স্বাস্থ্যমন্ত্ৰীয়ে আজিৰ সংবাদমেলত কি ক’লে

সমগ্ৰ ৰাজ্যতে মহামাৰী ক’ৰণা ভাইৰাছৰ ফলত ভয়াবহ অৱস্থাৰ সৃষ্টি হৈছে । ৰাজ্য চৰকাৰৰ স্বাস্থ্য বিভাগে এই সম্পৰ্কত কেনে ধৰণৰ  নতুন কাৰ্যব্যৱস্থা গ্ৰহণ কৰিছে সেই সন্দৰ্ভত  আজি ৰাষ্ট্ৰীয় স্বাস্থ্য মিছনত ৰাজ্যৰ স্বাস্থ্যমন্ত্ৰী হিমন্ত বিশ্ব শৰ্মাই  এখন সংবাদ মেল সম্বোধন কৰে।

 

আজি মন্ত্ৰী গৰাকীয়ে সম্বোধন কৰা সংবাদমেল খনত ৰাজ্যৰ কোৱাৰেণ্টাইনৰ ব্যৱস্থা সন্দৰ্ভত মত প্ৰকাশ কৰে। তেখেতে কয় যে সমগ্ৰ ৰাজ্যত আপোচবিহীন ধৰণেৰে কোৱাৰেণ্টাইন চেণ্টাৰ সমূহ গঠন কৰা হ’ব। কোৱাৰেণ্টাইনত থকা লোকসকলৰ কাৰণে ৰাজ্য চৰকাৰে প্ৰতি ব্যক্তিৰ খোৱা লোৱাৰ বাবদ দৈনিক ৫০০টকাকৈ খৰচ কৰিব  বুলি কয়। আনহাতে হোটেল সমূহত যিসকল লোকক কোৱাৰেণ্টাইনত আছে তেওঁলোকৰ কাৰণে প্ৰতিদিনে ২০০০ টকা পৰ্যন্ত ভাড়া বহন কৰিব।

 

 

 

আজিৰ সংবাদমেলৰ জৰিয়তে মন্ত্ৰী গৰাকীয়ে কয় যে ৰাজ্যৰ গ্ৰীণ জ’নৰ পৰা অহা লোকসকলৰ স্বাস্থ্য পৰীক্ষাৰ সমগ্ৰ নীতি নিয়ম সম্পন্ন কৰি কোৱাৰেণ্টাইন চেণ্টাৰৰ পৰা ঘৰলৈ যাবলৈ হ’লে উপায়ুক্তৰ অনুমতি  লোৱাটো বাধ্যতামূলক।

 

 

আনহাতে কোৱাৰেণ্টাইন চেণ্টাৰৰ পৰা ঘৰলৈ যোৱাৰ পিছত আকৌ  নিজৰ পৰিয়ালসহ আগন্তুক সাত দিনৰ বাবে হোম কোৱাৰেণ্টাইনত থাকিব লাগিব। ইয়াৰ কাৰণে ৰাজ্য চৰকাৰে বহন কৰিব দুহেজাৰ টকাকৈ। আগন্তুক সাতদিনৰ বাবে যাতে পৰিয়ালটোৰ কোনোধৰণৰ সমস্যা নহয় তথা  ঘৰখন ভালদৰে চলিব পাৰে তাৰ বাবে দুহেজাৰ টকাৰ লগতে পুনৰ অতিৰিক্ত পাঁচশ টকা প্ৰদান কৰিব চৰকাৰে।

 

