কৃষি বিজ্ঞান কেন্দ্ৰত কৃষক সজাগতা সভা সম্পন্ন

ৰাষ্ট্ৰীয় বাগবানী বোর্ড গুৱাহাটীৰ উদ্যোগত আৰু গুৱাহাটীৰ পশ্চিম প্ৰান্তৰ আজাৰা কাঁহিকুছিস্থিত কৃষি বিজ্ঞান কেন্দ্ৰ , কামৰূপৰ সহযোগত কৃষি বিজ্ঞান কেন্দ্র চৌহদত আজি এদিনীয়াকৈ এখন সজাগতা সভা অনুষ্ঠিত হয়। সভাৰ উদ্ধোধনী অনুষ্ঠানত ভাগ লৈ কৃষি বিজ্ঞান কেন্দ্র , কামৰূপৰ মুৰব্বী ডঃ সোণমইনা ভূঞাই কৃষকসকলক উদ্দেশ্যি উদ্যান শস্যৰ প্রসাৰ আৰু বিজ্ঞানসন্মত পদ্ধতিৰ দ্বাৰা স্বাৱলম্বী হোৱাৰ ওপৰত বিতং বাখ্যা আগবঢ়ায় । অনুষ্ঠানত ভাষণ প্ৰসংগত ৰাষ্ট্ৰীয় বাগবানী বোর্ডৰ উপ সঞ্চালক নবনীতা বৰুৱা মহন্তই কৃষকসকলে ৰাষ্ট্ৰীয় বাগবানী বোর্ডৰ আঁচনি সমূহ কিদৰে সুবিধা সমূহ ল’ব পাৰি, সেই বিষয়ে অৱগত কৰে। অনুষ্ঠানত সমল ব্যক্তি হিচাপে অসম কৃষি বিশ্বিবিদ্যালয়ৰ কাঁহিকুছি চৌহদত থকা উদ্যান শস্য গৱেষণা কেন্দ্ৰৰ বিজ্ঞানী ডঃ ৰিংকুমণি ফুকন আৰু কৃষি বিজ্ঞান কেন্দ্র ,কামৰূপৰ উদ্যান শস্যৰ বিশেষজ্ঞা ডঃ দৰদী প্রিয়ম দুৱৰা উপস্থিত থাকি উদ্যান শস্যৰ ওপৰত বিতং আলোচনা কৰে। তাৰোপৰি ভাৰতীয় ষ্টেট বেংকৰ কৰ্মকৰ্তা নিৰ্মাণ দে’ই উদ্যান শস্যৰ আৰু কৃষি ক্ষেত্ৰত বেংকৰপৰা কিদৰে কৃষি ঋণ ল’ব পাৰি তাৰ বাখ্যা দাঙি ধৰে।উল্লেখ্য যে দিনজোৰাকৈ অনুষ্ঠিত সজাগতা সভাত কামৰূপ জিলাৰ বিভিন্ন প্ৰান্তৰ পুৰুষ – মহিলা নিৰ্বিশেষে ৫০ কৃষকে ভাগ লৈছিল।