বৰষুণৰ অভাৱত ৰাজ্যত ক্ৰমাৎ বৃদ্ধি পাইছে তাপমাত্ৰা -মাৰ্চ মাহতে মে’ৰ দৰে হৈছে গৰম
অসমত সাধাৰণতে বহাগ মাহ আৰম্ভ হোৱাৰ সময়ত বা এপ্ৰিল মাহৰ আধামান দিন পাৰ হোৱাৰ পিছত গ্ৰীষ্মকাল আৰম্ভ হয় যদিও মাৰ্চ মাহৰ তিনিটা সপ্তাহ পাৰ হোৱাৰ পাছৰে পৰা আৰম্ভ হৈছে ক্ৰমাৎ গৰম । এই বৰ্দ্ধিত গৰম বা তাপমাত্ৰাক উত্তৰ ভাৰতৰ দৰে গ্ৰীষ্মপ্ৰবাহ আৰম্ভ হোৱা বুলি আশংকা ব্যক্ত কৰিছে একাংশ পৰিবেশবিদে। উল্লেখ্য যে মাৰ্চ মাহৰ এই সময়ত অসমৰ তাপমাত্ৰা সৰ্বাধিক ২৮ ৰ পৰা ৩০ ডিগ্ৰীৰ আশে – পাশে থাকিব লাগে যদিও বহুদিন বৰষুণ নোহোৱা বাবে বিগত চাৰি – পাঁচদিন ধৰি ৰাজ্যৰ বেছিভাগ ঠাইতে স্বাভাৱিকতকৈ গড় তাপমাত্ৰা ৬ ডিগ্ৰী চেলচিয়াছ পৰ্যন্ত বৃদ্ধি পাইছে। ফলত ৰাইজে মাৰ্চ মাহতে মে’ মাহৰ দৰে গৰম অনুভব কৰিব লগা হৈছে।গুৱাহাটীৰ আজাৰা বৰঝাৰস্থিত আঞ্চলিক বতৰ বিজ্ঞান কেন্দ্ৰই আজি সদৰি কৰা অনুসৰি মতে বৰষুণৰ অভাৱত ৰাজ্যখনৰ বেছিভাগ অঞ্চলতে তাপমাত্ৰা অস্বাভাৱিকভাবে বৃদ্ধি পাইছে ।উদ্বেগজনক ভাবে তাপমাত্ৰা স্বাভাৱিকতকৈ বেছিভাগ অঞ্চলতে তাপমাত্ৰা ৩ ৰ পৰা ৬ ডিগ্ৰী চেলচিয়াছ পৰ্যন্ত অধিক হোৱাত ৰাইজে গৰমৰ সৈতে মোকাবিলা কৰিব লগা হৈছে । আনকি বহুতে উত্তৰ ভাৰতৰ দৰে ভয়ংকৰ উষ্ণ প্ৰৱাহৰ ঘটনা অসমত হব পাৰে বুলিও আশংকা ব্যক্ত কৰিছে। আনহাতে আজিৰ দিনটোত ৰাজ্যখনৰ ভিতৰতে সর্বাধিক তাপমান আছিল শিলচৰ আৰু ধুবুৰী চহৰত। দুয়োখন ঠাইতে সৰ্বাধিক তাপমাত্ৰা স্বাভাৱিকতকৈ প্ৰায় ৫.২ ডিগ্ৰী চেলচিয়াছ বৃদ্ধি হৈ হয়গৈ ৩৫.১ ডিগ্ৰী চেলচিয়াছ। তাৰ পাছত গুৱাহাটী মহানগৰীত দুপৰীয়াৰ ভাগত তাপমান বৃদ্ধি পাই হৈছিলগৈ ৩৩.৫ ডিগ্ৰী চেলছিয়াছ । যিটো স্বাভাবিকতকৈ প্ৰায় ৩ ডিগ্ৰী চেলচিয়াছ অধিক আছিল । তেনেদৰে নিশাৰ ভাগতো সৰ্বনিম্ন তাপমাত্ৰা ঠাইবিশেষে স্বাভাবিকতকৈ ২ ৰ পৰা ৫ ডিগ্ৰী চেলচিয়াছ পৰ্যন্ত ওপৰত থকাত ৰাইজে নিশাৰ ভাগতো গৰম অনুভব কৰিব লগা হৈছে । বতৰ বিজ্ঞান কেন্দ্ৰৰ বিজ্ঞানী সকলৰ মতে অসমত বায়ুত জলীয় বাষ্পৰ পৰিমাণ বহুত বেছি পৰিমাণে থাকে, সেয়েহে তাপমান ৩৩ ডিগ্রী চেলছিয়াছ হলেও ইয়াৰ অনুভৱ উত্তৰ ভাৰতৰ ৰাজ্য সমূহৰ দৰে ৪৫-৪৭ ডিগ্রী চেলছিয়াছৰ দৰে হয়গৈ। মন কৰিব লগীয়া কথা যে প্ৰকৃতিৰ ওপৰত হোৱা ধ্বংসলীলাৰ বাবে অসম তথা উত্তৰ পূৰ্বাঞ্চলত বিগত বৰ্ষৰ তুলনাত এইবাৰ পৰিস্থিতি অধিক ভয়াৱহ হৈ উঠিছে। কেৱল গুৱাহাটী বা অসমেই নহয়, উত্তৰ-পূবৰ স্কটলেণ্ড খ্যাত শীতল ঠাই শ্বিলঙতো পূৰ্বৰ তুলনাত গৰমৰ প্ৰকোপ বৃদ্ধি পাইছে। আনহাতে আজিৰ দিনটোত ৰাজ্যৰ কেবাখনো চহৰৰ সৰ্বাধিক তাপমাত্ৰা আছিল এনে ধৰণৰ – ডিব্ৰুগড়ত ২২.৬ ডিগ্রী চেলছিয়াছ, , তেজপুৰত ৩০.০ ডিগ্ৰী চেলছিয়াছ , যোৰহাটত ২৬.৭ ডিগ্ৰী চেলছিয়াছ , উত্তৰ লখিমপুৰত ২২.৪ ডিগ্ৰী চেলছিয়াছ আছিল। একাংশ পৰিৱেশবিদে সদৰি কৰা অনুসৰি ভাৰতীয় বতৰ বিজ্ঞান বিভাগে এই সন্দৰ্ভত ২০২৪ চনত কেইবাখনো প্রতিবেদন প্রকাশ কৰিছে। য’ত গ্লবেল ৱামিঙ বা গোলকীয় উত্তাপৰ বাবেই পৰিস্থিতি অৱনতি ঘটা বুলি প্ৰকাশ পাইছে। এনে পৰিস্থিতিৰ বাবে অনাগত দিনতো কেতিয়াবা অধিক বৰষুণ হ’ব, কেতিয়াবা খৰাং হ’ব, আন কেতিয়াবা আকৌ ধুমুহা আহি ভয়ংকৰ পৰিস্থিতিৰ সৃষ্টি কৰিব। আনহাতে আঞ্চলিক বতৰ বিজ্ঞান কেন্দ্ৰই বৰষুণ আহিলে বৰ্তমানতকৈ তাপমাত্ৰা কিছু হ্ৰাস পাব বুলি সদৰি কৰিছে । অৰ্থাৎ বৰষুণ নহালৈ ৰাইজে ক্ৰমাৎ বৃদ্ধি পোৱা বৰ্দ্ধিত গৰমৰ সৈতে সহাবস্থান কৰাৰ বাহিৰে আন কোনো বিকল্প পথ নাই বুলিয়ে সদৰি কৰিছে বতৰ বিজ্ঞান কেন্দ্ৰই।