আনহাতে কোৱাৰেণ্টাইনৰ সমগ্ৰ ব্যৱস্থাটো ভালদৰে হ’বলৈ প্ৰতিখন গাঁৱত এখন কমিটী গঠন কৰি দিয়া হৈছে। কালাপাহাৰৰ চিকিৎসালয়খনক গুৱাহাটী চিকিৎসা মহাবিদ্যালয়ৰ সৈতে জড়িত কৰি তাত ক’ভিড১৯ৰ ৰোগীক চিকিৎসা কৰা হ’ব। প্ৰথম পৰ্য্যায়ত চিকিৎসক সকলে সাতদিনৰ দায়িত্ব লৈ চৈধ্য দিনৰ বাবে কোৱাৰেণ্টাইন হৈ আছিল কিন্তু এতিয়াৰ পৰা তেওঁলোকে সাতদিনৰ দায়িত্ব পালন কৰি সাতদিনৰ বাবে কোৱাৰেণ্টাইনত থাকিব লাগিব।

 

 

ধনন্তৰী আঁচনিৰ অধীনত পূৰ্বতে ৭৩০৬গৰাকী লোকক ঔষধ প্ৰদান কৰিছিল ৰাজ্য চৰকাৰে। এতিয়াৰে পৰা অকণমান সলনি কৰি সেই আঁচনি খনৰ জৰিয়তে ক’ৰণাত আক্ৰান্ত সকলকহে ঔষধ প্ৰদান কৰা হ’ব।

 



অসমৰ ৮খন জিলাত এতিয়ালৈকে কোনোধৰণৰ ক’ৰণাত আক্ৰান্ত ৰোগী পোৱা নাই। কোনো এখন জিলাত দুশটা ক’ৰণাৰ কেছ পালেহে সেই অঞ্চলটো বা জিলাখনক ৰে’ড জ’ন অথবা কনটেইনমেণ্ট জ’ন হিচাপে ঘোষণা কৰিব চৰকাৰে। এতিয়ালৈকে ৰাজ্যত আক্ৰান্ত হোৱা ১৯জন আক্ৰান্তকাৰীৰ ভিতৰত বঙাইগাও, কামৰূপ মেট্ৰ’ আৰু কামৰূপ গ্ৰাম্যৰ মুঠ নটাকৈ কেছৰ ক্ষেত্ৰত কোনোধৰণৰ তথ্য জানিব পৰা নাই স্বাস্থ্যবিভাগে। উল্লেখ্য সৰ্বমুঠ আক্ৰান্তকাৰী ১৯৯গৰাকীৰ ভিতৰত ১১২জনেই বহিঃৰাজ্যৰ পৰা অহা লোক।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

ৰাষ্ট্ৰীয় একতা দিৱস উপলক্ষে শিৱসাগৰত আয়োজিত একতা পেৰেডৰ কুচকাৱাজৰ অভিবাদন গ্ৰহণ কৰিলে মুখ্যমন্ত্ৰীয়ে

মুখ্যমন্ত্ৰী সৰ্বানন্দ সোনোৱালে আজি শিৱসাগৰৰ ব’ৰ্ডিং খেলপথাৰত ৰাষ্ট্ৰীয় একতা দিৱস উপলক্ষে আয়োজিত একতা পেৰেড পৰিদৰ্শন কৰি কুচকাৱাজৰ অভিবাদন গ্ৰহণ কৰে।শিৱসাগৰ জিলা আৰক্ষীৰ উদ্যোগত আয়োজিত এই পেৰেডত মুঠ আঠটাকৈ দলে অংশগ্ৰহণ কৰে।তেওঁলোক হৈছে চি আৰ পি এফৰ ১৫৯নং বেটেলিয়ন,অ’এন জি চি,নাজিৰাস্থিত কেন্দ্ৰীয় ঔদ্যোগিক সুৰক্ষা বাহিনী,অসম আৰক্ষী প্ৰথম,তৃতীয় আৰু ২৫নং বেটেলিয়ন, শিৱসাগৰ আৰু যোৰহাট ডিষ্টিক্ত এগজিকিউটিভ ফ’ৰ্চ আৰু লিগিৰিপুখুৰী নাজিৰাস্থিত প্ৰথম অসম আৰক্ষী বেটেলিয়ন ব্ৰেণ্ড প্লাৰ্টুন দল।এই পেটেডৰ নেতৃত্ব বহন কৰে পেৰেড কমাণ্ডাৰ অনুপজ্যোতি বৰাই।

