গুৱাহাটী বিশ্ববিদ্যালয়ৰ সাফল্য

প্ৰধানমন্ত্ৰীক দুখনকৈ গ্ৰন্থ উপহাৰ দলে অসম পাব্লিচিং কোম্পানীয়ে

সমগ্ৰ দেশতে অভিলেখৰ সৃষ্টি কৰি গুৱাহাটীৰ অসম পাব্লিচিং কোম্পানীয়ে প্ৰকাশ কৰা প্ৰধানমন্ত্ৰী নৰেন্দ্ৰ মোদীৰ দুখন কিতাপৰ অসমীয়া সংস্কৰণ কৰি প্ৰধানমন্ত্ৰী গৰাকীয়ে প্ৰকাশক সঞ্জয় কুমাৰ সান্যালৰ হাতৰ পৰা গ্ৰহণ কৰে। এখন কিতাপ হ’ল প্ৰধানমন্ত্ৰীৰ মন কী বাতৰ উদ্দীপনামূলক নিৰ্বাচিত অংশ বিশেষৰ সংকলন মোৰ প্ৰিয় দেশবাসী। কিতাপখনৰ সংকলন কৰিছে নম্ৰতা দত্তই।আনখন কিতাপ হ’ল নৰেন্দ্ৰ মোদীয়ে ৰাজনৈতিক জীৱন আৰম্ভ কৰাৰ আগৰ সময়ছোৱাত কৰা বিভিন্ন উপলদ্ধিৰ প্ৰকাশ আইলৈ চিঠি।

মূল গুজৰাটীৰ পৰা ভাৱনা চোমায়াই ইংৰাজীলৈ কৰা অনুবাদৰ পৰা আইলৈ চিঠিৰ অনুবাদক উৎপল দত্ত।দুয়োখন কিতাপৰ প্ৰচ্ছদ প্ৰসিদ্ধ চিত্ৰশিল্পী সৌৰীশ মিত্ৰৰ আৰু আইলৈ চিঠিৰ অন্তৰ্ভাগৰ অলংকৰণো শ্ৰীমিত্ৰৰেই ।শিৱসাগৰত অনুষ্ঠিত সভাত অংশগ্ৰহণ কৰিবলৈ আহোতে প্ৰধানমন্ত্ৰীৰ কাৰ্যালয়ৰ পৰা প্ৰকাশক শ্ৰীসান্যালক মাতি পঠোৱা হয় আৰু সেই আমন্ত্ৰণ মৰ্মে প্ৰকাশক গৰাকীক প্ৰধানমন্ত্ৰীয়ে নিজৰ কোঠালৈ মাতি নিয়ে তেওঁৰ হাতৰ পৰা কিতাপ দুখন গ্ৰহণ কৰে।

সেই সময়ত প্ৰধানমন্ত্ৰীৰ সতে উপস্থিত আছিল ৰাজ্যৰ মুখ্যমন্ত্ৰী সৰ্বানন্দ সোণোৱাল আৰু বিত্তমন্ত্ৰী হিমন্ত বিশ্ব শৰ্মা।প্ৰধানমন্ত্ৰী গৰাকীয়ে শ্ৰী সান্যালক তেওঁৰ কামৰ বাবে প্ৰশংসা কৰে,প্ৰতিষ্ঠানটিৰ মংগল কামনা কৰে। তেখেতে কয় যে বাধাৰ সন্মুখীন হ’লেও তুমি কাম কৰি যোৱা,কাম বন্ধ নকৰিবা।

প্ৰধানমন্ত্ৰী গৰাকীৰ কেইবাখনো কিতাপ ইতিমধ্যে বিভিন্ন ভাষাত প্ৰকাশ পাইছে যদিও একেলগে এটা ভাষাত দুখন কিতাপ প্ৰকাশ হোৱাটো এয়াই প্ৰথম।প্ৰকাশক শ্ৰী সান্যালে কয় আমাৰ প্ৰকাশনৰ স্বৰ্ণজয়ন্তী উপলক্ষে প্ৰকাশ কৰা কেইখনমান বিশেষ কিতাপৰ মাজৰ এই দুখন কিতাপৰ প্ৰকাশ অকল মোৰ বাবেই নহয় অসমৰ সকলো প্ৰকাশকৰ বাবেই গৌৰৱৰ বিষয়। মাননীয় প্ৰধানমন্ত্ৰী গৰাকীয়ে নিজ আগ্ৰহ প্ৰকাশ কৰি নিজ হাতে দুখন অসমীয়া কিতাপ গ্ৰহণ কৰাটো অসমীয়া গ্ৰন্থ প্ৰকাশন উদ্যোগৰ বাবে সন্মানজনক বুলি মই বিবেচনা কৰো।মই বিশ্বাস কৰো আমি অসমত নেচনেল লাইব্ৰেৰী দৰে বা তেনে জাতীয় বিশাল প্ৰতিষ্ঠান এটি বিচাৰিলে প্ৰধানমন্ত্ৰী গৰাকীয়ে নিশ্চয় সহাঁৰি জনাব।

