাকী নিষ্ঠাৱান জোৱানে এই দৃষ্টিভংগীৰে আগন্তুক সময়ত কাম কৰি যাব বুলিও মুখ্যমন্ত্ৰীয়ে আশা প্ৰকাশ কৰে৷ ঐতিহাসিক তলাতল ঘৰৰ এই প্ৰাঙ্গণত সমগ্ৰ অসমৰ জনসাধাৰণক বিভিন্ন প্ৰত্যাহ৩ান আহিলেও মিলাপ্ৰীতি আৰু সমন্বয় অটুত ৰখাৰ বাবে সংকল্পবদ্ধ হ’বলৈ মুখ্যমন্ত্ৰীয়ে আহ্বান জনায়৷
আজিৰ এই অনুষ্ঠানতে মুখ্যমন্ত্ৰীয়ে গাঁওৰক্ষী বাহিনীৰ প্ৰতিষ্ঠাপক হৰিনাৰায়ণ বৰুৱাৰ এটা প্ৰতিমূৰ্তি গুৱাহাটীত স্থাপনৰ পদক্ষেপ ল’বলৈ আৰক্ষী সঞ্চালক প্ৰধানক নিৰ্দেশ দিয়াৰ লগতে গাঁঁওৰক্ষী বাহিনীৰ জোৱানসকলে স্মাৰক পত্ৰ প্ৰদানৰ জৰিয়তে উল্লেখ কৰা সমস্যাসমূহ সমাধানৰ দিশত চৰকাৰে ইতিবাচকভাৱে পদক্ষেপ ল’ব বুলিও আশ্বাস প্ৰদান কৰে৷ মুখ্যমন্ত্ৰীয়ে লগতে গাঁওৰক্ষী বাহিনীসমূহৰ মাননি বৰ্তমানৰ ২৫০০ টকাৰ পৰা বৃদ্ধি কৰাৰ দিশটো চৰকাৰে পদক্ষেপ ল’ব বুলি কয়৷ এই অনুষ্ঠানতে মুখ্যমন্ত্ৰীয়ে বিশিষ্ট সেৱাৰ বাবে ৩৪ টা গাঁওৰক্ষী সংগঠন তথা মণ্ডল পৰ্যায়ৰ সংগঠনক মান পত্ৰ প্ৰদান কৰে৷
গাঁওৰক্ষী বাহিনীৰ মুখ্য নিয়ন্ত্ৰক দিগন্ত বৰাই আদৰণী ভাষণ প্ৰদান কৰা কালিৰ অনুষ্ঠানত ৰাজহ আৰু দুৰ্যোগ ব্যৱস্থাপনা বিভাগৰ মন্ত্ৰী যোগেন মহন, যোৰহাট লোক সভা সমষ্টিৰ সাংসদ তপন কুমাৰ গগৈ আৰু আৰক্ষী সঞ্চালক প্ৰধান ভাস্কৰজ্যোতি মহন্তইও ভাষণ প্ৰদান কৰে৷ অনুষ্ঠানত বিধায়কসকল ক্ৰমে প্ৰদীপ হাজৰিকা, কুশল দুৱৰী, নৱনিতা সন্দিকৈ, গাঁওৰক্ষী বাহিনীৰ মুৰব্বী অঞ্জন কুমাৰ বৰা, শিৱসাগৰ জিলাৰ উপায়ুক্ত বিষ্ণুকমল বৰা, অসম ক্ৰিকেট সন্থাৰ সভাপতি ৰমেন দত্ত প্ৰমুখ্যে গণ্য-মান্য ব্যক্তিসকল উপস্থিত থাকে৷

Share on whatsapp
WhatsApp
Share on facebook
Facebook
Share on twitter
Twitter
Share on email
Email