 

 

 

একতা পেৰেড উপলক্ষে আয়োজিত অনুষ্ঠানত ভাষণ প্ৰদান কৰি মুখ্যমন্ত্ৰীয়ে কয় যে স্বাধীন ভাৰতৰ প্ৰথম গৰাকী উপপ্ৰধানমন্ত্ৰী তথা গৃহমন্ত্ৰী লৌহমানৱ,ভাৰতৰত্ন চৰ্দাৰ বল্লভ ভাই পেটেলৰ এক ভাৰত শ্ৰেষ্ঠ ভাৰতৰ আদৰ্শৰে অনুপ্ৰাণিত হৈ প্ৰতিগৰাকী ভাৰতীয়ই দেশৰ একতা,অখণ্ডতা আৰু সৰ্বভৌমত্ব ৰক্ষাৰ বাবে প্ৰতিজ্ঞাবদ্ধ হ’ব লাগিব।

 

লৌহমানৱ গৰাকীয়ে স্বাধীনতা সময়ত দেশৰ সৰু সৰু ৰাজ্যবোৰ একত্ৰিত কৰি এক শক্তিশালী গণতন্ত্ৰৰ ভেটি গঢ়ি তুলিছিল।তেওঁ দেখুৱাই যোৱা পথ অনুসৰণ কৰি প্ৰধানমন্ত্ৰী নৰেন্দ্ৰ মোদীয়ে ৬ হাজাৰ বছৰীয়া ভাৰতীয় সভ্যতা,মূল্যবোধ আৰু পৰম্পৰা ভেটিৰ ওপৰত প্ৰতিষ্ঠিত এখন শক্তিশালী ভাৰতীয় সমাজ গঢ়াৰ বাবে নিৰন্তৰ কাম কৰি আহিছে। আমিও অসমৰ বুকুত শিক্ষা,সাংস্কৃতিক, ক্ৰীড়া আদি সকলো দিশতে নিপুণ তথা ৰাষ্ট্ৰভক্তি আৰু ৰাষ্ট্ৰ সেৱাত সমৰ্পিত এক প্ৰজন্ম গঢ়ি তোলাৰ লক্ষ্যৰে নিষ্ঠাৰে কাম কৰিছো। ইচ্ছা শক্তি থাকিলে সকলো সম্ভৱ বুলি মন্তব্য কৰি একতা,দৃঢ়তা,কঠোৰ পৰিশ্ৰম আদি মানৱীয় অস্ত্ৰৰে এখন আত্মনির্ভৰ অসম তথা শক্তিশালী ভাৰত নিৰ্মাণৰ বাবে আত্মনিয়োগ কৰিবলৈ সকলোকে আহ্বান জনায়।

আজি এই একতা পেৰেডৰ অনুষ্ঠানত সাংসদ তপন গগৈ,বিধায়ক কুশল দুৱৰী,আৰক্ষী উপ মহাপৰিদৰ্শক শিৱ প্ৰসাদ গাঞ্জালা ,শিৱসাগৰ জিলাৰ উপায়ুক্ত লক্ষীনন্দন গগৈ আৰু আৰক্ষী অধীক্ষক অমিতাভ সিনহাকে ধৰি জিলা প্ৰশাসন আৰু আৰক্ষীৰ শীৰ্ষ বিষয়াসকল তথা স্থানীয় ৰাইজ উপস্থিত থাকে।