শিৱসাগৰত নৱৰূপত স্বয়ম আঁচনিৰ শুভাৰম্ভ কৰিলে বিত্তমন্ত্ৰী ড০ হিমন্ত বিশ্ব শৰ্মাই

স্থানীয় উদ্যোগ আৰু গ্ৰাম্য অৰ্থনীতিক সৱলীকৰণৰ লক্ষ্যৰে ৰাজ্য চৰকাৰে হাতত লোৱা কৰা নৱ ৰূপত স্বয়ম যোজনাৰ আজি শিৱসাগৰ জিলাত শুভাৰম্ভ কৰা হয়৷ অসম চৰকাৰৰ বিত্ত, স্বাস্থ্য, শিক্ষা, লোকনিৰ্মাণ বিভাগৰ মন্ত্ৰী ড০ হিমন্ত বিশ্ব শৰ্মাই আজি শিৱসাগৰৰ ব’ৰ্ডিং খেল পথাৰত নৱ ৰূপত স্বয়ম- স্বামী বিবেকানন্দ অসম যুৱ সৱলীকৰণ যোজনাৰ হিতাধিকাৰীসকললৈ ধনাদেশ প্ৰদানেৰে শিৱসাগৰ জিলাত এই আঁচনিৰ শুভাৰম্ভ কৰে।

উল্লেখযোগ্য যে, শিৱসাগৰ জিলাত এই আঁচনিৰ জৰিয়তে মুঠ ৯৩২৪ গৰাকী হিতাধিকাৰীক সামৰি লোৱা হ’ব৷ স্বামী বিবেকানন্দৰ প্ৰতিচ্ছবিত পুস্পাঞ্জলী অৰ্পণ আৰু বন্তি প্ৰজ্বলন কৰি বিত্তমন্ত্ৰী গৰাকীয়ে নৱৰূপত স্বয়ম আঁচনিৰ দুগৰাকী হিতাধিকাৰীক আনুষ্ঠানিকভাৱে ৩০,০০০ টকাৰ ধনাদেশ প্ৰদান কৰে ।