পলাশবাৰীৰ ৰামপুৰ কৃষি উন্নয়ন চক্ৰত ৰবি শস্যৰ বীজ বিতৰণ

ৰাষ্ট্ৰীয় কৃষি বিজ্ঞান যোজনাৰ অধীনত পলাশবাৰীৰ ৰামপুৰ কৃষি উন্নয়ন চক্ৰত আজি কামৰূপ জিলা পৰ্যায়ত অনুমোদিত হিতাধিকাৰীসকলৰ মাজত ৰবি শস্য সৰিয়হ, মাকৈ আৰু মটৰৰ বীজ বিতৰণ হয়। কৃষি উন্নয়ন বিষয়া গিৰীন্দ্ৰ কুমাৰ শৰ্মা, কৃষি উন্নয়ন সহায়ক লংকেশ্বৰ কলিতা, দক্ষিণ কামৰূপ জিলা কিষাণ মৰ্চাৰ সভাপতি মাণিক সিংহ আদিকে ধৰি কেবাগৰাকীও বিশিষ্ট ব্যক্তিৰ উপস্থিতিত চাৰি কুইণ্টল সৰিয়হ, আঠ কুইণ্টল মটৰ আৰু ন কুইণ্টল মাকৈ কৃষক হিতাধিকাৰীসকলৰ মাজত বিতৰণ কৰি দিয়ে। পলাশবাৰীৰ ৰামপুৰ চক্ৰৰ অন্তৰ্গত কৃষকসকলৰ বেছিভাগেই মহাবাহু ব্ৰহ্মপুত্ৰৰ পাৰত অথবা বালি চাপৰিত ৰবি শস্যৰ খেতি কৰি আহিছে। তেনে ক্ষেত্ৰত চৰকাৰে বিনামূলীয়াকৈ বিতৰণ কৰা এই ৰবি শস্যৰ বীজে কৃষকসকলক যথেষ্ট উপকৃত হ’ব বুলি কৃষকসকলে মন্তব্য কৰে।

মুদুকী হাইস্কুলৰ সোণালী জয়ন্তীৰ লাইখুঁটা স্থাপন

কামৰূপ জিলাৰ পলাশবাৰী বিধান সভা সমষ্টিৰ মুদুকী আঞ্চলিক জনজাতীয় হাইস্কুলৰ সোণালী জয়ন্তীৰ আজি লাইখুঁটা স্থাপন কৰা হয় ৷ ১৯৭২ চনত স্থাপিত শিক্ষা প্ৰতিষ্ঠান খনৰ সোণালী জয়ন্তী উৎসৱৰ লাইখুঁটা স্থাপন কৰে ৰাভা হাছং স্বায়ত্ত্বশাসিত পৰিষদৰ মূখ্য কাৰ্যবাহী সদস্য টংকেশ্বৰ ৰাভাই ৷ উদযাপন সমিতিৰ সভাপতি দেৱজিত নাফাই আঁতধৰা অনুষ্ঠানটিত নিজ বক্তব্যত পৰিষদৰ মূখ্য কাৰ্যবাহী সদস্য টংকেশ্বৰ ৰাভাই কয় যে – শিক্ষা অবিহনে কোনো জাতি বা অঞ্চল এটা কেতিয়াও আগবাঢ়ি যাব নোৱাৰে ৷ মানৱ সম্পদ গঢ়া উক্ত মহান প্ৰতিষ্ঠান খনৰ এই দীঘলীয়া যাত্ৰাত যথেষ্ট সমস্যাৰ সন্মুখীন হৈ আহিছে ৷ সেয়ে এই পবিত্ৰ অনুষ্ঠানটিৰ উত্তৰণৰ বাবে সকলো শ্ৰেণীৰ ৰাইজৰ সহযোগিতা কামনা কৰাৰ লগতে সোণালী জয়ন্তীৰ মূল তোৰণকে ধৰি স্মৃতিগ্ৰন্থ প্ৰকাশলৈ এঘাৰ লাখ পঞ্চাশ হেজাৰ আৰ্থিক সাহায্য ঘোষণা কৰে টংকেশ্বৰ ৰাভাই ৷ উল্লেখ্য যে- ২০২২ বৰ্ষৰ ২৫ ফেব্ৰুৱাৰীৰ পৰা তিনিদিনীয়া কাৰ্যসূচীৰে অনুষ্ঠিত হ’বলগীয়া সোণালী জয়ন্তীৰ লাইখুঁটা স্থাপন অনুষ্ঠানত বিদ্যালয় খনৰ প্ৰাক্তন প্ৰধান শিক্ষক নলিনী কুমাৰ ৰাভাকে ধৰি বৰ্তমানৰ শিক্ষক কৰ্মচাৰী তথা ছাত্ৰ ছাত্ৰী সকল উপস্থিত আছিল ৷ আনহাতে, উক্ত সোণালী জয়ন্তী উদযাপনৰ বাবে দেৱজিত নাফাক সভাপতি আৰু গোপীনাথ ৰাভাক সম্পাদক হিচাপে লৈ ২০ খন উপ – সমিতি সহ এখন পৰিচালনা সমিতি গঠন কৰা হৈছে ৷ তেনেক্ষেত্ৰত শিক্ষা প্ৰতিষ্ঠান খনৰ সোণালী জয়ন্তীৰ সকলো কাৰ্যসূচীত প্ৰাক্তন ছাত্ৰ ছাত্ৰীকে ধৰি সকলো ৰাইজৰ সহায় সহযোগিতা কামনা কৰিছে উদযাপন সমিতিয়ে ৷

