মনালিছা বৰুৱা ভাৰতীয় টেবুল টেনিছ দলৰ প্রশিক্ষক নিযুক্ত

অসমৰ একালৰ প্রখ্যাত টেবুল টেনিছ খেলুৱৈ মনালিছা বৰুৱা মেহতা ভাৰতীয় টেবুল টেনিছ দলৰ প্রশিক্ষক নিযুক্ত হৈছে৷ অহা ২৮ ছেপ্টেম্বৰৰ পৰা ৫ ছেপ্ঢেম্বৰলৈ কাটাৰত অনুষ্ঠিত হ’বলগীয়া ২৫সংখ্যক আই টি টি এফ এছিয়ান টেবুল টেনিছ চেম্পিয়নশ্বিপৰ বাবে ঘোষিত ভাৰতীয় দলটোত অসমৰ অৰ্জুন বঁটা বিজয়ী প্রাক্তন খেলুৱৈগৰাকীয়ে প্রশিক্ষকৰ গুৰুদায়িত্ব লাভ কৰিছে৷ দলটোৰ আনগৰাকী প্রশিক্ষক হ’ল অৰূপ বাছাক৷ইফালে, প্রতিযোগিতাখনত জি সাথিয়ান, শৰথ কমল আদিৰ দৰে দেশৰ আগশাৰীৰ টেবুল টেনিছ খেলুৱৈয়ে অংশ ল’ব৷ মন কৰিবলগীয়া যে ভাৰতীয় ছিনিয়ৰ টেবুল টেনিছ দলটোৰ প্রশিক্ষকৰ দায়িত্ব লাভ কৰা মনালিছা বৰুৱা হ’ল কেইবাবাৰৰ প্রাক্তন ৰাষ্ট্রীয় চেম্পিয়ন৷ তেওঁ ১৯৮৭ত সন্মানীয় অর্জুন বঁটা লাভ কৰিছিল৷