যোৰহাটত ১২ ছেপ্তেম্বৰত ২৭ টা কেন্দ্ৰত অনুষ্ঠিত হ’ব অসম লোকসেৱা আয়োগৰ পৰীক্ষা

অসম লোকসেৱা আয়োগৰ অধীনত যোৰহাটত ১২ ছেপ্তেম্বৰত ২৭ টা কেন্দ্ৰত অনুষ্ঠিত হ’বলগীয়া সংযুক্ত প্ৰতিযোগিতামূলক ( প্ৰাৰম্ভিক) পৰীক্ষা- ২০২০ ৰ সন্দৰ্ভত জৰুৰী তথ্য যোগান ধৰিবলৈ যোৰহাট জিলা উপায়ুক্ত কাৰ্যালয়ত এটা অস্থায়ী নিয়ন্ত্ৰণ কক্ষ স্থাপন কৰা হৈছে৷পৰীক্ষাৰ্থীসকলে পৰীক্ষা সমন্ধীয় যি কোনো তথ্যৰ বাবে নিয়ন্ত্ৰণ কক্ষৰ দূৰভাষ নং ০৩৭৬-২৩০০১২৪ ত অহা ১২ তাৰিখলৈকে যোগাযোগ কৰিব পাৰিব৷ইয়াৰোপৰি কোনো পৰীক্ষাৰ্থীৰ যাতায়তৰ অত্যন্ত অসুবিধা হ’লে জিলা পৰিবহন বিভাগে যোগান ধৰা বাহনৰ বাবে আগতীয়াকৈ ওপৰত উল্লেখিত নম্বৰটোত যোগাযোগ কৰিব পাৰিব৷ এইসমূহ বাহনৰ ভাড়া তেওঁলোকে নিজে ভৰিব লাগিব যদিও নূন্যতম ভাড়াহে লোৱা হ’ব বুলি জিলা প্ৰশাসনে জানিবলৈ দিছে৷পৰীক্ষাৰ্থীসকলে লগত ক’ভিড পৰীক্ষাৰ প্ৰমান পত্ৰ অথবা ক’ভিড প্ৰতিষেধক( প্ৰথম বা দ্বিতীয়) পালি গ্ৰহণৰ প্ৰমান পত্ৰ লগত লৈ যোৱাটো বাধ্যতামূলক৷ পৰীক্ষাৰ্থীসকলে পৰীক্ষা কেন্দ্ৰলৈ মোবাইল ফোন, টেবলেট আদি বৈদ্যুতিন সামগ্ৰী লগত লৈ যাব নোৱাৰিব বুলিও জিলা প্ৰশাসনে জানিবলৈ দিছে৷