অসম সাহিত্য সভাৰ পূৰ্ণাংগ অধিবেশন আৰম্ভ

আজিৰে পৰা আনুষ্ঠানিকভাৱে আৰম্ভ হ’ল অসম সাহিত্য সভাৰ পঞ্চসপ্ততিতম পূৰ্ণাংগ তথা দ্বি বাৰ্ষিক অধিবেশন।এইবাৰৰ অধিৱেশনখনি বস্ত্ৰ নগৰী শুৱালকুছিৰ জ্যোতি ক্ষেত্রত ৩০ জানুৱাৰীৰ পৰা ৪ ফেব্ৰুৱাৰীলৈ অনুষ্ঠিত কৰা হৈছে। আজিৰ আৰম্ভণিৰ কাৰ্যসূচী মে ডাম মে ফি অনুষ্ঠানত টাই আহোম সাহিত্য সভাৰ সভাপতি দয়ানন্দ বুঢ়াগোহাঁই মুখ্য অতিথি হিচাপে উপস্থিত থাকে।তাৰ পাছতে ডবা,কাঁহ,উৰুলি মঙ্গল বাদ্যৰে মূল তোৰণ আৰু মূল মঞ্চ ক্ষেত্র,মূল মঞ্চ উদঘাটন পৰ্ব সম্পন্ন হয়।উদঘাটন পৰ্বৰ সভাত সভাপতিত্ব কৰে ড০ পৰমানন্দ ৰাজবংশীয়ে।পৰবৰ্তী কাৰ্যসূচী অনুযায়ী ভাৰতৰত্ন ড০ ভূপেন হাজৰিকা মঞ্চত বিহগী কবি ৰঘুনাথ চৌধুৰী কবি সন্মিলন অনুষ্ঠিত হয়।বিশিষ্ট লেখিকা ড০ লিলি ৰাজবংশীয়ে উদ্বোধন কৰা এই সন্মিলনত শুৱালকুছি অঞ্চলৰ লগতে কামৰূপ আৰু কামৰূপ মহানগৰ জিলাৰ মুঠ ৫০ গৰাকী কবিয়ে অংশগ্রহণ কৰে।ইয়াৰোপৰি ড০ পৰমানন্দ ৰাজবংশীৰ সভাপতিত্বত আনন্দৰাম বৰুৱা মূল মঞ্চত আনন্দৰাম সোঁৱৰণী স্মৃতিগ্ৰন্থ আৰু অন্যান্য গ্ৰন্থ উন্মোচিত হয়।সন্ধিয়ালৈ অনুষ্ঠিত হয় সাংস্কৃতিক অনুষ্ঠান।১ ফেব্ৰুৱাৰীৰ অনুষ্ঠানত অস্থায়ী নামঘৰ উদ্বোধন কৰাৰ লগতে ভাওনা প্ৰদৰ্শিত হ’ব।তাৰ পাছতে চিৰ চেনেহী মোৰ ভাষা জননী শীৰ্ষক গীতেৰে আৰম্ভণি হ’ব উপেন্দ্র চন্দ্র লেখাৰু সোঁৱৰণি অসম সাহিত্য সভাৰ অষ্টম পূর্ণাঙ্গ কাৰ্যনিৰ্বাহক সভা।সমান্তৰালকৈ নলিনীবালা দেৱী সোঁৱৰণি নাৰী সন্মিলন আকাশত সভাপতিৰ বিশেষ নাৰী সন্মান ৰেখা বৰুৱাক প্ৰদান কৰিব।তাৰোপৰি ৭০ গৰাকী বিশিষ্টা নাৰীক সম্বৰ্দ্ধনা জনাব।ইয়াৰ লগতে দিনযোৰা কাৰ্যসূচীত শিশু সাহিত্য বঁটা প্ৰদান অনুষ্ঠান,ৰামধেনু অনুষ্ঠান,যুৱ সংসদৰ বিশেষ অনুষ্ঠান,কবি সন্মিলন,কাব্যানুষ্ঠান,প্ৰতিনিধি সভাৰ উপৰিও গল্পকাৰ,নাট্যকাৰ সন্মিলন অনুষ্ঠিত হ’ব।