তিনিচুকীয়াৰ বাৰেকুৰিত বিশ্ব হলৌ দিৱস উদযাপন

তিনিচুকীয়াৰ বাৰেকুৰি অঞ্চলৰ দীঘল সাঁকো ন মতাপুং পুৰণি বিহুখোলা প্ৰেক্ষাগৃহত শনিবাৰৰ পৰা অনুষ্ঠিত হৈছে বিশ্ব হলৌ দিৱস-২০২১ । বিশ্বৰ বিলুপ্তপ্ৰায় প্ৰাণী হলৌ বান্দৰ সংৰক্ষণ আৰু বন্যপ্ৰাণীৰ প্ৰতি মানুহৰ মাজত সজাগতা অনাৰ উদ্দেশ্যৰে বৃহত্তৰ বাৰেকুৰি অঞ্চলৰ ৰাইজে আয়োজন কৰা হৈছে বিশ্ব হলৌ দিৱস ২০২১ ৰ ৷ অইল ইণ্ডিয়া লিমিটেডৰ তত্বাৱধানত, বাৰেকুৰি পৰিৱেশ উন্নয়ন সমিতি, মৰাণ জাতীয় মহিলা পৰিষদ বাৰেকুৰি আঞ্চলিক সমিতি, গ্ৰীণ ভিজন এন-ইৰ উদ্যোগত আৰু তিনিচুকীয়া মহাবিদ্যালয়, দীঘলসাঁকো নৱজ্যোতি যুৱ সংঘ আৰু ন-মতাপুং সুৰুযজ্যোতি যুৱ সংঘৰ সহযোগত দুদিনীয়াকৈ অনুষ্ঠিত কৰা বিশ্ব হলৌ দিৱসৰ কাৰ্যসূচী মুখ্য অতিথি হিচাপে উপস্থিত থাকে অৰণ্য মানৱ যাদৱ পায়েং । মহোৎসৱৰ লগত সংগতি ৰাখি পুৱা আয়োজন কৰা বিভিন্ন ধৰণৰ বাৰেৰহণীয়া সাংস্কৃতিক শোভাযাত্ৰাৰ লগতে কলা-নৃত্য প্ৰদৰ্শনেৰে মুখৰিত হৈ পৰে সমগ্ৰ বাৰেকুৰি অঞ্চল ।

ডিব্রুগড়ৰ বগীবিলৰ সমীপৰ দক্ষিণ পাৰটো পৰিদৰ্শন কৰি প্ৰস্তাৱিত কার্গ টার্মিনেল তথা পর্যটনঘাটৰ প্ৰকল্পস্থলীৰ বুজ লয় কেন্দ্রীয় মন্ত্রী সর্বানন্দ সােণােৱালে

