নৱ প্ৰজন্মৰ শিক্ষাৰ্থী সকলক কেৱল পুথিগত শিক্ষাৰ মাজতে আবদ্ধ কৰি নাৰাখি স্বকীয় কৃষ্টি সংস্কৃতিৰ চর্চাটো জড়িত কৰাৰ এক পৰিকল্পিত কৰ্মসূচী গ্ৰহণ কৰিছে ঢকুৱাখনাৰ ব্যক্তিগত খণ্ডৰ শিক্ষানুষ্ঠান হাৰ্হি শ্ৰীমন্ত শংকৰদেৱ প্ৰাথমিক বিদ্যালয়ে । সম্প্ৰীতি ভাতৃত্ববোধৰ এনাজৰীৰে সংপৃক্ত হৈ ঢকুৱাখনাৰ গোবিন্দপুৰত অৱস্থিত এই হাৰ্হি শ্ৰীমন্ত শংকৰদেৱ প্ৰাথমিক বিদ্যালয় পৰিয়াল উদ্যোগত শনিবাৰে এনে এক কাৰ্যসূচী গ্ৰহণ কৰা হয় । শ্ৰীমন্ত শংকৰদেৱ গুৰু জনাৰ মাৰ্গ দৰ্শনৰ ভেঁটিত প্ৰতিষ্ঠিত এইখন বিদ্যালয় প্ৰাংগণ শনিবাৰে পুৱাৰ পৰা এই ৰং অনুষ্ঠানৰ বিভিন্ন কাৰ্যসূচীৰে বিদ্যালয় চৌহদ মুখৰ হৈ পৰে । বিদ্যালয়খনৰ পৰিচালনা সমিতিৰ সভাপতি বলোৰাম দত্ত ,উপদেষ্টা ধনীৰাম বৰা , প্ৰধান শিক্ষয়িত্ৰী দীপ্তি বৰুৱা , সহকাৰী শিক্ষক উমেশ বৰা ,শুভন দত্ত, সঞ্জীৱ শইকীয়া , ৰেখা বৰা ,মীনা দত্ত মনালিছা দিহিঙীয়া আদিৰ লগতে সমূহ কৰ্মচাৰী আৰু অভিভাৱক সকলে অংশ গ্ৰহণ কৰে উৎসৱত । বিদ্যালয়খনৰ কণ কণ শিক্ষাৰ্থী সকলে কান্ধত ঢোল তাল লৈ , কণমানি নাচনী সকলে হাতত গগনা, টকা লৈ বিহু গাই নাচি বাগি আত্মহাৰা হৈ পৰে প্ৰতিকূল বতৰকো নেওচি। ইয়াৰ পূৰ্বে বিদ্যালয়ৰ আন্তঃগাঁথনি উন্নয়নৰ বাবে ৰাজ্য চৰকাৰৰ “আনটাইড শিতান”ৰ ২০২০-২০২১ বিত্তীয় বর্ষৰ আবন্তিত ১০ লাখ টকাৰে নিৰ্মিত ৪টা কোঠা বিশিষ্ট পকী গৃহটো আয়তীৰ উৰুলী, মংগল ধ্বনিৰ মাজত উদ্ধোধন কৰে বিদ্যালয় পৰিচালনা সমিতিৰ সভাপতি বলোৰাম দত্তই। গৰিষ্ঠ সংখ্যক শিক্ষানুৰাগী ৰাইজ , অভিভাৱক উপস্থিত থকা এই শুভ উদ্ধোধনী অনুষ্ঠানৰ পাছত শিক্ষাৰ্থী সকলে জাতীয় সাজ পোছাক পৰিধান কৰি বিহু নাম গাই ,হুঁচৰি জুৰি ৰংৰ উৎসৱত মতলীয়া হয় । বিদ্যালয়খনৰ শিক্ষাগুৰু আৰু কৰ্মচাৰী সকলেও অংশ গ্ৰহণ কৰা এই বিহু অনুষ্ঠানে উপস্থিত সকলোকে আপ্লুত আৰু সন্মোহিত কৰে । জাতীয় কৃষ্টি সংস্কৃতিৰ চহকী পৰম্পৰাৰ সৈতে নৱ প্ৰজন্মক পৰিচিতি কৰাৰ বাবে বিদ্যালয় কৰ্তৃপক্ষই গ্ৰহণ কৰা এনে সাংস্কৃতিক পৰিক্ৰমা নিশ্চিত ভাবে প্ৰশংসনীয় পদক্ষেপ হিচাবে ধৰা দিছে ।
বাতৰি যুগুতালে অমৃত পৱন বৰাই।