আঁচনিখনৰ শুভাৰম্ভ কৰি বিত্ত মন্ত্ৰী গৰাকীয়ে হিতাধিকাৰী সকলক অভিনন্দন জ্ঞাপন কৰে।তেওঁ কয় যে, এই আঁচনিৰ অধীনত প্ৰথম পৰ্যায়ত ৩০,০০০ টকা হিতাধিকাৰী সকলৰ বেংক একাউণ্টত প্ৰদান কৰা হ’ব আৰু পৰৱৰ্ত্তী পৰ্যায়ত ২০,০০০ কৈ টকা প্ৰদান কৰা হ’ব । তেওঁ এই পুঁজিৰ সদ ব্যৱহাৰৰ দ্বাৰা নিজকে স্বাৱলম্বী কৰাৰ লগতে আন দহ জনকো উপাৰ্জনমুখী বৃত্তিত মনোনিবেশ কৰাবলৈ হিতাধিকাৰী সকলক আহ্বান জনায় । তেওঁ কয় যে, ভৱিষ্যতে নৱ ৰূপত স্বয়ম আঁচনিৰ হিতাধিকাৰী সকলক লোকনিৰ্মাণ বিভাগৰ অধীনত নিঃশুল্ক পঞ্জীয়নভূক্ত কৰি গ্ৰামাঞ্চলত চলি থকা বিভিন্ন বিভাগৰ কাম-কাজ সমূহত জড়িত হোৱাৰ সুবিধা প্ৰদান কৰা হ’ব । ভাষণ প্ৰসঙ্গত মন্ত্ৰী গৰাকীয়ে যুৱ সমাজক উৎপাদনমুখী হৈ নিজৰ লগতে সমাজৰ উন্নয়নত অংশীদাৰ হ’বলৈ উৎসাহিত কৰে । তেওঁ যুৱ শক্তিক স্বামী বিবেকানন্দৰ আদৰ্শ সৰোগত কৰি ৰাষ্ট্ৰ নিৰ্মাণৰ হকে আগুৱাই আহিবলৈ আহ্বান জনায় । শিৱসাগৰ নাট্য মন্দিৰৰ পুণৰ নিৰ্মাণৰ বাবে ইতিমধ্যে ঘোষণা কৰা এক কোটি টকাৰ অনুদান অতিশীঘ্ৰে অনুমোদন দিয়া হ’ব বুলি মন্ত্ৰী গৰাকীয়ে সদৰি কৰে । লগতে তেওঁ ঐতিহাসিক জেৰেঙা পথাৰত ১০০ বিঘা ভূমিত জয়মতী স্মৃতি প্ৰকল্প নিৰ্মাণৰ বাবে অসম চৰকাৰে গ্ৰহণ কৰা পদক্ষেপ বিষয়ে দোহাৰে ।
অসম চৰকাৰৰ কল্যাণকামী আঁচনি সমূহৰ বিষয়ে এক অৱলোকন দাঙি ধৰি মন্ত্ৰী গৰাকীয়ে ঘোষণা কৰে যে, শিৱসাগৰ নগৰত যান-জটৰ সমস্যা সমাধানৰ বাবে এটি বাইপাচ নিৰ্মাণ কৰা হ’ব । তেওঁ উল্লেখ কৰে যে, অহা ৭ ফেব্ৰুৱাৰী তাৰিখে প্ৰধানমন্ত্ৰী নৰেন্দ্ৰ মোডীয়ে অসম মালা আঁচনিৰ অধীনত শিৱসাগৰৰ পৰা সোণাৰীলৈ চাৰি লেন যুক্ত পথ নিৰ্মাণ কাৰ্যৰ উদ্বোধন কৰাৰ সম্ভৱনা আছে।

তেওঁ নিজ ভাষণত মন্ত্ৰীগৰাকীয়ে উল্লেখ কৰে যে,ৰাজ্যৰ প্ৰায় ৮০০০ অনিয়মীয়া নিযুক্তিপ্ৰাপ্ত শিক্ষকক নিয়মীয়াকৰণ কৰি অহা ৩০ জানুৱাৰীত খানাপাৰাত নিযুক্তিপত্ৰ প্ৰদান কৰা হ’ব।
৩৩৩.১০ লাখ টকা ব্যয় সাপেক্ষে SOPD (G) আঁচনিৰ অধীনত ৩৭ নং ৰাষ্ট্ৰীয় ঘাই পথৰ ৫২৫ তম কিলোমিটাৰৰ পৰা স্বৰ্গদেউ চ্যুকাফা মাল্টিস্পেচিয়েলিটি হস্পিটাললৈ যোৱা ২ কিলো মিটাৰ দৈৰ্ঘ্য পথৰ উন্নয়নৰ কাম চলি আছে বুলি বিত্ত মন্ত্ৰী গৰাকীয়ে অৱগত কৰে।

শিৱসাগৰৰ অসম টাই যাদুঘৰক আটকধুনীয়া আৰু নৱৰূপত নিৰ্মাণৰ বাবে অসম চৰকাৰে গ্ৰহণ কৰা পদক্ষেপৰ বিষয়ে উল্লেখ কৰি মন্ত্ৰী গৰাকীয়ে কয় যে, শিৱসাগৰক অসমৰ সাংস্কৃতিক প্ৰাণকেন্দ্ৰ ৰূপে গঢ়ি তুলিবলৈ অসম চৰকাৰে যৎপৰোনাস্তি প্ৰচেষ্টা অব্যাহত ৰাখিব ।