কেন্দ্রীয় বন্দৰ, জাহাজ, পৰিবহণ আৰু জলপথ মন্ত্রী তথা কেন্দ্রীয় আয়ুষ মন্ত্রী সর্বানন্দ সােণােৱালে আজি ডিব্রুগড়ৰ বগীবিলৰ সমীপৰ দক্ষিণ পাৰটো পৰিদৰ্শন কৰে আৰু ইয়াত প্রস্তাৱিত কার্গ টার্মিনেল তথা পর্যটনঘাটৰ প্রকল্পস্থলীৰ সৈতে জড়িত বিভিন্ন দিশৰ বুজ লয়।এই প্রসংগত তেখেতে কয় যে- এসময়ত ডিব্রুগড় ভাৰতৰ মানচিত্রত এক গুৰুত্বপূর্ণ নদী বন্দৰ হিচাপে খ্যাত আছিল। এই অঞ্চলৰ মােহনাঘাটৰপৰা থলুৱাভাৱে উৎপাদিত বিভিন্ন সা সামগ্রী ব্ৰহ্মপুত্ৰয়েদি বংগােপ সাগৰৰ জৰিয়তে দেশ বিদেশৰ বিভিন্ন প্রান্তলৈ প্ৰেৰণ কৰা হৈছিল আৰু লগতে ইয়ালৈ আমদানিও হৈছিল। অসমৰ অর্থনৈতিক বুনিয়াদ গঢ় দিয়াত ডিব্রুগড়ৰ নদী বন্দৰৰ ভূমিকা ঐতিহাসিকভাৱে তাৎপর্যপূর্ণ। কিন্তু পৰৱর্তী সময়ত এই ধাৰা স্তব্ধ হৈ পৰিছিল। সেয়ে উক্ত দিশত ডিব্রুগড়ৰ পূৰ্বৰ গৰিমা পুনৰ ঘূৰাই অনাৰ বাবে আমি লক্ষ্য নির্ধাৰণ কৰিছো।

তদুপৰি তেখেতে কয় যে- মাননীয় প্রধানমন্ত্রী নৰেন্দ্র মােদী ডাঙৰীয়াৰ বলিষ্ঠ নেতৃত্বত “এক্ট ইষ্ট প’লিচীৰ জৰিয়তে অসম তথা উত্তৰ পূর্বাঞ্চলত এতিয়া যাতায়াত-যােগাযােগ ব্যৱস্থা সুগম হৈ পৰিছে, যাৰ যােগেদি সমগ্র অঞ্চলটোত সূচনা হৈছে উন্নয়নৰ এক ন দিগন্তৰ।জলপথে বেপাৰ-বাণিজ্য, আমদানি-ৰপ্তানি কৰাৰ ক্ষেত্ৰত সদায়েই অগ্রণী ভূমিকা পালন কৰি আহিছে। ই এক সহজসাধ্য আৰু তুলনামূলকভাৱে কম খৰচী মাধ্যম। মােদী ডাঙৰীয়াৰ দূৰদৃষ্টিপূর্ণ নেতৃত্বত ৰাষ্ট্ৰীয় জলপথ নং ২ অর্থাৎ ব্রহ্মপুত্র নদ আৰু ৰাষ্ট্ৰীয় জলপথ নং ১৬ অর্থাৎ বৰাক- এই দুয়ােখন নদীৰ যােগেদি বাংলাদেশৰ
মংলা আৰু চিটাগং বন্দৰৰ জৰিয়তে বিভিন্ন সা-সামগ্ৰীৰ আমদানি ৰপ্তানিকৰণৰ ক্ষেত্ৰত ভাৰত বাংলাদেশৰ মাজত ইতিমধ্যে বুজাবুজিৰ চুক্তি স্বাক্ষৰিত হৈছে। ইয়াৰ ফলত আমাৰ থলুৱা সামগ্রীসমূহে বিশ্ব বজাৰত স্থিতি সবল কৰিব পাৰিব। তদুপৰি ব্ৰহ্মপুত্ৰৰ দাঁতিত মাল্টিমডেল লজিটিক্স পার্ক স্থাপন কৰাৰ বাবেও ব্যৱস্থা গ্রহণ কৰা হৈছে। ইতিমধ্যে যােগীঘােপাত ইয়াৰ কাম পূর্ণগতিত চলি আছে। সমান্তৰালভাৱে গুৱাহাটী, পান্ডু, ধুবুৰী আদিত ব্ৰহ্মপুত্ৰৰ যাতায়াত ব্যৱস্থা সুচল কৰাৰ বাবে নদী বন্দৰ নিৰ্মাণ কৰাৰ পদক্ষেপ গ্রহণ কৰা হৈছে।
আগন্তুক দিনত কাৰ্গ আৰু যাত্রী পৰিবহণ উভয়ৰে সুবিধাৰ বাবে ডিব্রুগড়তাে তেনে এটা বন্দৰ নিৰ্মাণৰ প্রয়াস কৰা হৈছে- এইবুলি সােণােৱালে উল্লেখ কৰে।
প্রধানমন্ত্রী গতি শক্তিৰ অধীনত প্রস্তাৱিত উক্ত পদক্ষেপসমূহ ৰূপায়ণ হ’লে অসমৰ অর্থনৈতিক গতি অধিক ত্বৰান্বিত হােৱাৰ লগতে যুৱপ্ৰজন্মৰ বাবে সংস্থাপনৰ পথে প্রশস্ত হ’ব। সেয়েহে এইক্ষেত্ৰত যাৱতীয় আন্তঃগাঁথনি গঢ় দিয়াত আমি অগ্রাধিকাৰ দিছোঁ। তদুপৰি, ব্ৰহ্মপুত্ৰৰ বুকুত মজুত থকা বিভিন্ন পর্যটন সম্ভাৱনীয়তাৰ প্রতি লক্ষ্য ৰাখি ইয়াৰ অত্যাধুনিক অন্বেষণৰদ্বাৰা অনাগত দিনত উপযুক্ত ব্যৱস্থাও গ্রহণ কৰা হ’ব- সােণােৱালে লগতে উল্লেখ কৰে। লগতে তেখেতে কয় যে- সাগৰ মালা প্রকল্পৰ যােগেদি মাল্টিমডেল সংযােগ উন্নয়ন সাধি বিভিন্ন আন্তঃগাঁথনি আৰু পর্যটন উন্নীতকৰণৰ বাবেও ব্যৱস্থা লােৱা হৈছে।
আজিৰ পৰিদর্শনকালত কেন্দ্রীয় মন্ত্রীগৰাকীক সংগ দিয়ে কেন্দ্রীয় বন্দৰ, জাহাজ পৰিবহণ আৰু জলপথ মন্ত্ৰালয়ৰ বিষয়াসকলে, অসম চৰকাৰৰ অভ্যন্তৰীণ জল পৰিবহণ বিভাগৰ প্ৰধান সচিব শ্রী কে কে দ্বিবেদী তথা বিষয়াসকলে, উত্তৰ-পূব সীমান্ত ৰে’লৱেৰ মহাপ্ৰৱন্ধক শ্রী অনশুল গুপ্তা আৰু বিষয়াসকলে।

