২০ জানুৱাৰীৰ পৰা ৰাষ্ট্ৰীয় শিশু নাট সমাৰোহ

গুৱাহাটী শিশু নাট্য বিদ্যালয়ৰ অষ্টম বাৰ্ষিক ৰাষ্ট্ৰীয় শিশু নাট সমাৰোহখনি অহা ২০ জানুৱাৰীৰ পৰা ২৩ জানুৱাৰীলৈ ৰবীন্দ্ৰ ভৱনত অনুষ্ঠিত হ’ব।আজি গুৱাহাটী প্ৰেছ ক্লাৱত অনুষ্ঠিত হোৱা এক সংবাদমেল যোগে এই কথা ঘোষণা কৰে শিশু নাট্য বিদ্যালয়ৰ পৰিচালনা সমিতিৰ সাধাৰণ সম্পাদক মাণিক ৰয়,সভাপতি দিলীপ কুমাৰ বৰা,নাট সমাৰোহখনৰ মুখ্য উপদেষ্টা ড০ হিতেশ ডেকা আৰু সভাপতি ডাঃ হিতেশ বৰুৱাই।উল্লেখ্য যে অসম সাংস্কৃতিক সঞ্চালকালয়,অইল ইণ্ডিয়া লিমিটেড আৰু সংগীত নাটক একাডেমীৰ সহযোগত অনুষ্ঠিত হ’বলগীয়া এই নাট্য সমাৰোহখনি উদ্বোধন কৰিব সাংস্কৃতিক মন্ত্রী নৱ কুমাৰ দলেই।এই সমাৰোহখনিত আৰম্ভণিৰ নাট হিচাপে পৰিবেশিত হ’ব মুম্বাইৰ ষ্টৰি চাৰ্কাছ গোষ্ঠীৰ উল্কা ময়ূৰ ৰচিত পৰিচালিত হিন্দী আৰু ইংৰাজী ভাষাৰ নাটক টিক টক টেলচ।উল্লেখযোগ্য যে এই শিশু নাট সমাৰোহত মুম্বাই,দিল্লী,কেৰেলা,ভূপালৰ লগতে অসমৰ দৰং,গোৱালপাৰাৰ মুঠ ৯ টা নাট্য দলৰ শিশু নাটক পৰিবেশিত হ’ব।লগতে শিশু নাট সমাৰোহখনিৰ অংকুৰ শীর্ষক এখনি মুখপত্র উন্মোচিত হ’ব।সংবাদমেলখনত নাট সমাৰোহৰ উপদেষ্টা বন্দিতা ফুকন আৰু জিতেন শৰ্মা উপস্থিত থাকে।