আগন্তুক দিনত ৰাজ্যত পুনৰ গাজনি, ঢেৰেকনি , বজ্ৰপাত , ধুমুহাৰ সৈতে প্ৰৱল বৃষ্টিপাতৰ সম্ভাৱনা

চুবুৰীয়া ৰাজ্য পশ্চিমবঙ্গকে ধৰি হিমালয়ৰ পাদদেশৰ আকাশত সৃষ্টি হোৱা হোৱা বতৰৰ কেতবোৰ পৰিবৰ্তনৰ বাবে সাগৰপৃষ্ঠৰ পৰা ৯০০ মিটাৰ মিটাৰ ওপৰৰে জলীয় বাষ্পসহ বতাহ বলি আছে। উল্লেখ্য যে বতৰৰ আকস্মিক পৰিবৰ্তনৰ বাবে বিগত ১৯ এপ্ৰিলৰ দিনা নিশাজুৰি গুৱাহাটী মহানগৰীত প্ৰাক মৌচুমী বায়ুৰ প্ৰভাৱত শতিকাটোৰ ভিতৰতে অভিলেখ পৰিমাণৰ ১২০ মিলিমিটাৰ বা ১২ চেণ্টিমিটাৰ পৰিমাণৰ প্ৰৱল বৃষ্টিপাত হৈছিল । বতৰ বিজ্ঞানৰ ভাষাত ৬.৫ চেণ্টিমিটাৰ বা ৬৬.৫ মিলিমিটাৰ পৰিমাণৰ বৰষুণ হলে তাক প্ৰৱল বৃষ্টিপাতৰ পৰিমাণ বৰষুণ অহা বুলি কোৱা হয়। তাৰ মাজতে বতৰৰ আকস্মিক পৰিবৰ্তনৰ বাবে ২২ এপ্ৰিলৰ দিনা সন্ধিয়াৰ ভাগত গুৱাহাটী মহানগৰীৰকে ধৰি নামনি অসমৰ বহু অঞ্চলত অহা এজাক ধুমুহা বতাহে বাৰুকৈয়ে কোবাই যায় । আনহাতে গুৱাহাটীৰ বৰঝাৰস্থিত আঞ্চলিক বতৰ বিজ্ঞান কেন্দ্ৰৰ তথ্য অনুসৰি আজিৰ দিনটোত ৰাজ্যৰ প্ৰধান চহৰ নগৰ কেইখনৰ সৰ্বাধিক তাপমাত্ৰা আছিল এনে ধৰণৰ—গুৱাহাটীত ৩৪.৪ ডিগ্ৰী চেলচিয়াছ , ডিব্ৰগড়ত ৩৪.৬ ডিগ্ৰী চেলচিয়াছ, তেজপুৰত ৩৪.৫ ডিগ্ৰী চেলচিয়াছ , ধুবুৰীত ৩২.৩ ডিগ্ৰী চেলচিয়াছ , যোৰহাটত ৩৩.৬ ডিগ্ৰী চেলচিয়াছ , উত্তৰ লখিমপুৰত ৩৪.৯ ডিগ্রী চেলচিয়াছ , শিলচৰত ৩৪.৭ ডিগ্ৰী চেলচিয়াছ । একে সময়চোৱাত পূবৰ স্কটলেণ্ড স্বৰূপ শ্বিলং চহৰৰ সৰ্বাধিক তাপমাত্ৰা আছিল ২৫.০ ডিগ্ৰী চেলচিয়াছ। অৱশ্যে কেবাদিনৰ মূৰত কালিৰে পৰা বতৰ কিছু ফৰকাল হোৱাৰ বাবে তাপমাত্ৰা স্বাভাৱিকতকৈ কিছু বৃদ্ধি পোৱাত ৰাইজে আজি বহুদিনৰ মূৰত গৰম অনুভৱ কৰিবলগীয়া হৈছে । আনহাতে আঞ্চলিক বতৰ বিজ্ঞান কেন্দ্ৰই বতৰৰ পৰিবৰ্তনৰ বাবে অহা ২৮ এপ্ৰিল পৰ্যন্ত ৰাজ্যৰ আকাশ মেঘাছন্ন হৈ থকাৰ লগতে বহু অঞ্চলত পাতলীয়া আৰু আৰু কিছু কিছু ঠাইত গাজনী, ঢেৰেকনি , বজ্ৰপাত , ধুমুহাৰ সৈতে মজলীয়া পৰিমাণৰ বৰষুণ আহিব বুলি আগতীয়া সতর্কতা জাৰি কৰিছে। বিশেষকৈ ২৬ এপ্ৰিলৰ পাছত বতৰে ৰুদ্ৰমূৰ্ত্তি ধৰাৰ আশংকা ব্যক্ত কৰা হৈছে।