শংকৰদেৱ কলাক্ষেত্ৰৰ শ্ৰীমন্তশঙ্কৰদেৱ আন্তঃৰাষ্ট্ৰীয় প্ৰেক্ষাগৃহত সঙ্গীত সত্ৰ পৰীক্ষা পৰিষদৰ সমাবৰ্তন সম্পন্ন

মহানগৰীৰ চানমাৰিস্থিত সঙ্গীত সত্ৰ পৰীক্ষা পৰিষদৰ সপ্তম সমাবৰ্তন-২০২১খন কালি ২৩ অক্টোবৰ শনিবাৰে শঙ্কৰদেৱ কলাক্ষেত্ৰৰ “শ্ৰীমন্ত শংকৰদেৱ আন্তঃৰাষ্ট্ৰীয়(আন্তৰ্জাতিক) প্ৰেক্ষাগৃহত দিনৰ ১১বজাৰ পৰা অনুষ্ঠিত হয়৷সম্পূৰ্ণ ক’ভিড বিধি মানি আয়োজন কৰা সমাবৰ্তনখনৰ কাৰ্যসূচীৰ আৰম্ভণিতে ১৯৬৮ চনতে প্ৰতিষ্ঠা হোৱা সঙ্গীত সত্ৰৰ উল্লেখযোগ্য -স্মৰণীয় কিছুমান দৃশ্য পৰ্দাযোগে প্ৰদৰ্শন কৰা হয়৷ইয়াৰ পাছতে নৃত্যাচাৰ্য পদ্মশ্ৰী যতীন গোস্বামীয়ে কৰা বন্তি প্ৰজ্বলনৰে সঙ্গীত সত্ৰৰ প্ৰতিষ্ঠাপক অধ্যক্ষ প্ৰয়াত ৰসেশ্বৰ শইকীয়া বৰবায়নক প্ৰতিষ্ঠা লাভ কৰাত সহায় কৰা বিশিষ্ট সমাজসেৱক দ্ৰোণ কান্ত ভাগৱতীৰ সোৱঁৰণত সঙ্গীত সত্ৰই উছৰ্গা কৰা মঞ্চখন মুকলি হয়৷ সঙ্গীত সত্ৰৰ দ্বাৰা আয়োজিত অনুষ্ঠানটিত ভাৰ্চুৱেলি প্ৰদৰ্শিত হয় সঙ্গীত সত্ৰৰ প্ৰতিষ্ঠাৰ দিনা প্ৰয়াত নিকুঞ্জলতা মহন্তই পৰিবেশন কৰা এটি বৰগীত৷ সমাবৰ্তনখনত বিশিষ্ট অতিথি হিচাপে গুৱাহাটী বিশ্ববিদ্যালয়ৰ বৰ্তমানৰ উপাচাৰ্য ড° প্ৰতাপ জ্যোতি সন্দিকৈ ,অসম চৰকাৰৰ সাংস্কৃতিক সঞ্চালকালয়ৰ বৰ্তমানৰ সচিব মাধুৰীমা বৰুৱা সেন আৰু সন্মানীয় অতিথি ৰূপে উপস্থিত থাকে গুৱাহাটী বিশ্ববিদ্যালয়ৰ পৰীক্ষা নিয়ন্ত্ৰক ড° ধ্ৰুৱজ্যোতি চৌধুৰী৷ সমাবৰ্তনখনত সঙ্গীত সত্ৰৰ সাধাৰণ সম্পাদক ৰঞ্জুমণি শইকীয়াৰ আদৰণি ভাষণৰ পাছতে সঙ্গীত সত্ৰৰ কাৰ্যকৰী সভাপতি অতুল্য মাধব গোস্বামীয়ে বক্তব্য প্ৰদান কৰে৷সত্যজিত গগৈয়ে আঁতধৰা অনুষ্ঠানটিত অৰুণাভ জ্যোতি মালাকাৰ,কংকন জ্যোতি শইকীয়া,বিশ্বজিত বৰদলৈয়ে কৰা খোল বাদন নিবিড় দেৱ শৰ্মাৰ বাঁহী আৰু জুৰি দাসৰ তাল সংগতৰে পৰিবেশিত হয়৷