সোণাৰিৰ ঔগুৰি শ্যাম গাঁৱৰ বৌদ্ধ ধৰ্মাৱলম্বী অঞ্চলত বৰ্ষাবাস প্ৰবাৰণা তিথি পালন

বৌদ্ধ ধৰ্মাৱলম্বী লোকসকলৰ অন্যতম প্ৰধান উৎসৱটো হ’ল বৰ্ষাবাস প্ৰবাৰণা তিথি। তিনিমাহ জুৰি বিভিন্ন ৰীতি নীতিৰে শাওণ মাহৰ পুৰ্ণিমাৰ তিথিৰপৰা লক্ষ্মী পুৰ্ণিমালৈকে জীৱন যাপন কৰাৰ অন্তত লক্ষ্মী পূৰ্ণিমাত সামৰণি পৰে।

 

 

উল্লেখযোগ্য যে এই তিনি মাহ বৌদ্ধ ধৰ্মাৱলম্বী লোকসকলৰ বাবে পবিত্ৰ মাহ।এই সময়ছোৱাত তেওঁ লোকে নিজৰ মিতিৰ কুটুম্বৰ ঘৰলৈ অহা যোৱা নকৰে, বিয়া-সকাম আদি নাপাতে।পৰাপক্ষত বৌদ্ধ ধৰ্মৰ মূল নীতিৰ অষ্টশীল ধাৰণ কৰি সকলোৱে উপবাসে থাকিবলৈ চেষ্টা কৰে। এই বৰ্ষাবাস প্ৰবাৰণা তিথিৰ সামৰণিত সোণাৰিৰ অসম নাগালেণ্ড,অৰুণাচল প্ৰদেশ সীমান্তৰ ঔগুৰি শ্যাম গাঁৱৰ বৌদ্ধ বিহাৰত ভিক্ষুৰপৰা আশীষ লৈ বৌদ্ধ ধৰ্মাৱলম্বী লোকসকলে আকাশ বন্তি বৌদ্ধ সকলৰ ভাষাত ফুং-ফাই উৰোৱাই অপায় অমংগল দূৰ কৰিবলৈ ভগৱানৰ ওচৰত প্ৰাৰ্থনা জনায়।

 

 

অসমৰ বিভিন্ন প্ৰান্তত থকা বৌদ্ধ ধৰ্মাৱলম্বী লোকসকলৰ লগতে চৰাইদেউ জিলাৰ ঔগুৰি শ্যাম গাওঁ, ৰহন শ্যাম গাওঁ, দিচাংপানী শ্যাম গাওঁ, চলাপথাৰ আদি বৌদ্ধ ধৰ্মাৱলম্বী বসতিপ্ৰধান অঞ্চলসমুহতো বৰ্ষাবাস প্ৰবাৰণা তিথিৰ সামৰণি পৰে। গাঁওবাসীৰ এটাই আশা যাতে এই তিথিয়ে জনসাধাৰণৰ অপায় অমংগল দূৰ কৰি এক শান্তিৰ বাতাবৰণ সমাজত প্ৰতিষ্ঠা কৰে।

খবৰ যুগুতালে সোণাৰিৰপৰা অভিজিৎ ভূঞাই

অহা ২ নৱেম্বৰৰ পৰা খুলিব বিদ্যালয় মহাবিদ্যালয় সমূহ-ৰাজ্য চৰকাৰৰ নিৰ্দেশনাত আৰু কি আছে

অহা ২ নৱেম্বৰৰ পৰা ৰাজ্যৰ বিদ্যালয়,মহাবিদ্যালয় সমূহ আৰম্ভ হ’ব। ৰাজ্য চৰকাৰে এই সম্পৰ্কে কেইটামান গুৰুত্বপূৰ্ণ নিৰ্দেশনা জাৰি কৰিছে।

 

 

ষষ্ঠ শ্ৰেণীৰ পৰা দ্বাদশ শ্ৰেণীলৈ পাঠদান আৰম্ভ হ’ব। ষষ্ঠ,অষ্টম,দশম,দ্বাদশ শ্ৰেণীৰ পাঠদান প্ৰতি সোমবাৰ,বুধবাৰ আৰু শুকুবাৰে হ’ব।এই ক্ষেত্ৰত বিদ্যালয় মুৰব্বীয়ে শ্ৰেণীৰ বেটছ নিৰ্ধাৰণ কৰিব।

