মিনি লকডাউনত ভাস্কৰ্য শিল্পত ব্যস্ত চাৰি জন ব্যক্তিয়ে কাঠৰে বনাইছে বিভিন্ন মূৰ্তি

এটি শিক্ষিত পৰিয়াল ৷ কোনোবা যদি অৱসৰপ্ৰাপ্ত শিক্ষক আন কোনোবা আন বিভাগৰ প্ৰাক্তন কৰ্মচাৰী ৷ আৰু আন কোনোবা বৰ্তমান শিক্ষক ৷ সম্বন্ধত খুৰাক,ভতিজাক তথা ভাই- ককাই ৷ ক`ৰণা মহামাৰীৰ বাবে চলি থকা মিনি লকডাউনত তেওঁলোকে শিল্পকৰ্মত ব্যস্ত হৈ সময় পাৰ কৰিছে ৷ পিতৃ আৰু ককাকৰ স্মৃতি জীয়াই ৰখাৰ বাবে তেওঁলোকে অব্যাহত ৰাখিছে নিজৰ শিল্পকৰ্ম ৷ প্ৰতিদিনে পুৱাৰ পৰা সন্ধিয়ালৈ হাতে হাতে হাতুৰি,বাতুলি,কটাৰী আদি লৈ ব্যস্ত হৈ পৰে শিল্পকৰ্মত ৷ তেওঁলোকৰ হাতৰ পৰশত প্ৰাণ পাই উঠিছে অসম গৌৰৱ এশিঙীয়া গড়,হৰিণা,হাতী,ঘঁৰিয়ালৰ লগতে বিভিন্ন চৰাই চিৰিকটি আদি ৷ পেলনীয়া কাঠ দেখিলেই তেওঁলোকে বুজি পাই কাঠটুকুৰাৰ পৰা কি হ’ব ! দক্ষিণ কামৰূপৰ পলাশবাৰী সমষ্টিৰ সাতপখলী গাঁৱৰ এটি শিক্ষিত পৰিয়ালৰ কৰ্মৰাজী এয়া । মিনি লকডাউনত তেওঁলোক ব্যস্ত হৈ পৰিছে ভাস্কৰ্য শিল্পত ৷ ক`ৰণা এই দু:সময়ত তেওঁলোকে নিজ হাতেৰে কাঠেৰে প্ৰস্তুত কৰি উলিয়াইছে এনেধৰণৰ প্ৰায় দুশটা বিভিন্ন পশু পক্ষী তথা অশোক স্তম্ভ ৷ আনহাতে পেইণ্টিং কৰি উলিয়াইছে কেইবাখনো ছবি ৷ সাতপখলী গাঁৱৰ প্ৰাক্তন শিক্ষক সুভাষ মালী,প্ৰাক্তন কৰ্মচাৰী কমল কুমাৰ মালী,দুই ভাতৃ তথা শিক্ষক প্ৰণৱ মালী আৰু ধীৰাজ মালীয়ে শিল্প কৰ্মৰে দেখুৱাইছে এক আদৰ্শ ৷ কমল কুমাৰ মালীৰ খুৰাক তথা অৱসৰপ্ৰাপ্ত শিক্ষক সুভাষ মালী আৰু সুভাষ মালীৰ দুই শিক্ষক পুত্ৰ প্ৰণৱ মালী আৰু ধীৰাজ মালীৰ লগতে অৱসৰপ্ৰাপ্ত চৰকাৰী কৰ্মচাৰী কমল কুমাৰ মালীয়ে আজি প্ৰায় তিনিমাহ ব্যস্ত হৈ আছে শিল্প কৰ্মত ৷ কমল কুমাৰ মালীয়ে জানিবলৈ দিয়া মতে তেওঁৰ ককাক প্ৰয়াত শ্যামলাল মালী এগৰাকী কাঠমিস্ত্ৰীৰ লগতে ভাস্কৰ্য শিল্পী আছিল ৷ প্ৰায় ৩০ বছৰ পূৰ্বে ককাকৰ পৰা প্ৰেৰণা পোৱা কমল মালী আৰু তেওঁৰ খুৰাক আৰু দুই ভাতৃয়ে সুদীৰ্ঘ ৩০ বছৰৰ পিচত পুনৰ আৰম্ভ কৰিছে এই ভাস্কৰ্য শিল্প ৷ আচলতে মিনি লকডাউনে তেওঁলোকক এই সুযোগ দিয়া বুলিও কয়। অৱশ্যে সময় অতিবাহিত কৰাৰ বাবে চাৰিওজনে এই শিল্পকৰ্মত ব্যস্ত হৈ পৰিছিল যদিও এতিয়া তেওঁলোকে ইয়াক এটা প্ৰকল্প হিচাপে ল’ব বুলি কয়। ইতিমধ্যে তেওঁলোকৰ ওচৰলৈ গ্ৰাহক আহি আছে যদিও মূৰ্তি সমূহত ৰং দিয়া কাম তথা সম্পূৰ্ণ নোহোৱাৰ বাবে বিক্ৰী কৰা নাই ৷ পৰৱৰ্তী সময়ত ট্ৰেড ফেয়াৰ সমূহতো এই গড়,হাতী আদি মূৰ্তি সমূহ বিক্ৰীৰ বাবে নিব বুলিও জানিবলৈ দিয়ে ৷ অনাগত দিনত তেওঁলোকে মহাভাৰতৰ যুদ্ধত অৰ্জুনে ব্যৱহাৰ কৰা ৰথখনৰ মডেল এখন বনোৱাৰে পৰিকল্পনা কৰাৰ কথাও ব্যক্ত কৰে ৷ অৱশ্যে প্ৰয়োজনীয় কাঠৰ বাবে কিছু সমস্যা হোৱা বুলিও কয় ৷ কোনো লোকে তেওঁলোকৰ ওচৰত ভাস্কৰ্য শিল্পৰ বিষয়ে শিকিব বিচাৰিলে বিনাপইচাই শিকাব বুলিও আমাক জানিবলৈ দিয়ে ৷ সাতপখলীৰ এই চাৰিগৰাকী শিক্ষিত ব্যক্তি আন দহজনৰ বাবে আদৰ্শ হওক,আমি জনালো অলেখ শুভকামনা।
বাতৰি যুগুতালে জিতুমণি দাসে..