আজিৰ অনুষ্ঠানত শিৱসাগৰ জিলাৰ উপায়ুক্ত বিষ্ণুকমল বৰাই আদৰণী ভাষণ আগবঢ়ায়।নৱ ৰূপত স্বয়ম আঁচনিৰ শুভাৰম্ভণী অনুষ্ঠানত অসম চৰকাৰৰ ৰাজহ আৰু দুৰ্যোগ ব্যৱস্থাপনা বিভাগৰ মন্ত্ৰী যোগেন মহন, ৰাজ্যসভাৰ সাংসদ কামাখ্যা প্ৰসাদ তাছা, থাওৰা সমষ্টিৰ বিধায়ক কুশল দুৱৰী, সোণাৰি সমষ্টিৰ বিধায়িকা নৱনীতা সন্দিকৈ, শিৱসাগৰ জিলাৰ জিলা উন্নয়ন আয়ুক্ত নৱাব আল আজহাৰ আলীৰ উপৰিও ভালেসংখ্যক বিশিষ্ট ব্যক্তি আৰু জিলাখনৰ বিভিন্ন অঞ্চলৰ পৰা অহা ৰাইজ উপস্থিত থাকে ।

দিল্লীৰ কৃষক প্ৰতিবাদকাৰীক তিল পিঠা, পাচলি আগবঢ়ালে অসমৰ কৃষকে

ৰাজধানী দিল্লীত চলি থকা কৃষকৰ প্ৰতিবাদত অসমৰ পৰা অংশ ল’লে কৃষকৰ এদল প্ৰতিনিধিয়ে।অসমৰ পৰা যোৱা ১৩ জনীয়া প্ৰতিনিধি দলটোৱে প্ৰতিবাদত অংশগ্ৰহণ কৰে।এই প্ৰতিনিধিৰ দলটোৰ নেতৃত্ব লৈছিল সোণেশ্বৰ নৰহে।দলটোৱে ঢোল,কাহ,ডবা বজাই ৰাভা সংগীত গাই প্ৰতিবাদ সাব্যস্ত কৰে।অসমৰ পৰা যোৱা কৃষকৰ দলটোক আদৰণি জনায় যোগেন্দ্ৰ যাদৱে।অসমৰ পৰা লৈ যোৱা তিল পিঠা, শাক পাচলি প্ৰতিনিধি দলটোৱে প্ৰতিবাদী কৃষকক অৰ্পণ কৰে।

গুৱাহাটীৰ আমিনগাঁৱত স্থাপন হ’ব ইছৰো কেন্দ্ৰ

ভাৰতীয় অন্তৰীক্ষ প্ৰতিষ্ঠান চমুকৈ ইছৰো কেন্দ্ৰ স্থাপনৰ বাবে ভূমি আৱন্টন কৰিছে অসম চৰকাৰে।জানিব পৰা মতে গুৱাহাটীৰ সমীপৱৰ্তীৰ আমিনগাঁৱত ইছৰোৰ কেন্দ্ৰ স্থাপন হ’ব।Geospatial technology ব্যৱহৃত হ’ব লগা কেন্দ্ৰটোৰ জৰিয়তে গৱেষণামূলক কাম কাজ হ’ব।উত্তৰ পূবত গৱেষক ছাত্ৰ ছাত্ৰীৰ বাবে কেন্দ্ৰটো বিশেষ ভাৱে সহায়ক হ’ব।উল্লেখযোগ্য যে এই কেন্দ্ৰটো স্থাপনৰ বাবে ২০১৭ চনৰ যো জা চলি আছিল।