 

 

সপ্তম, নৱম,আৰু একাদশ শ্ৰেণীৰ পাঠদান প্ৰতি মঙলবাৰ,বৃহস্পতিবাৰ আৰু শনিবাৰে  হ’ব। প্ৰতিটো শ্ৰেণীৰ দুটাকৈ বেটছ থাকিব লাগিব। অৱশ্যে শিক্ষাৰ্থীৰ সংখ্যা ২০ জনতকৈ কম হ’লে এটা বেটছই হ’ব।

 

 

আনহাতে পলিটেকনিক আৰু অভিযান্ত্ৰিক শিক্ষানুষ্ঠানসমূহো অহা ২ নৱেম্বৰৰ পৰা খোলা হ’ব যদিও হোষ্টেলসমূহ প্ৰথম এমাহ বন্ধ থাকিব।ইফালে এক তৃতীয়াংশ শিক্ষাৰ্থী কঢ়িয়াই বাছ চলা-চল কৰিব পাৰিব। সকলোৱে মাস্ক আৰু ছেনিটাইজ পৰিধান কৰাটো বাধ্যতামূলক।

আমেৰিকাৰ পাঠ্যক্ৰমত সন্নিবিষ্ট হ’ল অৰণ্য মানৱৰ বিষয়ে

অসমবাসীৰ বাবে সুখবৰ।অসম গৌৰৱ অৰণ্য মানৱ যাদৱ পায়েঙৰ কৰ্মৰাজি সন্নিবিষ্ট হ’ল আমেৰিকা বিদ্যালয়ৰ পাঠ্যক্ৰমত।উল্লেখযোগ্য যে আমেৰিকা বিদ্যালয়ৰ ষষ্ঠ শ্ৰেণীৰ পাঠ্যক্ৰমত অন্তৰ্ভুক্ত কৰা হৈছে।

 

 

 

অৰণ্য মানৱ গৰাকী এই স্বীকৃতিকলৈ মুখ্যমন্ত্ৰী গৰাকীয়ে এনেদৰে কয়- অৰণ্য মানৱ যাদৱ পায়েঙদেৱৰ পৰিৱেশ সচেতনতা আৰু প্ৰকৃতিৰ সৈতে থকা আত্মীয়তাই কেৱল আমাৰ দেশৰে নহয়, বিশ্বৰ বিভিন্ন প্ৰান্তৰ জনগণক উদ্বুদ্ধ কৰিছে। সুদূৰ আমেৰিকাৰ শিক্ষানুষ্ঠানৰ পাঠ্যক্ৰমত তেখেতৰ বিষয়ে অন্তৰ্ভুক্ত হোৱাটোৱে প্ৰতিফলিত কৰিছে- বিশ্বজুৰি থকা তেখেতৰ সুনামৰ কথা।

 

পায়েঙৰ এই স্বীকৃতিত অসমবাসী গৌৰৱান্বিত। তেখেতৰ কৰ্মচেতনাৰে অনুপ্ৰাণিত হৈ আমি সকলোৱে পৰিৱেশ তথা জৈৱ বৈচিত্ৰতাৰ সুৰক্ষা আৰু সংৰক্ষণৰ বাবে একেলগে কাম কৰি যাব লাগিব।

পশ্চিম গুৱাহাটীত ৰাইজৰ মাজত ক’ভিড সজাগতা সৃষ্টিৰ বাবে ১৭৫ চি আৰ পি এফৰ ১০০ দিনীয়া কাৰ্যসূচী আৰম্ভ

