দক্ষিণ কামৰূপৰ ৰামপুৰৰ সন্তান মেজৰ ভাৰ্গৱ কলিতাক শৌর্যচক্র সম্মান ৰাষ্ট্ৰপতিৰ

অসম সন্তান, দক্ষিণ কামৰূপৰ ৰামপুৰৰ বাসিন্দা তথা ভাৰতীয় সেনাত মেজৰ হিচাপে কৰ্মৰত ভাৰ্গৱ কলিতাই জম্মু আৰু কাশ্মীৰত সন্ত্রাসবাদৰ বিৰুদ্ধে চলোৱা অভিযানত দুর্দান্ত সাহসিকতা প্ৰদৰ্শন কৰা বাবে ভাৰতৰ ৰাষ্ট্ৰপতিৰ সন্মানীয় শৌৰ্য চক্ৰ সন্মানেৰে সন্মানিত কৰা হৈছে। ৰাষ্ট্ৰীয় ৰাইফলছৰ ৫০ বেটেলিয়ানৰ মেজৰ ভাৰ্গৱ কলিতাক ৮ জুনত ৰাষ্ট্ৰপতি ভৱনত আয়োজিত এক গাম্ভীর্যপূর্ণ অনুষ্ঠানত ৰাষ্ট্ৰপতি দ্রৌপদী মুর্মুৱে তেওঁক এই সন্মান প্রদান কৰে। অনুষ্ঠানত প্ৰধানমন্ত্ৰী নৰেন্দ্ৰ মোডী, প্ৰতিৰক্ষা মন্ত্ৰী ৰাজনাথ সিংঙকে ধৰি কেবাজনো কেন্দ্ৰীয় মন্ত্ৰী, তিনিওটা সশস্র বাহিনীৰ মূৰব্বীসহ ভাৰতীয় সেনা , ভাৰতীয় নৌ সেনা আৰু ভাৰতীয় বায়ু সেনাৰ কেবাজনো উচ্চপদস্থ বিষয়া আৰু বহু বিশিষ্ট ব্যক্তি উপস্থিত থাকে। উল্লেখযোগ্য ২০২২ চনৰ অক্টোবৰ মাহত জম্মু কাশ্মীৰত নিযুক্তি লাভ কৰা মেজৰ ভাৰ্গৱ কলিতাৰ নেতৃত্বত ২০২৪ চনৰ ২ ডিচেম্বৰত চলোৱা এক দুঃসাহসিক অভিযানত পাকিস্তানৰ মদতপুষ্ট তিনিজন দুর্ধর্ষ সন্ত্রাসবাদী নেতা নিহত হৈছিল। একেদৰে অভিযানটোত উগ্ৰপন্থীক সহায় কৰা চাৰিজন অভাৰগ্ৰাউণ্ড সদস্যক জীৱন্তে আটক কৰা হৈছিল। মেজৰ ভাৰ্গৰ কলিতাই এই অভিযানত নিজৰ জীৱনকো বিপন্ন কৰি দুর্দান্ত সাহসিকতা প্রদর্শন কৰিছিল। ইয়াৰ ফলতে তেওঁক শৌর্য চক্র প্ৰদানৰ কথা চলিত বৰ্ষৰ ২৬ জানুৱাৰীৰ গণতন্ত্ৰ দিৱসৰ দিনা ঘোষণা কৰা হৈছিল। উল্লেখ্য যে মেজৰ ভাৰ্গৱ কলিতাৰ পিতৃ ভাস্কৰ কলিতায়ো দীৰ্ঘদিন ধৰি সেনা বাহিনীত সেৱা আগবঢ়াই ভাৰতীয় সেনাৰ তৃতীয় সৰ্বোচ্চ পদ হিচাপে পৰিচিত মেজৰ জেনেৰেল পদৰ পৰা ২০২২ চনৰ ডিচেম্বৰ মাহত অৱসৰ গ্ৰহণ কৰিছিল। বৰ্তমান তেওঁ প্ৰায় তিনি বছৰ ধৰি অসম লোকসেৱা আয়োগৰ সদস্য পদত কৰ্মৰত হৈ আছে।