Share on whatsapp
WhatsApp
Share on facebook
Facebook
Share on twitter
Twitter
Share on email
Email

প্ৰস্তুতি দেৱীৰ বাঁও চকু মোৰ লৰে দৃশ্য শ্ৰব্য মুকলি

সংগীত জগতত ভুমুকি মৰা নবাগতা কণ্ঠশিল্পী প্ৰস্তুতি দেৱীৰ কণ্ঠ আৰু কেশৱ নয়নৰ কথা-সুৰেৰে এটি সুমুধুৰ গীত ‘বাঁও চকু মোৰ লৰে’ আজি শুভমুক্তি হয়। ভোগালী বিহুৰ মাজতে অসমবাসীৰ মাজলৈ এই সুৰীয়া গীতটি কণ্ঠশিল্পীগৰাকীয়ে উপহাৰ দিয়ে। গীতটি আনুষ্ঠানিকভাৱে শুভমুক্তি দিয়ে বিশিষ্ট কণ্ঠশিল্পী, সংগীত পৰিচালক জে পি দাস আৰু মনীষা হাজৰিকাই। লগতে উপস্থিত থাকে চাজু আহমেদ, মানস হাজৰিকা আৰু সুনয়না। গীতটি মুকলি অনুষ্ঠানত বহুকেইগৰাকী বিশিষ্ট ব্যক্তি উপস্থিত থাকে।বেলতলাস্থিত হোটেল ৰয়েল দি কাছাত আয়োজিত এক গাম্ভীৰ্যপূৰ্ণ অনুষ্ঠানত আনুষ্ঠানিকভাৱে মুকলি কৰি কণ্ঠশিল্পী জে পি দাসে কয় যে, গীতটি অতিকে মনোমোহা হৈছে। গীতটিৰ কণ্ঠ হৃদয়স্পৰ্শী।অনাগত দিনটো প্ৰস্তুতি দেৱীয়ে এনে ধৰণৰ গীত অসমবাসী ৰাইজলৈ আগবঢ়াই যাব বুলি আশা কৰিছোঁ। তেওঁলৈ অশেষ শুভ কামনা থাকিল। অসমবাসীয়ে গীতটি আঁকোৱালি ল’ব বুলি আশা প্ৰকাশ কৰিলো।একেদৰে মনীষা হাজৰিকাই কয়, গীতটি সুৱলা হৈছে। গীতটিৰ কথা-সুৰ সুন্দৰ। গীতটি অসমবাসীয়ে আদৰি ল’ব। গীতটি সম্পৰ্কে কিছু বক্তব্য ৰাখে কণ্ঠশিল্পী প্ৰস্তুতি দেৱীয়ে।