পলাশবাৰীৰ উপৰহালীত মুগা সূতা কটা ৫ দিনীয়া প্ৰশিক্ষণৰ সফল সামৰণি

গুৱাহাটী খানাপাৰাস্থিত কেন্দ্ৰীয় ৰেচম বোৰ্ডৰ উদ্যোগত আৰু জ্ঞান বিজ্ঞান সমিতি কামৰূপ জিলাৰ সহযোগত পলাশবাৰীৰ উপৰহালী গাঁও পঞ্চায়তৰ সভা কক্ষত যোৱা ১৯ জানুৱাৰীৰ পৰা ২৩ জানুৱাৰীলৈ ৫ দিনীয়া সোণালিকা মেচিনৰ সহযোগত মুগা কটা প্ৰশিক্ষণ অনুষ্ঠিত হৈ যায়। জ্ঞান বিজ্ঞান সমিতি কামৰূপ জিলাৰ সভাপতি মুনীন্দ্ৰ দাসৰ তত্বাবধানত অনুষ্ঠিত প্ৰশিক্ষণৰ শিৱিৰ মুকলি কৰে উপৰহালী গাঁও পঞ্চায়তৰ সভাপতি জগদীশ ঠাকুৰীয়াই। ঠাকুৰীয়াই ভাষণ প্ৰসঙ্গত মুগা সূতা কটা প্ৰশিক্ষণৰ জড়িয়তে অঞ্চলটোৰ মহিলা-যুৱতীসকলে ব্যৱসায় কৰি স্বাৱলম্বী হোৱাৰ লগতে শিপিনীসকলে এই ব্যৱসায়ৰে অসমৰ ঐতিহ্য বজাই ৰখাত সহায়ক হ’ব বুলি মন্তব্য কৰে। প্ৰশিক্ষণত খানাপাৰাস্থিত কেন্দ্ৰীয় ৰেচম বোৰ্ডৰ সঞ্চালক তথা বৈজ্ঞানিক “ডি” চনি বিজয় কুমাৰে প্ৰশিক্ষণৰ মুখ্য অতিথি হিচাপে উপস্থিত থাকি কয় যে প্ৰশিক্ষণত অংশ গ্ৰহণ কৰা প্ৰশিক্ষাৰ্থীসকলক ৯০% ৰেহাই মূল্যত সোনালিকা মেচিন যোগান ধৰাৰ লগতে কেন্দ্ৰীয় ৰেচম বোৰ্ড বাংগালোৰ অধীনত একোখনকৈ চৰকাৰী প্ৰমাণ পত্ৰ কৰা হ’ব। ইয়াৰ উপৰিও প্ৰতিগৰাকী প্ৰশিক্ষাৰ্থীক প্ৰত্যেক দিনাই ১৫০.০০ টকা ভাট্টা লাভ কৰিব বুলি ভাষণ প্ৰসঙ্গত উল্লেখ কৰি মহিলা মুগা শিপিনীসকলে মূগা সূতা কামত ভালকৈ নিয়োজিত হৈ উন্নতিৰ পথত আগুৱাই যোৱাৰ বাবে আহ্বান জনায়। উক্ত প্ৰশিক্ষণ শিৱিৰত কেন্দ্ৰীয় ৰেচম বোৰ্ডৰ বিষয়ববীয়া অনুপ বৰ্মন উপস্থিত থাকি প্ৰশিক্ষাৰ্থীসকলৰ মাজত প্ৰাক প্ৰাথমিক মুগাৰ ওপৰত পৰীক্ষা অনুষ্ঠিত কৰাৰ লগতে মুগা কিমান বিধ, কোনবোৰ মুগাৰ আহ বেছি লগতে বজাৰ মূল্য বছৰি লাভ আদি সন্দৰ্ভত আলোকপাত কৰে। প্ৰশিক্ষণৰ মাজে মাজে উপৰহালীস্থিত অসম গ্ৰামীণ বিকাশ বেংক, প্ৰশিক্ষণ প্ৰতিষ্ঠানৰ প্ৰশিক্ষক প্ৰণৱজ্যোতি শৰ্মাই উপস্থিত থাকি জীৱন বীমা, লোন লোৱা আৰু ঋণ পৰিশোধ কৰা আদি বিষয়ত বিতংভাৱে ব্যাখ্যা কৰি বুজাই দিয়ে। প্ৰশিক্ষণত উপৰহালী গাঁও পঞ্চায়তৰ সচিব সীমান্ত বৈশ্য, সহযোগী গৌৰৱ পাঠক উপস্থিত থাকি প্ৰশিক্ষাৰ্থীসকলক উৎসাহিত কৰাৰ লগতে স্বাৱলম্বী হ’বলৈ আহ্বান জনায়। উক্ত প্ৰশিক্ষণত ২০ গৰাকী প্ৰশিক্ষাৰ্থীক প্ৰশিক্ষণ প্ৰদান কৰে কেন্দ্ৰীয় ৰেচম বোৰ্ডৰ কাৰিকৰী টেকনেচিয়ান ডিগাম্বৰ প্ৰসাদ আৰু বিজয় বৈশ্যই। প্ৰশিক্ষণৰ অন্তিম দিনা প্ৰশিক্ষাৰ্থীসকলৰ মাজৰ পৰা প্ৰতিবেদন পাঠ কৰে হেমলতা নাথ দাস, ৰুণু দাস আৰু পদুমী হীৰাই। শেষত তত্বাবধায়ক মুনীন্দ্ৰ দাসৰ শলাগৰ শৰাইৰে ৫ দিনীয়া প্ৰশিক্ষণৰ সফল সামৰণি পৰে।