সন্ধিয়াৰ ভাগত অনুষ্ঠিত হ’ব শিল্পী সম্বৰ্দ্ধনা আৰু জনপ্রিয় শিল্পীৰ গীতৰ শৰাই।২ ফেব্ৰুৱাৰীত অসম সাহিত্য সভাৰ পতাকা উত্তোলন অনুষ্ঠান অনুষ্ঠিত হ’ব।য’ত সাহিত্য সভাৰ মূল পতাকাৰ লগতে ভিন্ন সংগঠনৰ মুঠ ১৭৭ খন পতাকা উত্তোলন কৰিব বিভিন্ন শাখাৰ ১০২ গৰাকী বৰেণ্য ব্যক্তিয়ে।তাৰ পাছতে আই তোক কিহেৰে পূজিমে শীর্ষক অনুষ্ঠানত অসমৰ জাতীয় আন্দোলনৰ শ্বহীদসকললৈ শ্ৰদ্ধাঞ্জলি জ্ঞাপন কৰিব।দিনটোৰ কাৰ্যসূচীত স্মৃতি তৰ্পণ,সুশীল শৰ্মা কবি সন্মিলন,জ্যোতি বিষ্ণু ভূপেন্দ্র সোঁৱৰণি সাংস্কৃতিক শোভাযাত্রা,অসম সাহিত্য সভাৰ বিভিন্ন বঁটা আৰু সন্মান প্ৰদান অনুষ্ঠান,সাহিত্যাচাৰ্য চৈয়দ আব্দুল মালিক সোঁৱৰণি প্রথম মুকলি অধিৱেশন,বহুভাষিক কবি সন্মিলন আৰু ড০ ভূপেন হাজৰিকালৈ শ্ৰদ্ধাৰ্ঘ্য নিবেদি আমি একেখন নাৱৰে যাত্রী অনুষ্ঠান অনুষ্ঠিত কৰিব।সন্ধিয়ালৈ ১০০ গৰাকী শিল্পীক সম্বৰ্দ্ধনা জনোৱাৰ লগতে গীতৰ শৰাই অনুষ্ঠান অনুষ্ঠিত হ’ব।৩ তাৰিখৰ কাৰ্যসূচীত কবি সন্মিলনৰ লগতে ৰাষ্ট্ৰীয় সাহিত্য বঁটা প্ৰদান অনুষ্ঠান,ঔপন্যাসিক সন্মিলন,ভাষাবিদ সন্মিলন,গীতিকাৰ সন্মিলন আৰু সাংস্কৃতিক অনুষ্ঠান অনুষ্ঠিত হ’ব।শেষৰদিনা বুৰঞ্জী সন্মিলন,যুৱ সতীৰ্থ সন্মিলন,বঁটা প্ৰদান অনুষ্ঠান,বিজ্ঞান সাহিত্য সন্মিলন আৰু দিপালী বৰঠাকুৰ সাংস্কৃতিক অনুষ্ঠানত জুবিন গাৰ্গৰ সঙ্গীতানুষ্ঠানেৰে অসম সাহিত্য সভাৰ পঞ্চসপ্ততিতম অধিৱেশনখনিৰ সামৰণি পৰিব।অসম সাহিত্য সভাৰ হৈ আদৰণি সমিতিৰ সাধাৰণ সম্পাদক অনিল চন্দ্র বৈশ্য আৰু প্ৰধান সম্পাদক পদুম ৰাজখোৱাই সকলোকে সভালৈ আদৰণি জনাইছে।বিশেষ তথ্যৰ বাবে উদ্যোক্তা সকলে ৯১০১০১৪১৭৭ নম্বৰত যোগাযোগ কৰিবলৈ দিছে।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

