মন্ত্ৰী অজন্তা নেওগৰ মহানুভৱতা- দৰমহাৰ ধনেৰে সাজি দিলে দলীয় কৰ্মকৰ্তাৰ ঘৰ

এটা আপোন ঘৰ গঢ়াৰ সপোন সকলোৰে থাকে। কেতিয়াবা আৰ্থিক অনাটন বা অন্য কোনো কাৰণত সেয়া সম্ভৱ হৈ নহয় । তেনে এজন ব্যক্তি হ’ল গোলাঘাটৰ আঠগাঁও মণ্ডলৰ নিবাসী তিলেশ্বৰ শইকীয়া। সমাজ সেৱাকেই জীৱনৰ ব্ৰত হিচাপে লোৱা শইকীয়া আছিল এজন স্বয়ং সেৱক। বিভিন্ন অনুষ্ঠান প্ৰতিষ্ঠানৰ লগত জড়িত শইকীয়া জীৱনৰ এছোৱা কাল ভাৰতীয় জনতা পাৰ্টি গোলাঘাট জিলাৰ সভাপতি আছিল। ব্যক্তিগত সা-সুবিধাৰ প্ৰতি উদাসীন শইকীয়াৰ ঘৰত এদিন উপস্থিত হৈছিল ৰাজ্যৰ বিত্ত, মহিলা আৰু শিশু বিকাশ মন্ত্ৰী অজন্তা নেওগ। শইকীয়াৰ জৰাজীৰ্ন ঘৰ দেখি বিষ্ময় আৰু দুখত হতবাক হৈ পৰিল তেতিয়াৰ বিধায়িকা তথা বৰ্তমানৰ বিত্ত মন্ত্ৰী নেওগ। শইকীয়াক প্ৰতিশ্ৰুতি দিলে চৰকাৰী আঁচনিৰে নহয়, নিজৰ দৰমহাৰে গৃহ নিৰ্মাণ কৰি দিব ভাৰতীয় জনতা পাৰ্টিৰ অতি নিষ্ঠাবান কাৰ্যকর্তা তিলেশ্বৰ শইকীয়াক। কথা দিলে কথা ৰখা স্থানীয় বিধায়িকা তথা ৰাজ্যৰ বিত্তমন্ত্ৰীৰ একক প্ৰচেষ্টাত চলিত মাহত সম্পূৰ্ণ হ’ল তিলেশ্বৰ শইকীয়াৰ অসম আৰ্হিৰ গৃহ। আৰু ১৫ আগষ্টৰ দিনাই দুপৰীয়া ফিটা কাটি তিলেশ্বৰ শইকীয়াৰ গৃহ প্ৰৱেশৰ শুভাৰম্ভনি কৰিলে ৰাজ্যৰ বিত্তমন্ত্ৰী অজন্তা নেওগে। নেওগৰ এনে প্ৰচেষ্টাক স্থানীয় ৰাইজৰ লগতে শইকীয়াই কৃতজ্ঞতা জ্ঞাপন কৰে।