অনুষ্ঠানৰ মাজতে সঙ্গীত সত্ৰ পৰীক্ষা পৰিষদৰ আচাৰ্য মূল কমলাবাৰী সত্ৰৰ সত্ৰাধিকাৰ ভৱকান্ত দেৱগোস্বামীৰ এটি আশীষবাণী ভিডিঅ’যোগে সম্প্ৰচাৰো কৰা হয়৷ সঙ্গীত সত্ৰৰ সহকাৰী সম্পাদক গোপাল চন্দ্ৰ বৰদলৈয়ে সম্পাদনা কৰা সঙ্গীত সত্ৰৰ পুস্তিকাখনৰ শুভ উন্মোচন কৰে অসম চৰকাৰৰ
সাংস্কৃতিক সঞ্চালকালয়ৰ সচিব মাধুৰীমা বৰুৱা সেনে৷গুৱাহাটী বিশ্ববিদ্যালয়ৰ উপাচাৰ্য ড° প্ৰতাপ জ্যোতি সন্দিকৈয়ে আগবঢ়োৱা দীক্ষান্ত ভাষণয়ে উপস্থিত ছাত্ৰ-ছাত্ৰীসকলক যথেষ্ট অনুপ্ৰেৰণা যোগায়৷ অনুষ্ঠানটিত ৰঞ্জুমণি শইকীয়াই সম্পাদকীয় প্ৰতিবেদনখনো পাঠ কৰে৷চাৰিশৰো অধিক শিক্ষাৰ্থীৰ প্ৰ পত্ৰ প্ৰদানকো সামৰি অনুষ্ঠিত এই সমাবৰ্তনখনত ইতিমধ্যেই দুটাকৈ ক’ভিড ভেক্‌চিন লোৱাৰ প্ৰমাণপত্ৰসহ উপস্থিত থকা শিক্ষাৰ্থীসকলক সঙ্গীত সত্ৰৰ তৰফৰ পৰা মাস্ক-চেনিটাইজাৰৰো যোগান ধৰা হয়৷উল্লেখ্য যে সঙ্গীত সত্ৰ পৰীক্ষা পৰিষদৰ অন্তৰ্গ প্ৰায় ৩০০খন বিদ্যালয়ৰ ১৭২টা পৰীক্ষা কেন্দ্ৰৰ বিগত দুটা বৰ্ষৰ ‘গুণীন’ শিক্ষাৰ্থীসকলক উত্তীৰ্ণৰ প্ৰমাণপত্ৰ আৰু একোখন অংগবস্ত্ৰ প্ৰদান কৰাৰ লগতে ইয়াৰে ডিচ্‌টিংচন লাভ কৰা ৬৩ গৰাকী প্ৰশিক্ষাৰ্থীক এটি বিশেষ স্মাৰক প্ৰদান কৰা হয়৷অনুষ্ঠানটিত সংগীত নাটক একাডেমীৰ বিছমিল্লা খাঁ যুৱবঁটা প্ৰাপক অঞ্জলী বৰবৰা বৰঠাকুৰ,মনোজ কুমাৰ দাস,কুলদীপ পাটগিৰীক বিশেষভাৱে সম্বৰ্ধনা জনোৱা হয়৷ইয়াৰ উপৰিও সঙ্গীত সত্ৰলৈ আগবঢ়োৱা অৱদানৰ বাবে সঙ্গীত সত্ৰৰ যুটীয়া সম্পাদক পাৰ্থপ্ৰতীম বৰুৱাৰ লগতে মঃ ছাইফুল ইছলামকো সম্বৰ্ধিত কৰা হয়৷ অসমৰ লগতে ভাৰতৰ আন ৰাজ্যতো প্ৰশিক্ষণ কেন্দ্ৰ থকা সঙ্গীত সত্ৰ পৰীক্ষা পৰিষদৰ পৰীক্ষা নিয়ন্ত্ৰক পদ্মশ্ৰী,সংগীত নাটক অকাডেমী বঁটাপ্ৰাপ্ত বায়নাচাৰ্য ঘনকান্ত বৰায়ো সমাবৰ্তনখনত ভাষণ প্ৰদান কৰে৷আজিৰ এই অনুষ্ঠানত সঙ্গীত সত্ৰৰ অধ্যক্ষ ৰিঞ্জুমণি শইকীয়া, সঙ্গীত সত্ৰ পৰীক্ষা পৰিষৰ সচিব নৱদেৱ কৃষ্ণশংকৰ ভাৰতী,দেৱশংকৰ বৰ্মন প্ৰমুখ্যে সংগীত সত্ৰৰ সদস্য তথা বহু গণ্য মান্য ব্যক্তি,শিক্ষাৰ্থী উপস্থিত থাকে৷