শিৱসাগৰত উলহ মালহেৰে গণৰাজ্য দিৱস উদযাপন

ৰাজ্যখনৰ অন্যান্য ঠাইৰ লগতে শিৱসাগৰ জিলাতো দেশৰ ৭২ তম গণৰাজ্য দিৱস ব্যাপক উলহ-মালহেৰে আৰু বিস্তৃত কাৰ্যসূচীৰে উদযাপন কৰা হয় । জিলাৰ সদৰ শিৱসাগৰৰ ঐতিহাসিক বৰ্ডিং খেল পথাৰত আয়োজিত গণৰাজ্য দিৱসৰ মূল অনুষ্ঠানত বিশিষ্ট অতিথি হিচাপে উপস্থিত থাকি জাতীয় পতাকা উত্তোলন কৰে অসম চৰকাৰৰ ৰাজহ আৰু দুৰ্যোগ ব্যৱস্থাপনা বিভাগৰ স্বতন্ত্ৰ তথা গড়কাপ্তানী বিভাগৰ ৰাজ্যিক মন্ত্ৰী যোগেন মহনে।

নিজ ভাষণত মন্ত্ৰী গৰাকীয়ে দেশৰ শ্বহীদ, মুক্তি যোদ্ধা সকলক শ্ৰদ্ধাৰে সোঁৱৰাৰ লগতে দেশৰ সীমান্ত আৰু আভ্যন্তৰীণ সুৰক্ষাত নিয়োজিত নিৰাপত্তা বাহিনীৰ জোৱান সকলৰ সাহস আৰু ত্যাগৰ কথাও কৃতজ্ঞতাৰে স্মৰণ কৰে। স্বাধীন ভাৰতৰ সংবিধান প্ৰণেতা ডঃ ভীমৰাও ৰামজী আম্বেদকাৰৰ লগতে সংবিধান সভাৰ লগত জড়িত দেশৰ মহান নেতা সকলকো তেওঁ শ্ৰদ্ধাৰে সোঁৱৰণ কৰে । লগতে কয় যে, ৰাষ্ট্ৰৰ আত্মাস্বৰূপ এই সংবিধান আৰু গণৰাজ্য দিৱসৰ তাৎপৰ্য প্ৰকৃতাৰ্থত অনুধাৱন কৰিব পাৰিলেহে আমি ৰাষ্ট্ৰৰ একোগৰাকী সুনাগৰিক বুলি পৰিচয় দিব পাৰিম।

ভাষণৰ আৰম্ভণিতে মন্ত্ৰী গৰাকীয়ে শিৱসাগৰৰ গৌৰৱ প্ৰতিথযশা সাহিত্যিক তথা অসম সাহিত্য সভাৰ প্ৰাক্তন সভাপতি ইমৰান শ্বাহ দেৱক এইবাৰ ভাৰত চৰকাৰে পদ্মশ্ৰী সন্মানেৰে বিভূষিত কৰাটো এক অতি আনন্দৰ বতৰা বুলি উল্লেখ কৰে আৰু তেখেতক পদ্মশ্ৰী সন্মানেৰে বিভূষিত হোৱাৰ বাবে আন্তৰিক অভিনন্দন জ্ঞাপন কৰাৰ লগতে তেখেতৰ সুস্বাস্থ্য আৰু দীৰ্ঘায়ু কামনা কৰে।

নিজ বক্তব্যত মন্ত্ৰী গৰাকীয়ে ৪২ গৰাকী আহোম স্বৰ্গদেউৰ স্মৃতি যুগমীয়া কৰাৰ স্বাৰ্থত চৰাইদেউত স্বৰ্গদেউ সমন্বয় ক্ষেত্ৰ স্থাপনৰ বাবে ৰাজ্য চৰকাৰে গ্ৰহণ কৰা পদক্ষেপৰ বিষয়ে উল্লেখ কৰে। তেওঁ ৰাজ্যখনৰ লগতে ঐতিহাসিক শিৱসাগৰ জিলাক সমৃদ্ধিশালী হিচাপে গঢ়ি তোলাৰ বাবে ৰাজ্য চৰকাৰে গ্ৰহণ কৰা বিভিন্ন উন্নয়ণমূলক পদক্ষেপ সমূহৰ এক অৱলোকন ডাঙি ধৰে। ৰাজ্য চৰকাৰে দুৰ্নীতিৰ বিৰুদ্ধে শূণ্য সহনশীলতা নীতি বজাই ৰাখি জনিসাধাৰণৰ উন্নতিৰ হকে কাম কৰি গৈছে বুলিও মন্ত্ৰী গৰাকীয়ে উল্লেখ কৰে ।