নামৰূপৰ সাৰ কাৰখানালৈ আহিছে ভাল খবৰ

নামৰূপ কাৰখানাৰ বাবে আছে ভাল খবৰ। নামৰূপ সাৰ কাৰখানাৰ চতুর্থ গোটৰ স্থাপন হোৱাৰ সপোন এতিয়া সাৰ্থক হোৱাৰ দিশে আগবাঢ়িছে।আজি কেন্দ্ৰীয় সাৰ আৰু ৰসায়ন বিভাগৰ মন্ত্ৰী সদানন্দ গৌড়াৰে হোৱা এক আলোচনাত উপস্থিত থকাৰ পিছতে কাৰখানাটোৰ চতুৰ্থটো গোট স্থাপনৰ ক্ষেত্ৰত সম্ভাৱনা ব্যক্ত কৰিছে বিত্তমন্ত্ৰী ড০ হিমন্ত বিশ্ব শৰ্মাই। মন্ত্ৰী ড০ শৰ্মাই জনাই যে চতুৰ্থটো গোটক লৈ থকা জটিলতা আঁতৰাবলৈ অসম চৰকাৰে বিনিয়োগৰ পৰিমাণ পূৰ্বৰ ১১ শতাংশৰ পৰিৱৰ্তে ২৬ শতাংশলৈ বৃদ্ধি কৰাৰ প্ৰস্তাৱ দিছে।

লগতে বিত্তমন্ত্ৰী গৰাকীয়ে কয় যে কেন্দ্ৰীয় চৰকাৰে এই সম্পৰ্কত সেউজ সংকেত দিব।উল্লেখযোগ্য যে ১৯৬৯ চনৰ পৰা আৰম্ভ হোৱা কাৰখানাটোৰ ২য় আৰু ৩য় গোটৰ কাম অতি দুৰ্বলভাৱে চলি থকাৰ পিছত ৪ৰ্থটো গোট মুকলি কৰাৰ বাবে চেষ্টা চলাই থকা হৈছিল যদিও ই কাৰ্যতঃ হৈ উঠা নাছিল। কিন্তু আজি বৈঠকত বিত্তমন্ত্ৰী গৰাকীয়ে চতুৰ্থটো গোট স্থাপনৰ স্থাপনৰ সম্ভাৱনাৰ থকা কথা সদৰি কৰে।

গাহৰি পালকৰ সমস্যাক গুৰুত্ব দিয়ক

অসমৰ গাহৰি পালক সকলে দীৰ্ঘদিন ধৰি সন্মুখীন হৈ থকা সমস্যাৰ সমাধানৰ বাবে চৰকাৰ তথা বিভাগীয় কৰ্তৃপক্ষক দৃষ্টিগোচৰ কৰাৰ অৰ্থে কালি এখনি সংবাদমেল অনুষ্ঠিত কৰে।গুৱাহাটী প্ৰেছ ক্লাৱত অনুষ্ঠিত হোৱা সংবাদ মেলখনত উত্তৰ পূব প্ৰগতিশীল গাহৰি পালক সন্থাৰ সম্পাদকে কয় যে লকডাউনৰ বাবে গাহৰি পালক সকলে লকডাউনৰ পিছত গাহৰিৰ বাবে পয্যাপ্ত সামগ্ৰী যোগানৰ ক্ষেত্ৰত বিভিন্ন সমস্যাৰ সন্মুখীন হোৱাৰ লগতে উপাৰ্জনহীনতাত ভূগিছে।ইয়াৰ উপৰিও আফ্ৰিকান ছোৱাইন ফ্লুৱে যথেষ্ট প্ৰভাৱ পেলাইছে।সেয়েহে বিভাগীয় কৰ্তৃপক্ষক গাহৰি পালনৰ ক্ষেত্ৰত সুস্থ পৰিৱেশ গঢ়ি দিবলৈ সংবাদমেলৰ যোগে আহ্বান জনাইছে।

জন্মদিনত অনুৰাগীয়ে লিখিলে সুশান্ত তুমি য’তেই আছা, শান্তিত থাকা

আজি জনপ্ৰিয় অভিনেতা সুশান্ত সিং ৰাজপুতৰ ৩৫ সংখ্যক জন্ম বাৰ্ষিকী।অভিনেতা গৰাকী জন্ম দিনৰ লগত সংগতি ৰাখি ছ’চিয়েল মেডিয়াত হাজাৰ হাজাৰ অনুৰাগীয়ে শুভেচ্ছা জ্ঞাপন কৰি পোষ্ট শ্বেয়াৰ কৰিছে।কোনোৱে ৰাজপুতৰ দৰ্শন, আৰ্দশক সুঁৱৰি অভিনেতা গৰাকী শুভেচ্ছা যাঁচিছে।কোনোৱে অভিনেতা গৰাকীৰ ন্যায়ৰ বাবে এই বিশেষ দিনটোত ঈশ্বৰক প্ৰাৰ্থনা জনাইছে।