গণৰাজ্য দিৱসত কোন মন্ত্ৰীয়ে ক`ত পতাকা উত্তোলন কৰিব

ক’ভিড প্রট’কলৰ মাজেৰে দেশৰ ৭৩ সংখ্যক গণৰাজ্য দিৱস উদযাপনৰ প্রস্তুতি চলিছে৷ মহামাৰীৰ বর্ধিত সংক্রমণৰ প্রতি লক্ষ্য ৰাখি এইবাৰৰ গণৰাজ্য দিৱস উদ্যাপনৰ পৰিসৰ কেতবোৰ ক্ষেত্রত সীমাবদ্ধ থাকিব৷ বিশেষকৈ কোনো ধৰণৰ সাংস্কৃতিক কার্যসূচী নাথাকে বুলি ইতিমধ্যে সদৰী কৰিছে স্বাস্থ্যমন্ত্রী কেশৱ মহন্তই৷ ইয়াৰ মাজতে কোন মন্ত্রী, স্বায়ত্তশাসিত পৰিষদৰ মুখ্য কার্যবাহী সদস্য, উপ–মুখ্য কার্যবাহী সদস্যই কোন জিলাত গণৰাজ্য দিৱসত ৰাষ্ট্রীয় পতাকা উত্তোলন কৰিব, সেই সন্দর্ভত মুখ্যমন্ত্রী কার্যালয়ৰ তৰফৰ পৰা এক নির্দেশনা জাৰি কৰা হৈছে৷ নির্দেশনাটোত উল্লেখ কৰা মতে মন্ত্রী ৰঞ্জিত কুমাৰ দাসে নলবাৰীত, অতুল বৰাই যোৰহাটত, উর্খাও গৌৰা ব্রহ্মই তামুলপুৰত, চন্দ্রমোহন পাটোৱাৰীয়ে গোৱালপাৰাত, পৰিমল শুক্লবৈদ্যই বঙাইগাঁৱত, কেশৱ মহন্তই ডিব্রুগড়ত, ডাঃ ৰণোজ পেগুৱে শোণিতপুৰত, অশোক সিংহলে কাছাৰত, যোগেন মহনে লখিমপুৰত, সঞ্জয় কিষাণে গোলাঘাটত, অজন্তা নেওগে নগাঁৱত, পীয়ূষ হাজৰিকাই তিনিচুকীয়াত আৰু বিমল বৰাই ধুবুৰী জিলাত ৰাষ্ট্রীয় পতাকা উত্তোলন কৰিব৷ সেইদৰে বিটিচিৰ মুখ্য কার্যবাহী সদস্য প্রমোদ বড়োৱে কোকৰাঝাৰত, উপ–মুখ্য কার্যবাহী সদস্য গোবিন্দ চন্দ্র বসুমতাৰীয়ে ওদালগুৰিত, কার্বি আংলং স্বায়ত্তশাসিত পৰিষদৰ মুখ্য কার্যবাহী সদস্য তুলিৰাম ৰংহাঙে কার্বি আংলঙত আৰু উত্তৰ কাছাৰ পার্বত্য স্বায়ত্তশাসিত পৰিষদৰ মুখ্য কার্যবাহী সদস্য দেৱলাল গার্লোছাই ডিমা হাছাও জিলাত উত্তোলন কৰিব গণৰাজ্য দিৱসৰ ৰাষ্ট্রীয় পতাকা৷