তেওঁ উল্লেখ কৰে যে, ভাৰত চৰকাৰে ঐতিহাসিক শিৱসাগৰক এখন আইকনিক চাইট বুলি ঘোষণা কৰাটো জিলাবাসীৰ বাবে গৌৰৱৰ বিষয় । ইয়াৰ বাবে ৰূপহী পথাৰত এখন আইকনিক চাইঞ্চ মিউজিয়াম নিৰ্মানৰ বাবে ৰাজ্য চৰকাৰে ৫ একৰ ভূমি ইতিমধ্যে আৱণ্টন দিছে বুলিও তেওঁ সদৰি কৰে। লগতে তেওঁ কয় যে, অসম চৰকাৰে ঐতিহাসিক জেৰেঙা পথাৰৰ ১০০ বিঘা ভূমিত সতী জয়মতীৰ প্ৰতি শ্ৰদ্ধা জ্ঞাপনেৰ অৰ্থে এক স্মাৰক নিৰ্মাণ কৰিব।

২০১৬ চনৰ পৰা ২০২০ চনৰ ডিচেম্বৰ মাহলৈ ২.২৮ লাখতকৈও অধিক ভূমিহীন খিলঞ্জীয়া পৰিয়াললৈ মাটিৰ পট্টা প্ৰদান কৰি ৰাজ্য চৰকাৰে খিলঞ্জীয়া ভূমিপুত্ৰ সকলৰ অধিকাৰক সন্মান জনাইছে বুলি মত প্ৰকাশ কৰে ।

ক’ভিড-১৯ৰ প্ৰত্যাহ্বান মোকাবিলা কৰাৰ সময়ত অসম চৰকাৰে ‘অসম কেয়াৰ’ কাৰ্যসূচী আৰম্ভ কৰি ৩.৪৯ লাখ বহিঃৰাজ্যত আবদ্ধ অসমবাসীক DBT পদ্ধতিৰে দুটা কিস্তিত ৪০০০ টকাকৈ তেওঁলোকৰ বেংক একাউণ্টত জমা দিযাৰ দৰে মহৎ পদক্ষেপ গ্ৰহণ কৰিছিল বুলি ভাষণত উল্লেখ কৰে।

ভাষণ প্ৰসঙ্গত তেওঁ কয় যে, মুখ্যমন্ত্ৰীৰ বিনামূলীয়া স্বাস্থ্য পৰীক্ষা আঁচনিৰ অধীনত শিৱসাগৰ জিলাত ১লাখ ৪৩হাজাৰ ৩৩৪ টা লেবৰেটৰী পৰীক্ষা সম্পন্ন কৰা হয় । ইয়াৰ ভিতৰত ৮৭২ জন ৰোগীয়ে চিটি স্কেন আৰু ১২,৯৬৩ গৰাকী ৰোগীয়ে এক্স-ৰেৰ সুবিধা পাইছে । জিলাখনৰ চাহ বাগিছাৰ গৰ্ভাৱতী মহিলাই মজুৰী ক্ষতিপুৰণ আঁচনিৰৰ অধীনত ৪৩০৯ গৰাকী মহিলা হিতাধিকাৰী উপকৃত হয়। এই হিতাধিকাৰী সকলৰ মাজত ৩কোটি ৬২লাখ ২৬হাজাৰ ২০০ টকা প্ৰদান কৰা হৈছে বুলি তেওঁ অৱগত কৰে।

তেওঁ কয় যে, শিক্ষা খণ্ডৰ উন্নয়ণ তথা গুণগত শিক্ষাৰ প্ৰসাৰৰ বাবে ৰাজ্য চৰকাৰে জিলাখনত বহুতো কাম কৰি আহিছে । জিলাখনত প্ৰজ্ঞান ভাৰতী আঁচনিৰ অধীনত ড০ বানীকান্ত কাকতি বঁটাৰ অন্তৰ্গত ২০২০ চনৰ উচ্চতৰ মাধ্যমিক শিক্ষান্ত পৰীক্ষাত প্ৰথম বিভাগত উত্তীৰ্ণ ৯৪৮ গৰাকী ছাত্ৰীক স্কুটী প্ৰদান কৰা হৈছে । তেওঁ লগতে কয় যে, অসম চৰকাৰৰ অভিলাষী নৱ-ৰূপত স্বয়ম আঁচনিৰ অধীনত জিলাখনৰ ৯৩২৪ গৰাকী হিতাধিকাৰী লাভান্বিত হ’ব। অৰুন্ধতী স্বৰ্ণ আঁচনিৰ অধীনত বৰ্তমানলৈ জিলাখনৰ ৬০ গৰাকী হিতাধিকাৰী উপকৃত হৈছে। ৰাজ্য চৰকাৰৰ অৰুনোদয় আঁচনিৰ অধীনত জিলাখনৰ ৪টা বিধানসভা সমষ্টিৰ মুঠ ৫৮হাজাৰ ৬৪৮ গৰাকী হিতাধিকাৰী বৰ্তমানলৈ লাভান্বিত হৈছে।