ইতিমধ্যে ছ’চিয়েল মেডিয়া ফেচবুকত এটা টেণ্ড আৰম্ভ হৈছে। উল্লেখযোগ্য যে বিগত বৰ্ষৰ ১৪ জুনত অভিনেতা গৰাকীক মুম্বাইত নিজা ফ্লেটত মৃত অৱস্থাত পোৱা গৈছিল ।পৰৱৰ্তী সময়ত অভিনেতা গৰাকীৰ মৃত্যু তদন্ত কৰিবলৈ চি বি আই, এ চি বি আৰু ইউ ডি সক্ৰিয় হৈ পৰিছিল।জনপ্ৰিয় অভিনেতা গৰাকীৰ আজি এই বিশেষ দিনটোত এন ই ফ’কাচ ডট কমৰ পৰিয়ালে শ্ৰদ্ধাৰে স্মৰণ কৰিছোঁ।

ৰবীন্দ্ৰ ভৱনত পৰিবেশিত হ’ল মোক্ষ

ৰবীন্দ্ৰভৱনত আজি সন্ধিয়া ৬ বজাত অসম চৰকাৰৰ সাংস্কৃতিক সঞ্চালকালয়ৰ উদ্যোগত তথা বৰ্তমানৰ সঞ্চালক যাদৱ শইকীয়াৰ নেতৃত্বত,গুৱাহাটীৰ “দৰ্পণ ডান্স অকাডেমী” আৰু সংগীত সত্ৰৰ সহযোগত যোৱা বৰ্ষত মহাপ্ৰয়াণ ঘটা পদ্মশ্ৰী ,সংগীত নাটক অকাডেমী বঁটা প্ৰাপক ভাৰতৰ এগৰাকী যশস্বী নৃত্যবিশাৰদ, সমালোচক কোঠাৰীৰ স্মৃতিত “মোক্ষ” শীৰ্ষক ভাৰতীয় ধ্ৰুপদী নৃত্যৰ এক অনুষ্ঠান পৰিৱেশিত হয়৷এই অনুষ্ঠানটিত নৃত্যাচাৰ্য পদ্মশ্ৰী যতীন গোস্বামী,অসম চৰকাৰৰ সাংস্কৃতিক বিভাগৰ অৱসৰপ্ৰাপ্ত উচ্চপদস্থ বিষয়া স্বপ্ননীল বৰুৱা,আই এ এছ বিষয়া তথা সাংস্কৃতিক ব্যক্তিত্ব মাধুৰীমা বৰুৱা,প্ৰখ্যাত মূকাভিনয় শিল্পী মইনুল হক,গুৱাহাটী বিশ্ববিদ্যালয়ৰ ছাত্ৰ কল্যাণৰ সঞ্চালক ড° ৰঞ্জন কাকতি,গুৱাহাটী বিশ্ববিদ্যালয়ৰ ভাইচ চেঞ্চেলৰ মৃণালজ্যোতি ডেকা বিশিষ্ট অতিথি হিচাপে উপস্থিত থাকে৷এইসকল বিশিষ্ট ব্যক্তিক অনুষ্ঠানটিত সম্বৰ্ধনা জনোৱাৰ লগতে প্ৰয়াত সুনীল কোঠাৰীৰ বিষয়ে কিছু কথাও শ্ৰদ্ধাৰে স্মৰণ কৰা হয়৷বন্তি প্ৰজ্বলনৰে আৰম্ভ হোৱা ‘মোক্ষ’ শীৰ্ষক নৃত্য সন্ধিয়াটিত অৰুণাভজ্যোতি মালাকাৰৰ “খোল বাদন”,স্বনামধন্য নৃত্যশিল্পী অনিতা শৰ্মাৰ “গুৰু বন্দনাৰে সৈতে সত্ৰীয়া নৃত্য”,যশস্বী নৃত্যগুৰু বিপুল দাসৰ “কথক নৃত্য”,খ্যাতনমা নৃত্যশিল্পী তথা প্ৰৱক্তা ড° অঞ্জনাময়ী শইকীয়াৰ “ওডিচি নৃত্য” পৰিবেশনৰ লগতে গুৱাহাটীৰ সংগীত সত্ৰৰ শিল্পীসকলে ‘একলব্য’ আৰু আন এক সত্ৰীয়া নৃত্য প্ৰদৰ্শন কৰে৷