আৰ্যভট্ট বিজ্ঞান কেন্দ্ৰ ৰাণী ব্লকৰ উদ্যোগত ধাৰাপুৰ উচ্চ মাধ্যমিক বিদ্যালয়ত বিজ্ঞান ভিত্তিক প্ৰতিযোগীতা

ধাৰাপুৰ উচ্চ মাধ্যমিক বিদ্যালয়ত আজি বিজ্ঞান ভিত্তিক এখনি প্ৰতিযোগিতা অনুষ্ঠিত হয় । ধাৰাপুৰ উচ্চতৰ মাধ্যমিক আৰু পলাশবাৰী আঞ্চলিক হাইস্কুলৰ ছাত্ৰ- ছাত্ৰী সকলে বিজ্ঞানৰ আৰ্হি, আকস্মিক বক্তৃতা আৰু পষ্টাৰ লিখাৰ প্ৰতিযোগিতাত অংশ গ্ৰহন কৰে । প্ৰতিযোগিতাৰ অন্তত ধাৰাপুৰ উচ্চ মাধ্যমিক বিদ্যালয়ৰ পৰিচালনা সমিতিৰ সভাপতি তৰুন চন্দ্ৰ দাসৰ সভাপতিত্বত বটাঁ বিতৰণি সভা অনুষ্ঠিত হয় । ধাৰাপুৰ উচ্চতৰ মাধ্যমিক বিদ্যালয়ৰ অধ্যক্ষ উৎপল শৰ্মা, পশ্চিম গুৱাহাটী মহাবিদ্যালয়ৰ প্ৰৱক্তা ড°হেমন্ত কলিতা, পলাশবাৰী আঞ্চলিক হাইস্কুলৰ শিক্ষক দীনেশ শৰ্মা, খগেন মেধি, মৰমী শৰ্মা আদিয়ে প্ৰতিযোগীতা সন্দৰ্ভত বক্তব্য আগবঢ়ায় । বিজয়ী প্ৰতিযোগী সকলোৰ মাজত বঁটা আৰু মানপত্ৰ বিতৰন কৰে ।

জোনবিল মেলাত মন্ত্ৰী পীযুষ হাজৰীকা: ১৮ গৰাকী তিৱা ৰজাক ৰাজভাট্টা প্ৰদান

অসম চৰকাৰৰ তথ্য, জনসংযোগ, জলসম্পদ আৰু সংসদীয় পৰিক্ৰমা বিভাগৰ মন্ত্ৰী পীযুষ হাজৰীকাই আজি মৰিগাঁও জিলাৰ ঐতিহাসিক জোনবিল মেলাত উপস্থিত থাকি গোভা ৰজা দীপচিং দেওৰজা সহিতে ১৮ গৰাকী সন্মানীয় তিৱা ৰজাক সম্বৰ্ধনা জনোৱাৰ লগতে মুখ্যমন্ত্ৰীৰ হৈ এক লাখ টকাকৈ ৰাজভাটাৰ চেক বিতৰণ কৰে । লগতে মন্ত্ৰীগৰাকীয়ে ৫০ লাখ টকা ব্যয় সাপেক্ষে নিৰ্মাণ কৰা অতিথি আৰু সংগ্ৰহালয় গৃহৰ উন্মোচন কৰে ।

ৰাজ্য চৰকাৰৰ ক’ভিদ বিধি মানি অনুষ্টুপীয়াকৈ আয়োজিত জোনবিল মেলাত অংশ লৈ মন্ত্ৰী পীযুষ হাজৰীকাই কয় যে জোনবিল মেলা হৈছে আমাৰ তিৱা সম্প্ৰদায়ৰ গৌৰৱ আৰু আমাৰ সংস্কৃতিৰ এক অন্যতম অনুস্থান । জোনবিল মেলাৰ বিনিময় প্ৰথাৰ ঐতিহাসিক গুৰুত্বৰ কথা উল্লেখ কৰি মন্ত্ৰীগৰাকীয়ে কয় যে অসমৰ ঐতিহ্য আৰু সংস্কৃতিক কেতিয়াও উপেক্ষা কৰিব নোৱাৰো ।ৰজা জোঙাল বলহুৰ শৌৰ্য-বীৰ্যৰ কথা সোৱঁৰি মন্ত্ৰীগৰাকীয়ে কয় যে এই শৌৰ্য বীৰ্যৰ ধাৰাবাহিকতা আজিও তিৱাসকলে ৰক্ষা কৰি আহিবলৈ সক্ষম হৈছে । 