পশ্চিম গুৱাহাটীৰ ৰাণীস্থিত ১৭৫ চি আৰ পি এফ বেটেলিয়ানৰ উদ্যোগত ৰাইজৰ মাজত ক’ভিডৰ সজাগতা সৃষ্টিৰ বাবে ১২ অক্টোবৰৰ পৰা ১০০ দিনীয়া কাৰ্যসূচী আৰম্ভ কৰা হৈছে।১৭৫ চি আৰ পি এফৰ কমাণ্ডেণ্ট সুভাষ চন্দ্ৰ শৰ্মাৰ নেতৃত্বত আৰম্ভ হোৱা সজাগতা কাৰ্যসূচীৰ অহা বর্ষৰ ১৯ জানুৱাৰীত সামৰণি পৰিব।

 

 

আনহাতে কাৰ্যসূচীৰ লগত সংগতি ৰাখি ৰাণীকে ধৰি কাষৰীয়া অঞ্চলত বাস কৰা ৰাইজৰ মাজত ক’ভিড সজাগতা সৃষ্টিৰ বাবে মাস্ক, চেনিটাইজাৰ, চাবোন, আদি বিতৰণ কৰা হয়। তেনেদৰে চাবোনৰে হাত ধোঁৱা পদ্ধতি আৰু সামাজিক দূৰত্ব বজাই ৰখা আদিৰ বিষয়ে বুজাই দিয়া হয়। কার্যসূচীত কমাণ্ডেণ্ট সুভাষ চন্দ্ৰ শৰ্মা, চেকেণ্ড-ইন-কামাণ্ড কে.এল.ধীমান, পৰিদৰ্শক দেশবীৰ সিং, উপ-পৰিদৰ্শক দিলীপ কুমাৰ তিৱাৰী, সহ: উপ-পৰিদৰ্শক বি.কে.স্বামীকে ধৰি বাহিনীটোৰ আন বিষয়া জোৱান সকলে ভাগ লয়।

অভিশপ্ত ৩০অক্টোবৰৰ নিহত সকলক সুঁৱৰি অনুষ্ঠিত হ’ল শ্ৰদ্ধাঞ্জলি অনুষ্ঠান

আজি ৩০ অক্টোবৰ। আজি দিনটোতে ধাৰাবাহিক বোমা বিস্ফোৰণত কপি উঠিছিল অসমৰ বিভিন্ন প্ৰান্ত। বহু নিৰিহ লোকে এই ধাৰাবাহিক বোমা বিস্ফোৰণত প্ৰান হেৰুৱালে। চিৰদিনৰ বাবে ঘুনীয়া হ’ল বহু জন।

 

 

এই অভিশপ্ত ৩০ অক্টোবৰ নিহত সকলক সুঁৱৰি আজি গণেশগুৰিত অনুষ্ঠিত হয় শ্ৰদ্ধাঞ্জলি অনুষ্ঠান। উল্লেখযোগ্য যে প্ৰতিবছৰে নিহত সকলক সুঁৱৰি শ্ৰদ্ধাঞ্জলিৰ অনুষ্ঠান অনুষ্ঠিত হৈ আহিছে ।এইবাৰ অনুষ্ঠানত নিহত সকলৰ আত্মীয় উপস্থিত থাকে।

 

এই অনুষ্ঠানত উপস্থিত থাকি মন্ত্ৰী সিদ্ধাৰ্থ ভট্টাচাৰ্যই এনেদৰে কয় । আজি শ্ৰদ্ধাঞ্জলি অনুষ্ঠানত সৰ্বধর্মীয় প্ৰাৰ্থনা সভাৰ লগতে বিভিন্নজনে বক্তব্য ৰাখে। আজি অনুষ্ঠানত উপস্থিত থাকে বিধায়ক অতুল বৰা, মন্ত্ৰী সিদ্ধাৰ্থ ভট্টাচাৰ্য, কামৰূপ জিলা উপায়ুক্ত বিশ্বজিৎ পেগু, মেডিয়া উপদেষ্টা হৃষীকেশ গোস্বামীকে আদি কৰি বহু কেইজন বিশিষ্ট ব্যক্তি।