আজি আনুষ্ঠানিক ভাৱে মুকলি হ’ল উদ্যান শস্য মেলা

বৃহস্পতিবাৰৰ পৰা বোকাখাতত তিনিদিনীয়াকৈ অনুষ্ঠিত হ’ল আন্তঃৰাষ্ট্ৰীয় ভাৰ্চুৱেল পদ্ধতিৰে ৰাষ্ট্ৰীয় কৃষি আৰু উদ্যান শস্য মেলা ৷ মুখ্যমন্ত্ৰী সৰ্বানন্দ সোণোৱালে মেলাখন আনুষ্ঠানিকভাৱে মুকলি কৰাৰ কথা আছিল যদিও প্ৰতিকুল বতৰৰ বাবে উপস্থিত থাকিব নোৱাৰি ভাৰ্চুৱেল পদ্ধতিৰে অংশ গ্ৰহণ কৰে ৷ তাৰোপৰি মেলাখনত কেন্দ্ৰীয় কৃষিমন্ত্ৰী নৰেন্দ্ৰ সিং টোমাৰেও ভৰ্চুৱেল পদ্ধতিৰে অংশ গ্ৰহণ কৰে ৷ প্ৰায় দুঘন্টা পলমকৈ আৰম্ভ হোৱা উদ্বোধনী অনুষ্ঠানৰ কৃষিমন্ত্ৰী অতুল বৰাই আদৰণি ভাষণ প্ৰদান কৰাৰ সময়তে ভৰ্তি হৈ থকা মণ্ডপ খালী হৈ পৰা দেখা গ’ল ৷ অনুষ্ঠানত ১২ দেশৰ ৰাষ্টদূত আৰু উচ্চায়ুক্তই অংশ গ্ৰহণ কৰে ৷ এই বৃহৎ মেলাত ৰাজ্যখনৰ ৩৩ খন জিলাৰ ১৮৩ খন বিপনীয়ে অংশ গ্ৰহণ কৰিছে ৷ অৱশ্যে চিপচিপিয়া বৰষুণৰ বাবে উৎসাহ সীমিত হোৱা পৰিলক্ষিত হয় ৷ ৰাজ্যৰ ৫ শ কৃষকে প্ৰতিদিনে প্ৰশিক্ষণ লোৱাৰ লগতে গোলাঘাট জিলাৰ ৬ শ কৃষকে প্ৰতিদিনে প্ৰশিক্ষণ ল’ব ৷ প্ৰতি সন্ধ্যা ৰাজ্যৰ প্ৰতিস্থিত শিল্পীয়ে সাংস্কৃতিক কাৰ্যসূচী পৰিৱেশন কৰিব ৷ আজি প্ৰথম নিশা বিপিন চাওদাং, কল্পনা পাটোৱাৰী, সোমনাথ বৰা আৰু বিমান বৰুৱাৰ লগতে স্থানীয় শিল্পীৰ সাংস্কৃতিক অনুষ্ঠান অনুষ্ঠিত হ’ব ৷

খবৰ যুগুতালে বোকাখাতৰ পৰা দিব্যজ্যোতি হাজৰিকাই..

কুমাৰ ইঞ্জিনিয়াৰিঙৰ উদ্যোগত ধাৰাপুৰত নিৰ্মাণ হৈছে থলুৱা প্ৰযুক্তিৰে নিৰ্মিত ৰিক্সা