আনহাতে বিগত সময়ত তিৱা ৰজাসকলক বছৰি ৬০ হাজাৰ টকাৰ ভাট্টা দি অহাৰ বিপৰীতে এই বৰ্ষৰপৰা তেঁওলোকক বছৰি ১ লাখকৈ ৰাজভাট্টা দিয়া হৈছে বুলিও মন্ত্ৰীগৰাকীয়ে উল্লেখ কৰে।পাছবেলালৈ মন্ত্ৰীগৰাকীয়ে জাগীৰোড সমষ্টিৰ কেইবাটাও স্থানত অংগনবাদী কেন্দ্ৰৰ আধাৰশিলা স্থাপন কৰে ।

জামুগুৰিহাটত শোণিতকোঁৱৰ গজেন বৰুৱা দিৱস উদযাপন

অসমৰ সাংস্কৃতিক ক্ষেত্ৰৰ এগৰাকী নক্ষত্র স্বৰূপ,ঐতিহ্য মণ্ডিত বাৰেচহৰীয়া ভাওনা, বৰপুখুৰীপাৰৰ মুকলি বিহুক জগত সভাত পৰিচয় কৰি স্বৰ্ণ শিখৰত উপনীত কৰোতা, শোণিতকোঁৱৰ গজেন বৰুৱাৰ স্মৃতি দিৱস আজি বাৰেচহৰীয়া ভাওনা প্ৰকল্প স্থলীত চৰকাৰী নীতি-নিৰ্দেশনা অনুসৰি অনুষ্ঠুপীয়াকৈ পালন কৰা হয় । চতিয়া বিধানসভা সমষ্টিৰ বিধায়ক তথা গৰুখুঁটি প্ৰকল্পৰ অধ্যক্ষ পদ্ম হাজৰিকাক মুখ্য উপদেষ্টা আৰু বাৰেচহৰীয়া ভাওনা কমিটিৰ সভাপতি ভৱ গোস্বামীক উপদেষ্টা হিচাপে লৈ গঠন কৰা উদ্ যাপন সমিতিখনে উক্ত দিৱসটি বৰ্ণাঢ্য কাৰ্যসূচীৰে পালনৰ আয়োজন কৰিছিল যদিও ক’ভিদ পৰিস্থিতিৰ বাবে অধিকাংশ কাৰ্যসূচী বাতিল কৰি অনুষ্ঠুপীয়াকৈ পালন কৰা হয়। আজি পুৱা ৯ বজাত বাৰেচহৰীয়া ভাওনা প্ৰকল্প স্থলীৰ শ্বহীদ বেদী প্ৰসংগত থকা শোণিতকোঁৱৰ গজেন বৰুৱাৰ প্ৰতিমূৰ্তিত অঞ্চলটোৰ অনুষ্ঠানসমূহৰ বিষয়ববীয়া আৰু সীমিত সংখ্যক ৰাইজৰ উপস্থিতিত শ্ৰদ্ধাঞ্জলি অনুষ্ঠান অনুষ্ঠিত হয় আৰু সন্ধিয়া বন্তি প্ৰজ্বলনেৰে বৰ্ষটোত কাৰ্যসূচীৰ সামৰণি পৰিব। অনুষ্ঠানটোত উপস্থিত থকা সকলোৰে মাস্ক পৰিধান বাধ্যতামূলক কৰাৰ লগতে সমিতিৰ তৰফৰ পৰা চেনিটাইজাৰৰ ব্যৱস্থা কৰা হৈছে বুলিও সম্পাদকদ্বয়ে জানিয়ে দিয়ে। উল্লখযোগ্য যে ২০১৭ চনৰ পৰা অসম চৰকাৰে প্ৰতি দুবছৰৰ অন্তৰে অন্তৰে শিল্পী গৰাকীৰ নামত বঁটা প্ৰদান কৰি আহিছে ।
বাতৰি যুগুতালে জামুগুৰিহাটৰ পৰা ৰাতুল হাজৰিকাই

