চাৰিদুৱাৰ ৰাজহ চক্ৰ বিষয়াৰ মহানুভৱতা- বহি মূল্যায়ক হিচাপে বিদ্যালয়ক দান কৰিলে ১০ হাজাৰ টকা

আজিৰেপৰা শোণিতপুৰ জিলাত আৰম্ভ হৈছে ৰাজ্য শিক্ষা বিভাগৰ নিৰ্দেশনা মতে গুণোৎসৱ -২০২২ । জিলাখনৰ অন্যান্য শিক্ষাখণ্ডৰ লগতে বালিপৰা খণ্ড প্ৰাথমিক শিক্ষা বিষয়া কাৰ্যালয়ৰ অধীনৰ বিদ্যালয়সমূহতো অনুষ্ঠিত হৈছে গুণোৎসৱ প্ৰক্ৰিয়া । বালিপৰা খণ্ড প্ৰাথমিক শিক্ষা বিষয়া কাৰ্যালয়ৰ সৰ্বমুঠ ৩৯১ খন বিদ্যালয়ৰ প্ৰায় ৪৪ হাজাৰ ছাত্ৰ-ছাত্ৰীৰ মাজত আজিৰেপৰা অনুষ্ঠিত হৈছে গুণোৎসৱ । গুণোৎসৱ অনুষ্ঠিত প্ৰতিখন বিদ্যালয়ত নিৰ্ধাৰিত বহিঃ মূল্যায়ক উপস্থিত হৈ মূল্যায়ন প্ৰক্ৰিয়া সম্পাদন আৰু তদাৰক কৰিছে । আজি বহিঃ মূল্যায়ক হিচাপে বালিপৰা শিক্ষাখণ্ডৰ বাকোলা মৰিসূঁতি প্ৰাথমিক বিদ্যালয়ত অনুষ্ঠিত গুণোৎসৱত বহিঃ মূল্যায়ক হিচাপে উপস্থিত হৈ চাৰিদুৱাৰ ৰাজহ চক্ৰ বিষয়া অদিতি গগৈয়ে নিজ কৰ্তব্য সম্পাদন কৰাৰ লগতে দিলে মহানুভৱতাৰ পৰিচয় । চক্ৰ বিষয়া অদিতি গগৈয়ে বিদ্যালয়খনৰ মুল্যায়ন কৰাৰ অন্তত বিদ্যালয় কৰ্তৃপক্ষ আৰু বিদ্যালয় পৰিচালনা সমিতিৰ হাতত দহ হাজাৰ টকা বিদ্যালয়খনত চিলিং ফেন লগোৱাৰ বাবে আগবঢ়াই মহানুভৱতাৰ পৰিচয় দাঙি ধৰিছে।চক্ৰ বিষয়াগৰাকীৰ এনে মহানুভৱতাক বিদ্যালয় পৰিচালনা সমিতিৰ লগতে বালিপৰা শিক্ষাখণ্ডৰ বিষয়া মনিশ ঠাকুৰে কাকতৰ যোগেদি আন্তৰিক কৃতজ্ঞতা জ্ঞাপন কৰিছে।