ৰাজ্যত প্রথমবাৰৰ বাবে থলুৱা প্ৰযুক্তিৰে কম মূল্যত কৃষকৰ সুবিধাৰ বাবে ইন্ধন ৰাহিকাৰক ডিজেল আৰু পেট্ৰলচালিত পাৱাৰ টিলাৰ নিৰ্মাণ কৰি সকলোৰে সমাদৰ লাভ কৰাৰ পাছত কুমাৰ ইঞ্জিনীয়াৰিং নামৰ প্ৰতিষ্ঠানটোৱে ইয়াৰ গুৱাহাটীৰ ধাৰাপুৰ নতুন বস্তিত থকা কাৰখানাত পৰিবেশ অনুকূল ই- ৰিক্সাৰ নিৰ্মাণ তথা উৎপাদন আৰম্ভ কৰিছে । ইতিমধ্যে ভোগালী বিহুৰ সময়ত থলুৱা প্ৰযুক্তিৰে নিৰ্মাণ কৰা ই-ৰিক্সাৰ পৰীক্ষামূলক চালনা আৰু প্ৰদৰ্শনীৰ ব্যৱস্থা কৰা হৈছিল। গুৱাহাটী মহানগৰ আৰক্ষীৰ যুটীয়া আৰক্ষী আয়ুক্ত পাৰ্থসাৰথি মহন্তই পৰীক্ষামূলক প্ৰদৰ্শনীৰ শুভাৰম্ভ কৰিছিল । এই সন্দৰ্ভত কুমাৰ ইঞ্জিনিয়াৰিঙৰ অধ্যক্ষ আৰু উদ্যমী ব্যক্তি কুমাৰ গৌৰৱে জানিবলৈ দিয়া মতে তেওঁলোকৰ ধাৰাপুৰ নতুন বস্তিত থকা উদ্যোগত “মেক ইন ইণ্ডিয়া” কাৰ্যসূচীৰ আধাৰত এটি অভিযন্তা আৰু বিশেষজ্ঞৰ দলে প্ৰায় তিনিমাহ যোৰা প্ৰচেষ্টাৰ অন্তত এই “৮৮৮-ই ” নামৰ ই-ৰিক্সাৰ উৎপাদন কৰিবলৈ সক্ষম হৈছে । সকলো ঠিকে ঠাকে থাকিলে অহা ফেব্ৰুৱাৰী মাহৰ প্ৰথম সপ্তাহত বাণিজ্যিক ভিত্তিত এই “৮৮৮ ই ” মডেলৰ ই ৰিক্সাৰ মুকলি কৰিব পৰা হব । জালুকবাৰীৰ গুৱাহাটী বিশ্ববিদ্যালয়ৰ বাইপাছত থকা কুমাৰ ইঞ্জিনিয়াৰিঙৰ কাৰ্যালয়ত এই ৰিক্সা সমূহ ৰখা হৈছে । চালকসহ ৫ জন প্ৰাপ্তবয়স্ক লোক বহি যাব পৰা ই ৰিক্সা সমূহত বিশ্বমানৰ কাৰিকৰী কৌশল আৰু প্ৰযুক্তিবিদ্যাৰ প্ৰয়োগ কৰা হৈছে । প্ৰথম পৰ্যায়ত ৰঙা আৰু নীলা দুটা ৰঙত উপলব্ধ হবলগীয়া ই ৰিক্সাৰ সমুহৰ বডীত অতি উন্নতমানৰ এম এছ ছিট আৰু চকাত এলয় হুইল ব্যৱহাৰ কৰা হৈছে । তেনেদৰে যাত্ৰীৰ মনোৰঞ্জনৰ বাবে ৰিক্সাৰ মিউজিক ছিষ্টেম সংযোজন কৰা হৈছে । এবাৰ চার্জ দিলে যিকোনো পথত প্ৰায় ৮০ কিঃমিঃ দূৰত্বলৈ যাত্ৰা কৰিব পৰা এই ই ৰিক্সাৰ মূল্য মাত্ৰ ১.৪৬ লাখ টকাৰ ভিতৰত ৰখা হৈছে । অতি আৰামদায়ক যাত্ৰাৰ উদ্দেশ্যৰ বাবে বডীত জিন্দাল ষ্টীল ব্যৱহাৰ কৰা হৈছে । ইতিমধ্যে ভাৰত চৰকাৰৰ লঘু আৰু ক্ষুদ্র উদ্যমিতা বিভাগ চমুকৈ এম এছ এম ই য়ে কুমাৰ ইঞ্জিনীয়াৰিঙক এই ই-ৰিক্সাৰ উৎপাদনৰ বাবে প্ৰমাণ পত্ৰ দিছে বুলি কুমাৰ গৌৰৱে জানিবলৈ দিছে । প্ৰায় ৩০ জনৰো অধিক থলুৱা আৰু দক্ষ শ্ৰমিক ই-ৰিক্সাৰ নিৰ্মাণ কাৰ্যত জড়িত হৈ আছে । ফেব্ৰুৱাৰী মাহৰ পৰা মাহেকত ১,২০০ ইউনিট উৎপাদন তথা নিৰ্মাণৰ লক্ষ্য নিৰ্ধাৰণ কৰা হৈছে।