সোণাৰি মহাবিদ্যালয়ত কেৰিয়াৰ কাউঞ্চেলিঙৰ কৰ্মশালা

সোণাৰিৰ যুৱক যুবতীসকলক প্ৰতিযোগিতামূলক পৰীক্ষাৰ বাবে সাজু কৰি তুলিবলৈ ব্যবস্থা লোৱা প্ৰশিক্ষণ প্ৰতিষ্ঠান ড্ৰীমছ জ’ন আই এ এছৰ উদ্যোগত আজি সোণাৰি মহাবিদ্যালয়ত এটা কেৰিয়াৰ কাউঞ্চেলিঙৰ কৰ্মশালা সম্পন্ন হয়।সোণাৰি মহাবিদ্যালয় প্ৰেক্ষাগৃহত অনুষ্ঠিত কৰ্মশালাটোত সমল ব্যক্তি হিচাপে উপস্থিত থাকে চৰাইদেউ জিলাৰ আৰক্ষী অধীক্ষক সুধাকৰ সিঙ। প্ৰশাসনিক সেৱা তথা প্ৰতিযোগিতা মূলক পৰীক্ষাৰ প্ৰস্তুতি সন্দৰ্ভত অনুষ্ঠিত হোৱা এই কৰ্মশালাটো উদ্বোধন কৰে সোণাৰি মহাবিদ্যালয়ৰ অধ্যক্ষ ড° বিমল চন্দ্ৰ গগৈয়ে।ক’ভিড প্ৰট’কল মানি অনুষ্ঠিত হোৱা এই কৰ্মাশালাত মহাবিদ্যালয় খনৰ যথেষ্ট সংখ্যক ছাত্ৰ-ছাত্ৰীয়ে অংশগ্ৰহণ কৰে। এই কৰ্মশালাত ছাত্ৰ ছাত্ৰীসকলক কেনেদৰে প্ৰশাসনিক সেৱা পৰীক্ষাৰ বাবে সাজু হব লাগে সেই সম্পৰ্কে বিভিন্ন ধৰণৰ প্ৰশিক্ষণ দিয়া হয় ।