কামৰূপ জিলাত গণৰাজ্য দিৱস উদ্‌যাপনৰ প্ৰস্তুতি সম্পৰ্কীয় পৰ্যালোচনা সভা অনুষ্ঠিত

কোভিডৰ বৰ্দ্ধিত সংক্ৰমণৰ প্ৰতি লক্ষ্য ৰাখি সমাগত ৭৩ সংখ্যক গণৰাজ্য দিৱসটি এইবাৰ কামৰূপ জিলাত অনুষ্টুপীয়াকৈ উদ্‌যাপনৰ সিদ্ধান্ত গ্ৰহণ কৰা হৈছে৷ এই দিৱস উদ্‌যাপনৰ প্ৰস্তুতি সম্পৰ্কত পুনৰালোচনা কৰাৰ অৰ্থে আজি জিলা উন্নয়ন আয়ুক্ত নৰসিং বে’ৰ সভাপতিত্বত উপায়ুক্তৰ কাৰ্যালয় সভাকক্ষত জিলাখনৰ বিভিন্ন বিভাগৰ বিষয়াসকলৰ উপৰি আৰক্ষী প্ৰশাসন, সামৰিক আৰু অৰ্দ্ধসামৰিক বাহিনীৰ প্ৰতিনিধিসকলৰ উপস্থিতিত অনুষ্ঠিত সভাত এই সিদ্ধান্ত গ্ৰহণ কৰা হয়৷ এই অনুসৰি পূৰ্বৰ সিদ্ধান্তমতে প্ৰস্তুতি আৰম্ভ কৰা সকলো সাংস্কৃতিক আৰু অন্যান্য কাৰ্যসূচী বাতিল কৰা হয়৷

চৰকাৰী নিৰ্দেশনা অনুসৰি কোভিডৰ নীতি-নিৰ্দেশনা সম্পূৰ্ণৰূপে মানি ৰাষ্ট্ৰীয় পতাকা উত্তোলন, আৰক্ষী, সামৰিক আৰু অৰ্দ্ধসামৰিক বাহিনীৰ দ্বাৰা প্ৰদৰ্শিত কুচ-কাৱাজ আৰু মুখ্য অতিথিৰ ভাষণেৰে আগন্তুক গণৰাজ্য দিৱসটি উদ্‌যাপন কৰা হ’ব৷ উল্লেখযোগ্য যে প্ৰতিকূল পৰিস্থিতিৰ প্ৰতি লক্ষ্য ৰাখি এইবাৰৰ গণৰাজ্য দিৱস উদ্‌যাপনৰ কাৰ্যসূচীত ৬০ বছৰৰ ঊদ্ধৰ্ৰ লোকসকলৰ লগতে ১৫ বছৰৰ তলৰ শিশুসকলক উপস্থিত থাকিবলৈ উৎসাহিত কৰা হোৱা নাই৷

আজিৰ সভাত বিভিন্ন বিভাগ, সামৰিক তথা অদ্ধৰ্সামৰিক বাহিনীৰ প্ৰতিনিধিসকলৰ উপৰি কামৰূপ জিলা পৰিষদৰ মুখ্য কাৰ্যবাহী বিষয়া পৰাগ কুমাৰ কাকতি, জিলাখনৰ অতিৰিক্ত উপায়ুক্তসকল ক্ৰমে ধ্ৰুৱজ্যোতি দাস, সিদ্ধাৰ্থ গোস্বামী, প্ৰণৱ দত্ত গোস্বামী আৰু কমল বৰুৱাকে ধৰি জিলা প্ৰশাসনৰ অন্যান্য বিষয়াসকল উপস্থিত থাকে৷