আজি পুৱা ৫ বজাত জনসংযোগ বিভাগৰ দ্বাৰা শিৱসাগৰ নগৰত প্ৰভাতফেৰী আৰু অনুভাষ যন্ত্ৰযোগে দেশপ্ৰেমমূলক গীত পৰিবেশনেৰে গণৰাজ্য দিৱসৰ কাৰ্যসূচী আৰম্ভ হয় । পুৱা ৭ বজাত নিজ নিজ বাসগৃহত ৰাষ্ট্ৰীয় পতাকা উত্তোলন, ৭-৩০ বজাত শিক্ষানুষ্ঠান, চৰকাৰী, বে-চৰকাৰী, অৰ্দ্ধ চৰকাৰী কাৰ্যালয়ত ৰাষ্ট্ৰীয় পতাকা উত্তোলন কৰা হয় ।

শিৱসাগৰৰ বৰপুখুৰীৰ পাৰত অৱস্থিত আনন্দৰাম বৰুৱা উদ্যান আৰু পিয়লি ফুকন উদ্যানত শ্বহীদ তৰ্পনৰ পিছত বৰ্ডিং খেল পথাৰত আয়োজিত মূল কাৰ্যসূচীত মন্ত্ৰী গৰাকীয়ে অংশগ্ৰহণ কৰে । লগতে তেওঁ কেন্দ্ৰীয় আৰক্ষী বাহিনী, অসম আৰক্ষী, এন চি চি, স্কাউট-গাইড, গৃহৰক্ষী বাহিনী আদিৰ অভিবাদন গ্ৰহণ কৰে।

অনুষ্ঠানত বিভিন্ন বিদ্যালয় আৰু শিক্ষানুষ্ঠানৰ ছাত্ৰ-ছাত্ৰীয়ে বাৰেৰহণীয়া সাংস্কৃতিক অনুষ্ঠান পৰিবেশন কৰে।গণৰাজ্য দিৱস উপলক্ষে দুপৰীয়া ২ বজাত জিলা প্ৰশাসন আৰু শিৱসাগৰ প্ৰেছ ক্লাৱৰ মাজত এখন প্ৰীতি ক্ৰিকেট খেল অনুষ্ঠিত হয় ।

গণৰাজ্য দিৱস উদযাপন অনুষ্ঠানত প্ৰদৰ্শিত মাৰ্চপাষ্টত নিয়মীয়া শিতানত প্ৰথম স্থান দখল কৰে শিৱসাগৰ জিলা কাৰ্যবাহী বাহিনী (Sivasagar District Executive Force)-য়ে, দ্বিতীয় স্থানত থাকে চি আই এচ এফ আৰু তৃতীয় স্থান দখল কৰে অসম গৃহৰক্ষী বাহিনী (Assam Home Guards)-য়ে। আনহাতে অনিয়মীয়া (Non Regular) শিতানত প্ৰথম স্থানত থাকে একাদশ অসম ছোৱালী এন চি চি বাহিনী, দ্বিতীয় স্থানত ৪৯ নং অসম নৌবাহিনী গোট আৰু তৃতীয় স্থানত থাকে একাদশ অসম ছোৱালী এন চি চি বাহিনী (জ্যেষ্ঠ শাখা)।

প্ৰতীকপট প্ৰদৰ্শনী শিতানত প্ৰথম স্থান দখল কৰে শিৱসাগৰ পৌৰ সভা, স্বচ্ছ ভাৰত অভিযান (নগৰাঞ্চল), দ্বিতীয় স্থান জিলা স্বাস্থ্য বিভাগে আৰু তৃতীয় স্থান দখল কৰে জিলা পৰিবহন বিভাগে।